沖繩七天之旅 Day 1 -- 24 March 2013 (SUN)

2013年3月中去完星馬, 3月尾再去沖繩.

因為早前心情欠佳, 又要應付QP考試, 所以沖繩之旅既BLOG一拖再拖都無mood寫...

今次係繼2012年歐洲之旅後既家族旅行, 可惜今次五缺一, 墨魚妹夫剛剛轉咗新工, 唔係太方便請假.

去沖繩有2間航空公司, 我地穩陣起見都係搭番港龍. 另一條airline既機票係平D, 但成日聽人講會delay, 時間就係金錢嘛, 搏唔過囉...

 

去到沖繩, 即刻有雨水迎接我地... 好彩雨勢又唔算好大. 不過由國際線大樓行去國內線大樓搭單軌列車要經過室外地方, 我地拖住喼又落住雨, 有D論盡咁.

那霸機場唔係好多國際線, 我見主要都係飛香港同台灣, 所以國際線大樓超級細同簡陋, 同國內線大樓簡直係天淵之別:




我地要搭單軌列車去酒店check-in先, 去到那霸空港駅, 即時買咗2-DAY PASS, 每張1,000円:

那霸空港駅係全日本最西面既車站:

 

 

我今次book既酒店喺おもろまち站(即係有DFS果個站), 酒店名係Libre Garden Hotel, 我book呢間酒店主要有幾個原因:

1.酒店所有房間都有free wifi (但唔知點解第一日用唔到wifi, 問過staff佢地又幫唔到手. 好在lobby都有兩部電腦比住客用)
2.價錢唔算貴, 雙人房價錢每晚約7,000円
3.車站徒步只係5分鐘
4.酒店附近有DFS, shopping mall如Naha Main Place (行路5分鐘可到, 好近), 仲有遠少少既天久樂市(有Sports Depo, 24小時超市, BEST電器, 無印良品同埋Uniqulo等等. 不過原來酒店行去係好遠的. 我地都係揸車去), 啱晒我呢D驚夜晚訓唔著都可以有地方行吓既人
5.酒店對面既DFS就係租車公司, 攞車還車都方便D

我地既酒店係中間米白色最高果幢建築物, 而左手面就係DFS:

 

房間都算企理:
 

 

頭先喺機場拎咗一大堆地圖/小冊子/優惠券之類:

 

我黎日本之前一早book咗聽朝出海睇鯨魚, 點知一去到酒店, 收到觀鯨公司張fax, 話因為天氣惡劣關係, 聽日既觀鯨活動全日取消! 我真係晴天pig pig!! 我雖然有7日時間喺沖繩, 但中間有幾日我地會北上, 唔會留喺那霸. 要改觀鯨日子, 我就要再plan過部份行程 (我係果D唔浪費一分一秒, 所以會將行程plan得好緊密既人. 所以臨時改行程的話, 對我黎講係幾麻煩). 但無辦法, 唯有打電話去再約, 想改後日26號, 但係已經full晒. 唯有約30號, 同時間要求對方如果26號有人cancel booking, 請佢打電話去酒店通知我地, 我地想後補上.

放低D行李再洗個臉, 我地正式出發~

間唔中有D霧氣噴出黎, 唔知係咪消暑用呢?:

 

本來諗住今晚喺酒店附近既shopping mall行吓就算, 想早D抖 養足精神聽朝一早出海觀鯨. 改咗行程後, 唯有聽日改去outlet(本來outlet諗住day 6先去, 因為有車), 而本來plan咗聽日去既國際通同小祿JUSCO, 就改做今日去.

趁未天黑, 我地先黎到遊客必到既國際通行吓 (可以搭單軌列車喺県庁前站或者牧志站落車都可以), 好多人話國際通賣既野比其他地方貴, 所以我地多數得個睇字, 無咩買野. 同埋果度D舖頭, 10間有8間都係賣類似既野, 無咩特色. 呢個時候又落雨了... 

 

 

身為卡樂B粉絲既我, 黎到沖繩, 一定要參觀呢度 - 卡樂B專門店:

超超超大包薯片:

 

即炸薯條, 我好鍾意食呢個款架~~ 可惜有人唔比我買黎食囉, 話熱氣喎, 又話好快就去食晚飯啦喎... 哼!:

黎沖繩必試既食物之一: 鹽味雪糕~ 仲有好多款topping比你任落.

行行吓街, 我地買咗呢個小食試吓 (我覺得有D似牛脷酥), 不過我覺得唔好食囉...:

台灣人勁愛既花笠食堂, 鍾意跟風既香港人當然都有追捧, 我呢, 影張相算啦... 無幫襯.

黎到第一牧志公設市場附近既乜通物通, 第一牧志公設市場逢每月第4個星期日休息, 咁啱就係今日. 不過我睇過D旅遊書同其他BLOGGER既評價之後, 覺得唔去都無損失.

 

行完國際通, 我地搭單軌列車去到小祿站, 主要係去果度既JUSCO食飯, 同埋行吓超市入貨 (墨魚妹話日本買貓零食平好多, 指明一定要為佢3個仔女黎超市入貨).

今晚既晚餐喺food court食(我食咗すき家既芝士牛肉飯, 好味道~), 無咩特別:


今日既戰利品, 主要購自超市, 100円店+藥房: