2006年2月22日星期三

2006年2月11日(六)

今朝ANATA一早出佐去做野, 我朝早就睇番去旅行時錄低佐既America's next top model, 真係估唔到會淨番呢三個, 我覺得如果Lisa唔係D性格咁古怪, 可能冠軍果個會係佢, 因為佢一直既表現都好好, 但佢既行為就真係怪異佐D. 下午我出佐去join ANATA, 我地去佐Holiday Inn食tea buffet, 然後再搭船過灣仔睇婚妙展. 本來我想係酒店擺, 但四星級果D都五千幾蚊以上一圍, 仲未計酒水. 五星級果D就坐底成六, 七千蚊... 我諗最後可能都係揀番酒樓. 雖然ANATA話我鍾意就無咩所謂, 但無理由駛咁多無謂錢架麻. AE都有去婚紗展做promote, ANATA見個sales係咁落咀頭, 換飛行里數又好似幾抵咁, 所以都即場申請佐張AE金卡, 而且仲申請埋張附屬卡比我添喎, 好開心~ 不過我自己本身果張AE卡申請佐差唔多六年, 好似都只係用黎碌過一次卡...

2006年2月21日星期二

2006年2月6日(一) 放假後第一天開工~

尋晚先落機, 差唔多兩, 三點先訓, 今朝就要起身返工, 好慘. 本來打算請病假, 但今日一定唔請得, 因為過年後第一日開工, 係收利是既大好日子. 我地公司結佐婚既同事, 一朝早就會行勻全公司派利是, 我只要坐係位唔好走開, 就會不斷有利是派埋黎, 我要珍惜呢種感覺啦, 逗埋出年我就唔可以再逗利是啦, 嗚嗚~~

今晚返去先正式執行李, 發覺買既手信仲多過真係自己食既. 望住一大堆行李, 真係唔知點執, 好彩ANATA將D物件分好類, 咁就易執好多. 但我地都執到成點幾鐘.

2006年1月23日星期一

2006年1月23日(一)

仲有三日我就身處北海道啦, 好興奮呀~~ ?, 先旨聲明, 凡係託佐我幫佢買野既, 我唔擔保一定會買到返黎架~ 因為我地呢次既行程將會非常緊密, 同埋我地主要係觀光旅行, 而唔係去血拼, 所以未必會去果D名牌店, 化?品店等等. 所以買唔到既話唔好怨我... 同埋我絕對唔會買白之戀人返黎做手信架, 因為香港都有得賣, 我唔會山長水遠咁係日本拎返黎架, 同埋白之戀人做手信實在太行貨了. (同埋講真我唔覺得好好食喎...)

尋日去佐市中心行街, 度度都鬼死咁迫人, 但因為我仲未買雪褲, 星期日再唔買既話我就無時間買, 因為星期一約佐人食飯, 星期二要返學, 星期三要加班. 尋日去Columbia睇過, 特價佐都要成六百幾蚊, 好貴呀, 同埋senpai話六百幾蚊果條就唔係太好, 八百幾蚊果條就誇張得滯, 於是去佐間戶外旅行用品舖頭買佐條唔出名既牌子, 但都要五百幾蚊, 好貴呀~~~

2006年1月18日星期三

2006月1月18日(三)

抖佐差唔多一個月, 呢個星期又開學啦, 而家暫定係二, 四返學, 星期二果科係business process design for e-business; 星期四果科係corporate accounting. 尋晚果個tutor真係好恐怖, D英文難聽到暈, 我覺得佢應該係馬拉人, 因為佢既英文聽起上黎同我馬拉客D英文差唔多(都係咁難聽), 講野又「甩甩咳咳」, 淨係一開始講呢科既課程簡介, 對住張紙都講到口疾疾, 我真係頂唔順呀, 所以即刻上網轉tutorial班(呢堂係CSC上, 所以我地即使上緊堂都即刻add-drop科). 跟住講答案果陣佢就淨係照住張紙照讀, 真係好唔掂呀! 都唔知點解會搵D咁既人黎教既?

本來呢班tutorial有30個位, 上堂前只係得4個吉位, 上完堂之後再check, 吉位暴升至18個. 睇黎應該唔只我一個頂唔順...

(邊個匿名者問我做咩顎骨手術呀? 你蒲頭我就話你知, 哈哈~~)

2006年1月16日星期一

2006年1月15日(日)

週六我同senpai落佐屯門行街, 買佐部DVD recorder連160G內置HD, 3千蚊有找; 另外仲買佐個風筒同鬚刨.

週日我就留係屋企磨, 但呢兩日我既情緒病又發作, 唔知點解心情好低落, 但又講唔出係咩原因(會唔會D藥有影響呢?), 咩都提唔起勁去做, 有friends約我去碌bowling+食tea, 我都唔知點解唔想去, 最後都係0係屋企不斷上網搵旅行既資料, 終於都搵得七七八八了, 用佐好多時間同精神, 自遊行付出既代價真係...

SEM A既成績終於出佐, 兩科都係A, GPA=4. 希望SEM B果科accounting生生性性, 咁我今年既schlorship應該又有著落.

2006年1月13日(五)

星期五係公司annual dinner, 地點又係洲際酒店, 今年既菜色感覺比上年好佐, 同埋有我最愛既鵝肝, 好味道~~ 但果個椰汁雪蛤膏就唔得啦, 洗又洗得唔乾淨, 味道又唔好食...

記得舊年抽?抽到個爛鬼投射燈(我都唔記得塞佐去邊), 今年就咩都抽唔到. 不過呢度D?品就無以前元朗咁有睇頭啦, 買埋D什麼水晶手/頸鏈, VW電話繩, 名牌鎖匙扣(我覺得最鬼無用就係呢樣), 散子包, card holder, 鬼死咁多部MP3... 完全唔吸引.

完佐之後同同事夾份搭的士返元朗, 六折的士每人都係$31, 好抵~~

2006年1月13日星期五

2006年1月12日(四)

星期三, 四過佐非常難捱既兩日, 事緣係我因為身體出現某些問題, 所以要入院檢查. 11號5點鐘去到法國醫院, 上到病房就開始佐無聊兼漫長既住院生涯, 果日我全日淨係晨早飲佐杯麥片, 下午飲埋D粟米魚肚羹, 入院後食佐碗瘦肉粥就要開始禁食, 因為我第二日要照內窺鏡, 所以果晚仲要飲瀉藥, 果D瀉藥極度難飲, 陣味好難聞好攻鼻攻喉, 令人好想嘔, 而家諗番起果陣味都會作嘔, 好難頂~~~

食完碗粥一D都唔飽, 仲係好肚餓, 最慘係隔離床竟然買佐煲仔飯黎食, 好鬼香呀, 嗚嗚. 跟住我就刨旅遊書, 睇下電視, 十二點左右就訓覺啦.

第二朝六點半比姑娘叫醒, 因為仲要飲多半支瀉藥, 嗚嗚, 真係好難飲呀. 好辛苦咁飲完跟住再訓過, 訓到八點幾起身, 然後九點幾就落去做檢查勒. 做完之後十二點幾被推番上房, 可能D藥力未散, 個人好?, 於是衫都未換就攤落床訓到死佐, 訓到兩點幾先起身, 即刻去沖涼換衫, 因為差唔多成日無食過野, 餓到好頭暈, 手又震, 於是??臨問姑娘可以食得野未, 然後即刻叫佐個叉燒通粉同熱朱古力, 肚餓既時候真係食咩都好好味, 第一啖熱朱古力落肚果刻, 真係非常非常之感動, 覺得好滿足, 但可能係餓過頭, 好細碗既通粉都食唔晒. 食完成個人好?, 即刻又撻落床訓過, 訓到差唔多五點零六點起身, 睇陣報紙, 醫生就黎睇我, 結果如前所料, 係因為該原因, 其他一切正常. 於是等醫生填埋保險張claim form同等姑娘開埋張單, 交埋錢拎埋藥, 差唔多八點幾先離開醫院, 埋單多謝$12054.

總結:
1. 我住過兩次醫院, 上次整顎骨住政府醫院, 今次住私家醫院, 感覺真係好唔同, 服務其實就無咩大分別, 兩次D姑娘都好nice, 而我係政府醫院既主診醫生一向都好好人好nice. 但最大分別就係私隱, 政府醫院鬼咁開揚咩都比人睇到晒, 私家醫院就可以拉簾圍住自己, 又有電視睇~ 當然價錢都好大分別啦~~

2. 健康真係好緊要, 我寧願窮D, 都一定要健健康康, 兩次住院都食唔到野, 對我黎講真係好折磨, 你知我一向都為食架啦~~

3. 唔好問我因為咩野事入院, 我係絕對唔會講既!!

2006年1月9日星期一

2006年1月8日(日)

今日senpai要去CityU做大專盃既球証, 本來打算我等佢差唔多放工就出去又一城, 行一陣食埋飯先返去, 但因為天氣實在太凍了, 凍到我都唔想出街, 所以我最後匿埋佐係屋企. 但senpai出去搵錢咁辛苦, 我無理由匿係屋企嘆世界, 所以我就出去買菜返屋企煮飯. 但結論就係以我既「廚藝」, 煮出黎既實在唔係太好食...

呢排成日發夢夢見一D唔應該夢見到既人, 好煩呀~~

2006年1月7日(六)

嗚嗚, 呢幾日好凍呀, 凍到都唔想出街~

星期六同senpai出佐花墟球場, 因為佢下午要帶隊女仔比賽, 女仔打完之後我就同senpai去佐九龍灣拎旅行package. 跟住我地扮野去佐D旅行社拎章程, 想參考下佢地既行程, 新華果兩條腸粉, 團團都話淨番兩個位, 真係信佢先奇! 今時今日咁既服務態度.

之後我地再落番花墟睇男仔比賽, 唉, 隊元朗已經人面全非, 今非昔比啦, 都唔係以前果隊元朗了, 以前既元朗係我心目中係好勁架麻, 碩仔啦, 振宇啦, 阿Ken啦, 當然仲有senpai啦... 但自從senpai帶佐佢地上乙組, 唔再做教練之後, 再加上又加佐D新人, 而家隊元朗已經唔再係以前既元朗啦, 而家好似得番個無靈魂既軀殼咁, 黯然失色佐好多了... 好唏噓添. 第二局我諗如果唔係senpai客席做佐陣教練教佢地點攔網, 我諗佢地連第二局都輸埋了... 但第一局比人炒, 真係好肉酸啊~~ 以前既元朗只有炒人既0者, 點會比人炒架!~~ 仲要輸比庭木...

2006年1月3日星期二

2006年1月2日(一)

今日我地起身就去佐飲茶, 有我鍾意食既流沙包啊, 好好味~ 聽舅父講senpai個表弟撞車入佐醫院, 希望佢早日康復啦. 之後我地就去車站搭車, 過關恐怖又迫人就唔駛講架啦, 總算無驚無險返到香港, 好掛住屋企呀, 好明白咩野叫在家千日好~ 我地係大陸食佐幾日中菜, 返到黎香港即刻去食西餐.

總結呢幾日既中山之旅:
1. 我嘗試佐好多個第一次, 包括第一次坐電單車, 仲要一坐就坐三個人果隻, 真係好鬼驚; 第一次坐BENZ, 真係好鬼豪; 第一次食鹿肉, 好似羊肉咁; 第一次係大陸飲喜酒; 第一次「飲」VSOP; 第一次食青蛙; 第一次係外地過新年...
2. 去親大陸我都盡量飲少D水, 非必要都唔飲, 因為我好怕去果D??, 又臭又污糟, 好恐怖.
3. 大陸D人有錢果D真係可以好有錢, 但諗極唔明點解可以有錢成咁, 我通常既結論就係有錢果D通常都係貪污貪番黎, 否則比著一個普通人, 打份工/做生意又有咩可能可以咁有錢...
4. 呢幾日每日都日食夜食, 餐餐都大魚大肉, 原來都幾辛苦, 所以我呢幾日要食番D清淡D既野~~