勁燥勁down

呢幾日, 脾氣勁差, 心情勁down.

自從星期一發生馬尼拉慘劇之後, 心情一直沒有舒展過.

我知自己M到前會勁忟憎, 但呢幾日成個人好似癲佐咁, 獨自一人在家都會對住D死物咆哮.

再加上我真係好討厭果隻爛鬼流沙包.

我已經講過N次, 唔鍾意佢同D學生咁close!!!!

人地學生今日做過咩, 同邊個係邊度食飯, 幾時去邊度, 關你乜野事呀? 成日來來回回send埋晒D咁既SMS, 我真係眼火爆呀!!!! 我覺得呢D咁既SMS係情侶之間先至會做架咋??!! 果隻流沙包話呢D係閒話家常喎!!! 就算佢有時同我落街食飯或者去超市買野, 條友都會拎部電話出黎唔知SMS定Facebook緊, 總之一有時間就對住部電話係咁篤篤篤, sorry囉, 我阻倒你囉, 阻住你同D學生"閒話家常"囉!!!

我唔知呢一代既教師係點樣, 自己既手提電話, Facebook, MSN都比埋D學生, 條友仔已經差唔多每晚都有野做, 每晚成十點, 十一點先返黎屋企. 返到黎屋企第一時間係開電腦囉, 然後不停咁同人MSN, Facebook. 我覺得自己似同屋主多D囉. 咁又係, 我都已經係一件C9扒啦, 比我都寧願上網對住D十零歳既妹妹仔啦!

有時佢D學生打電話黎, 我係側邊都會聽到佢地講咩, 我聽到D學生會話"好掛住你呀!", 我嬲係咪好正常呀?? 有時又會見到佢D唔知send比邊個既SMS寫住話"很想念你!", 我發脾氣係我太小器嗎? 得! 第時我同男性朋友一日幾廿個SMS噓寒問暖, 係咁話好掛住你, 日日send埋D無聊SMS講大家今日要去邊, 要做D咩, 幾點會返屋企之類果陣, 你都唔好過問我!!

講真, 如果以前唔係發生過唔止一次既不愉快事件, 我都唔會將呢D野睇得咁重. 如果之前唔係發生過D唔開心既野, 以上所述, 我可能都會覺得呢隻流沙包係一個比較關心學生既阿sir囉. 但講真, 自從不愉快事件發生後, 我已經唔係100%信任佢. 每次見佢收/send SMS or MSN, 我心裏就忍唔住問"邊個黎架? 你同佢咩關係呀? 學生? 真係學生?", 我真係好辛苦呀, 我無辦法擺脫到我既心理陰影, 你話我成日亂諗野?!! 如果你唔係做過D咁既野, 我而家駛成日亂諗野??!!!!! 呢D完全係你一手造成架!!! 你之前應承過我既野有照做嗎??!! 完全係得個講字!!! 我睇吓幾時自己頂唔順谷爆既時候, 唯一既解脫就係同你離婚!!! 我唔想好似潑婦罵街咁, 儲埋隔幾個月就頂唔順發作, 又拎番呢D野出黎嘈呀!!! 又或者等我死L佐, 就無人再阻住你啦!!! 咁樣你滿意啦!!

而家暑假, 做教師既唔係應該都有D假放既咩? 我知佢忙, 好多兼職, 又好多野要練習. 但呢個七, 八月, 佢每個月都有時間同人遊船河3, 4次, 但就無一日空閒可以全日陪我囉. 呢個暑假裏面, 八月開始我已經油牆中啦, 但我地完全無一日係一齊出過街玩囉. 佢有時週末晚返倒黎同我食飯, 我已經要覺得好恩賜架啦, 妄想話佢可以陪我去行街睇戲食飯啦!!!  

紐約芝士餅

又黎整餅, 今次學款要焗既蛋糕, 問佐流沙包意見後, 決定學紐約芝士餅.

估唔到呢款紐約芝士餅咁鬼易整, 等我買佐焗爐之後, 一定要試吓自己整.

 

 

 

元朗區有好幾間學整蛋糕既舖頭, 我將會試晒咁多間, 睇吓邊間教得好D, 遲D有機會係呢度同大家分享吓吖~~

開始煮飯啦~~

上星期三終於開始煮飯, 不過因為自己廚藝未精, 所以叫佐阿媽一齊買餸, 然後返屋企一齊煮.

以下寫低既野, 唔係話想教大家點整, 只係for自己做一個record, 第時睇番呢篇blog, 就會記得番點樣煮.

魚湯 $22.5

材料:
鯇魚(大鱗果D叫鯇魚)/大魚 $18
毛瓜兩條 $4.5

步驟:
1. 先燒熱pan, 再落油
2. 燒熱油後, 將魚放落pan大火煎, 加D薑. 放佐落去之後唔好郁住, 最少煎3分鐘才反轉.
3. 反轉第二面再煎, 煎大約5~7分鐘後放入熱水中, 中火煲. 

 

鹹蛋蒸肉餅 $15

材料:
豬肉 $10
鹹蛋兩隻 $5

步驟:
1. 將豬肉剁扁
2. 放入調味料
3. 加入鹹蛋
4. 蒸大約10分鐘

 

 

 

鮑魚仔 $28

步驟:
1. 將鮑魚仔洗淨, 尤其是邊位
2. 加入薑絲, 水滾蒸約10分鐘
3. 放入鼓油, 再淋上熟油

墨魚餅 $23

材料:
墨魚肉 $20
(硬)豆腐 $3

步驟:
1. 將墨魚肉及豆腐撈勻
2. 加入調味料
3. 放入鑊煎熟

 

 

開飯啦, 好味好味~ (呢餐飯得我同墨魚媽食, 流沙包要做野, 都唔知幾時先至得閒返黎食飯)

3餸1湯合計$88.5.

油牆假期做咩好???

油牆假期開始佐, 我諗佐好多可以學同埋做既事:

1. 學煮飯(一定啦) AND 學整蛋糕(遲D打算買埋焗爐)

2. 學織冷衫(諗吓先, 雖則係溫暖牌, 但買毛冷錢應該夠係出面買幾件現成冷衫; 更何況香港而家D天氣, 冬天根本無需要著冷衫)

3. 諗吓將日本研修之旅既所見所聞自資出書(明知會蝕, 但希望當係一種回憶. 諗緊好唔好趁下年書展之前搵間出版社自資出書, 而家有時間可以係屋企靜靜寫吓野)

4. 準備考QP?? (唔知, 如果我去trading firm做一個普通會計, 根本唔需要攞會計牌. 我未知自己黎緊想搵咩野工, 或者可能唔做會計, 又或者可能唔再搵工??)

5. 繼續學好日文(keep住上堂同埋多D係屋企煲吓劇囉...)

6. 練習普通話(自學)

7. 睇多D有關投資既書, 放多D時間係股票市場

8. 同屋企人傾傾開番間舖頭仔? (前排老豆公司無同佢續約, 我地全家人叫佢當早D退休抖吓, 但本身無咩嗜好既老豆話日日無無聊聊無野做, 話D時間好難過. 阿媽又係為打發時間 而家仲有做緊野. 兩老其實仲好後生, 老豆都未過60歳.  所以我諗緊好唔好開番間細細地既舖仔, 都唔係為賺錢, 只係想比佢地兩老過吓日神有D寄託咁, 咁舖頭盤數我自己可以睇番唔駛假手於人麻)

9. 繼續學番琴或者長笛(鋼琴我考到七級就無再學; 長笛為興趣學佐大半年, 但成日唔識用丹田氣, 吹得好辛苦, 於是又放棄佐)

10. 學車? (唔知呀, 我成日將左右搞錯[因為細細個D大人成日教話你揸筆/揸筷子果隻咪右手囉, 但我本身係左撇子喎, 只係後天被迫要用右手揸筆, 筷子我keep番左手揸, 所以我咁大個人有時仍然都左右不分], 為佐路面安全, 我係咪唔應該學車呢?)

11. 其他...?

淚不停...

個心真係好痛, 好唔明點解會發生D咁既事, 開開心心去旅行, 點解會搞成咁?!!!

尋晚八點左右係朗豪坊, 準備行去上堂, 途經一間電器舖, 見到一大堆人聚集, 原來電視報導緊情況, 當時報導話"車上全部人質被殺", 我睇到之後大庭廣眾即刻喊佐出黎, 嚇親我身邊既友人.

抱住沉重既心情上堂, 基本上都聽唔入腦, 只係不斷用手機上網睇新聞, 心裏面一路同自己講"唔係真既! 唔係真既!", 雖然最後證實有人質生還, 但始終有團友遇上不幸, 個心真係好痛.

尋晚即使躺在床上, 但眼淚卻流不停, 不能入睡.


由今日起, 我永不會踏足的國度, 除了印尼之外, 現在多了一個地方.

希望港府或者中國政府可以強硬的做點事, 作為港人, 或者作為人, 這件事不能白白讓它過去的!!!

新東京鐵塔: TOKYO SKY TREE

前幾篇BLOG話我有點懷念宿舍隔離的TOKYO SKY TREE, 趁有時間就出埋D寫定佐想出好耐但又未有機會出既日本生活BLOG啦~

我係日本研修期間, 住係墨田區, 附近既車站叫"押上", 都營淺草線同埋TOKYO METRO半藏門線都會經過呢個站.

每逢放假, 宿舍附近就會聚集佐好多人, 因為大家都黎同興建中既TOKYO SKY TREE影相.

http://www.tokyo-skytree.jp/

TOKYO SKY TREE最高會有634M, 而家已經起到418M啦~ 本來TOKYO SKY TREE係打算起到610M, 但因為廣州電視塔亦計劃起到610M(但因為新白雲機場既啟用, 天線高度要降低10米, 所以整體高度會由610M降至600M以下), 所以TOKYO SKY TREE就再起高D勒.

我當然有不定期影相啦, 就借呢個BLOG放D相出黎啦~

我09年8月中剛剛到埗, 個塔只是起得果少少...:

呢張係09年9月5日影既:

 

09年11月23日影既:

呢張係10年2月21日影, 已經高佐好多啦~~(因為塊臉影得太包, 都係遮佐佢先):

而呢張就係10年3月尾影既, 亦是我即將離開日本返香港既日子, 果陣個塔啱啱起到一半~:

 

完成後既設計圖, 將會有兩個展望塔:

呢個係放係墨田區役所裏面既模型:

當TOKYO SKY TREE起好之後, 我一定會重臨架~~

唔知今年會唔會係電視上見到流沙包呢...?

當呢篇BLOG出街既時候, 我應該不在香港, 因為我約佐幾個大學同學仔, 尋晚去佐深圳揼骨呀~~

適逢星期五六日係一年一度既世界女排大奬賽, 流沙包要做野, 跟唔到我地一齊北上吖.

流沙包係呢個大奬賽擔任咩野崗位, 我就唔直接講啦, 睇吓大家有無機會可以係電視上見到佢啦~~

前幾年我年年都會去現場睇架(可參考呢度), 而家因為安排問題, 唔想去lu, 費事流沙包難做啦~

順帶一句, 就係因為每年八月呢個大奬賽, 流沙包事前成日要做rehearsal, 所以好難可以離開香港幾日去旅行囉, 唉... 

 

無聊記事幾則

有時無無聊聊影佐D相, 今日就借呢個blog擺幾張出黎啦~

未resign之前, 有同事比佐個Rilakkuma既calendar比我, 個calendar係我地個客整架, 我用label遮佐個客名:

某日去佐銅鑼灣世貿既toilet, 見到呢堆"日文":

某日同流沙包去飲茶, 個茶壼...:

某日去深水埗睇中醫, 之後自己一條友去佐食豬潤麵, 好味好味:

自己整Tiramisu

油牆假期, 我話要學煮飯同埋整蛋糕.

今次要認真咁學識煮飯, 所以買佐個中式鑊同埋一隻新pan返黎:

另外仲要學整蛋糕, 所以亦買佐一堆工具返黎:

仲有呢個電子磅:

首先整tiramisu, 但我唔係整蛋糕, 只係倒落杯, 所以無手指餅同埋無咖啡味:

將250g芝士mascarpone由雪櫃拎出黎攤吓先:

先將50g淡忌廉whipping cream打起:

蛋黃3隻+20g糖坐熱水打勻(坐熱水係因為驚有人唔受得生雞蛋會肚痛):

將頭先的蛋黃加入芝士中攪勻:

再加入10ml rum酒及剛才的淡忌廉攪勻:

2隻蛋白+20g糖打至企身:

將蛋白加入芝士, 落埋溶佐既1片魚膠液, 攪勻:

倒入杯仔, 放入冰格約45分鐘:

最後係冰格拎出黎, 灑上可可粉即可:

我總共整佐兩次, 唔知點解, 第一次既tiramisu唔夠滑, 鞋鞋地, 有無人話我知點解? 係咪D芝士唔可以打得太耐呢?

8月17日

回想去年8月17日的現在, 我正在飛往日本東京的途中.

沒錯, 去年的8月17日, 是我飛往日本head office研修的日子.

你問我對日本生活的日子懷念否? 我的答案是:"我想念週末或連休的日子; 但不懷念月曜~金曜要上班的日子"

你問我想不想再過日本生活? 說實在, 返工的日子我不想再過了, 日本男尊女卑, 我不是太想再在office內倒垃圾, 做清潔工. 我也不是太想再過一個人生活, 無朋友無人理的日子.

如果我中佐六合彩, 我(拉埋流沙包一齊去)或者再過日本生活, 但是會以學生身份, 我希望以留學生身份到日本學習日語.

日本的風土人情, 自然景色, 傳統文化, 我還是很懷念的. 我懷念一個人走遍立山黑部, 栃木縣日光+鬼怒川, 東北秋田青森岩手, 長野縣輕井沢, 福島縣會津若松, 新潟縣搭煤炭火車, 群馬縣草津+伊香保溫泉; 也懷念同流沙包遊走岐阜縣白川鄉, 山梨縣河口湖, 宮城縣松島, 山形縣銀山+藏王溫泉...

下一次再踏足日本, 可能會是數年後的事了(因為想去吓其他國家旅遊, 唔想去黎去去都係日本), 有點懷念宿舍隔離的TOKYO SKY TREE添...

油牆假期開始, 第一步係...

8月份, 油牆假期正式開始, 第一步做咩? 答案係執屋.

油牆假期未開始前, 個廳亂成咁:

 

無法啦, 因為係公司執晒D私人物品返黎, 都未有時間整理, 求其放晒係餐枱面就算.

買佐D廚房用品返黎, 又未得閒執, 放住係地下先:

8月開始執屋, 係書房執佐一大堆無用既書同埋舊NOTES出黎.

紅色同白色果兩袋入滿晒A4紙, 全部係流沙包以前進修既NOTES:

執廚房就執佐呢堆垃圾出黎:

係廚房執佐呢堆野出黎, D煲呀碟呀水煲呀全部全新未用過... 將會"轉贈"去就黎結婚既細妹新居, 嬉嬉~~:

黎緊仲有個洗手間未洗, 雪櫃未抺, 衣櫃未執... 唔知幾時先執得完.