整到手軟0既薑餅人

學識咗整餅, 今年試吓自己整薑餅人.

食譜同製作過程就遲D先出啦, 而家比D製成品大家睇吓先~

因為係第一次整, 靚就唔係好靚架啦, 味道亦都唔係好好食, 但叫做小小心意啦~ 收到既朋友快D食, 我無落防腐劑, D餅唔擺得耐架, 哈哈~

流沙包呢期睇三國睇到上腦, 佢話我地而家有十萬大軍:

D餅出咗爐攤凍之後仲要寫字同畫公仔, 好在有個臨時工幫手:

我本來想全部薑餅人都寫晒人名架, 但我寫字技術好差, D字寫得勁核突, 所以寫咗部份人名就放棄咗啦. 留番比學過西洋書法既流沙包佢自由發揮.

嗱, 12月gathering無出席既朋友, 我有整你地果份架, 有相為証:

Pipi負責監督:

小花都有份架, Hana chan就係小花:

我買咗一堆膠袋同扭扭鐵線:

其實有無人知呢D透明膠袋仔可以係邊度買到大量? 我自己就係求其入咗間烘焙店問, 佢話呢D膠袋佢都只係用黎包貨用, 唔係用黎賣, 但就以$15賣咗100個比我. 後尾我去元朗家政坊睇睇, 見到佢有個位置專係賣同聖誕有關既模呀, 包裝呀之類, 我見家政坊有呢D透明袋仔賣, 但係要$6/20個, 嘩, 佢真係賺到笑喎... 到底邊度有大量呢類透明膠袋賣呢? 深水埗長沙灣果頭有無?

寫完字之後等風乾, 然後再入袋:

呢堆薑餅人我總共整咗3日, 整咗二百幾塊, 分咗做100袋左右, 整到我腰酸膊痛呀~~