2006年10月28日星期六

California Pizza Kitchen -- 除佐個brownie, 其他都唔多好食

地址: 尖沙咀海港城海運大廈LCX第2層
電話: 3102-0375


上星期日約佐大學同學黎呢度食飯, 由於十月係我做搞手, 所以呢度都係我揀既. 我地張枱係窗口位, 對住個海, 好正. 我地四個人叫佐個雞肉餃子, 一個辣肉腸pizza, 同一個墨西哥雞肉菠菜闊面, 仲有一樣野唔記得佢叫咩名. 個雞肉餃子OK啦, 辣肉腸pizza麻麻地, 個菠菜面味道怪怪地, 雞肉份量好少, 但都幾好食. 後尾見大家好似唔多夠食, 我提議叫甜品, 我地叫佐個brownie, 同埋一個唔知咩朱古力餅. 去親美國餐廳我一定叫brownie架啦, 呢度既brownie好好食喎, 好食過Friday, 好正~!!

是次每人消費約$96

佳記甜品 -- 元朗人唔會幫襯B仔, 但流沙包屋企人係屯門人...

地址: 元朗教育路大坑渠側
電話: 2473-3148

食完飯我地去佐舊B仔食糖水, 我同流沙包叫佐個B仔船, 有香蕉, 西瓜, 哈蜜瓜, 大樹菠蘿, 椰果, 桃, 同埋雪糕球. 無咩特別, 出面既糖水越黎越出色, 變相B仔就已經無咩特別啦~ 以前都仲會聽講有人專登揸車入黎食B仔, 我諗而家應該唔會架啦? 比我有車我調番轉出松記好過~~


是次每人消費約$20

美麗都 -- 一向水準唔錯~

地址: 元朗馬田路80號御庭居商場1號舖
電話: 2442-4887


上星期六流沙包帶完隊返黎落去食tea, 費事行咁遠所以近近地落樓下美麗都, 我叫佐個日式豬軟骨拉面, 流沙包睇錯menu叫佐個炸雞翼沙律. 豬軟骨拉面幾好食, 個湯底好得, 掂過果D真係賣拉面既日本料理, 好食! 雞翼沙律既雞翼炸得好脆, 同埋醃得好入味, 我覺得隻雞翼好重豉油味. 其實美麗都D野係幾掂, 不過我份人貪新鮮又鍾意試新野, 所以而家都好少落黎食.

是次每人消費約$28

2006年10月26日星期四

Baby Blue Cafe & Bar -- 百零蚊/head 有咁多款式比你揀, 抵啦~~

地址: 銅鑼灣駱克道463-483號銅鑼灣廣場二期9樓
電話: 2882-8770

上星期五放工後要去銅鑼灣覆診, 之後去佐Baby Blue Cafe食飯. 其實係舊舖果陣去過一次, 之後一直都想搵機會再去, 但直至佢執佐都無再去過. 後黎佢係銅鑼灣廣場重開, 所以今次難得同流沙包黎銅鑼灣, 諗都唔駛諗就決定黎呢度食飯.

先講環境, 比以前差佐囉, 印象中以前既佈置同氣氛都似係高級餐廳feel, 但而家就係普通餐廳feel, 同埋個場好黑, 睇menu睇得好辛苦, 我見隔離枱甚至乎要拎住個電筒照住個menu睇.

食物方面佢好多選擇, D配搭都幾好, 我地叫佐個二人套餐C, 可以揀四個頭盤, 兩個湯, 三個主菜, 兩個甜品, 包兩杯餐飲, 都好似只係$358. 頭盤我地叫佐鵝肝, 芝士藍貝, 蟹肉果凍, 同一個唔知咩酥盒. 湯我地叫佐南瓜忌廉同龍蝦湯. 主菜我地叫佐墨魚汁飯, 燒春雞同煎魚(唔記得咩魚). 甜品我地叫佐心太軟同荔枝雪芭.

鵝肝--雖然係好細舊, 但係煎得剛剛好, 唔會太熟, 好好味

芝士藍貝--都唔錯, 幾好食

蟹肉果凍--佢賣相幾靚, 味道都唔錯

酥盒--好細個, 雖然鹹佐少少, 但都係好好味

南瓜湯--淡佐少少, 味道OK

龍蝦湯--正如waiter所講, 真係好鬼濃味, 但流沙包話啱佢口味, 我就唔多接受到

墨魚飯--好好味, 但食完成個咀黑晒, 要抺好耐

燒春雞--唔好以為係成隻呀, 係一舊仔咋, 味道麻麻, D肉唔多滑

煎魚--OK

心太軟--都好食, 但唔夠熱, 同埋穿佐既?? 特色黎架?

荔枝雪芭--好味

總括黎講, 咁既價錢試到咁多野, 都幾抵啦. 不過佢上菜太慢, 等到眼訓, 我食完飯仲要趕住去行街架麻...

是次每人消費約$200

2006年10月20日星期五

福滿樓川粵酒家 -- OK啦~~

地址: 尖沙咀堪富利士道12號宏貿發展大廈3樓
電話: 2730-9131

上星期日晚同流沙包出佐尖沙咀食飯, 因為流沙包剛剛入佐Marco Polo既Privilege Club, 有一張食中菜一圍既唔知咩coupon, 於是流沙包就約埋班同事一齊黎食, 菜式如下:

荷葉花彫籠仔蒸生蝦 -- OK啦.
桂花瑤柱炒魚肚 -- 幾好食喎, 好特別.
蜜豆花枝帶子 -- 唔錯, 帶子大粒彈牙.
鮑參肚翅羮 -- 好淡好稀...
清蒸大海青斑 -- 條魚好靭...
古法羊腩煲 -- OK, 唔太羶.
薑蔥焗蟹 -- 呢個好味, 但份量好少...
福滿出位豉油雞 -- OK.
瑤柱蛋白炒飯 -- OK.
上湯雲吞 -- 難食, 感覺裏面D肉好霉...
美點雙輝 -- 甜品好食, 係芒果布甸, 同埋類似老波餅, 但裏面有奶皇既酥, 好味~
合時甜品 -- 紅豆沙, 好唔掂, 食佐兩啖就放低佐...
生果拼盆 -- 西瓜同哈蜜瓜.

無咩特別, 服務都OK既, 但個toilet勁細...

是次每人消費約$210

2006年10月14日(六)

今日同流沙包食完tea就返學校補課, 放佐學之後又約佐流沙包食刀削面. 流沙包話琪琪打黎約打麻雀, 我其實就唔多想打, 因為知佢地打得唔大, 同埋我今晚有少少頭痛. 但可能流沙包唔想佢地掃興, 所以話佢落場打, 哈哈. 佢地十二點幾上到黎, 我就去佐沖涼先, 出到黎先知佢地打八番32, 可能想就番琪琪個表姐掛??? 我今日輸錢, 因為打咁細我都無咩心機打, 明知人地八番都照fing D牌出去, 二來真係頭痛. 後尾流沙包去佐訓覺, 我地幾個就打八圈打到凌晨五點, 好攰啊~~~

生記山西刀削面 -- 唔係好好食...

地址: 元朗大馬路212號華昌樓地下D舖
電話: 2479-8033


上星期六晚黎佐呢度食飯, 今次係第二次黎食, 我叫佐個餃子紅燒肉手拉面, 流沙包叫佐個餃子鹵肉刀削面. 講真我覺得呢度D面麻麻, 餃子唔太好食, 紅燒肉都唔好食. 搞到我好懷念巴士總站果間北京水餃店...


是次每人消費約$29

元朗體育會餐廳 -- 意粉好味, 從此改觀~~

地址: 元朗體育路8號地下
電話: 2474-6828

上星期六同流沙包黎呢度食tea, 其實選擇有好多, 照計應該好容易揀, 但諗起自己要節食, 以前我必叫既雞髀薯條唔叫得; 見到個奄列拼薯條都好吸引喎, 但薯條太heavy, 又唔叫得... 睇黎睇去都唔知食咩好, 嗚~~~ 最後叫佐個黑椒肉片炒意粉, 流沙包叫佐個腸仔煎蛋熱香餅(好早餐feel). 個黑椒肉片意粉比想像中好食好多喎, 即炒熱辣辣又夠鑊氣, 味道又剛剛好, D意粉又炒得幾入味, 唔會一D太鹹一D太淡一D無色, 佢炒得好平均. 呢度既意粉真係幾出色幾好食, 上次lunch黎食意粉都係水準不俗. 以前覺得呢度係"up dup"餐廳D野唔慌好食, 但從此我會改觀, 因為D意粉真係好得~~

是次每人消費約$22

2006年10月13日(五) -- 黑色星期五喎...

今日去拎body check report, 專登揀星期五去因為去完唔駛返公司. 我本來約佐四點鐘, 但做唔晒D野, 搞到四點四先去到醫療中心. 都唔知搞咩一等就等佐成九個字先可以入去睇report, 果陣又唔係多人... 入到去見醫生, 佢都算有講解下, 但係我呢D普通凡人, 佢講完一輪我都未必明佢講緊咩. 佢劈頭第一樣野就問我有無聽過地中海貧血症, 呢個我當然聽過, 因為之前次次body check醫生都話我可能有呢個地中海貧血症, 今次呢個醫生話睇完我個blood report, 所有數據都完全係地中海貧血症既徵狀, 佢話我九成都似係, 但當然如果真係要confirm要再抽一次血再驗啦~ 我就無再驗, 因為我都唔諗住生BB, 有同無都無咩所謂啦; 二來如果真係要做, 都應該搵埋流沙包一齊做, 睇下我地兩個人係咪都係基因帶有者, 係既話就真係想生都唔應該生了...

另外醫生話我乙形肝炎既抗體低佐喎, 理想既應該要有100以上, 我就得番三十幾, 佢話最好補一針, 是但啦, 反正我支肝炎針係成五年前打既, 都應該係時候加強番掛? 盛惠$250.

今晚食完飯行佐陣朗豪坊, 買佐條好可愛既Keroppi泳褲仔, 同埋買佐套結婚用既粉紅色Mickey Mouse睡衣~

Mr. Steak Cafe -- 普通啦...

地址: 旺角朗豪坊13樓
電話: 3514-4227

上星期五晚流沙包做完body check餓佐成日話要食扒, 於是我地去佐朗豪坊睇睇, 最後揀佐呢間, 流沙包叫佐個肉眼扒, 我就淨係要佐個田螺薯茸, 因為一來lunch食得太飽都未肚餓, 二來我要認真咁on diet. 我唔食牛所以唔知流沙包個扒得唔得, 個田螺就普普通通啦, D薯茸好少... 我地仲叫佐個火焰雪山添, 但係好唔掂, 大家千祈唔好試, D cream成尺厚, 挖極都見唔到裏面D雪糕, 同埋佢唔知用D咩牌子既雪糕呢? 我感覺佢似係牛奶公司雪糕囉~(但流沙包話應該唔係), 總言之就係難食...

是次每人消費約$120