見到Theresa

星期三朝早八號風球, 但係晨咁早十一點幾就落佐風球, 所以下晏都要返工.

 

放佐工約佐人係尖沙咀食飯, 係海港城三樓賣電器果層見到Theresa同埋佢既助手經過, 我同佢地迎面而過, Theresa個樣同上鏡差唔多, 無咩大分別, 不過佢個樣真係好假, 佢呢期扮日本娃娃(有人話佢抄日本呢期好紅既model Lena Fujii), 個妝好白, 胭脂好紅, 我覺得D粉勁厚. 總之成個樣就好假啦, 同埋佢個表情好cool.

 

一路上都好多人認得佢, 好多人回頭望.

 

我記得兩年前仲係尖沙咀返工, 放工果陣係海防道見過陳冠A, 真人好矮, 完全唔靚仔, 當時佢既衣著係板仔look, 佢果陣既表情都係一路行一路咀藐藐咁, 個樣係串串貢.

2008年6月22日(日) -- 海鮮打邊爐

今日上佐姚姚同碧蓮屋企打邊爐, 特別在我地今次打邊爐既主菜係海鮮, 今晚既海鮮有鮑魚, 生蠔, 魷魚, 蝦, 蟹. 好豐富呀~

 

食到好滿足, 每人都只係夾$93, 好抵呀~

 

不過就辛苦晒主人家又要洗又要執野.

2008年6月22日(日) -- 好討厭既牆上粒粒呀!!

每一年既3~5月, 回南天, 濕氣重, 濕度高, 又成日落雨, 牆上面就會"吽"出好多黑色/啡色既一點點蟲仔, 我都唔知佢既學名係咩, 但係每年既呢個時候, 總會係牆上面, 天花板, 或者一D木製東西上面出現, 好討厭呀!!! 之前有人教我地用布濕D漂白水黎抺牆, 因為聽人話呢D黑色粒粒蟲係靠霉菌黎生存, 用漂白水抺走牆上面既霉菌, 就可以將呢D粒粒趕絕. 

 

於是我今日就係屋企對付呢D討厭既粒粒, 我先用吸塵機吸走晒D粒粒, 然後再用浸過漂白水既布抺牆身, 呢D野都唔知係邊度"爛"出黎, 都唔明點解吸完之後, 明明見度果個範圍內係無晒粒粒, 轉過頭返黎睇睇, D粒粒又出現返! 佢地係邊度出黎架? 就算係D櫃後面爬出黎, 都無理由爬得咁快架? 激死人!!

 

到底點樣可以將呢D野趕盡殺絕呀? 年年都要大屠殺一次, 好煩呀!!

 

旦王花 - 泰越鍾情

地址: 元朗錦上路148號地下

電話: 2488-3263

 

流沙包細妹因為生佐BB, 所以最近買佐車, 因此佢地開始衝出卓爾居, 而家會去唔同既地方食飯(以前過時過節食飯只會係卓爾廣場食, 唔係裕滿人家就係美心(未執前)/麗都酒樓.

 

早前佢地睇過飲食男女介紹新界食飯好去處, 繼之前我地去佐位於屯門藍地既季季紅(話食燒乳豬好出名喎, 但我地食完唔覺得有咩特別), 今次我地就去佐位於錦上路既旦王花.

 

呢度係露天既, 有D園林, 有D水池咁, 食物我覺得無咩特別, 都係泰國餐廳可以食到既野, 佢特別在有D冰鮮海鮮可以比你揀, 即場燒比你食. 除此之外我唔覺得呢度有咩賣點, 食物又唔係特別好食. 同埋我覺得都幾貴, 我地七個人, 埋單成二千蚊.

 

2008年6月21日(六) -- 卡斯柏王子

因為有兩張免費戲飛, 所以出佐尖沙咀港威睇戲, 其實我對呢類"王子, 魔法, 森林, 歷險"既題材無咩興趣, 不過有免費飛, 一看無妨.

 

成套戲無咩特別, 無咩特別悶, 又無咩特別驚險, 成個故事好鬼簡單, 時空交錯既情節, 我覺得好似多此一舉, 同埋又交待得唔清晰, 點解果四個所謂國王, 皇后會變晒做細路? 蘇珊對卡斯柏講自己比佢老1600歳, 係佢地係英國既現實世界不斷輪迴, 但記憶依舊, 所以佢地個樣係細路, 但因為記憶依舊, 所以有千幾歳?

 

本來諗住睇完戲就行尖沙咀, 然後係TST食埋飯. 但係流沙包屋企人突然打黎話今晚去錦上路食飯, 於是我地睇完戲無耐就要搭車返入新界勒.

自製蕃薯糖水

上星期突然心血來潮想整蕃薯糖水, 於是去街市買佐四個蕃薯加少少芋頭.(咁就廿蚊, 唔知有無比人呃秤呢?)

 

返到屋企將D蕃薯同芋頭去皮, 切細, 連埋薑片, 放晒落煲, 最後落埋冰糖, 搞掂.

 

原來蕃薯糖水好鬼易整, 整完當晚餐食, 廿蚊糖水煮到一大煲, 可以分好多餐食, 好抵!!

 

瑞樵閣 Chesa@半島酒店 -- 溫馨的晚飯

地址: 尖沙咀彌敦道19-21號半島酒店1樓
電話: 2315-3169

流沙包6月15日生日, 但果日佢要帶隊, 之後就同埋D隊員一齊搞野, 所以我就6月13日同流沙包預祝生日. 我果日仲帶埋小花一齊去, 所以我食晏果陣就同小花係office影佐幾張相.

我揀佐係半島既Chesa食瑞士菜, 我地只係點佐四樣野, 分別係goose liver, 芝士火鍋, lamb, 同埋甜品.

個goose liver我覺得就麻麻地香, 不過都好食既.

芝士火鍋我地叫佐Fondue a la saviesanne, 個火鍋有bacon係裏面, 配面包同薯仔一齊食.

仲有個羊架, 好味~

甜品: 我預先訂佐, 有寫名架~

餐廳附送既甜品, 都好好食, 尤其是左手面果隻, 正!

成餐飯又唔貴, 但已經食到好飽啦~ 同埋餐廳氣氛又好, 食得好舒服, 相比兩年前係洲際既Spoon同流沙包慶祝, 果餐飯我就覺得比較拘謹. 不過美中不足係當晚既其他食客有D嘈, 我地後面坐佐枱7~8個人既女仔, 成晚傾計傾到鬼咁大聲, 嘈喧巴閉, 我擰轉頭望佐佢地一眼, 佢地當中有人即刻好大聲咁講:「喂, 有人嫌我地嘈, 望住我地呀」. 我唔係話五星級酒店餐廳唔可以傾計, 但唔該唔好成日高聲呼叫大笑大嚷, 請尊重自己尊重別人呀~~ 如果呢度係茶餐廳, 我就理得你呀. 但係D高級餐廳, 唔該比少少manner哩~?

送給流沙包的壽包

流沙包6月15日生日, 所以早幾日買定佐半打壽包送比流沙包(流沙包佢鍾意食壽包).

個包好大呀, 拳頭咁大個~

日本語分享1

1. 講D野你聽呀~:

 

聞いてくれる。

 

2. 改變佐主意:

 

気が変わった。

 

3. Leave me alone:

 

ほっといてよ。

 

4. 呢個係咁, 果個又係咁!:

 

どっちもどっちだ。

 

 

 

 

2008年6月9日(一) -- 深圳揼骨

開估: 長洲餐海鮮餐埋單總共$1,620.

 

我地一行八人約佐係落馬洲等, 大約凌晨兩點左右上到深圳, 我地去佐水立方. 由於端午節假期既關係, 係超超超多人. 我地沖完涼上大廳, 根本就無晒位, 於是唯有上房揼住骨先, 不過D房就無晒雙人房, 於是就全部人都係單人房度揼(好悶呀, 無得傾計).

 

揼完再落大廳睇睇, 仍然係咁多人, 於是我地就去打麻雀, 由凌晨四點幾打到朝早八點, 打完落到大廳睇睇, 終於有位坐啦, 於是我就做埋腳底按摩, 然後訓覺.

 

我訓到下午一點鐘起身, 然後就睇電視, 狂食生果, 我一年夾埋都無今日食咁多生果. (呢度既生果都算幾多喎, 有火龍果, 西瓜, 哈蜜瓜, 蘋果, 香蕉, 雪梨, 蕃石榴, 蕃茄仔, 梅, 仲有D生果我都唔知叫咩名)

 

食完生果後其他人都仲未起身, 於是我就周圍行行企企(想打乒乓波又有人打緊, D電影又唔好睇), 於是又再搵個位繼續訓, 訓到四點幾先起身沖涼埋單返香港.

 

今次去既呢間水立方算幾新, 聽講係新開佐五個月, 裝修幾靚, 環境幾好, 地方幾大, 服務唔錯, D staff都有禮貌, 態度幾好幾醒目. 不過今次去實在太多人勒, 簡直係困獸鬥咁. 下次都係唔好大時大節上黎好D, 或者星期五上黎既話唔知會唔會好D呢?

2008年6月8日(日) -- 長洲食海鮮

星期日一大班人入佐長洲, 因為其中一個friend既阿媽係長洲做, 所以成班人一齊入去食海鮮, 同埋諗住過番晚夜.

 

我地傍晚入到去, 由於部份人係果朝早都仲未決定入去食完海鮮過唔過埋夜, 所以我地無訂定任何酒店/渡假屋, 到我地入到去決定佐幾多人會留底過夜既時候, D渡假屋已經full晒, 住酒店又無咁多間房, 所以唯有食完海鮮就搭船返番出去.

 

講番餐海鮮先, 超正! 有瀨尿蝦, 黃金蝦, 粉絲蒸扇貝, 鮑魚, 魚, 蟹, 蜆, 洋葱焗蠔, 同埋一個秘製骨.

 

瀨尿蝦, 有膏架, 好味!

 

黃金蝦, 熱辣辣.

 

鮑魚, 超大隻, 但一D都唔靭.

 

個蠔超好食, 我第一次食咁樣整法既蠔, 佢連埋洋葱一齊焗, 連D洋葱都超好味, 我平時唔多食洋葱, 都忍唔住夾完再夾.

 

我地total十個人去食, 大家估下呢餐埋單幾錢? (下一篇blog開估)

 

飲飽食醉之後, 我地就唯有搭返船出黎啦, 但當然唔係各自各返屋企訓覺啦, 我地即刻改變計劃, 決定齊齊去深圳揼骨. 於是大家落船之後, 就call的士由中環返元朗/屯門返屋企擺低D野先, 然後再約定係落馬洲等.

2008年6月4日(三) -- body check

以前係舊公司, 每年都包一次body check, 唔駛自己比錢. 但係離開佐舊公司之後, 就要自己比錢做.

 

本來我之前上網睇過, 都諗住去番上次公司body check揀果間, 因為我覺得佢地既服務, 診所環境都唔錯. 不過後尾多口問佐其他人有無好介紹, 有人就介紹佐另一間比我, 幫我book埋, 所以我上去間診所之前, 我都唔知個plan包括D乜野.

 

上到去先知個plan係$880, 只係包D好基本既野, 無check cancer, 又無得照乳房, 我自己加錢照, 最後埋單要$1,480. 早知都係幫襯之前自己搵果間...

 

同埋今次去既呢間診所, 我既感覺係麻麻地囉, 好多人等, 所有野都好似好趕急咁, 下次我唔會再幫襯lu, 又唔係平.

 

17號去拎report~

2008年6月1日(日) -- 成班爛賭鬼

尋日食佐個tea buffet, 尋晚無食飯. 今日就連早餐及午餐都唔駛食, 淨係三, 四點果陣食佐幾塊餅塊而已.

 

今晚一班人上佐振宇度玩, 本來諗住一齊食飯既啫, 點知成班都係爛賭鬼(包括我), 掛住打麻雀同玩啤牌, 所以最後都係叫外賣上黎食.

 

今晚手風麻麻, 都無咩食糊, 輸佐少少錢...

Project Runway Season 4

我追佐好耐既Project Runway終於都完佐呢個season. 我一直都睇好Christian架啦, 佢雖然得廿一歳, 但真係非常之有天份, 好有才華. 雖然有時佢既表現係有D囂張, 有D目中無人, 但因為佢實在太出色啦, 有D designers同佢比真係即刻遜色好多. (例如我覺得成日喊果個Ricky, 簡直係笑話, 根本就唔夠班, 咁遲先out真係奇蹟...)

 

所以最尾呢一集真係睇得好緊張, 我淨係坐係屋企睇, 見佢地係台上面等宣佈winner果陣, 我個心都跳得好快, 真係好緊張. 宣佈Christian勝出果刻, 我直情尖叫佐出黎~

 

倚窗閣 The Window Cafe -- tea buffet唔錯~

地址: 尖沙咀彌敦道19-21號九龍酒店2樓
電話: 2734-3803

 

今日同流沙包去佐尖沙咀九龍酒店食tea buffet, 好似係$188位. 幾多野食喎, 連甜品都有好多種, 我覺得好抵食.

 

食完飯之後落佐旺角行街街.

 

我食buffet食到好盡, 所以今日夜晚唔駛再食飯.

2008年5月30日(五) -- 萬世歌王 疑似好睇演唱會

今晚同流沙包去佐文化中心睇詹瑞文, 詹瑞文真係一個好出色既表演者, 成場show三個幾鐘, 只有佢一個人係台上, 無對手, 只有些簡單的佈景與道具, 但係就可以帶動觀眾既情緒, 掀動全場既氣氛. 佢扮果樣似果樣, 同埋佢既演澤方法, 有時真係估佢唔到.

 

不過, 尾段發生佐D不太愉快既事件, 係尾段, 詹瑞文好慢好慢咁由台側行去台中間支mic stand度, 竟然有幾條友係度大嗌:「行快D啦!」, 仲要嗌佐兩次. 聽把聲應該係D十零歳既死0靚妹. 到底佢地呢班人, 知唔知咩叫尊重別人, 尊重自己? 知唔知咩叫修養? 你以為自己0係紅館呀? 你地唔識欣賞表演無人會怪你, 但你咁樣嗌出黎, 一來比全場人都知道你地係幾咁無知, 二來又影響到表演者同其他觀眾... 唉, 真係... 

鈴木咖啡館 -- 有進步 (因為以前太差了...)

地址: 上環德輔道中199號維德廣場地下G07-08號鋪
電話: 2854-1616

上星期一放工後同老細兩條友去佐呢間餐廳食飯, 我地已經係第三次黎呢間餐廳食, 成日去既原因唔係佢D野好好食, 只係因為佢近我地公司.

講真之前果兩次, 我地都覺得D野麻麻地好食, 最好食既竟然係個甜品... 因為之前個set dinner既主菜, 佢總係配埋D好鬼難食既薯蓉(D薯蓉唔知撈佐D咩, 搞到成pat薯蓉淺啡色既, 又難食), 同埋唔知咩鬼野蔬菜, 總之個賣相唔靚, 個味道又唔掂.

 

今次去, 我覺得佢地有好大改進, 首先我記得以前D set一係揀餐湯, 一係揀沙律, 今次去, D set就包埋餐湯同沙律(不過個湯淡佐D). 同埋今次D主菜既賣相靚佐好多, 終於無佐果pat核核突突又難食既薯蓉.

 

甜品都仍然咁好食, 但個set始終都係唔包餐飲...

 

同老細兩個人食飯幾開心, 同佢傾計, 佢間唔中會袋錢落我袋.