2010年4月9日(五) -- 失望的銅鑼灣聘珍樓結婚週年飯

除佐寫九州之旅之外, 我仲想間中寫吓我返黎香港之後既生活.

 

話說我回歸香港後, 就打電話去聘珍樓book枱食結婚週年紀念飯啦.

 

因為我當年係尖沙咀聘珍樓擺酒, 所以每年都book番去尖沙咀食.

 

點知果日打電話去訂枱, 先知原來尖沙咀聘珍樓已經執佐啦(好似話因為租約期滿喎), 吓~~!!!?? 嗚, 晴天pig pig呀, 估唔到我擺酒既地方咁快就唔再存在啦, 連想間中去回憶下都無, 嗚...

 

本來我諗住即使過佐五年, 已經再無免費結婚週年飯食也好, 我都會繼續keep住去聘珍樓食飯慶祝架麻, 但而家連酒樓都唔係度咯, 無野啦~ (我估計酒樓可能就捉我呢種心態, 所以先咁好送五年既週年飯比新人)

 

咁於是我改去銅鑼灣聘珍樓啦(方便我放佐工過去麻), 唉, 銅鑼灣聘珍樓真係令人好失望呀, D侍應(著白色制服果D)無咩禮貌, 態度麻麻, 無笑容囉... 我地一坐低, 有個侍應就問我地"飲咩呀?", "請問"都無句, 而且D語氣真係好似茶餐廳伙計咁架. 個個都木口木面(係白色制服果D囉, 著黑色制服高級少少既果D都還可以), 你完全feel唔到殷勤囉. 你話如果呢度係普通屋村酒樓, 咁既服務態度我會覺得無咩野; 但呢度係聘珍樓喎, 兩個人去食餐飯閒閒地都過千銀啦, 你D侍應既水準唔係咁吓麻?

 

真係令我更加懷念尖沙咀聘珍樓呀, 因為果度D侍應真係好pro架, 一入到門口個個已經笑容滿面對住你, 態度又殷勤又nice, 令你成餐飯感覺好舒服架(舊年既週年飯BLOG可參考呢度), 而且尖沙咀既趙經理又認得我地(佢仲記得流沙包係教書既), 每次去食飯, 趙經理都會走埋黎同我地吹吓水架. 而家呢間銅鑼灣聘珍樓...? 唉...