新鮮熱辣@墨魚燒賣: 1/9/2007

2007年9月28日星期五

元氣一杯 -- 麻麻地啦...

地址: 尖沙咀彌敦道美麗華商場4樓E
電話: 2375-8100

上星期四同幸福少婦食飯, 叫佐厚燒玉子, 三文魚壽司, 日式炒烏冬, 蟹子沙律, 蕃薯天婦羅同つくね. 我覺得呢度D野食麻麻地啦, 個玉子真係... 我鍾意一遊果個多過佢多多聲囉... 其他野食都普普通通啦... 不過個蟹子沙律就幾好食.

結論係我未必會再黎囉...

勝香園 -- 蕃茄面好味~~

地址: 中環美輪街2號排檔
電話: 2544-8368

上星期五無帶飯, 本來諗住食杯面, 咁啱幾個同事話去食蕃茄面, 於是就一齊去. 去到等佐好耐先有位呀, 又曬, 好熱呀. 我叫佐個豬扒腸仔蕃茄面, 好好味呀, 好多蕃茄呀.

另外我地仲叫佐豬扒包, 好好味呀, 個包熱辣辣又脆脆地, 好食呀~~

不過D阿姐要叫幾廿次佢先會應你囉, 佢都做唔切...

是次消費每人約$33

2007年9月16日(日) -- 外甥仔滿月

今日外甥仔滿月, 大家屋企人係酒樓擺佐兩圍食飯. BB幾乖, 成餐飯都無咩點喊, 我地有同BB影相, 不過唔係我部機度, 所以無得post上黎住.

席中當然有人明示暗示問幾時到我, 說實在我真係無諗過生喎, 生黎唔知為咩, 我唔要過果種咁既生活呀, 我情願自由自在, 何況我又唔鍾意細路.

結婚前我已經同流沙包先旨聲明我係唔會生既, 如果你真係想要小朋友你諗清楚唔好娶我. 到而家結佐婚, 我都同流沙包講, 到你有一日真係好想要小朋友而我又唔肯生, 我會同你離婚, 等你可以搵過第二個人同你生. 因為我有我唔想生既選擇, 你亦可以有你選擇搵其他人生既選擇, 好公平. 我係認真的, 唔係講霉氣或者恐嚇說話.

為佐生唔生小朋友既問題而離婚係咪誇張佐D? 咁我又唔想咁自私, 如果流沙包佢將來真係想生, 我唔會阻止佢, 只不過同佢生既人唔會係我, 我亦唔可以咁自私阻止佢想要小朋友既心情, 所以我願意離婚去成全佢. (或者你會反問我情願離婚去成全佢都唔肯改變主意同佢生番個黎成全佢? 係呀, 我係自私, 我唔要生件出黎舵手ling腳) 至於我, 我咪回復番單身囉, 反正婚姻生活我已經感受過, 恢復單身也有單身的樂趣吧? 總言之我就是不會生!!

合發燉奶餐廳 -- 好貴耶...

地址: 銅鑼灣謝斐道483-489號
電話: 2892-2633

上星期二晚同流沙包食飯, 我叫佐個黑豚豬石頭飯, 上菜速度極快, 個飯幾夠熱, 不過我覺得個飯無咩味道囉, 好淡. 同埋呢度六十幾蚊一個石頭飯貴佐D囉.

2007年9月25日星期二

一遊日本料理 -- 本人推介

地址: 尖沙咀諾士佛臺1號其利中心4樓
電話: 2366-2999

上星期六去完太空館就黎佐呢度食飯. 因為我掛住個藍莓茶, 所以雖然上次黎食完無幾耐, 今次又再黎.

我地今次叫佐蟹肉厚燒玉子, 帶子薄餅, 海鮮湯, 炸雞軟骨, 辣炒豬肉石頭飯, 當然唔少得個藍莓茶啦~~

我覺得呢度整體黎講真係唔錯, 個玉子好好食, 唔會太老. 個湯好鮮甜同埋落足料, 有大大粒既帶子同蝦. 個石頭飯都好好食, 好入味. 不過個藍莓茶就好似比上次淡佐少少.

同埋我鍾意呢度氣氛, 我幾buy一D比較暗既餐廳, 感覺可以relax D.

是次每人消費約$150. (AE卡有九折)

2007年9月22日星期六

2007年9月15日(六) -- 玩樂散心日

呢排為佐公事上我partner要離開而情緒極度低落佐大半個月, 於是流沙包今日同我去行下街玩下. 我地先去佐青衣睇戲, 套《1408》唔係我想像中咁恐怖囉, 完全唔驚...

之後我地去佐尖沙咀太空館睇天象廳電影, 去到果陣, 套《深海奇趣》已經開佐場做緊, 於是唯有睇下一場既《宇宙大爆炸》, 初初睇都明少少既, 但越睇佢講既野就越深, 越睇就越唔明. 什麼分子, 空間, 密度, 物質, 負能量... 咩呀??

然後我地就過諾士佛台食飯啦, 好攰呀~~~

2007年9月21日星期五

西貢越南湯河 -- 普普通通, 服務一般

地址: 銅鑼灣紀利佐治街1號金百利7樓
電話: 2833-6833

上星期二晚同流沙包去佐銅鑼灣食飯, 我叫佐個無骨雞翼檬, 同埋叫佐個虎蝦春卷. 個無骨雞翼裏面塞佐餡料, 不過我覺得味道就麻麻. 個虎蝦春卷OK喎, 熱辣辣味道唔錯.

不過呢度D服務就麻麻地, D阿姐似乎有少少撞聾, 叫極都聽唔到.

2007年9月18日星期二

Spice Market -- 呢期食蟹

地址: 尖沙咀海港城香港太子酒店3樓
電話: 2113-6046

上星期一同流沙包去佐食buffet, 今次既主題係蟹, 不過我覺得就唔算好多蟹種, 特別少少既係有酥皮焗蟹湯, 焗梳乎里咁.

食物方面我覺得呢度OK架, 種類算多, 味道都OK既.

同埋呢度既雪糕係杯裝Haagen-Dazs呀~~

流沙包係會員有半價, 每人是次消費約百幾蚊.

2007年9月17日星期一

綿綿冰甜品屋 -- 幾特別既~

地址: 元朗建業街59號慶年大廈3號地下
電話: 2470-9083

上個再上個星期六食完晚飯黎佐呢度食甜品, 呢度既招牌係刨冰, 我地叫佐一個芒果刨冰, 味道都OK, 不過食落去都唔似刨冰, 似雪糕多D.

一個刨冰要廿幾蚊, 貴唔貴就見仁見智啦~~

2007年9月14日星期五

金香漁港 -- 平到顛!!

地址: 元朗西裕街

上星期六又同流沙包去飲早茶, 呢間酒樓真係顛顛地, 係平到顛呀, 我地叫佐四個點心, 分別係燒賣, 流沙包, 雞粥同埋紅油抄手, 茶芥每位$5, 大家估下呢餐茶幾多錢??

開估, 答案係$33呀!!! 痴線架, 兩條友去飲茶只係$33, 仲平過你去茶餐廳叫個早餐呀~~~

咁當然, 呢度D野就麻麻地好食啦, 好似個流沙包, 都唔似流沙包既, 唔好食.

2007年9月13日星期四

Pokka Cafe -- OK啦

地址: 旺角雅蘭中心地下

上星期五同流沙包去佐旺角食飯, 都唔知食咩好就求其係雅蘭食就算. 我地叫佐個雞柳意粉, 一個田螺, 一個北海道蠔餅. 總括黎講每樣野都幾好食, 不過我心情唔好, 無影相.

2007年9月6日(四) -- 出佐成績, GPA3.91, 終於畢業啦!!

等佐好耐, 終於出埋最後一科既成績, 都係我預計既A, 最後既GPA係3.91, 攞唔到4添, 哈哈哈~~

本來之前報佐個QP conversion course既master, 不過佢唔收我, 所以呢一年我都未有咩讀書計劃, 暫時係報佐今年日本語能力試驗1級. 黎緊睇下好無學番琴或者學番flute, 不過結婚後既新居無鋼琴, 所以如果學番琴似乎就難D, 無琴練. 學flute我又唔夠氣, 唔識用丹田.

同埋我會增值下自己既英文同普通話, 睇多D英文報紙同明珠台, 迫流沙包得閒同我用英文溝通.

仲有咩野可以做呢?

2007年9月12日星期三

2007年9月2日(日) -- 睇示範單位

9月2號難得流沙包無野做, 於是就兩條友無無聊聊去睇示範單位, 目標係天水圍既栢慧豪園. 我地其實根本無諗住買既, 要換樓我都唔會再搬番入天水圍, 去睇樓只係諗住過下日神. 係元朗有專車送你去示範單位, 我果時先知原來個示範單位係紅磡漁人碼頭.

一路上有個agent姐姐跟住我地, 佢話咁多座已經賣晒咁濟, 而家得番第一座. 去到睇佐三個示範單位, 一個3房七百幾呎, 一個2房六百幾呎, 同埋一個好似2房五百幾呎? 其實我都唔太記得D呎數啦, 只係睇完覺得唔掂, 個廳細到死, 即使係七百幾呎果個單位, 個客廳係無辦法放到電視櫃架囉, 超窄, 個示範單位都只係擺張梳化, 一張茶几仔, 個電視已經按佐係牆上面, 根本再擺唔落電視櫃.

同埋個主人房又係勁細囉, 佢個示範單位好似只係放普通雙人床而已, 加埋個衣櫃都無咩位淨. 我地訓開queen size架喎, 點搞呀? 個agent話我地住開低密度既, 唔能夠用低密度住宅果種眼光去睇呢D「標準樓」喎... 雖然果D幾廿層高既「標準樓」個會所真係幾吸引, 不過我暫時都係鍾意住番D低密度樓.

2007年9月11日星期二

稻香 -- 服務超唔掂!!!

地址: 元朗馬田路38號怡豐花園地下32舖
電話: 2475-9251

上個再上個星期六朝早同流沙包飲茶, 呢度裝修完之後我第一次黎, 但感覺呢度既服務水準就差佐好幾皮, D阿姐完全唔掂囉, 無禮貌. 首先入到去無人招呼既, 我差D以為返番去以前自己搵位隨便搭抬果隻呀. 我入到去棟係度D阿姐見到我都無人埋黎serve.

食物就唔講啦, 飲茶都係果D野啦, 不過另一個例子就係我地D野食唔晒叫阿姐比個盒我地打包拎走啦, 個阿姐都唔知聽唔聽到, 佢唔應你囉. 轉個頭行埋黎比個盒你, 但聲粒唔出淨係搵個盒頂下你示意你接住, 嘩, 你算係咩服務態度呀?? 離晒譜!! 元朗咁多間酒樓, 我短期內都唔會再黎幫襯呀!!!

三上日本料理 -- 都算幾好既

地址: 元朗大棠路紅棉大廈B-C舖
電話: 2411-1807

上個再上個星期五晚約佐個舊同事食飯, 元朗最多日本料理, 所以我地都去佐食日本野. 我地叫佐個蟹籽沙律, 鐵板帶子, 幾件壽司, 三文魚軟殼蟹卷同一個豬軟骨拉面.

呢度既食物質素都OK, 我覺得個鐵板帶子幾抵食, 用鐵板上大約有6粒帶子, size都唔算細.

是次消費每人約$90

2007年9月9日星期日

Turin Cafe 都靈 -- 不妨一試~

地址: 元朗又新街61號運興樓地下2號舖
電話: 2473-9108

8月30日又係出job既日子, 地點都係果間公司, 係觀塘. 我開始熟習點樣做呢間公司, 有少少滿足感耶, 同埋好順利咁balance到條數, 果種感覺係幾有成功感, 哈哈~ (如果計黎計去都平唔到條數我會發忟憎)

放佐工約佐流沙包係元朗食飯, 個衰人係西貢玩完wakeboard, 要成兩個幾鐘先返到入黎元朗, 我就係餐廳等佐大半個鐘, 哼!!

食物方面, 呢度既set dinner有餐湯, 頭盤, 主菜, 餐飲及甜品. 呢度既頭盤我覺得就普普通通啦, 主菜方面都OK既, 不過上菜實在上得太慢啦...

至於環境同氣氛, 我覺得呢度比未搬之前差D囉.

2007年9月6日星期四

悔不當初

做人, 真係有時唔知好過知. 只要你不知道, 你還會活在幸福當下; 但是一知道真相, 就立刻要面對殘酷的事實.

係我唔好, 我唔應該將一D根本不應說的事情說出口, 傷害了別人. 我知道事實後, 我內心也不好受, 自從果次之後, 我一直都好唔安樂. 而那件事更加速導致了一件我不想它發生的事終於都發生了, 只怪我! 這幾天, 我一直在內疚, 傷心, 痛苦, 不安, 難過... 是我對不起他, 但是一切都已經太遲, 沒有辦法彌補. 我一直怪自己當初不應將答案告訴他!!!

對不起, 是我不好! I wish you have a better future!!! I believe you can!

恋人以外の男性のため泣いたのは…初めてだろう…