2009年10月10日(六) -- Day 1: 湯滝, 湯之湖, 鬼怒川溫泉, 返酒店

睇完龍頭瀑布, 就再搭巴士去下一個景點 -- 湯滝.

落佐巴士之後要行一段山路:

黎到湯滝啦:

沿住呢條山路上去, 就可以到達湯之湖:

 

個湖唔係好大.

 

 

 

我頂呀, 黎到呢度我部相機又無電啦! 明明見到D紅葉好靚架麻, 影唔到!!! (我已經好就住黎影架啦, 好明顯舊電已經嚴重depreciated)

睇完湯之湖就搭巴士返東武日光站, 再搭電車去下今市轉車去鬼怒川溫泉站.

我今日都唔知發咩神經, 平時旅行懶醒既我, 今日竟然多次出錯, 差D延誤佐行程. 首先我今朝早放佐D行李係locker架麻, 回程時完全唔記得攞番, 仲施施然咁上車. 架電車54分開車, 我53分先醒起, 即刻衝返出車站開locker, 然後又跑返上車, 好彩又比我趕得切. 你知日本D電車架啦, 有時一個鐘頭先得一班車, miss佐就麻煩啦.

上佐車之後唔知係咪驚云未定, 明明落車既站叫下今市, 我十吓十吓咁早佐係上今市落佐車, 我仲奇怪點解個車站咁荒蕪, 連車長都問我係咪要係度落車. 好彩我又趕得切衝番上車, 真係白痴呀~

最後安全地去到鬼怒川溫泉站, 又大風又凍, 間死人cheap酒店又唔知係邊(有地圖係手都搵唔到, 因為間酒店唔0係大街, 都唔知邊度有路可以行上去), 連想搵個人問吓都無. 行佐成半個鐘先去到酒店.

好騎呢, 日本溫泉區既酒店, 無啦啦有兵馬俑:

 

間房係幾大勒, 不過...

 

好嗱渣呀, 被舖上面竟然痴住好多頭髮架!!!:

唉, 15,000円一晚既酒店, 仲嗱渣過我去泰國時住果間cheap酒店(鬼叫你一個人黎住咩, 都無其他酒店肯比你訂)... 算啦, 落去食飯先, 酒店包佐早, 晚餐的.

嘩, 一個人六餸一湯, 勁!! (其實應該係兩人份量黎既, 不過我得一個人黎住咁解啫):

仲有生果喎(但唔係太好食):

可能太肚餓(我無食lunch呀), 或者可能呢餐係中華料理幾啱胃口, 我竟然掃晒枱上面既食物...