地址: 上環德輔道中199號維德廣場地下G07-08號鋪
電話: 2854-1616
今日同流沙包去佐傳說中既南生圍, 由於我今日三點先正式起身(我九點幾果陣起佐身架, 流沙包果陣未醒我就做下自己野, 之後又再訓過咋麻), 所以入到南生圍都已經四點幾. 我地係紅毛橋果個巴士站落車, 然後一直行, 一直行, 一直行, 一直行... 點解行極都仲係果條路, 未見到柳暗花明又一村架...? 
行佐成個鐘都仲係果條路, 行極都好似行唔完咁. 然後到差唔多日落, 先見到一處種佐好多樹既地方, 傳說中話好靚既南生圍係咪就係果塊地? 我地沿住個「樹林」一直再行, 終於無路, 要搭果D橫水渡過對面岸, 好得意幾好玩~
呢個星期心情都好差, 因為日日都忙到顛, 得閒死唔得閒病, 吊頸都無時間抖氣.
幫D客去銀行問野, D死人staff態度又超差, 又晦氣, 恒生果D係咁, HSBC果D又係咁, 一D禮貌都無, 仲要句句「得」埋黎. 我又受氣, 搞到我條氣好唔順.
終於send佐個mail比GM話我頂唔順, 我好大壓力.
放工本來諗住去配副新眼鏡, 流沙包帶我去佐深水埗某一眼鏡舖, 但一來我心情唔好, 二來叫佢地介紹下D款比我, 佢地淨係話「擺晒係度架啦」, 我唔滿意佢地既服務態度, 於是發流沙包晦氣, 無配到眼鏡就走佐出眼鏡舖.
今日心情真係好差, 差到好核突咁忍唔住係條街度喊, 真係羞家.
然後又話無胃口食飯, 扭扭擰擰咁話咩都唔食.
如果我好似HEROS裏面既Hiro咁可以穿越時空去見番果刻既自己, 我相信我都會忍唔住好想摑當時既我一巴囉... 好彩流沙包EQ高, 無論我幾無理取鬧都容忍我氹我.
流沙包, 對唔住呀. 我知我係好任性好細路女. 不過有你呢個好老公, 我先可以有地方宣洩下任性下. 多謝你呀~!!
地址: 元朗阜財街20A1號舖
電話: 2477-9420
上星期一本來諗住買餸返屋企玩煮飯仔, 但最後都係決定係出面食就算. 我地第一次黎米線大王食, 叫佐個二人餐, 有湯, 雞半隻, 桂花魚一條, 咖喱薯仔雞翼, 菜一碟, 白飯一大碟, 米線一碗, 飲品兩杯. 大家估下呢個二人餐要幾錢??
開估啦~ 盛惠七十蚊. 係咪好痴線呀? 我地叫既呢個二人餐算貴啦, 仲平D都有呀. 真係唔知佢地點樣有錢賺.
當然, 衞生同服務就無乜架啦. 總算食完無肚痛.
1月11日我地去佐睇萬千師奶賀台慶, 詹瑞文真係好勁, 一人分飾多角. 有D環節真係笑到流眼水. 我覺得最好笑既係「最緊要食字」, 真係全場都笑不停. 其次「智能焗飯」都好好笑, 聽得出佢既菜色名係用心諗過度過, 連D菜色既命名都超好笑.
成個劇真係非常諷刺同踩TVB踩得好勁, 但踩得勁之餘, 佢所反映既卻又係事實喎, TVB真係一成不變, 毫無創新. 套劇除佐令人笑不停之外, 其實亦帶出好多反思.
地址: 元朗馬田路80號御庭居商場地下1號舖
電話: 2944-3688
1月10號同流沙包試下樓下新開既越南菜, 無錯呀, 間餐廳真係叫「越南菜」. 我地叫佐個二人套餐, 有南瓜海鮮羹, 春卷, 咖喱雞, 蒜蓉包同馬拉盞通菜. 另外我地仲叫佐個豬頸肉湯粉.
食物一般啦, 不過價錢又唔算貴. 我覺得蒜蓉包硬佐D, 個南瓜海鮮羹麻麻地, 好稀, 所謂既海鮮係幾粒蝦仔咁.
係佢執之前我地黎幫襯過, 算係咁啦. (因為每次行過呢間餐廳, 都無咩人幫襯, 我諗應該都唔支持得幾耐...)
是次消費每人約$80
地址: 旺角彌敦道639號雅蘭中心1期6樓C舖
電話: 2628-0331
1月8日同流沙包去佐旺角食飯, 參考openrice後決定黎呢度食. 我地叫佐個拼盤, 包括有炸牛油雞翼, 春卷, 牛肉蝦片同蝦粉卷. 味道唔錯, 幾好食.
睇openrice好多人都推介雞肉喇沙, 於是我地又叫佐個試下, 我就覺得普普通通, 唔係特別好好食, 但D雞算幾滑.
同埋叫佐個椰青掛蝦, 我覺得呢個有D呃錢, 得六隻蝦only. 但係D湯幾好飲, 香甜.
是次消費每人約$80.
今晚我同流沙包都要去飲, 佢係銅鑼灣飲, 我係尖沙咀飲. 呢兩日似乎係幾好日子? 因為流沙包尋日又去飲, 今晚又去飲, 連續飲佐兩晚...
今次係我結佐婚之後第一次出席別人既飲宴, 突然覺得有D唏噓, 覺得自己咁就嫁鬼佐勒, 唉... 都唔知自己究竟諗緊乜...
今次去泰國我地係跟康泰去, 如果唔計細細個同屋企人跟旅行團返大陸旅行, 計搭飛機出國既話, 呢次可以說係我第一次跟旅行團去旅行. (我每次去日本一定係自遊行, 之前去台灣, 關島都係自遊行)
好多人問我今次泰國之旅好唔好玩, 我既答案都係「OK啦, 普普通通啦~」, 有時我覺得自己既要求幾高, 無論係工作時既要求, 對人既要求, 甚至對玩既要求都好高, 稍有少少不稱心不如意唔啱心水我就好容易會唔高興黑面唔滿意. 所以我覺得同我去旅行既人某程度上都會幾掃興. 就好似今次去泰國咁, 我都有好多唔滿意既地方, 少如架旅遊巴個咪有少少問題, 我地又被安排坐到最後排, 根本聽唔清楚個導遊講咩, 至到個團多細路我唔多鍾意, 大至間酒店核核突突等, 都令到我覺得今次既泰國之旅唔太好玩.
同埋經過呢次之後, 我都係唔再係旺季去旅行勒, 我地今次呢個團既團費平時二千蚊有找, 但聖誕去就要成三千蚊, 住埋D cheap爆酒店. 如果三千蚊團費係平時去泰國既話, 我相信一定會住好食好好多囉. 同埋長假期去一定係多細路多一家大細去, 我真係唔多鍾意細路喎, 我只係會覺得佢地好煩好嘈. 同埋呢次聖誕去泰國, 係勁塞車囉, 真係塞到阿媽都唔認得, 耽誤佐好多行程.
本來我地諗住農曆年去韓國旅行, 但旺季去團費又貴又唔抵, 都係無謂去啦... 同埋今年開始要派利是, 無啦啦多筆開支, 好窮呀, 嗚... 所以我地下次既旅行地點應該係歐洲honeymoon(無錯我地結婚成年都仲未去honeymoon), 去歐洲唔知跟邊間旅行社好呢? 係咪跟金怡, 翠明果D好呢? 我地打算六月左右去, 我要豪華團食好住好架~
同埋今次去歐洲我地唔想幫人買野啦, 我地想舒舒服服咁去honeymoon呀, 唔想仲拎埋D咩咩袋既相呀資料呀等等過去, 去到又要花時間幫人搵幫人摷幫人買. 我地想無壓力咁過去輕輕鬆鬆渡蜜月呀~ 其實我唔係咁鍾意去旅行果陣搭單幫人買野, 所以調番轉人地去旅行果陣我都唔會叫人地搭單幫我買D咩.
(流沙包我地今次去honeymoon我唔想搭單幫人買袋呀!)
今日係last day係泰國, 朝早我地係酒店食早餐, 跟住就去佐昆你買野既珠寶城, 係珠寶城無無聊聊逗留佐成粒鐘咁濟, 呆坐到訓著. 然後去佐土產店, 我地買佐少少魷魚片椰子糕等等做手信, 跟住就去食飯.
我地食飯既地點叫龍城酒家, 入佐健力士大全, 係全世界最大既restaurant喎, D waiters要踩住roller去送菜. 餐飯無咩特別, 最好食係個咖喱蟹.
食完飯兩點幾三點我地就出發去機場啦, 我地搭六點幾機返香港, 晨咁早就要去機場勒... 去到機場又掃佐堆Boots先走.
上機前檢查, 見到對香港情侶比人搜到成喼行李都係Boots咁濟, 唔比帶走, 個女既係度
第四日行程終於出海, 首先朝早我地出發去珊瑚島, 我地玩佐三樣水上活動, 分別係香蕉船(每人300銖), 水上電單車(二人同車700銖)同埋降落傘(三個圈700銖). 水上電單車幾好玩, 好快, 好「櫈」, 好刺激. 反而降落傘就無咩特別, 唔驚唔刺激, 上到半空係飄下飄下咁.
六舊腹肌既流沙包呀~~:
午餐我地都係珊瑚島食, 好差, 米粉, 菜, 無咩特別. 好在有一籃蝦蟹雞翼粟米餐, 有番少少安慰.
跟住我地就返酒店梳洗, 然後就出去食tea啦~ 個tea食咩? 我地去佐食魚翅, 蟹焗粉絲, 同埋椰青燕窩呀, 好味道~ 成個set價值800銖.
之後我地就去佐做SPA, 本來個團係包1小時香薰SPA按摩, 但當然一個鐘做唔到D咩啦, 加錢的話就可以做晒成個療程, 結果我地都加佐1500 Bahts. 呢次係我第一次做SPA, 但係都唔舒服既, 唔知係咪因為我係香港慣佐做全身淋巴按摩呢? 做SPA既過程係先沖涼, 然後就濕蒸, 乾蒸同浸池. 跟住就香薰按摩同去死皮, 之後再沖身, 然後查D牛奶漿上身, 跟住再浸個花瓣浴就做完啦... 都唔relax唔舒服既...
最後我地去食晚飯同睇人妖(自費), 我覺得個人妖show幾精彩喎, 有D人妖真係好鬼靚, 身材又好對腳又長又靚, 真係靚過晒好多女人呀(慚愧...)
好難相信呢個係人妖呀, 咁鬼靚...:
今日係我地既結婚(註冊)一週年紀念. 朝早我地又去佐昆你買野既蜂蜜園, 當然我地咩都無買啦~ 跟住我地就出發去芭堤雅, 係途中奇奇怪怪咁食佐餐中餐, 又唔係特別好食.
之後我地去佐暹邏大象園騎大象, 餵鱷魚同坐泰式馬車. 原來騎大象都幾辛苦, 因為好「櫈」, 腰骨都痛埋. 不過我地騎果隻大象幾「熱血」, 見象過象, 都幾刺激.
餵鱷魚方面, D鱷魚已經被人餵到無晒本能咁, 成舊雞放係佢頭頂佢都未必會擘大口食. 
泰式馬車無咩特別, 速度亦唔係好快. 不過我地坐果架車有隻好得意既狗狗呀~
然後我地去佐一個叫做大富之家(Sukhavadee House)既地方, 係個有錢人起既. 其中一棟building因為有舍利子, 所以唔可以著住短裙短褲吊帶入去, 所以我地要披住件圍裙同披番件衫先可以入去.
跟住我地就返酒店先, 同埋係酒店食埋飯. 但餐飯好唔掂, 一餐好cheap既中菜, 玉子豆腐, 蛋炒蛋, 菜炒菜, 菜炒蛋咁.
食完飯我地又再出發. 本來導遊話呢個團多細路, 成人節目佢就唔介紹啦(依!!! 我對成人節目有興趣多D喎!!). 於是導遊就推介D本來行程無, 但就老少咸宜既節目(當然要自費啦), 就係去Believe It Or Not, 同埋4D電影(又4D電影...), 鬼屋同玻璃迷宮. 最後既結果係... 得我同流沙包及另外一家4口去玩, 其他人全部都唔去(唔去既人就自己行商場). 頂!! 去埋呢D老少咸宜既地方係諗住遷就你地班細路, 點知又無人去. 不如去成人節目好過啦~
之後就返酒店啦... (妖! 真係有D無奈)
想講一講芭堤雅間酒店, 都係唔掂, 一入房就發覺勁多蚊, 兩條傻瓜就係度拍蚊. 個浴缸又畸型, 沖沖下涼D水會沿住個浴缸邊流落地, 沖個涼會搞到個toilet地下濕晒. 我地以為我地間房有問題, 仲諗住駛唔駛要求換房, 點知原來其他團友都遇到同樣問題... 同埋酒店竟然無風筒喎...
第二日行程, 我地朝早去佐暢遊湄南河, 跟住落船去睇黎明塔, 逗留佐十分鐘就坐返船回程, 回程途中有餵魚環節, 面包當然要出錢買, 我地無買到, 睇人地餵咪得囉~
跟住我地去佐蛇園, 唔駛問又係昆你買野既地方啦, 我地當然咩都無買, 但餐餐去到呢D地方, 佢都講到佢地既藥好似神仙水咁, 乜都醫到, 係咁勁既話呢個世界唔駛醫生啦.
之後我地就去佐號稱全亞洲最大既Central World, 我地係裏面既food court食飯, 每人有200 Bahts budget, 我地呢餐飯兩個人共用佐大約HK$100.
然後導遊就話有興趣既人可以跟佢去四面佛, 無興趣去既人就係商場shopping, 因為四面佛距離商場好近, 行十分鐘左右就到. 我地一場黎到泰國, 梗係要到四面佛睇下啦, 不過我地無拜, 流沙包係基督徒當然唔會拜啦, 我亦都無咩興趣拜, 只係參觀下就走, 之後我地就返番Central World行商場, 唔駛問梗係有買Wacoal同Boots啦~~
跟住我地就去佐全曼谷最高既地方食飯同睇夜景, 去到又係食buffet, 真係食到厭, 仲要係自費, 價錢都唔平, 差唔多都要每人兩舊水港幣. 我都無食到D咩, 我黎到泰國係想食D特色野地道野呀, 連續兩晚都食buffet, 真係無咩胃口.
食完飯我地就上八十四層睇夜景, 上到去幾特別, 果層係會三百六十度咁自轉, 同埋只係隔住個鐵絲網, 比起其他D乜塔乜塔要隔住塊玻璃既感受更深. 
