22號(一)係日本假期, 係我在日既最後一個3連休, 加上阿媽黎佐日本, 諗住陪佢去個兩日一夜旅行開開心心玩吓啦.
呢個時期櫻花又未開, 諗住去千葉縣睇菜花啦, 一早plan好行程, 點知...
點知日本呢幾日強風, 好多地方因為強風關係火車停駛. 我本來打算搭9:30既特急さざなみ3号由東京出發, 85分鐘就去到千葉縣既浜金谷, 然後諗住搭纜車上鋸山觀光, 之後再去南三原站附近既Rosemary Garden, 最後先返御宿既酒店架麻...
但係強風影響下, 我本身打算坐既特急列車停駛, 只可以搭普通列車, 唯有由東京站搭京葉線去到蘇我(果陣九點半, 京葉線都係剛剛重開), 再係蘇我搭內房線去浜金谷啦.
張特急券用唔著啦, 最後退番錢:
張特急券用唔著啦, 最後退番錢:
由東京坐普通列車去到蘇我差唔多用佐成粒鐘, 之後係蘇我再轉內房線, 我諗住火車都可以重開勒, 應該無問題啦, 點知搭佐成粒鐘後, 就喺距離我地既目的地浜金谷前既3個站, 架火車停低佐, 職員廣播話強風關係, 火車唔可以再前進, 於是成車人就唯有係車箱內呆坐, 由11點幾開始, 一路等.. 一路等.
由於火車唔可以繼續前行, JR話會安排巴士接送乘客去館山站; 而我地坐緊既火車則會返轉頭駛番去千葉站. 結果, 我地由11點幾等到兩點幾, 足足等佐兩個半鐘, 架巴士先到, 部份人落車轉巴士繼續前往館山, 而我就一頭煙勒...
係呢個佐貫町站等佐兩個半鐘...:
咁既情況下, 火車停駛, 班次亂晒, 我知道今日唔可以繼續原先plan好既行程, 當時既選擇只得兩個: 一係回程返東京 放棄旅程; 一係就直接去酒店. 呢個係我喺東京最後既三連休, 唔想就咁嘥佐, 於是我決定繼續行程.
決定繼續行程後, 又要作出選擇, 因為我地今晚住既酒店係御宿, 係千葉縣既東面, 但當時我地滯留既地點佐貫町係千葉縣西邊. 我地一就係落車轉巴士去館山, 再係館山諗辦法去御宿; 或者唔落車, 架火車回程駛返千葉站途中, 係蘇我落車, 再係蘇我轉外房線去御宿.
係咪好複雜咁呢, 可以參考吓以下呢個路線圖(按圖放大):
當時我選擇佐後者. 因為如果揀前者, 搭巴士去到館山的話, 係館山都唔知有無車可以繼續行程, 因為條內房線當時停駛中. 如果揀後者返蘇我, 到時如果連外房線都停駛埋, 咁都仲有後著可以由蘇我搭車返東京麻.
原車駛回頭返回蘇我之後, 已經係下午3點幾, 我地係蘇我再等外房線, 因為班次亂晒, 我地等佐3, 4個字先有車, 不過架車只係去到大原站, 去到大原又要再轉車先去到御宿站.
結果, 我地今日9點半由東京出發, 到下午五點先去到酒店, 歷時七個半小時, 救命呀~~ (正常黎講, 搭特急的話只需個半小時; 就算搭普通列車, 車程都只係2個半小時)
唉, 終於黎到:
往酒店途中:
我地今日無食過lunch, 好在我次次旅行都會帶定一大堆乾糧上路, 否則喺車上餓死佐啦... (我無所謂呀, 驚阿媽頂唔順呀)
本來一心諗住帶阿媽去個短trip, 點知遇著咁既天氣, 唉...
御宿既酒店留番一下篇blog先出啦.
沒有留言:
發佈留言