新鮮熱辣@墨魚燒賣: 1/10/2009

2009年10月31日星期六

2009年10月24日(六) -- 河口湖之旅 Day 1 (part 5) -- 奇蹟出現

既然行到上山頂都係搵唔番, 咁就唯有落番山啦. 流沙包好似仲未放棄咁, 繼續低頭搜索, 又踢吓D落葉去搵, 所以我行得比流沙包快.

行行吓突然間流沙包嗌住我, 大叫"搵到啦!", 吓? 我即刻衝埋去睇吓, 仲好白痴咁反問"係咪我地架, 會唔會係人地跌架?", 到我確認埋戒指上面刻住既紀念日期, 兩條白痴仔就係山上互相擁抱(好彩果陣無人行過, 否則會見到兩個香港黎既傻仔唔知係山上做乜)

說實在我真係無諗過可以搵得番架, 因為咁既環境, D樹葉遮住晒個路面, 唔通要逐塊樹葉踢開去搵?

流沙包又好野在唔放棄, 佢話行吓行吓見到有堆好大堆既樹葉, 於是去踢吓佢, 點知聽到一下金屬聲, 於是佢繼續係堆樹葉度踢, 終於比佢搵番隻戒指啦~ 我都覺得係奇蹟呀!

流沙包話搭纜車上番山既途中, 佢祈禱希望可以搵得番隻戒指, 如果搵得番就會更加錫呢個老婆(咁即係如果搵唔番可以對我差D?); 就算搵唔番, 佢都相信神既安排咁話喎.

雖然我無宗教信仰, 但如果祂真係存在的話, 我都很感謝祂.

2009年10月30日星期五

2009年10月24日(六) -- 河口湖之旅 Day 1 (part 4) -- 嗚, 唔見佐隻結婚戒指...

我地搭纜車落番山後本來打算搭巴士去下一個景點, 點知等車果陣我發覺流沙包條運動頸繩個扣鬆佐. 流沙包一向將隻結婚戒指穿喺條頸繩度, 個扣鬆佐, 即係隻戒指已經唔見佐.

明明本來大家既心情都好愉快, 果刻當堂晴天pig pig. 一來隻戒指都唔平, 要HK$6,500; 二來即使返香港買番, 都已經唔係果一隻啦, 配番都好似無咩意思.

我地即刻諗吓到底會係邊度唔見, 最大可能應該就係天上山公園, 因為當時天氣太凍, 我曾經係山上將隻手塞佐入流沙包既衫領取暖, 估計可能就係咁整甩佐佢條頸繩個扣.

於是我地上番山嘗試搵番隻戒指, 但當時我心諗, 機會都好渺茫, 一來其實我地都唔肯定隻戒指係邊度唔見; 二來就算隻戒指確定係天上山公園唔見, 但要喺滿山落葉既山路中搵一隻戒指, 仲要我地沿途行佐唔少山路, 真係mission impossible...

但唔搵又好似對唔住自己, 所以我地沿住頭先行過既山路再行一次, 完全係大海撈針咁...

通地都係落葉, 點搵呀...?: