沒有ANTM的日子...

我個個星期日晚都會追明珠台播既America's Next Top Model, 上星期終於都完佐呢個cycle, 有D失落添. 其實我買Tatasha嬴架麻, 有潛質, 每個星期都有進步, 性格又可愛; 相反果個冠軍, 都唔知憑咩野勝出既, 明明每一個cycle評判都好睇參賽者既性格, 睇佢地適唔適合係model界裏面生存架麻, 我覺得Natasha有晒一切條件架喎~~~ 相反果個冠軍一D性格都無...

 

幾時先等到下個cycle呢~~??

 

另外除佐明珠台播既America's Next Top Model, 我都有睇國際台每逢星期日晚8點既Make Me a Super Model, 呢個係英國搞既. 嘩, 真係悶到抽筋, 節奏緩慢, 比賽形式無聊, 參賽者全無水準可言, 我每次都只係錄起, 然後以100X快鏡飛快睇完就算, 真係好悶呀.

 

每次要eliminate既時候, 就係要D參賽者無無聊聊出黎行catwalk, 然後比觀眾投票決定邊個留低. 超唔公平囉, 果個Jane, 肥到隻豬, 無氣質又唔靚, 一早應該出局架啦, 如果換轉係ANTM, 我相信佢連面試既機會都無囉, 但佢竟然可以留到而家?! 點解? 因為佢係英國人囉~ 由觀眾投票決定麻, 於是其他明明有潛質, 比呢個Jane好得多既參賽者, 都一一比人foul晒出局囉, 因為被foul既唔係英國人麻. 真係不知所謂!!! 睇埋呢一輯, 即使有下一輯會播出我都唔會再睇架啦, 超無聊!!

北方小館 -- 難食態度又差

地址: 上環文咸東街49號地下
電話: 2541-7128

上星期五同同事出街食lunch, 呢間野真係不知所謂, D阿嬋落單落到鬼咁混亂, 我地重覆佐幾廿百次, 都落唔啱D單, 到最後都係黎錯, 個阿嬋D態度又差. 落錯單又落漏單, 離晒譜.

 

D野又難食, 個小籠包, 皮又厚, D小籠包又黐埋晒一齊, 一夾就扯爛晒D皮. 我同事叫佐個無錫骨擔擔面, 都唔係擔擔面黎既, 我見佢D無錫骨又細粒, 黑忟忟成舊炭咁...

 

是次消費每人約$60

三木韓國料理 -- 食得過

地址: 尖沙咀堪富利士道12-16號宏貿發展大廈2樓
電話: 2721-8970

上星期二飯局去佐食韓國菜, 我已經唔係好記得D食物叫咩名, 叫佐個豬頸肉, 炒粉絲, 海鮮薄餅, 飯, 湯面之類啦. 味道都OK既, 環境都唔錯, 坐得舒服, 同埋價錢又唔算太貴, 食得過架~~~

是次每人消費約$117

 

 

 

生仔? 唔好預我

未結婚果陣, 身邊既人就會問你幾時結婚; 結佐婚之後, 身邊既人就會問你幾時生仔. 老實講, 我從來都無諗過要生喎, 結婚之前, 我已經同流沙包先旨聲明, 第時結佐婚我係唔會生的, 如果佢想要小朋友就唔好娶我.

 

我唔生既原因其實有好多. 首先就係錢既問題, 什麼老有所依, 養兒防老已經不合時宜啦. 而家養一個小朋友係幾咁貴先得架, 我相信用係養育一個小朋友長大既錢, 我自己留番黎投資下儲起晒佢, 已經足夠我退休既時候生活無憂啦~ 我無四百萬去養大一個小朋友囉...

 

第二, 人地話有仔女既話, 老佐會有人照顧, 無咁悶. 說實在呀, 你地有幾多結佐婚之後仲會同父母住架? 結佐婚D仔女都會自己搬出黎住架啦, 最多咪過時過節同你食餐飯咁囉, 平時都係兩老自己過生活架啦~ 到你有病既時候, D仔女都要搵食, 都唔會有時間照顧你, 都會送你去老人院/護老院架啦~ 我唔覺得老佐之後有無仔女會好大分別囉.

 

第三, 我唔鍾意小朋友囉. 我自細就出黎補習同教琴, 而家D細路真係好惡教囉, 又唔純真又唔可愛, 人細鬼大又老積, 嘈喧巴閉麻麻煩煩.

 

第四, 我自私囉, 我覺得生佐小朋友之後, 我既人生就好似就此完結咁. 以後我都唔可以再過D自由自在既生活, 唔可以一年去幾次旅行, 唔可以想去邊就去邊, 想做咩就做咩, 我以後就要犧牲晒我既將來, 時間, 金錢, 自由等等去照顧個細路. 如果有佐小朋友, 我星期六日就唔可以想點就點, 而係要湊佢地上興趣班去公園玩去麥當當; 放大假果陣唔可以去旅行, 要全天候廿四小時服侍佢地; 佢地考試就要請假陪佢地溫書... 老實講我唔要過呢D咁既生活呀.

 

第五, 你話個小朋友生出黎係聽聽話話, 聰明伶俐, 人見人愛都仲話啫, 如果佢係曳到死, 唔聽教, 勁駁咀既, 真係激死你都有知啦, 何必要攞舊石頭砸自己隻腳呢?

 

第六, 我會擔心佢生出黎係智力有問題, 有缺陷, 殘障架囉, 我驚我會好忍心咁掉佢係保良局就算. 我覺得自己唔會咁偉大犧牲晒所有野去照顧佢囉... 我諗我會發顛都似...

意味小廚 Cafe A-Roma -- 尚算不錯

地址: 元朗西裕街17號民康大廈4-5號舖

電話: 2470-1017

 

星期日下午同流沙包黎呢度食lunch, 我叫佐個豬扒配什菌跟薯菜, 流沙包叫佐個茄汁蝦天使面. 呢度既價錢比較貴, 要成四, 五十蚊一個set lunch, 不過似乎都值既. 餐湯唔係普通忌廉湯, 我食到有魚肉係裏面, 不過我就唔多欣賞D餅乾條, 唔好食.

 

個天使面都唔錯既, 不過我覺得D蝦都仲好似有少少雪味; 我個豬扒什菌就普普通通啦~~

 

是次每人消費約$50

 

麥奀記麵家 -- 好味道!

地址: 中環永吉街37號地下
電話: 2541-6388

 

流沙包星期五晚係大舞台飲, 飲之前佢未有地方去, 所以我地就一齊係我公司附近逛佐陣. 流沙包陪我去佐食雲吞面, 我叫佐個「正斗雲吞面」, 呢度既雲吞面果然好好食呀, D蝦夠彈牙, D面夠爽口, D湯夠鮮甜, 好味道呀~ 另外我仲叫佐個菜.

 

是次消費每人約$40

泉章居 -- 無咩特別啫, 點解都咁多人等既...?

地址: 旺角奶路臣街33號依利大廈
電話: 2396-0672

上星期四流沙包係太子教球証班, 所以我地夜晚係旺角食飯. 我地六點幾去到, 未駛等位, 叫佐個2人套餐, 有個例牌鹽焗雞, 小菜叫佐西芹腰果肉丁同埋蒜子蜜糖骨, 仲有個例湯. 另叫佐兩個白飯.

呢度既雞似乎係招牌菜, 但可惜我唔覺得個鹽焗雞有咩特別, 我仲覺得有D靭添喎... 西芹腰果就普普通通啦, 個蒜子蜜糖骨都幾好食既, 不過食完個口一陣味, 記得要食番D香口珠...

食完飯大約七, 八點左右, 落到去發覺原來有好多人等位, 但係, 我唔覺得呢度特別好食咋喎, 點解都會有咁多人既...?

是次消費每人約$100

維苑餐廳 -- 服務唔掂

地址: 元朗廣場G/F 065-078號舖
電話: 2418-9777

星期三晚流沙包要練波, 練波前一齊係元朗廣場食飯, 由於元朗廣場都無咩好食, 所以無乜得揀之下去佐維苑. 佢搬舖後我第一次去, 我坐個位頭頂成日滴冷氣機水落黎囉. D侍應態度上都無咩禮貌, 好似係茶餐廳咁. 最慘係連寫單都唔識, 叫佐個普通侍應寫野, 佢自言自語問呢個餐有無餐湯, 轉頭走佐去, 跟住有一個類似高級D既人走埋黎問係咪寫野... 我頭先咪講佐次囉, 咩未落單既咩? 又要講多次, 真係超唔掂!!

食物方面, 普通啦, D薯條腍既, 一個非鐵板上既雜扒餐賣$58, 元朗黎講好貴囉, 體育會餐廳一個鐵板雜扒餐都只係$30咋喎...

是次消費每人約$60

part-time degree畢業前感想 (下)

3. 有次上accounting, 阿sir輪流叫同學講出問題既答案, 其中一題既答案係"66,000", 有條友就答"six six O O O"(英文字母O), 阿sir話你地上既係accounting, 應該用番正統既方法黎表達數字, 於是條友再更正為"six six zero zero zero", 阿sir當然唔接受啦. 跟住條友再答, 佢既「答案」真係令人O咀, 佢竟然答"six six triple zero"! 真係要頒番個最具創意奬比佢, 唔係咁白痴呀?? 小學都有教點用英文講數目字架啦... 你不如再答"double six triple zero"呀笨?!! 真係低能得交關. (唔知佢點開支票既呢??)

 

4. D人返學可能只係為佐點名為佐出席率, 只係為佐張cert., 唔係想黎學野啦, 總會有一D人, 每次上堂就由頭傾偈傾到放學. 每次返到去都要認住果科邊班PK會掛住傾偈唔係上堂, 千祈唔好坐係佢地附近, 否則成堂就聽佢地講埋D無聊白痴野. 好啦到group discussion既時候, 佢地班人竟然仲問xx呢樣野係咩野黎. 大佬呀, 而家已經week 7囉喎, 聽講xx係week 1既時候已經講解過, 同埋xx係一直以黎差唔多堂堂都會出現架喎, 你到今時今日仲問xx係D咩, 好心你地班PK要傾偈你出去食飯happy hour傾啦, 唔好係度嘥你自己時間又騷擾其他想聽書既人上堂啦!!!

 

5. 我地今個Sem要交份term paper, 又有人問format應該點, 可唔可以point form, 駛唔駛一定要有圖/graphs... 大佬呀, 你唔係成世人未做過project呀麻, 圖/graph呢D野你覺得有需要咪落, 無需要咪唔落囉, 咁都仲要問? 小學生呀? 不如比埋個sample你照住做添呀好無?

part-time degree畢業前感想 (上)

我讀緊的part-time degree是CityU的Bachelor of Business Administration (Honours) in Business Management, 係CityU本校自己開辦既, 唔係什麼校外進修學院同海外大學合辦既果D top-up degree. 總共要完成90 credits畢業, 我讀了三年, 只要完成埋summer term最後一科, 就可以畢業. 呢個programme每年都收數以百人.

 

說實在我覺得呢個programme, D同學既質素真係令人「大開眼界」, 呢個結論係我以下既經歷所得出黎既感覺:

 

1. 先講成績, 有D科我覺得自己考試考得麻麻, 預計只可以拎到B左右, 但最後出黎既結果竟然係A or A-, 我都覺得幾surprised. 我而家GPA係3.91, 19個courses裏面, 我只有其中兩科攞B同埋B+, 其他科都係A, A-, 甚至有四科係A+. 我覺得如果換轉係full-time的話, 我唔會攞到咁好成績囉. 我認為我高分唔係因為我真係好勁, 而係其他同學實在太渣, 所以拉curve下, 有D我認為自己考得麻麻地既科, 都可以攞到A. 

 

2. 係大學上堂, 當然所有科都係英文授課, 間唔中有d tutor會偷雞用中文講書. 但唔知點解每次要做presentation果陣, 總會有人問係用中文present定係用英文present, 年年/餐餐都會有人咁問. 天啊~! 你係得U上堂, 讀得既係degree, 唔駛問梗係用英文架啦, 呢樣野唔駛問架下話...?? 你唔係認為係大學可以用中文呀? 你以為自己讀緊中文系呀?

 

待續...

元朗鄉村小廚 -- 不倫不類

地址: 元朗西菁街9號富盛大廈12-13A號地舖
電話: 2473-3966

 

星期日我地同阿媽去佐呢度食飯, 睇個名以為食小炒小菜啦, 點知入到去發覺無咩野好食, menu D選擇少到暈, 同埋好九唔搭八咁有好多泰式食品, 如泰式湯粉, 泰式咖喱, 珍多冰三色冰之類. 然後又有海南雞飯, 又有湯飯, 又有D小菜咁, 完全唔知呢間野想點.

 

食物方面, 我地叫佐瓜粒什錦湯飯, 蠔仔湯飯, 一個蜜桃骨, 一個窩貼小棠菜, 味道都OK既, 不過最最奇怪係果個窩貼小棠菜, 我地以為佢上錯菜添喎, 完全估唔到竟然會係咁樣...

 

是次消費每人約$50

澳門街 -- 難食!!

上環干諾道中200號信德中心東翼3樓304A-304D舖
3102-1982

7月3日有新同事返工, 所以一齊出去食lunch. 我叫佐碟越式炒金邊粉, 等鬼死咁耐先至黎, 碟粉鬼咁難食, D金邊粉硬到死, 又乾, 一pat橡筋咁. D蝦好有味, 一陣雪藏味呀麻, D料又少, 我食剩大半碟係度, 成碟野簡直都唔係比人食既, 無下次呀!!!

 

是次每人消費約$45  

御花園咖啡室 -- 不知所謂

地址: 銅鑼灣怡和街88 號富豪香港酒店1樓
電話: 2837-1772

流沙包早排生日, 佢用開既電話公司新世界送佐張tea buffet coupon比佢, 二人同行, 一人免費. 我地就揀佐7月2號去食. 去到行佐個圈睇下有咩好食, 果一刻我真係想即走唔食, 因為完全唔掂呀!! 勁唔抵食, 熱盤數目十隻手指數得晒, 仲要係D極普通既食物, 如炒飯, 意粉之類, 又唔好食喎. 甜品數目就五隻手指數得晒. 呢度每位原來要$138, 真係搵鬼黎食囉...

7月2日繼續扮自由行

7月2號我地好早就起佐身, 然後落街搵野食. 雖然我上一份工係海港城返佐兩年, 但係由於我早餐只係0係公司食餅乾, 所以都唔知附近邊度有餐廳咁早開可以有早餐食. 我地周圍行黎行去, 到最後我先諗到澳門茶餐廳應該開佐門, 終於搵到地方食早餐.

 

空無一人既food court:

 

之後我地返酒店check-out, 然後就搭船過灣仔, 再搭叮叮過銅鑼灣, 因為我地兩點半會去富豪酒店食tea buffet. 由於未夠鐘既關係, 我地先去佐世貿既Namco玩佐陣, 呢間機舖真係越黎越唔掂, 八蚊玩一次夾公仔, D公仔又唔靚, 擺法又賤, 根本就係呃錢, 下次唔會再黎玩啦!!

      

食完tea buffet之後, 再行佐陣Sogo同旭屋, 跟住就返屋企lu, 正式結束呢兩日既自由行之旅.

Stage Cafe -- set lunch又前菜又甜品, 抵喎~

地址: 尖沙咀海港城海運大廈LCX第2層290號
電話: 2375-2183

七一回歸日我地去佐Stage Cafe食lunch, 呢度一個set lunch只係四十幾蚊, 包餐湯, 前菜, 主菜, 甜品同飲品, 幾抵架. 前菜係三文魚什果沙律, 雖然D什果係罐頭什果, 但舊三文魚都算幾大舊啦~

 

 

主菜方面, 我叫佐法式海鮮焗飯, 我覺得麻麻地, 所謂海鮮只係有D好細粒既魷魚同幾舊魚仔咁, 唔多好食. 流沙包叫佐個帆立貝天使面, D帶仔幾大粒, 不過無咩味, 唔知係咪雪藏得太耐呢?

 

 

甜品係朱古力蛋糕一小件.

 

整體黎講, 雖然D野唔多好食, 但係價錢只係四十幾蚊, 包佐咁多樣野, 算係咁啦~

是次每人消費約$55 

 

七一慶回歸@Marco Polo Hong Kong Hotel

話說流沙包係Marco Polo Club既member, 我地會有一晚免費酒店住宿, 經過我「極力爭取」下, 終於成功book到可以7月1日check-in. 回歸日我地先去佐Stage Cafe食lunch, 然後兩點後去check-in, 之後再行下海港城, 海運, 去佐冒險樂園玩, 行佐陣LCX, 跟住就去Panash買面包做tea, 再去7-11買飲品. 果陣已經係5, 6點, 好多人已經準備去睇煙花, 尖沙咀鬼死咁多人, 連去星光行果間7仔買野飲, 都要係門口排隊入去, 真巴閉, 呢D咁繁忙既時間置身尖沙咀, 我既感覺就好似香港淪陷佐咁, 買野食野都大排長龍, 貨架上既野清得七七八八, 周圍鬼咁多人...

望出去無景睇既酒店房:

睇煙花既地方:

買完野我地就上返房"high tea", 抖一抖之後大約七點就落佐酒店6樓個露天廣場霸個靚位睇煙花. 今次終於可以好近距離咁睇煙花啦, 好靚好清楚耶, yeah!!!

high tea:

睇完煙花之後, 大家就迫lift落返酒店lobby走, 我地就舒舒服服上房繼續休息, 唔駛同人迫餐矇, 個感覺好正呀~ 不枉我諗到7月1日用佐個免費住宿, 流沙包之前打去book唔到房, 我再寫e-mail去投訴先「爭取」到可以有房入住, 好開心呀~~

晚餐我地就落City Super買野返房食.

 

2007年6月29日(五) -- 新同事上黎我屋企玩~~

上星期五放佐工後成班新同事黎佐我屋企玩, 有7個同事上佐黎, 其中一個同事仲帶埋佢隻大狗狗黎添~ 我地外賣叫佐千之壽外賣返黎食, 結果我地都係眼闊肚窄, 剩低佐好多野食.

 

諗諗下我以前TDK D同事都未上過黎我屋企玩, 甚至乎每日返工都未必會同隔離位既同事講到一句野, 莫講話有同事生日會一齊出去食lunch咁好. 返而而家呢間公司, 我都未過probation, 同大家同事已經可以有講有笑, 食飯又會一齊食, 仲上埋黎我屋企玩添, 真係幾難得. 好同事呢樣野真係可遇而不可求. 不過可能係我舊公司D人實在太無人情味啦, 所以去到邊間公司都好過佢啦~

銀座藏人 -- overall黎講幾好

地址: 中環萬宜大廈213室
電話: 2259-5300

話說我而家份工D同事比係TDK果陣好幾百倍, 我地呢度每逢有人生日都會一齊出去食lunch, 間唔中又會一大班人約埋出去食lunch吹下水. 上星期五因為同某個同事預祝生日, 所以出佐黎食飯.

 

呢間餐廳overall黎講幾好, 環境唔錯, 坐得舒服, 唔會好迫, 同隔離枱有一定距離. 食物方面都幾好, 一個set lunch有湯, 有沙律, 賣相好, 味道都唔錯, 可以一試~

 

是次每人消費約$75

 

2007年6月28日(四) -- 滂沱大雨返大陸

經過兩個月時間, 終於將幾個月既FS做起佐比個客, 但係個客睇唔明, 於是我地唯有上去個客間廠度親自解釋比個客聽. 約佐同事同GM八點十係羅湖果邊等, 點知今日大雨到死, 我行去巴士站果段路已經搞到成對鞋成條褲濕晒. 大雨又搞到塞車, 搞到九點一先去到羅湖, 真樣衰.

 

今日十點幾就上到個客係東莞黃江間廠, 解釋佐一輪又問佐D問題, 點幾鐘可以去食飯, 我地去佐間coffee shop食飯. 食完飯約三點鐘就可以返香港, 返到香港四點幾, 本應可以好爽咁直接返屋企, 但係今晚要返CityU mid-term test喎, 於是早D返到學校溫下書先.

 

今日科mid-term真係令人嘔血...