2010年3月21日(日) -- 惡夢之南房総之旅 part 2: 又貴又唔掂既旅館

經過七小時既等待加車程, 我地終於係下午五點左右到達御宿既旅館, 大野莊.

 

 

 

 

房間可以望到少少海景:

 

旅館收費每位15,750円, 雖然我知三連休價錢係會貴D, 但無諗過每位萬幾円既收費, 間旅館竟然咁唔掂架囉...

 

1. 入到旅館正常係除鞋換拖鞋, 阿媽問我駛唔駛自己放上鞋櫃, 我仲話唔駛啦, 旅館既人會幫你, 唔駛自己郁手架(我之前住既旅館一向都係咁架麻, 當然我知民宿除外啦). 但係對鞋原來無人幫忙放入鞋櫃, 要自己動手.

2. 房間面積小

3. 感覺不是太乾淨, 榻榻米有唔少跡係上面囉...

4. 房間洗手盤竟然無熱水供應, 想用暖水洗面就要落2樓既共用洗面所

5. 早餐同晚餐一早擺定晒出黎, 好多都已經擺到凍晒

 

 

好啦, check-in後返房放低D野, 我地就出酒店行吓. 呢度既名所係月之沙漠, 趁日落前我地落沙灘行佐陣.

 

 

 

 

 

 

 

 

6點鐘就要返旅館食晚飯, 去到已經見到全部野放晒係枱面, 唔係逐少逐少拎出黎果隻...

 

 

 

呢間旅館話係飽魚同龍蝦專門之宿, 我book房果陣揀佐龍蝦餐, 但係一早整定晒出黎, 隻龍蝦已經凍晒囉.

 

呢餐味道普通, 我就話對呢D日式晚餐食到厭厭地啫, 但我都聽唔到阿媽一路食一路話好好味囉...

 

甜品係好騎呢既乳酪加藍莓汁, 好似襯早餐啱D喎.

 

食完飯嗱嗱臨去風呂沖涼啦, 呢度男/女風呂各一, 係貸切風呂, 入到去可以自己鎖門唔比其他人入黎. 但係女果個"月之沙漠風呂"去到22:00就會男女兼用(因為男風呂22:00後就close). 即係話如果唔好彩, 都唔知要等到幾多點先等到無人用緊, 所以我地一食飽飯就即刻去風呂.

 

初初book酒店果陣寫到個風呂係"表現到浪漫既月之沙漠既風呂", 點知打開門一睇, 呢個所謂既"月之沙漠風呂"... 我送一個字比佢:

 

A. 超~

B. 唓---

C. 吓? 

D. 頂!

E. X (請自行填上)

 

沖完涼返房撻落床即刻就訓得著, 我今晚未夠9點半就訓啦, 真係精神上同肉體上都好疲累呀...