2010年3月19日(五) -- 開蓬觀光巴士遊東京都心

好耐之前, 我同事話某日係公司附近見到有雙層開蓬巴士駛過, 得知呢架觀光巴士, 問我有無興趣坐, 我當然話有啦. (其實本音係興趣不大) 於是同事就話搵日一齊去搭.

 

但係同事Ms S佢本身好忙, 我又好忙, 夾黎夾去都搵唔到時間可以一齊去搭.

 

上星期同Ms S及另一個舊同事Mr Y一齊去食しゃぶしゃぶ, 席間Ms S同Mr Y講, 話應承佐同我去搭觀光巴士, 但我研修期都就黎完, Ms S都無辦法抽到時間同我去, 於是叫Mr Y不如陪我去搭啦. (Mr Y而家為佐應付考試, 全職在家溫習)

 

加上同事知我阿媽黎佐日本, 於是就話叫埋我阿媽, 三個人一齊去搭勒.

 

Mr Y佢負責預約巴士, 最後預約佐19號15:40開出既班次, Ms S佢話請示佐社長, 可以比我返返吓工走出去搭觀光巴士, Yeah!!

 

出去之前, 公司同事買佐便當係公司一齊食:

 

上車既地點係東京駅三菱ﾋﾞﾙ前, 上車前我要搵樣野先...

 

就係搵呢堆鬱金香花花啦, 我一兩日前睇電視, 知道丸之內ﾋﾞﾙ附近擺設佐好多鬱金香, 所以上車前爭取時間影幾張相先.

 

 

而家只係3點幾, 都好多人圍住晒影相, 如果放佐工先黎都唔知咩環境...

 

好啦, 夠鐘上車:

 

 

 

今日天氣並不是太凍, 應該有十一, 二度左右, 但沿途D風係咁吹, 都咪話唔甘...

 

我地搭既呢條線會經過皇居, 東京鐵塔, 台場, 築地, 銀座, 兜一個圈最後返番東京駅, 車程約1小時.

 

點解大廈天台會有鳥居既?:

呢個角度影東京鐵塔, 真係未試過:

 

 

 

去台場呢段係高速公路, 吹到人都顛, 好鬼凍呀~~~

 

 

 

 

黎到銀座啦, 呢個歌舞伎座, 果日睇電視好似話會重建定改建:

 

呢程巴士每位收費1,700円, 抵唔抵就見仁見智啦...

 

SKYBUS TOKYO巴士資料

 

搭完車, 同阿媽及Mr Y去食碗拉麵, 我就要返番公司, 阿媽就係銀座行吓街等我放工.

放佐工之後, 帶阿媽去香港人必到既景點: 二木之菓子.

 

一去到二木之菓子門口, 我同阿媽講, 呢度係香港人必黎架, 點知話口未完, 剛剛入到舖頭就即刻聽到廣東話, 裏面果然勁多香港人, 哈哈.

 

今天旅程完畢.