星期四晚去佐九龍灣飲, 我以為平日去飲會早D開席添. 原來都係九點先開始, 播片進場敬酒致詞等等, 九點三起菜.
其實我一直都覺得結婚飲宴好公式化, 一定係:
-先播成長片段(大部份都幾悶, D相又無咩特別, 除非我同你由細玩到大有共鳴, 否則我對你既成長其實無咩興趣)
-進場(例牌一定要放花炮)
-切蛋糕(明知個蛋糕係假的)
-敬酒
-新人致詞(你唔講我都估到你實係多謝爸爸媽媽, 另一半既父母, 多謝另一半為佐籌備婚禮辛苦晒, 然後就請大家今晚玩得開心D)
-起菜(一定係起音樂然後D侍應好「浩浩蕩蕩」咁捧住D乳豬入黎.
-再上菜(來來去去都係食果D野)
-新人連成班鄉村父老逐枱去敬酒(明知你手上果杯只係茶/汽水)
-再上菜(魚, 雞, 飯, 面, 糖水走唔甩)
-送客(佢對手掂下你力都無用下就叫握佐手...)
講真其實都幾悶, 但係我結婚果陣都一樣沿用番呢條公式. 其實我有諗過到底結婚飲宴可唔可以搞D咩新意思呢? 個個飲宴都係咁毫無特色, 幾年後我都唔記得你個婚宴到底係點...
所以如果你地係未結婚既, 我覺得你地不妨搞搞新意思, 唔好個個人結婚都係做埋同一樣既野, 比自己同賓客留下更深的回憶~~
8 則留言:
你講得幾好笑.
[版主回覆09/02/2008 01:09:00]哈哈, 我自己結婚都一樣係咁, 所以我一樣係話緊我自己. ~~
Kaka 會晤會有壓力呢?
[版主回覆09/02/2008 01:07:00]Kaka唔同, 我地咁friend, 我唔會覺得悶既~~
哈.......請你飲咪好大壓力? 不過我諗係要睇下你同果個人幾fd.如果果個人真係同你好好朋友.我諗佢地既婚宴就算乜都唔攪,你也會''祝福''他們的. 有時我反而覺得,有些飲宴太''特別'',會令人反感. 好似我以前去過一個婚宴.個新郎係度除衫打拳.雖然到而家都覺得好特別.但係就係好扮野的特別囉...:p 反而我希望一個婚禮可以主人家開心,又溫溫馨馨,就好了...哈...好似好老土的說法... ==== yi..你去九龍灣邊間呀?hahaa.
[版主回覆09/03/2008 13:46:00]我去九龍灣X藝會飲呀~ (我唔記得第一個字係咩, 德藝會定博藝會定係...?)
其實我既諗法都同你一樣, 如果我同結婚果個人真係好friend/識佐好耐(好似你同樓上的"幸福少婦"咁), 無論個婚禮點, 我都會一樣好投入好開心.
我講既果D"比較悶"的係指一些我唔係太熟太friend果D, 例如出席我老公朋友的婚宴
其實我都好怕平日飲.第日返工都飲得冇咁開心.... 不過暫時我都未試過飲平日又係真係同佢熟.所以我會選擇早走...
[版主回覆09/03/2008 13:48:00]係呀, 第二日返工果陣我真係超眼訓...
唉...係呀,好似 ii 講,我一睇完呢段文,即刻覺得有d壓力添....
因為如無意外,我既婚宴都係差唔多架啦.....
唔會有咩特別野搞.....我地都唔想....哈哈~
不過,希望到時大家記得同我影多d相呀~~~
大家賞臉來臨及得到大家既祝福,我已經好滿足架喇~~
[版主回覆09/03/2008 13:53:00]我要每套衫都影一張, 哈哈~
正如我係樓下回覆ii同至抵精明眼咁, 我同你咁熟, 就唔同講法架啦~~
不如你試下全晚兩公婆唱歌跳舞娛賓丫~~~ 或者播你地拍既MTV, 哈哈~~~
[版主回覆09/03/2008 13:53:00]嘩, 咁樣我地要收好貴架喎, 哈哈哈~~~
啊．．連果d都要出席．．真係好悶喎．．． 呀！你知唔知點解我問你呀？因為我都訂九龍灣．． 哦．．而家仲要知就係果間啦！！德藝會． 噢．．我想問下係咪好迫呀?(幾多圍？）同埋佢d野係咪ok or都唔得架?仲有係個backdrop係咪好核突呀？哈．．．哈．．．．俾d意見呀！Thanks!好多問題添．．．
[版主回覆09/08/2008 12:54:00]我覺得個場ok呀, 樓底夠高又無柱, 果晚坐廿幾圍我都唔覺得迫~~
你都啱，我個party都會係咁上下，哈哈。
但如果唔係咁既流程又可以點? 我冇咩表演慾喎，我諗我到時只可以扮靚靚做紙板公仔同人客影下相咁咋，呵呵~
[版主回覆09/08/2008 12:56:00]我都諗唔到有咩流程可以搞, 所以我個婚禮都係一樣咁做, 哈哈~~ 我都係吹下水咋, 唔好咁認真對待篇blog~~~
發佈留言