有感而發...

而家係凌晨兩點十六分, 點解我仲未訓? 因為尋晚九號風球橫風橫雨我驚會爆玻璃所以訓唔著, 所以成四點先訓, 今日好晏先起身, 於是而家都未係好眼訓.

所以我而家都仲係上吓網睇吓電視咁, 點知而家無線播緊個節目又見到王喜...

我咁講唔係因為我討厭王喜呢個人, 而係... 我個EX個樣真係有D似王喜.

而家晚晚做烈火雄心3, 搞到我一路睇, 一路不其然咁就諗起EX. 再加上王喜個角色性格同EX又真係好鬼似, 都係自以為是, 永遠覺得自己啱晒, 人地錯晒, 從來唔會企係對方既角度諗吓.

雖然我覺得我同EX其實根本唔應該0係埋一齊, 而佢同我分手果陣講佐好多難聽既說話, 亦都做得好絕(佢無親口同我講過分手呢兩個字, 只係透過個friend黎講我知), 不過我從來都無嬲過佢.

因為佢既出現都令我有反思既, 我知佢其實好睇唔起我係TDK份工, 覺得我好無用. 於是我好努力咁進修, 好努力咁轉行. 而家係公司總算叫做有D前途, 其實都要多謝佢.

而且如果唔係佢當初飛佐我, 我根本唔會有機會識到流沙包, 唔會搵到一個咁好既老公, 所以呢一點我更加應該要多謝佢.

不過同佢分佐手咁耐, 我對佢仍然有點介懷, 因為佢真係好hurt我, 一齊果陣從來都唔會理我感受, 咩都係佢自己啱晒咁, 有問題唔會同我坐低好好地傾, 我平心靜氣同佢講, 講唔夠兩句佢就話我發脾氣, 話無野同我講; 分手時話我一無是處, 總括黎講我係佢眼中好似係一堆廢物咁.

或者你會問, 佢係咪D咩專業人士黎架? 點解會對我講埋D咁既野呢? 答案又唔係喎, 果陣時我學歷高過佢, 搵錢多過佢. 當然我知道自己都有好多不足之處, 例如我唔識煮飯, TDK份工好無前途, 人又唔靚身材又唔好... 但係, 佢都唔駛踩到我一文不值咁吧?!

我都唔知發咩神經, 三更半夜寫埋D咁既野... 訓啦~