返佐黎香港一星期, 忙到七彩, 真係無時間去update個blog.
係公司忙到完全無停手, 而家忙緊tax, 56A,B同埋company secretary既job, 再加上好多突發性既野, 手頭上個tax computation斷斷續續計佐3日先計得完.
係屋企就忙執野, 係日本買佐好多衫返黎, 但係衣櫃根本唔夠位擺; 同埋好多書呀, 精品呀, 都唔知擺去邊好; 加上要整理D手信, 唉, 睇見間屋就心煩.
返到香港當然有少少懷念日本既生活啦, 最大感受就係覺得香港天氣好差, 同埋覺得香港人好無禮貌, 連D店員都係, 好似果日去薯嘜通想將舊SIM卡既資料過落張新SIM卡, 個店員一開始已經目無表情, 佢後尾行開佐幫我去整, 搞掂之後粒聲唔出將兩張卡遞番比我就算, 正常黎講都應該講句"整好架啦小姐"吓麻? 星期五去銅鑼灣聘珍樓食飯又係, D侍應既態度好似茶餐廳伙記咁, 真係O咀, 令我更加懷念尖沙咀聘珍樓(詳情稍後再講).
同埋係日本返黎之後, 真係勁勁勁討厭D人一路行街一路食煙. 香港既路已經又窄又多人架啦, D人仲要一路行一路噴二手煙, 完全唔會理其他人既感受架喎. 條街鬼咁窄, 好難先可以超前佢唔駛兜口兜面食佢既二手煙, 點知原來再前面果個都係度噴緊煙, 真係吹脹...
返到香港後暫時我有兩樣野無晒興趣去做, 第一係行街, 真係完全無mood係香港行街, 果日有事要去屯門市中心, 之後諗住順便行吓屯門市中心先去食晚飯, 但係覺得超悶囉, 對香港既野完全無興趣.
第二係完全無興趣睇香港既電視, 以前就算我唔係追睇電視, 但習慣性地一返到屋企就會開著個電視機令間屋有D聲氣; 但而家我返到屋企後, 可以係成晚無開過部電視囉, 有時最多係訓前睇埋晚間新聞, 或者一朝早起身睇天氣既時候先會開著部電視.
另外尋日放工後搭地鐵去尖沙咀, 白白痴痴地竟然唔記得應該係邊個站轉車, 我由上環到佐中環站, 我猶豫佐一陣, 係度諗到底係中環站落車定係應該金鐘站落車, 好白痴... 同埋望住D地鐵線, 好低能咁諗"紅色線係丸之內線, 紫色係半藏門線..."
沒有留言:
發佈留言