粥底海鮮火鍋, 勁勁勁好味~~

佐敦有間舖仔叫靚粥工房, 係墨魚妹食過之後大力推介,  不過果度真係好FULL架, 因為一來佢星期日休息, 二來舖仔細細唔係坐得好多枱, 三來如果要打邊爐一定要預約, 無得WALK-IN (你當然可以WALK-IN入去食其他野), 所以佢既BOOKING通常都要幾個月後先BOOK到 (如果你選擇平日夜晚去可能唔駛幾個月掛?).

之前墨魚妹負責訂枱, 6月打電話去訂, 要到9月先有位 (因為我地要BOOK星期六), 但等幾個月都值, 因為真係好食又抵食.

佢既粥底火鍋係類似私房菜咁, 每位人頭計錢, 你只要話比佢知幾多位, 佢地就會按人數準備食材.

唔講咁多, 比大家睇吓我地當日食咗D乜.

海鮮方面有大蝦, 鮑魚, 蟹, 蟶子, 泥鯭, 蜆, 魷魚; 另外仲有響鈴, 鮮雞, 牛肉, 油炸鬼, 同埋D蔬菜菇類.

佢地D材料真係好新鮮, 以泥鯭為例, 我呢D咁憎食魚既人從來都唔會食泥鯭, 不過流沙包話呢個泥鯭好好食, 叫我試吓, 我就即管試少少, 果然非常鮮味, 一D魚腥味都無, 連我呢D唔鍾意食魚, 少少魚腥味都接受唔到既人, 都可以食到泥鯭, 讚呀!

個粥底放咗咁多海鮮落去之後, 變得勁鮮味, 記得最後唔好放過個粥底, 一定要食埋佢, 因為真係超級美味架~ 

最後你梗係會問價錢啦架~ 大家估吓呢餐每位幾錢?

.
.
.
.
.
.
.
.

答案係每位唔駛$170呀, 係咪勁抵呢~~~