今日第一日返新工, 地點係上環, 最開心係我終於可以返九點啦, 想當年第一份工返八點, 之後返八點半, 而家終於可以一嘗返九點既滋味
. 呢間公司大約三十人左右, 名義上呢度係兩間公司, 因為我地會幫D客做數同埋做audit, 為免角色衝突, 所以名義上分佐兩間公司, 一間做accounting, 連埋會做taxation, comp sec等等; 另一間就負責做audit.
我今日既工作主要係上午睇下文件, 下午就跟同事去佐灣仔稅務大樓內既商業登記處同金鐘既公司註冊處. 我既title係Japanese coordinator, 我地既clients主要都係一D小型既日本公司, 有D甚至係香港註佐冊但0係香港無office無staff既日本分公司, 由於我地既clients都係一D細公司, 佢地唔會有自己既accounting department, 所以盤數會搵我地公司幫佢地做, 我地公司會提供埋一條龍服務, 會做埋company secretary, 做埋taxation, 幫日本人apply visa, 甚至乎佢地公司有咩問題, 如letter of credit既問題, 需要翻譯服務, 我地都會幫佢地解決. 所以老細話我黎緊咩都要學, accounting, taxation, company secretary之類全部都要識, 因為我要熟習整個運作流程我先可以清楚解釋比D日本客知. 我覺得呢份工應該幾有挑戰性, 同埋學既野比較實用D, 對我前途幫助會大D. 我既目標係兩年後學識全盤會計, 學識點樣幫公司報稅, 點様成立一間limited company等等, 然後可以跳出去搵一份20K以上既工作, 努力呀!!! 朝著識日文既會計呢個目標進發!!~~ (我終於搵到我工作上既目標啦, 唔再好似幾個月前咁仲渾渾噩噩=>詳情, 好開心~~)
2007年4月29日星期日
2007年4月16日(一) -- 第一日返新工~~
2007年4月14日(六) -- 有結婚相攞~~
今日專登出佐銅鑼灣攞擺酒果日D相, 因為今晚約佐兄弟姊妹食飯當作慰勞宴, 我想快D拎到相, 咁今晚食飯就有相睇. 我地影既係數碼相, 所以我其實都係出去拎隻DVD, 跟住就即刻返番元朗. 估唔到有成千張相咁多, 無可能曬晒出黎啦, 所以我淨係揀佐二百張曬住出黎先(淨係揀曬邊二百張都用佐幾個鐘).
之後就出發去Miss度食飯, 我地包佐個閣樓, 食完飯可以打埋牌, 最衰佢地聽日有比賽, 唔可以太夜訓, 否則可以打通宵啦~~~ 我放佐成個禮拜假無野做, 好悶呀麻…
*由於小妹剛轉工加上5月中要考試關係, 未有時間整理相片send比大家. 我5月19日考晒試之後會比心機執好D相send比大家架啦, 請耐心等待, 謝謝~~~
2007年4月12日(四) -- 迪士尼一日遊~~
星期四本來計劃同流沙包去迪士尼, 因為佢有朋友係裏面做, 可以帶我地入去. 但咁啱老豆係日本放假返黎, 於是就同埋阿媽老豆一行四人一齊去迪士尼. 由於迪士尼staff每次只可以帶三個人入去, 所以我地最後都買佐一張飛.
我地係十點迪士尼開門去到, 一開始就同米奇米妮, 高飛等等影相, 排隊影相都排佐個幾鐘. 然後就去睇獅子王劇場, 之後就開始玩遊戲. 講真香港個迪士尼真係無咩特別, 好多經典遊戲如小小世界之類都無, 同埋真係好細囉, 我都未試過去迪士尼, 可以一日內玩晒咁多個遊戲, 睇晒咁多個劇場/音樂劇, 更加未試過同咁多卡通人物影相(基本上我去外國迪士尼去過三次都未試過同卡通人物影相), 可想而知呢個迪士尼真係細到…
我既評價就係, 要錢買飛入場的話真係唔去好過, 又細, 又唔好玩, 又少遊戲, 同埋D staff無日本果D咁專業囉, 未必個個有禮貌, 未必個個有笑容.
玩足一日對腳攰到好似唔係自己咁… 好彩陳小姐好人入黎迪士尼車我地返出元朗, 然後一齊去佐正記食飯~~~
2007年4月10日(二) -- 銀行入數
今日朝早起身去銀行, 因為成十萬蚊cash係屋企, 好驚比人爆格呀. 因為放完個長假既關係, 銀行超超超多人, 變態架. 我排PowerVantage條隊都要排成粒鐘, 顛顛地…
2007年4月8日(日) -- 婚後第一天
今日一朝早起身數人情, 驚喜無乜, 反而驚嚇多D, 估唔到仲有人黎飲做$300人情, 唔… 好彩到最後擺酒條數都大約balance到, 賺就無得賺架啦, 要賺錢既我地就唔擺聘珍樓, 求其一間酒樓擺3, 4千蚊一圍果D啦. 之後我地就要落屯門飲茶, 因為流沙包D親戚飲完我地果餐之後就要返澳門/大陸, 走之前同佢地飲餐茶.
飲完茶要返元朗還衫, 陳小姐好人車我地去, 跟住夜晚我地就一齊去Miss度食飯, 順便打佐幾圈牌.
2007年4月28日星期六
2007年4月7日(六) – 大婚之喜(四): 擺完酒返屋企
埋完單成十二點幾先走得, 我爭取時間係車上面拆頭飾髮型, 由尖沙咀一路拆到大欖隧道先拆完, 手都軟埋, 然後返到屋企就叮埋D飯盒食. 其實聘珍樓唔錯架啦, 佢會每樣餸都留起少少, for我地擺完酒拎返屋企宵夜食. 我成晚淨係食過兩塊乳豬, 返到屋企第一件事就係叮番D野黎食, 唔, 果然幾好食喎~ 食完沖涼洗頭, 人情都無心情拆就去訓勒, 好攰呀~~~~
2007年4月25日星期三
2007年4月7日(六) -- 大婚之喜(三): 聘珍樓擺酒
我地四點半去到酒樓, 我個化妝師KK準時到達, 我就著番掛同戴番D金器坐定定化妝set頭. 但同姊妹化妝個化妝師就遲到, 搞到班姊妹都化唔切妝, 我係出面影佐好耐相, 但班姊妹都未出到去影相. 難得KK好人見出面咁多人入新娘房催, 出手幫我個妹set頭.(我都識做比多佐兩舊水尾數KK)
我由五點半左右化好妝著掛出去影相, 影到大約六點半左右就入去換第一套晚裝同轉妝, 然後影到七點半左右又再入去換第二套晚裝同轉妝, 然後到佐八點三左右就入去換婚紗轉妝, 本來諗住出到黎可以影多陣相, 點知酒樓話就黎開席(我地plan佐八點十要進場), 同埋話落佐個projector落黎, 所以唔可以繼續影相勒.
本來我地希望每一圍可以坐到十二人, 但係最後實會有D人當初應承佐黎又會無黎, 想砌番十二人一枱當然已經砌唔掂(當然如果你好意思將D friends打散晒你咪可以十二人一圍囉, 我做唔出麻), 所以有好多枱都係坐9個, 10個.
印象中好似九點左右進場, 然後就切蛋糕, 祝酒, 新人講野, 播成長片段, 司儀帶祈禱, 然後就正式有野食. 我淨係開頭食佐幾塊乳豬, 之後就要去換第三套晚裝同轉妝, 出到黎都唔敢食個翅, 驚整花個妝, 跟住就逐枱去敬酒勒. 敬完無耐影佐陣相, 之後又要再換衫轉妝, 跟住就要送客勒, 時間眨下眼就過…
辛苦完一輪, 終於可以換番便服執野離開. 我地十二點鐘仲係酒樓, 因為要同酒樓講數, 事緣係酒樓係個回禮小禮物度印錯佐流沙包個名呀!!!! 由於當初係經理打黎問我地既英文名, 我咪係電話度串出黎比經理聽囉, 但估唔到佢咁都會聽錯!!! 激死我啦~~~ 成個婚禮我籌備佐好耐, 務求做到盡善盡美一絲不苟, 我個人認為今晚成個婚禮都進行得好好, 但竟然係我能力範圍內控制唔到既地方出錯!!! 
嗚嗚嗚… 我地睇下酒樓有咩會補償比我地, 但經理佢自己一個人攬晒上身, 話呢個出錯唔係酒樓既問題, 係經理自己既錯, 所以張單就郁唔到勒, 個經理話一係遲D我地上去佢請我地食番餐咁話喎(聽佢口吻如果我地真係上去食番餐, 呢餐應該係由經理自掏荷包負責). 唉, 咁即係咩都做唔到啦, 到最後我地唯有無奈地埋單走人. (不過事後我地諗番轉頭, 我地完全唔記得比貼士呢樣野[當然去到酒樓都有全場派利是], 所以如果要計既, 經理呢個錯誤令我地可以慳佐$1000貼士錢囉…)
第一套晚裝(草綠色):
第二套晚裝(紫色):
著婚紗進場:
切蛋糕:
第三套晚裝(胭脂紅):
敬酒:
送客:
2007年4月22日星期日
2007年4月7日(六) -- 大婚之喜(二): 出門+回門
我地11點鐘出發往男家, 去到男家繼續斟茶, 跟住班兄弟姊妹就落佐樓下酒樓食飯, 我同流沙包就要係屋企食飯. 食完飯點半鐘又要番返女家回門, 今次班兄弟姊妹就可以休息下, 因為淨係伴郎伴娘陪我地返女家就得.
回門當然唔少得燒豬, 我地訂佐隻廿幾三十斤既燒豬, 師傅燒完無耐就送上黎砍件, 豬頭豬腳帶過去男家, 其他既就分比其他親戚, 同埋即場切黎食. 隻燒豬好香呀, 食落仲暖暖地, 扑扑趣架, 勁好味呀~~~
之後每人食埋湯圓後, 又要帶埋D豬頭豬尾去番男家, 跟住就要出發往酒樓勒~~
出門到男家:
2007年4月19日星期四
2007年4月7日 -- 大婚之喜(一): 接新娘
今朝係張床度典下典下都唔捨得起身, 因為實在太攰啦, 到佐七點半個化妝師打黎話已經到佐巴士站, 我先捨得去刷牙洗面換衫. 兩個化妝師都好準時, 七點半到. 化妝師KK先幫我化妝, 而另一個化妝師阿琪就幫阿媽化妝.
到佐八點, 姊妹, 攝影師, videoman都陸陸續續到達, 姊妹就排隊化妝同準備一陣玩新郎既遊戲, 我就繼續坐定定化妝.
本來原定班兄弟九點四應該上到黎被玩, 但係可能佢地要係樓下影下相之類, 差唔多九點十先到門口, 不過唔緊要, 反正班姊妹仲未化好妝, 同埋奶奶話十點後先比新郎同兄弟入門就得架啦. 由於我要匿埋係房等人接, 所以雖然聽到佢地係出面玩得好開心, 但係唔可以出去睇埋一份, 唯有等第二日睇番VCD啦.
玩到咁上下班姊妹終於比班兄弟入黎, 之後就要逐一斟茶比長輩, 真係跪到腳軟呀. 之後食長壽面, 然後就出發去流沙包屋企勒.
化妝:
2007年4月12日星期四
2007年4月6日 -- 結婚前夕
今日一朝早去佐屯門飲茶, 飲完茶我地就落元朗攞婚紗晚裝, 跟住就同流沙包各自返屋企勒. 其實仲有好多野未執未整理好, 但係為佐爭取時間休息, 我九點幾就上床訓覺, D野留番半夜三點半起身上頭後先再執.
九點幾上到床, 碌黎碌去都訓唔著, 典到成十二點左右先訓到, 但係三點就起身用碌柚葉沖涼洗頭, 等到三點半上頭, 對住塊鏡自己同自己梳, 阿媽就係後面講:一梳梳到尾, 二梳乜乜乜… 然後就要等對龍鳳燭燒完先可以訓, 於是趁有時間就執埋D野, 搞到差唔多五點先有得訓, 但係第二日七點就要起身…
2007年4月11日星期三
2007年4月5日(四) -- 結婚前扮靚靚~~
終於等到放假, 朝早先去佐做facial, 下午就出佐尖沙咀整頭髮, 主要想染同埋highlight, 由三點幾整到成八點先走得. 我都好耐無染過髮, 因為要係髮型屋坐足半日, 無聊又嘥時間, 不過為佐結婚呢個大日子, 無辦法啦~~
2007年4月9日星期一
終於捱到last day!!
話說4月4日係我期待以久既last day, 本來到4月3日條低能腦細都未交待邊個接手我既job, 我當然唔會走去問, 你唔交待唔安排我咪「pat」低晒所有野話走就走囉, 話之你.
點知3號果朝早有個同事問我今日咩時間得閒, 可以既話交低D野比佢跟手, 我反問:「下? 要你跟呀?」. 我覺得佢都好慘, 好似部門中有咩豬頭骨都要佢啃咁, 本來我諗住咩都唔理泵低晒一走了之架麻, 但呢個同事平時都幫我唔少, 我都唔想我走佐之後佢跟我D野會嗱手唔成世, 於是今日真係的起心肝處理番D後事, 正一PK老細黎架, 咩都唔交待, 咩都係由同事通傳, 做野又「笠囉」, 日後有機會一定將佢D低能野係度「公諸於世」!!! 我last day, 佢條粉腸連bye bye, 祝福都無句; 其他同事收到我個goodbye e-mail起碼都會reply番我講D祝福說話之類呀...
由於admin阿姐佢4號放假, 所以3號已經計埋D糧比我, 呢個admin阿姐又係公司經典, 做佐咁多年, 成日都做錯野, 計錯我糧, 好彩我心水清, 否則白白蝕佐幾千蚊比公司. 我07年4月4日last day, 佢可以係其中一個日子打佐做06年, 係第二個日子打錯佐做May, 真係服佐佢!!
本來糧都計埋, 4號果日真係唔返工都得, 不過費事做衰自己, 於是返公司hea佐成日, 真係無聊. 同同事吹下水, 影下相, delete埋D e-mail之類…
我自己個位:
2007年4月4日星期三
點解!!! 點解張帖寄出佐對方會收唔到!!!????
麻布茶房 -- farewell lunch 2
地址: 尖沙咀廣東道11-13號海港城2期2608-10號舖
電話: 2736-5006
星期一有一個同事同我去farewell食飯, 去佐麻布茶房食, 呢度真係十年如一日, 每次黎都要等到頸都長先有野食, 餐餐都係咁, 如果唔係近公司都唔會成日黎食, 不過係度等食既時間, 我諗可以for我地行遠D搵食囉... 不過我都就黎唔係呢頭返工勒, 食埋呢次啦~~
我叫佐個什菌雞定食, 我以為係有D雞既醬汁然後上面加D什菌, 但黎到係有pat什菌菇+難食汁再加D雞係面咁, 麻麻地好食, 主要係D什菌菇汁好難食, 同埋杯凍檸茶好難飲...
是次每人消費約$50 (同事請)
2007年4月3日星期二
沙嗲王 -- farewell lunch 1
地址: 尖沙咀海防道35-37號海利行1樓
電話: 3427-3415
上星期一班之前同我由元朗調出黎尖沙咀既同事同我搞farewell食飯, 去佐沙嗲王食, 其實我地成日都會黎沙嗲王, 因為每次幫襯都有coupon, 所以隔一排都會黎幫襯用佐D coupon, 循環不息. 不過由於我多數都係帶飯返公司食, 所以我都好耐無去過沙嗲王食飯, 我叫佐個白咖喱豬扒飯, 揀佐甜品唔揀菜, 同埋叫佐荔枝紅茶. 呢度既白咖喱豬扒飯都OK既, 味道唔濃, 清清淡淡咁, 豬扒唔靭, 幾好食. 不過個甜品布甸就唔掂, 個布甸好硬身, D糖漿又鬼咁甜.
2007年4月2日星期一
就結婚啦, 買野買野買野!!! 今日成功做佐好多野!~~
不經不覺我地仲有唔夠一星期就結婚啦, 但係都仲未買齊野喎, 於是尋日約埋流沙包去屯門買啦. 本來我打算去雅都商場二樓間芊芊花店訂花架麻, 點知去到未開門, 打比老闆娘, 原來佢今日去拜山, 唔會返舖頭, OH... 於是我地改去柏麗商場睇睇, 流沙包個妹前年結婚係果度租衫訂埋花球, 去到問佐價, 價錢都OK, 一個花球(玫瑰), 新郎襟花, 三個主婚人襟花(太陽花), 七個普通襟花(玫瑰), 六個手花(都係玫瑰), 全部夾埋七百幾蚊, budget內, 所以就費事煩係度訂埋. 另外仲決定係度做埋結婚花車對公仔(係比對公仔佢地, 佢地幫我綁蝴蝶係背後, 加埋對"V"字絲帶, 咁就收$120, 真係好賺...), 唉, 好貴...
之後我仲要買套新內衣褲同埋買過對結婚鞋, 但係屯門都無咩啱心水, 於是落番元朗, 好順利咁好快就睇中佐對白色鞋, 跟手去好順福商場買埋bra+under.
之後就約佐伴娘同細妹去雅麗fitting, 估唔到黎到竟然無人唔駛等(staff話因為呢排近清明, D人連試衫都唔肯黎試喎), 好快佢地就fitting完, 終於搞掂租衫呢part啦, yeah!!
再跟住七點鐘就去佐元朗人家打邊爐, 因為今餐係我地既兄弟姊妹飯, 好難得可以約齊人! 不過我班姊妹實在太斯文啦, 淨係振宇一個都可以頂住我五個伴娘姊妹咁款, 我班姊妹好文靜又無咩出聲, 好彩仲有金雅可以撐住~~ 希望到我結婚果日我班姊妹有能力玩殘班兄弟啦, 我驚到時會調番轉我班姊妹會比兄弟玩咋...
新寶粥麵茶餐廳 -- 超級焗豬扒飯...
地址: 元朗擊壤路17號順發大廈地下D舖
電話: 2470-6982
31號晚我又出元朗廣場等流沙包佢地練完波去食飯, 我地又去佐新寶, 我同流沙包叫佐火鴨絲伊面, 味道都OK, 料都算多. 不過我想講既係超人叫既焗豬扒飯, 呢度既焗豬扒飯好巨形呀, 山咁高, 仲要舖隻蛋同埋有芝士係面頭, 變態架, 佢地大大隻隻又做完運動, 都食唔晒成個飯, 可想而知個飯係幾咁巨形...
是次每人消費約$35
一泡而紅
地址: 葵芳葵涌廣場3樓
30號晚流沙包係葵芳附近教波, 於是我係尖沙咀做完facial就落葵方等埋流沙包食飯. 流沙包黎到已經九點幾, 我又唔想食得太飽太heavy, 於是去佐一泡而紅食飯, 我叫佐個麻辣雞泡飯, 流沙包叫佐個香菇豆腐泡飯, 我地仲叫佐個鄧家媽媽水餃, 因為見佢個menu寫到咁把炮咁出名咁, 店員又落力推介, 於是叫佐$15六隻. 呢度既水餃係咪凍食架? 因為D水餃唔係用湯浸, 係放係個碟度上, 食果陣都唔熱既...? 同埋味道真係無咩特別, 又唔係好好食, 好似有少少搵笨.
至於個泡飯都OK, 我都唔係第一次黎食泡飯, 如果唔OK我都唔會返黎幫襯, 好大碗, 都食唔晒.
不過想讚讚呢度既服務態度唔錯, 流沙包件外套放係櫈度拖佐地, 阿姐會好心提我地, 又問我地要唔要tissue. 然後到我地差唔多食完果陣, 又有個男人拎住pack紙巾問我地要唔要tissue, 幾搞笑.
是次每人消費約$40
好鮮味 -- 抵食又好食
地址: 元朗大馬路
29號晚試完衫去佐好鮮味食飯, 呢度D套餐真係好抵麻, 之前我都介紹過, 有湯有小菜有飯有野飲, 埋單都唔駛$40位, 我地四個人叫佐四個小菜, 包括三杯雞煲, 鹹魚雞粒煲, 海鮮什菜煲同埋咖哩豬軟骨, 如果係酒樓食, 我諗無二舊水都埋唔到單, 但呢度四個小菜, 埋單都唔駛百二蚊, 抵到爛呀~~
是次每人消費約$40
2007年3月29日(四) -- final fitting
今日放佐工約埋阿媽同奶奶去final fitting, 由七點試到八點幾, 我覺得自己手臂仲有少少肥呀, 如果可以再瘦D就好了. 著埋girdle去試, 只係著一陣我就覺得好攰腰骨好痛好辛苦啦, 到結婚果日點樣挨成晚呀? 我試完之後, 先知原來奶奶套褂唔駛試, 即是說佢白等一趟, 唔知佢會唔會怪我呢...?
之後去佐我地既飯堂好鮮味食飯~~