2006年5月29日(一)

某日睇報紙見到個好搞笑既IQ題:

某天, 三成熟牛扒係街上撞見五成熟牛扒, 點解佢地見到面都唔打招呼呢?

答案下次揭曉.


公司D人好搞笑, 仍然有好多人將NAME讀成LAMB. 雖然我自己D英文發音都唔準, 但係無理由連NAME, CHILDREN都讀成LAMB, "超鈍"麻?

今日比較得閒, 加上今晚開始要返學, 所以開佐好多IE出黎check mail, print notes等等. 無啦啦EDP走埋黎問我部電腦係咪上到IE(你check到架啦, 明知故問), 佢話我個IP扯得好勁喎, 係咁2搞過我部機check下個IP係咪真係我既, 然後叫我關梗D IE唔好開咁多. 我開佐六個IE出黎咋喎, 原來已經會「扯得好勁」架啦? 唔係化? 餐餐我上網上得勁, 班友仔就走埋黎check呢樣check果樣, 今次就話我IP扯得勁, 都唔知係咪既. 通常佢地搞完我部機之後, 我都係照上網, 我完全就係搏炒啦~~

另外我終於遇到一個同我同年同月同日生既人啦, 佢係新黎既會計部同事(巴閉部門成十幾人都仲要請人, 我地部門做到隻狗咁就一個人都唔肯請, 我仲聽聞大緊肚個同事遲D產假都唔會請TEMP, D野要分比我地幾個做, 咁到時死得啦!). 我同呢個新同事除佐同一日生日之外, 仲要大家都係住係天水圍, 真係好"橋"~~

2006年5月28日(日) 全日上網...

ANATA星期六日都要出去做野, 要帶隊, 教波, 做球証... 有無D freelance可以比我係屋企做呢? 咁我可以都搵下外快麻~~

今日全日係屋企上網, 主要係睇下邊度租衫好, 同埋搵D新娘化妝髮型相參考下, 星期六試妝果陣帶埋去.

今日仲無無聊聊係屋企睇下DVD, 睇佐套劉青雲, 劉嘉玲, 應采兒主演既七年很癢, 兩個字評語: 無聊! (但我竟然有時間睇晒成套戲, 似乎更加無聊果個係我!)
尋日無啦啦唔知做咩鬼野, 行行下突然右面盤骨位好鬼痛, 唔係退化得咁快呀? 定係其他原因呢? 唉, 我平時坐係度都已經每一刻都痛緊架啦, 唔係而家連行路都開始痛呀麻? 我死得啦~~ 如果我有D咩野事, 我係唔會結婚架, 費事累人累物啦. (我好認真的!)

2006年5月27日(六) 終於約佐試妝啦~~

今日ANATA當然又去佐做野啦, 我就去佐配CON, 因為我終於約佐6月3日早上十一時去試妝啦(係太子), 所以0拿0拿臨去配CON先. 如果各位有興趣係我試妝時幫下眼既就CALL我啦. 不過試妝大大話話都要兩, 三個鐘. 所以我都唔敢浪費大家時間…

今日去佐高登配, 諗住佢地應該專業D, 驗眼等各方面會準D, 咁我第時就可以去第二度買CON麻. 去到佢話我散光度數太勁, ONE-DAY果D最多都係去到75度散光, 如果以我既度數, 只有兩星期果隻CON先0岩我. 之後再驗眼, 佢話我而家戴緊副眼鏡度數, 比我本身既正確度數多佐一百度喎?!!(所以我以後都唔會再去A-LOOK配眼鏡, 當初都知佢地唔多專業, 但就諗住平D, 但結果我呢副眼鏡都唔平). 驗完就試戴CON, 佢話有散光果D要訂番黎, 所以比佐ONE-DAY無散光既我試戴下, 我同佢講我係諗住結婚所以先配CON, 都唔係諗住長戴, 視光師就話如果你戴佐ONE-DAY無散光呢隻都覺得睇野OK既話, 咁你都可以買ONE-DAY. 最後我當然選擇ONE-DAY啦, 價錢平D麻, 同埋我真係有特別場合先戴, 所以梗係揀隻平D啦~

高登買要$150一set, 我因為左右眼度數唔同, 所以要買兩set唔同度數既, 盛惠$300, 佢叫我星期二/三再去多次正式學試戴同試除. 但係… 我都係覺得自己唔戴眼鏡個樣好醜樣, 面肥眼細, 睇見自己個樣都想打爆塊鏡. 即使我結婚化晒妝SET晒頭都唔慌會靚得去邊… 只希望到時唔好太醜嚇親人…

2006年5月25日(四)

CONNIE, 我都唔係AC部既, 比人串幾咁閒呀. 即使係同一個部門, 平時賴係friend賴係好姊妹咁既, 都一樣係背後被人狂插啦.

話說ACCOUNT一向都係公司最「巴閉」既部門, 人人都大聲夾惡, 八婆又多是非又多. 話說有兩個同事一向都好似好姊妹咁, 出出入入都一齊, 串人既時候就左右夾攻合拍非常, 呢兩姊妹分別係之前話我話走又唔走既「賓妹」, 同埋另一個女仔(代號「大電視」--佢就係話自己旅行驚屋企比人打劫, 話自己屋企部PLASMA都幾萬蚊果個).

話說呢兩姊妹仲有個老細(代號小矮人), 平時佢地三個感情賴係好咁, 小矮人佢帶LUNCH會帶埋果兩姊妹既份量, 又拎埋湯番黎三個一齊食. 表面上好似好好咁, 但其實暗地裡就鬼打鬼. 話說大電視話自己好似有佐, 所以要去醫生度check, 搞到成日唔返工(我地公司出去睇醫生講聲就得, 唔駛扣病假唔扣錢唔駛任何醫生紙証明). 於是小矮人極度不滿, 向頂頭既日本老細投訴, 又向人事部經理投訴. 背後又成日周圍同人講大電視既是非, 仲要當住其他人面前勁數大電視既不是, 唔係匿埋細細聲講果隻, 係慌死無人聽到果隻. 於是今朝早人事部經理同大電視傾佐好耐, 傾到lunch打鐘都仲傾緊. 賓妹仲好野到懶係關心咁打內線問大電視食乜, 係咪落去買飯. 根本賓妹呢個人, 都係見人講人話, 見鬼講鬼話架啦, 唔少人都聽過佢係背後狂打大電視既小報告. 佢地咁樣係對方面前就笑口"西西", 係人地背後就勁插人勁唱人, 真係令人反胃呀~~

2006年5月22日(一)

今日朝早返黎就無停過手, 當然啦放完假返黎係要付出代價的. 今日JOSEPHINE講佐D野比我聽, 我聽完就無咩激氣唔開心, 不過真係好討厭公司有D咁既賤人係度, 仲要唔係一兩個而已, 係好多個. 話說公司年年都要參加職安健既問答比賽, 今年公司好似派兩隊出賽, 其中一隊要搵四個組員, 於是佢地果日開會就傾搵咩人出賽好. 唔知點解無啦啦有人提議搵我參加, 原因係我係「讀書人」喎, 痴痴地, 你地班人文盲黎架?? 仲要AC部果條賓妹大大聲咁講:「哩, 搵果個參加啦, 話走又唔走果個呀!」之後佢地仲諗住派JOSEPHINE開口叫我參加喎. 好彩JOSEPHINE都有反抗話要叫你地自己叫. 佢地都short short地, 平時我對多佢地一陣都想作嘔, 仲要一齊出去參賽? 神經病!!

佢地班人真係好鬼討厭, 鍾意講是講非, 又成日講埋D白痴野. 係pantry食lunch睇新聞未搞清楚就自己下埋D白痴判斷. 好似有次新聞話有人係住所殺佐男友然後跳樓自殺. AC部小矮人就大大聲話:「唔駛問一定係大陸妹啦.」 隔離果條賓妹仲要即刻附和:「一定係啦」. 我覺得佢地思想真係好有問題, 咁樣就可以斷定人地係大陸妹? 比我感覺是佢地係果D狗眼看人低, 成日歧視人, 以為自己高高在上果隻. 但其實後來報紙話跳樓自殺果個係外國空姐黎, 並唔係佢地斷定既大陸妹.
同埋佢地又鍾意晒命. 有次某人話自己就黎去澳洲旅行, 間屋十幾日都無人係度, 話驚會比人爆格, 話自己間屋好多貴野喎, 又話部PLASMA都幾萬蚊... 真係好心佢啦, 我屋企夠用緊LCD電視啦, 我都唔會咁唔知醜, 咁既幾萬蚊電視都?黎"晒命", short short地.

我真係好想搵一間公司, 老細可以有腦D有料D我可以係佢身上學到野, 同事之間可以好融洽唔會成日係背後/面前講人是非, 鍾意單單打打. 不過當然我知呢個世界上唔會有D咁既公司啦, 所以都只有繼續係度受氣, 得閒係日記發下勞騷咁囉~~

2006年5月21日(日) 落佐成日雨...

好彩朝早落雨, 所以ANATA可以朝早唔駛出去做野住, 可以陪我食埋LUNCH先出去做球証. 我就係屋企幫ANATA打埋個POWERPOINT. 跟住夜晚就出佐青衣, 因為元朗今晚係青衣有比賽. 今日場比賽驚心動魄, 因為佢地實在唔可以再輸啦, 再係咁會降班跌番落丙組. 今日又係要打三局, 好彩最後都可以獲勝, 真係睇到一額汗...

套電車男終於成套DL成功, 忍唔住飛快咁睇佐幾集, 睇埋結局. 始終唔明愛瑪仕點會鍾意電車男架?? 尤其是見到佢地kiss果幕, 呀~~~ 點會架?!! 無可能架, 現實中點會有可能發生架~~~~?????????!!!!!!!!!!!

2006年5月19日(五) 終於考完試啦~~

今日請佐假, 因為今晚要考試. 其實呢科都係D吹水野, 加上OPEN BOOK, 所以我都唔多著緊. 但係好鬼討厭呢D吹水科, 有兩條我都唔知佢想問咩, 唔知佢究竟想要咩答案. 我諗我果兩條實死緊, 因為連我自己都唔知答緊咩. 總之求其諗到咩都寫佐落去先.

今晚ANATA又要做球証, 今晚佢係界限街體育館, 於是我考完試落去體育館等佢, 好彩最後果場波打兩局, 我去到一陣ANATA就可以收工勒, 於是我地去佐附近餐廳食飯.

我知ANATA越黎越忙. 學校方面咩狗屎垃圾都要佢做, 唔關佢事既野都要佢做. 其他同事又幫唔到佢手, 一句話唔識就咩都唔駛做咁, 校長又當佢萬能, 有咩搞唔掂都搵ANATA執手尾.

ANATA讀書果度又要準備presentation, 我唔明白明明同組既都係教書, 點解佢地無佐ANATA係度就咩都傾唔成? 仲要老公佢做好晒D資料比佢地傾, 我都唔明, 老公都已經做好晒啦, 佢地仲有咩要傾呢? 如果有ideas就一早傾好佐啦, 駛咩我老公咁樣嘔份野出黎. 原來佢地話要傾既係點樣做個POWERPOINT, 唔係化? 呢D野一個人做都得啦? 唔駛成組一齊傾呀?

然後老公教緊個DIPLOMA又要準備黎緊上堂既POWERPOINT同出卷.

仲有就係老公呢兩日都要早出晚歸, 一係去帶隊, 一係去教波, 一係就去做球証. 我真係’鄧’佢好辛苦呀~~

2006年5月18日(四) 許留山龜苓爽, 掂呀!!

之前牙肉痛痛佐成個幾禮拜, 飲過許留山既五花茶, 又買過鴻福堂既支裝雞骨草, 但依然無好轉仲係好痛, 我開始驚自己係咪唔係熱氣咁簡單呢? 會唔會係口腔出現問題呢? 正諗緊考完試好無去睇次牙醫. 但今日lunch都落許留山諗住再買涼茶(我公司附近淨係識許留山, 唔知仲有咩涼茶舖), 雖然怕會苦, 但都「把心一橫」地買佐龜苓爽黎試下. 個阿姐係雪櫃度拎佐杯出黎比我, 我一路行一路飲, 點解個味道咁似五花茶既? 於是返番舖頭問, 個阿姐初初話兩個味會有D似喎, 仲分別斟佐少少五花茶同龜苓爽比我試味, 試完後我更加肯定我頭先買果杯唔係龜苓爽, 後尾confirm佢地搞錯佐, 換過杯比我. 原來杯龜苓爽係會倒小小龜苓膏落去, 我頭先果杯都無野既, 果杯我絕對肯定係五花茶啦~

我lunch飲完杯龜苓爽, 到夜晚食飯發覺牙肉已經無乜痛, 掂呀!

由於我聽日請佐假考試, 所以今日要做埋聽日既野, 仲要做埋個report交比大大聲果邊, 搞到十二點幾先離開公司. 今晚我話之佢試下搭的士返屋企, 星期一返到去睇下個白痴老細肯唔肯approve; 如果佢唔肯幫我簽, 睇下我發唔發難呀0拿!!! 同事介紹佐六折的士比我, 好鬼抵! 如果計埋隧道費, 跳錶要二百三十幾蚊, 但最後佢收我$135, 超抵呀!!

2006年5月17日(三)

麻鬼煩, 周身唔得閒架啦, 仲要成日聽埋ISO department搞果D EMS training, 痴線架!! D內容來來去去咪又係果D野, 教你點樣垃圾分類點樣丟垃圾, 自己個位要點執, 遮就唔可以擺係位要放遮架, 文件又唔可以疊到幾多吋高, 會議室用完要擺番好D chair, 捲番D電線, 電話要放番係「原有既位置」.... 等等既無聊白痴野, 仲要隔幾個月就上一次呢個無聊白痴"training", 低能架!! 而家唔駛做咩? ?鬼晒D時間, 好鬼討厭!!!

本來今日好期待八號風球唔駛返, 點知呢個風都無料到, 好失望.

2006年5月16日(二) 一號風球~~

今日ANATA屋企補祝母親節, 去三聖食海鮮, 去到又大風又落雨, 夾埋買料同等齊人, 餐飯足足用佐三個鐘, 呆佐~ 食完飯索性搭的士返屋企. 唔知打唔打得成八號風球呢? 約好佐如果打風就去打麻雀~~

2006年5月15日(一)

真係麻鬼煩, 話說K小姐放假期間, 佢間廠既進口有爛貨, 運輸果度寫返個report返黎, 話司機有打過電話比我通知佐我, 於是logistics個經理(代號"大大聲"啦)問我係咪有件咁既事, 我話淨係收過廠send過黎有爛貨相既mail, 但就無收過任何電話. 大大聲就話:「死啦, 咪即係佢地講大話, 死梗啦佢地!」. 轉過頭又走黎再問:「真係無收過電話? 你有無記錯呀? 諗真D? 個report上面有你個名, 話通知佐你喎」; 去toilet撞見佢又再問:「真係無人通知你? 真係無收過電話?」, 唉呀, 我而家柏金遜咩, 收到電話我實記得啦, 唔通我講大話呃你咩? 你係咁質疑我, 點解唔去同運輸班友仔對質問清楚佢地有無講大話呀?!!! 我無收過任何電話呀, 真係撞鬼!!

近排大陸D IS大執位咁, 好多IS轉佐(升佐?)去做OS. 但我發覺大陸D IS同OS既英文名真係古古怪怪, 有人叫KEIKO, NEKO, 又有人叫NATURE, SILENCE, DEAR, DOLPHIN, COOKIE, ECHO, MILK, FOGGY, TITTIE, 小女子孤陋寡聞, 其實呢D名係咪真係可以改做英文名架?? 有無外國人真係用黎改名架??

喂喂, 如果我係貴婦, 我就唔駛做, 得閒去公園放下狗, 下午去置地shopping, 然後去酒店high tea, 得閒去睇下fashion show, 去下ball, 點駛仲要好似而家咁對住個無腦既老細, 又要比人地部門阿頭質問呀~!!!!!!!!!

2006年5月14日(日)

睇到阿sa個留言, 差D噴水. 什麼貴婦啊~~?! ii才是呀~

星期六又去佐飲茶同打麻雀, 好開心~~ 打打下發覺打大陸牌好玩過平時玩開3番起糊最大8番果D香港麻雀. 初初其實我都唔係咁鍾意打大陸麻雀, 但係越打覺得越好玩, 如果而家有得揀我會揀打大陸牌.

星期日ANATA又一早出佐去做野, 朝早做球証, 中午帶隊, 下午教波. 我就係屋企好乖咁溫書, 夜晚就同阿媽出街食飯. 母親節, 度度都搶錢, 連MENU都成個改佐, 睇佢應該每樣野都加佐價. 又貴又唔抵食~!!

女人唔易做終於大結局, 以後可以錄少樣野.

2006年5月11日(四)

尋日K小姐去完HONEYMOON返黎, 所以我呢兩日都可以五點半即走. 佢買佐D朱古力同榶返黎做手信, 佢送比我盒糖好大盒有好多粒, 味道有D似瑞士糖. 我都好想去歐洲呀~~ 我咁大個人, 去過既地方都只限亞洲區, 淨係去過日本, 台灣, 北京咁. 再遠D都未去過, 唔知幾時可以「衝出亞洲」呢?? 其實我好多地方都想去, 我想去泰國啦, 歐洲啦, 布拉格啦, 杜拜啦... 今年年尾會去關島, 不過關島都好似係亞洲區呀呵~?? 講開旅行, 我覺得而家無線果個向世界出發既節目好好睇喎, 我而家晚晚都追/預錄.

今晚約佐阿媽食飯, 順便送埋份母親節禮物比佢, 因為剛剛lunch買佐, 費事拎黎拎去, 所以預先送佐比佢先.

跟住返到屋企就拎衫落去磅洗, 又去百佳掃佐$160貨, 跟住返上樓睇下電視洗頭沖涼. 呢排ANATA晚晚放佐工都仲要去各區做球証, 好辛苦呀. 雖然佢口講話唔辛苦, 話就黎要考一級球証, 所以呢排會吹多D波當practise, 又可以搵多D錢結婚咁話. 其實有時我會諗, 如果我可以搵多D錢, 咁ANATA咪唔駛咁辛苦日做夜做囉?? 講真我日日坐office又唔駛體力勞動, 但每日放佐工返去都已經累到死. ANATA放佐工仲要去做球証, 一做就幾個鐘, 點會唔辛苦0番. 有時佢係出面做野, 我就係屋企睇電視食雪糕, 真係覺得自己好衰...

2006年5月10日(三)

今日約佐湯米去壽司亭食飯, 真係越黎越不知所謂, 壽司亭我都覺得麻麻地架啦, 點知元朗果間仲差, D野又唔好食, 又細件, 咁既質素賣咁既價錢, 我去一番食無咁嬲啦~ 最離譜係D冷氣超勁, 我估佢既溫度應該得十零廿度, 痴痴地, 我披住件披肩都覺得好凍呀. 我下次唔會再去壽司亭食飯啦~!

返到屋企再搞下部錄影機, 原來佢個設定時間改佐, 所以搞到錄唔到野. 有無搞錯呀?! 點解無啦啦會變佐05年2月架?!! 我都無改過, 真係激死人~!!

2006年5月9日(二) 考試

今日考試, 朝早起身最後衝刺溫書, 下午搭車返學, 發覺大部份D學生都顛架, 三十幾度仲要個個著住件冷背心, 有D仲顛到著住長袖冷衫, 發神經!! 就算你唔著背心, 都知道你係無身材架啦, 遮咩呀~ 如果你話怕走光, 我夠做過學生啦, 係?面打底咪得囉, 根本成班學生都痴線架, 天氣已經熱架啦, 我睇見佢地就仲熱, 頂佢地唔順呀~!!!

今日果科CORPORATE ACCOUNTING考三個鐘, 但係我兩個鐘頭就做完, 可以由頭對一次.

返到屋企淨係食個叮叮飯團就當夜晚果餐. 部死人錄影機, 都唔知搞咩, 無啦啦錄唔到野不特止, 仲要無啦啦死機, 激死我啦!! 還番集RROJECT RUNWAY比我呀~!!! 份保養書又搵均成屋都搵唔到. 火到黎呀~!!

2006年5月8日(一)

今日又係做到無停手, 因為我聽日請佐假考試, 所以要做埋聽日既野先走得, 今日OT到十一點半先走到, 完全無食飯, 因為我知如果去食飯的話, 就十二點都唔駛旨意走. 如果日日咁OT法又無時間食飯, 真係一個好既減肥方法.

2006年5月7日(日)

今日ANATA要山長水遠出柴灣帶隊, 我就留係屋企溫書, 因為星期二要EXAM, 今日溫書進度都算OK, 因為四月尾先QUIZ完, 好多野都仲有印象, 唔駛花太多時間去溫.

夜晚就入屯門食飯.

2006年5月6日(六)

今日約佐班同事上黎打麻雀, 由下午三點幾打到夜晚一點. 本來一直都輸緊, 係食完飯之後先開始嬴番. 副麻雀就要抽水, 要佢地逢八抽一夾番, 但打成晚先得果百零蚊水, 加埋我自己嬴果二百幾蚊, 都唔夠副麻雀連木台個價錢. 不過副麻雀都擺係我屋企, 唔緊要啦.

打完牌我D同事仲同ANATA打佐陣WINNING, 我坐係側邊睇都睇到好緊張~~

2006年5月5日(五) 放假~~

今日又放假, 好開心可以同ANATA去元朗飲茶, 跟住行佐陣元朗. 本來睇中幾對鞋, 不過試上腳又覺得自己腳大著得唔靚, 所以最後都係無買. ANATA今日配佐副新眼鏡~~~

因為聽日約佐班同事上黎打麻雀, 於是今日要去買麻雀同麻雀木台, 兩樣夾埋要四百幾蚊, 好貴.

返到去溫佐陣書, 不過大部份時間又係度HEA...

2006年5月4日(四) 本應是last day的日子...

本來今日係LAST DAY, 但我應承佐留底, 所以都係要繼續做, 今日都係忙到死, OT到差唔多十點, 頂唔順走佐. 成晚都無食飯, 淨係食佐個提子鬆餅就算.

今日lunch同佐隔離位個同事一齊出去食飯, 我入佐黎公司年幾, 之前同佢夾埋都講唔夠十句野, 係近排多佐用e-mail黎傾計. 佢尋日約我今日食lunch, 我地食飯果陣講佐好多野, 感覺好好~~ 希望下次再有機會一齊食飯啦~~

2006年5月2日(二) 峰迴路轉..

今日一朝早返到去, 我就見到老細個MAIL, 叫我有時間過去佢個位. 講真我真係無時間, K小姐開始放假, 我跟佢D野都未停過手, 之後老細打黎催我幾次, 因為佢話下午要返大陸. 我十一點幾先過去老細位, 老細話人事部經理通知佢, 話10%而家可以confirm, 因為佢話有同D日本人傾過, 話日本人終於肯答應. 佢話我之前要求既20%真係加唔到比我, 因為如果加20%比我的話, 我就會高人工過其他入職比我耐既同部門同事, 所以最後只可以加到10%. 又話如果我留底係度, 佢會再rearrange過我做既野, 佢都知我而家做既野好似好散, 幫下呢個幫下果個咁. 佢講佐好多野, 話公司其實福利幾好, 又乜又物. 但係我都唔理佢, 我都係話要走.

無幾耐人事部經理又打黎叫我入房傾, 佢話一定confirm到可以加10%比我, 又話因為我部門有其中一part會摺, 所以黎緊有好多野會rearrange過, 唔駛好似我而家咁執頭執尾, 又話我一直以黎做野都好好, 日本人又"up"佐頭肯加比我想我留番係度. 我反問佢點解到而家仲同我講呢D野, 我星期四都last day啦. 佢話係日本人遲遲都唔肯理, 話迫過佢地比佐壓力佢地, 佢地都清楚其實呢個post都好重要(係咩...?!). 話日本人好多野遲遲都唔肯下決定, 好似要摺部門咁, 其實話要摺好耐, 拖到而家先confirm會摺, 話我辭職呢單野, 其實都引發到日本人肯正視下D問題(咁我即係比人擺上table 0者). 跟住仲confirm我個title會係overseas sales executive, 以後加薪升職之類會將我列入"executive program"呢個scheme既加幅去考慮喎. 後尾我好衰女咁終於應承佐留底. 佢話10%真係最盡架啦喎, 佢唯有可以係黎緊bonus果度幫我做D野...

下午佢仲即刻比佐封信我, confirm我title係乜, 新既salary係幾多. 仲計比我睇如果我繼續係公司, 我既加薪幅度會有幾多. 其實我當然知道佢講既野唔係100%可信, 什麼日本人肯正視問題, 什麼我做得好好, 呢點我就真係唔信. 但係我知道當中一定有D野發生佐, 否則無理由上星期仲confirm我會走, 今日轉過頭同我講想我留番底, 我感覺到佢地好似受到壓力, 接到order要講服我一定要我留番底咁, 因為我見我老細同我講果陣, 佢自己都講到有D激動. 我感覺到有D事應該醞釀緊會發生, 而我就係成件事上面既其中一隻棋子.

不過我唔想知咁多, 知得多是非又多. 公司無秘密, 我諗唔少人都應該知道我會走呢件事, 同埋因為上星期公司都confirm我走, 所以我私底下已經同熟既同事講佐我會走; 而家我又話唔走, 都唔知點交待. 我預佐比人唱同比人閒言閒語架啦. 不過我自己都衡量過得失既, 如果我轉新工, 我就請唔到假結婚, 係我最需要錢既時候就分唔到全份bonus. 我都知道我決定留底係好樣衰好衰女好"火羅"好無面, 不過既然已經決定佐, 就唔想再講咁多啦. 我就即管睇下公司會有咩變化, 如果都仲係得個講字, 我就再考慮搵到工先再辭職啦~ 成件事就係咁, 報告完畢.

2006年5月1日(一)

呢幾日放假, 本來應該好好地溫下書, 因為我五月頭要考試啦. 但係我呢兩日心情極度低落, 好抑鬱, 每一天淨係上下網, 好似死屍咁攤係度, 無無聊聊都唔知自己想點.

我知自己點解會咁, 因為呢幾日係度諗究竟自己想點, 想搵份咩野工, 想係邊方面發展. 但係根本就無結論. 覺得自己好無用好廢, 總之心情完全係谷底.

星期日晚落佐屯門同伯母食飯慶祝佢生日, 跟住好即興咁上佐ANATA個妹屋企打麻雀.
第二日朝早起身又係行屍走肉咁, 都唔知想做咩, 後尾同ANATA傾佐陣計心情好番少少, 跟住落街食個TEA就出佐荃灣, 因為佢班0靚妹同人打FRIENDLY, 佢要落去睇下. 之後再落青衣, 我地去佐食法國菜, 然後就去佐體育館睇元朗比賽, 本來以為佢地今次應該會嬴啦, 第一局仲曾經領先十分, 點知都可以比人追番上黎. 次次都要打第三局, 仲要輸埋, 真係激死人, 究竟問題出係邊度呢??

2006年4月28日(五) 啤.....................

今日發生佐好多事令我好谷氣! 話說之前結婚個同事(代號K小姐啦)下星期就放假去蜜月, 一早同老細請佐假, 但係老細就遲遲未安排D野邊個跟. 前幾日K小姐同我呻, 話老細竟然仲問佢幾時放假, 話自己唔記得佐. 跟住問K小姐你安排佐咩人跟你D野未, K小姐同我講話佢都SHORT上腦架, 呢D野你做老細梗係你安排啦, 我點敢叫其他同事幫我做野呀!!

到佐今日星期五, 仍然係未安排邊個跟K小姐放假D野. 老細一早又叫佐我去傾計, 佢竟然又問我幾時LAST DAY, 話自己唔記得佐, 我真係唔知佢個腦裝咩架~ 跟住佢仲問我係咪confirm要走, 痴痴地架, 而家仲問我呢樣野? 我都無氣同佢講, 我話係. 佢就話下星期會有人上黎interview, 係D TEMP黎. 因為某某同事(C小姐)佢做開既野會transfer番比IS做, 所以安排佐C小姐遲D會接手我個位, 但因為C小姐果part要六月先正式交接, 所以呢幾個月會請個temp番黎幫手喎. (你都安排好晒啦, 仲問我係咪confirm要走, short short地)

好啦到差唔多放工, 都未交待K小姐D野點, K小姐忍唔住走去搵老細傾, 後尾傾完K小姐同我講「老細話係你喎~」, 痴線架? 聽講我走啦喎, 仲要我跟? 即使真係要我跟, 你都早D安排同我講呀, 我點記得K小姐D野點做呀?? 仲要借K小姐把口同我講, 自己就一句聲都無同我交待過!! 如果我同K小姐唔係叫做有D交情, 我真係下星期請病假話之你死呀!! 但我知若果我真係咁做, 我會好不負責任, 咁我同賤人老細有咩分別? 同埋如果我真係咩都唔理, K小姐放完假返黎一定會有排善後, 所以我唯有算數囉, 吞佐啖氣佢.

夜晚放佐工無啦啦收到公司司機RICKY電話, 佢話我老細搵過佢問我個手提電話(因為我同RICKY都係元朗出黎, 知道我地熟), 話有D公事上既野想問我. 好彩RICKY都醒目, 無比我電話佢, 打黎問佐我意見先. 我就當然叫RICKY唔好比啦. 而且都話老細個腦唔知裝咩架, 其實我之前明明比過我電話佢, 佢都有打過幾次比我. 好彩佢唔見佐我電話0者, 我都唔想聽佢電話呀~