未結婚果陣, 身邊既人就會問你幾時結婚; 結佐婚之後, 身邊既人就會問你幾時生仔. 老實講, 我從來都無諗過要生喎, 結婚之前, 我已經同流沙包先旨聲明, 第時結佐婚我係唔會生的, 如果佢想要小朋友就唔好娶我.
我唔生既原因其實有好多. 首先就係錢既問題, 什麼老有所依, 養兒防老已經不合時宜啦. 而家養一個小朋友係幾咁貴先得架, 我相信用係養育一個小朋友長大既錢, 我自己留番黎投資下儲起晒佢, 已經足夠我退休既時候生活無憂啦~ 我無四百萬去養大一個小朋友囉...
第二, 人地話有仔女既話, 老佐會有人照顧, 無咁悶. 說實在呀, 你地有幾多結佐婚之後仲會同父母住架? 結佐婚D仔女都會自己搬出黎住架啦, 最多咪過時過節同你食餐飯咁囉, 平時都係兩老自己過生活架啦~ 到你有病既時候, D仔女都要搵食, 都唔會有時間照顧你, 都會送你去老人院/護老院架啦~ 我唔覺得老佐之後有無仔女會好大分別囉.
第三, 我唔鍾意小朋友囉. 我自細就出黎補習同教琴, 而家D細路真係好惡教囉, 又唔純真又唔可愛, 人細鬼大又老積, 嘈喧巴閉麻麻煩煩.
第四, 我自私囉, 我覺得生佐小朋友之後, 我既人生就好似就此完結咁. 以後我都唔可以再過D自由自在既生活, 唔可以一年去幾次旅行, 唔可以想去邊就去邊, 想做咩就做咩, 我以後就要犧牲晒我既將來, 時間, 金錢, 自由等等去照顧個細路. 如果有佐小朋友, 我星期六日就唔可以想點就點, 而係要湊佢地上興趣班去公園玩去麥當當; 放大假果陣唔可以去旅行, 要全天候廿四小時服侍佢地; 佢地考試就要請假陪佢地溫書... 老實講我唔要過呢D咁既生活呀.
第五, 你話個小朋友生出黎係聽聽話話, 聰明伶俐, 人見人愛都仲話啫, 如果佢係曳到死, 唔聽教, 勁駁咀既, 真係激死你都有知啦, 何必要攞舊石頭砸自己隻腳呢?
第六, 我會擔心佢生出黎係智力有問題, 有缺陷, 殘障架囉, 我驚我會好忍心咁掉佢係保良局就算. 我覺得自己唔會咁偉大犧牲晒所有野去照顧佢囉... 我諗我會發顛都似...
12 則留言:
冇錯, 生仔責任好重大
如果佢想要小朋友就唔好娶我 呢句說話好絕情喎~~~ 簡直係叫你男友決定飛你定繼續落去架喎~~~ 風險好大~~~ 其他女仔千祈唔好隨便用呢招~~~
我以前都有你類似的想法, 不過到左唔同的年齡階段, 想法會有所改變, 其實現今生小朋友, 不再是望回報, 這種投資一定是高高高風險, 我覺得生小孩是ENJOY做媽媽的過程吧 , 這過程雖然有很多不愉快的事發生, 但我想應該會有一種自己從來都沒有的幸福和快樂.所以我都希望做媽媽了.
你再大 d 唔知會唔又想要番呢 ?
哈哈, 我同你既諗法都差唔多, 我都同我男朋友講唔好期望我生. 依家啲小朋友真係好難教, 因為通常啲屋企人都好寵佢, 而且好物質化, 真係好唔純真, 兩三歲就識閙人, 諗起都怕怕
三姑: 我自問承擔唔起. gg俠: 先旨聲明好d既~~ 咪咪貓&豆豆龍: 今年好多人生呀, 你係咪其中一個? brtspec: 呢樣當然等我再大d先算, 哈哈~~ M&M: 哈哈, 咁你未來老公點諗?
我都發現這個問題，個個都會諗住唔生，但當年紀大了，諗法就唔同了．．． 以我女友為例，以前就話死都唔生，但現在就間中就話不如生翻個玩．．．但我唔係咁鍾意小朋友，特別嘈住晒，大喊時，我就好易會發脾氣．．．~><~
小J: 我都好憎細路喊, 尤其是果D係度扭計狂叫扮喊又無眼淚果D.
我都好認同，你嘅諗法﹗同道中人麻﹗但啲人講到，
唔生仔就唔係女人喎﹗真係莫明奇妙呀﹗仲話，如果個個都唔生，
呢個世界無人喎﹗何等偉大呀﹗無人都唔關佢事啦﹗輪到佢地管咩﹗
另外，仲有人話喎﹗想無仔送終呀﹗嘩﹗人都死咗啦﹗送咗終，又如何呀？
係啦﹗我都係咁話，我以前細個時，真係又可愛又純真架﹗
點會好似而家嗰啲呀﹗簡直不知所謂啦~
[版主回覆01/20/2010 22:03:00]終於有人同我一樣諗法啦, YEAH!! 得閒大家多D交流吓~
我身邊都有好多同事/朋友相繼做媽媽, 我當然鄧佢地開心啦~ 但我心裏面就同自己講"千祈唔好預我呀!!"
我都好開心呀﹗好難得搵到相同諗法嘅人呀﹗如果真係生，就真係自己搵嚟煩啦﹗舉個例子你聽吖﹗
我個女仔朋友咁，都成廿幾歲人啦﹗但係用錢方面，又無自制能力，有幾多駛幾多咁，咁佢咪將自己啲錢錢，放喺佢阿媽度咯﹗到要時又拎番嚟用，唉﹗我嘅角度係，都養到咁大啦﹗仲要幫個女，管住啲錢錢，但佢一啲都唔覺阿媽好喎﹗好似係理所當然咁﹗我咪話佢咯﹗"你阿媽己經好啦，俾著我唔會同你管錢咯﹗"，佢話 "咁咪唔俾咁多家用咯" ，真係無佢咁好氣~ = . ="
[版主回覆01/25/2010 11:11:00]係呀, 而家D後生(講到自己好老咁), 都好似無乜幾多個孝順咁. 對D老人家呼呼喝喝, 另外都唔好話比家用屋企呀, 淨係唔駛問屋企攤大手板攞錢都已經好好啦...
wow,...好 agree 你既睇法呀...因為我都係支持唔生之人...原因又同你一樣架!!!
[版主回覆06/04/2011 08:35:00]哈哈, 咪係, 我成日同人講, 生黎都唔知為乜.
同埋.....我一聽到小朋友喊就想打暈佢!!
[版主回覆06/04/2011 08:35:00]我就會好抗拒係餐廳食飯/巴士地鐵果陣會有細路係附近左右囉, 討厭佢地嘈喧巴閉, 一時又失驚無神尖叫大喊.
發佈留言