無野搵野黎搞既母語教學

呢排睇新聞有關微調教學語言, 好慶幸自己唔係呢個年代既學生.

 

我都唔明, 點解一定要規定/劃分D學校做英語授課同母語授課啫, 兩者唔可以係同一間學校共存既咩?

 

我以前讀既係英文中學, 用既課本, 做功課, 考試都係用英文. 但係上堂果陣, 好多時老師都係用中文講書, 我覺得咁樣幾好呀. 用既課本係英文課本, 你仍然可以學到實用既英文詞彙; 老師講解係用中文, 令學生可以更容易理解同吸收. 我一直覺得呢個方法唔錯架喎. 點解一定要限死中文中學一定要用中文書用中文授課; 英文中學一定要用英文課本同英文授課啫? 點解要咁死板啫?

 

我覺得學校鍾意用咩咪用咩囉, 最緊要都係因應番學生既程度啫! 最緊要學生學到野啫! 返學唔係為佐追求知識既咩(理論上)? 點解咁白痴要硬性規定中中同英中啫? 難道用邊一種語言教學, 重要性仲高過學校教育能否令學生求學問求知識?  

 

香港既所謂教育是否有點本末倒置了呢? 當初推行母語教學已經係徹底失敗架啦, 令學生兩頭唔到岸. 而家又搞乜野微調, 真係低能.

 

(呢篇BLOG係我前日寫, set佐時間到而家先出. 尋晚睇新聞又話會分咩彈性班, 真係盞搞)