葵樹坊 Casa Cafe & Restaurant -- 唔錯呀~~

地址: 元朗大棠路48A-48K昌發大廈8-9號舖
電話: 2474-6868

星期日同阿妹預祝生日, 一家人黎佐呢度食飯. 我唔知係奧運閉幕既關係, 定呢間餐廳一向都無咩生意, 星期日晚八點半都無人既? 我地差唔多包場咁濟, 成間餐廳得兩, 三枱客...

 

我地叫佐個晚餐(有前菜, 鱈魚拼雞扒飯, 生果), 田螺, 牛扒拼鵝肝, 忌廉莧菜, 薑汁豚肉薄餅, 帶子鵝肝炒飯, 三文魚蟹子意粉.

 

總括黎講D野都唔錯呀, 個薄餅幾好食. 不過佢地話個牛好韌, 同埋我覺得鵝肝麻麻地.

 

是次每人消費約$130.

2008年8月22~23日(五, 六) -- 打風放假

星期五, 又打風, 唔駛返工. 打風係聯誼既好日子, 所以我地落佐屯門同班friends一齊飲茶, 跟住就去振宇屋企玩~~

 

而家D食肆真係勁, 9號風球都照常營業, 夜晚都唔駛驚無飯食. 我地由朝玩到"清晨"過後三點幾先走, 真係攰過返工.

 

黑仔到暈, 輸佐成五舊水麻雀.

 

 

星期六, 到振宇佢地上黎我地屋企打邊爐. 我搬佐入黎約兩年, 都好似未試過係屋企打邊爐.

 

陣沙嗲味係屋度兩日都未散, 勁呀~~~

多謝流沙包~~

上星期政府話中國奧運金牌運動員會訪港, 到時會有體操, 跳水, 羽毛球等等既表演同埋大滙演. 門票會係星期四於各城市電腦售票網公開發售.

 

我同流沙包講話想去睇, 佢真係去佐排隊, 我地屋企附近就係元朗劇院, 星期四果朝早, 我都未出門口返工, 流沙包就已經落佐去排隊.

 

可惜流沙包排到十二點幾, 所有飛都已經賣晒, 買唔到. 而我就由朝早八點幾開始上網, 一直都入唔到去售票網.

 

雖然買唔到飛, 但流沙包呢份心意已經好足夠啦~ 我無諗過我一句話想去睇, 流沙包真係去排隊買飛~ 多謝你啊~~~

2008年8月17日(日) -- 美食展

今日同流沙包一齊去佐美食展, 之前我從來都未去過, 因為我怕人多, 又唔覺得有咩值得要比錢買飛入場買, 所以一直都無咩興趣去.

 

今年我第一次去, 果然係多人到暈, 有D地方簡直係多人到行都行唔郁, 又迫又焗.

 

入到去都唔係試食佐好多野, 試佐D月餅, 乾果, 雞飯醬, 龜岭膏, 面, 粥, 燒餅, 薯片, 湯, 豆漿, 涼茶, 果汁等等.

 

我地買佐D餅乾, 蛋糕, 益力多(有玩具送, 但後尾比我整爛佐個頭), 韓國薯片等等.

 

行到五, 六點, 振宇打黎約食飯, 於是我地又一齊食飯勒~~~

 

呢兩日行佐好多路, 好攰呀~~

 

2008年8月16日(六) -- 返中大拎學生証

今日同流沙包一齊返CU拎學生証, 好彩流沙包以前都係CU人, 有佢陪我返去, 否則CU咁鬼大, 我又唔識點搭車上山, 又唔知係邊個站落, 又唔知幢building係邊, 實會蕩失路啦~~ 所以今日順便搵埋第時上堂既班房係邊, 費事到時返學先搵餐矇.

 

好似賣廣告咁...:

 

第時上堂的地方:

 

適逢今日中大搞佐個嘉年華, 有野玩, 有野睇, 有野食~~~ 我地十二點去到CU, 十二點半上去拎佐學生証, 跟住影下相, 食下lunch, 睇下D攤位, 排隊拎下野食, 再去食個tea, 搵下班房, 搞到五點幾先走~ 今日真係超熱超曬呀~~

 

 

免費有得食:

 

比錢買既tea:

 

本來想今日去埋美食展, 但我行到好攰啦, 返屋企睇奧運lu~~~

大榮華酒樓 -- 都真係幾好味喎~~

地址: 元朗安寧路2-6 號2 樓

電話: 2476-9888

 

星期一都係未返到工, 個人好攰, 喉嚨勁痛, 手軟腳軟, 仲忽冷忽熱, 有時就覺得好熱要開風扇, 有時就覺得好凍要圍住件披肩.

 

今日都係0係屋企溫下日文, 睇下奧運, 食完藥攰得濟就訓下晏覺咁.

 

夜晚就出佐去大榮華同振宇等人食飯. 我住係元朗咁多年, 只係N年前去食過一次晚飯咁多. 飲茶就從來都未試過.

 

今次我地8個人, 叫佐雞蛋魚腸, 枝竹牛腩, 鹵味拼盤, 椒鹽九肚魚, 魚湯浸莧菜, 桂花蟹肉炒蛋, 鱔, 蝦醬豬肉, 同埋叫佐馬拉糕及糯米卷.

 

我覺得D餸菜好有特色, 最好食係椒鹽九肚魚, 同埋個馬拉糕真係好好食, 一定要試.

 

另外食食下飯見到關禮傑, 佢同屋企人黎食飯, 坐係我地隔離枱.

 

是次消費每人約$90.

 

2008年8月10日(日) -- 香港一日遊: 睇珊瑚+塔門+荔枝窩. (又病了...)

我地今日參加佐屋苑搞既香港一天遊活動, 參與既包括振宇氏同姚氏. 我地朝早九點三係屋苑樓下集合上車, 然後就去馬料水轉船.

 

我地第一站去后海灣睇珊瑚, 我地要分十人一組坐「玻璃船」去到淺水位置, 透過船底既玻璃去觀賞珊瑚. 每組睇5~10分鐘就要上返大船.

 

然後就去佐塔門食飯, 本來食完飯係去行天后廟, 但呢期裝修中, 無得入去睇.

 

跟住就再坐船去荔枝窩, 睇下空心樹, 百花魚藤, 五指樟等等. 睇完就上返船回程返馬料水, 再搭車返元朗.

 

返到元朗我就即刻去睇醫生. 都唔知點解, 今朝起身都好地地, 但到lunch坐低食飯果陣, 開始覺得喉嚨有D唔舒服, 去到荔枝窩就開始喉嚨痛, 然後搭車返元朗果陣就覺得個人好凍, 返到元朗得番半條人命.

 

嗱嗱臨去睇醫生, 原來發燒102度, 醫生話係感冒喎... 總之成個人無晒力, 三十幾度披住披肩都覺得好凍, 喉嚨勁痛, 行路都無力咁濟... 好辛苦呀!!

 

 

2008年8月9日(六) -- 陪阿媽去body check

今年我送比阿媽既生日禮物就係一個body check套餐, 所以我今朝早就陪阿媽出旺角做body check.

 

我揀既呢間係我以前係TDK, 公司body check果陣做過, 我覺得服務同環境都幾好, 所以就揀番呢間.

 

唔計填問卷/留小便等等既程序, 淨係計阿媽入去到做完晒出番黎, 都只係用佐半個鐘, 比我想像中快喎~ (我揀既package包括女性檢查, 照肺, 照腹, 心電圖, 測肺容量等等)

 

之後同阿媽去佐飲茶, 然後行佐陣女人街就返屋企勒.

 

今晚流沙包去wild camp, 我一個人在家繼續睇奧運~~~

2008年8月8日(五) -- 奧運開幕! (病了在家休息)

其實尋日已經唔舒服, 個肚好痛, 嗱住嗱住咁, 所以尋日朝早無返工去佐睇醫生, 睇完醫生先返工.

 

今日起身都仲係覺得痛, 所以都係請佐一日假係屋企休息.

 

今日係奧運開幕, 當然唔可以唔睇啦, 真係好精采, 中國加油!!

2008年8月6日(三) -- timing好準的颱風

好耐都未試過因為8號風球可以全日放假, 通常都係下午先掛可以提早收工, 或者好似上次咁好早就落風球要下午返工.

 

今次呢個颱風剛剛係正office hour最接近香港, 所以可以無啦啦多一日假期.

 

我同流沙包好優悠咁係屋企抖下, 下午就去佐姚氏屋企打麻雀~~~

2008年8月5日(二) -- 返深圳office

由於之前落黎香港training三個月既深圳同事已經到期返番上深圳, 所以我黎緊就要定期上深圳check下佢做既果盤數. 本來諗住一個上午就可以check完, 但今次呢盤數有少少mistakes, 所以改完又改, 搞到三點幾先check完.

 

本來以為三點幾走得, 但因為要等埋GM同深圳同事開埋會, 所以最後差不多四點先走.

 

定期要返上深圳office我又唔介意, 不過我要練好D煲冬瓜先...

2008年8月2日(六) -- Mega Box

振宇呢期搬屋, 所以要行傢俬舖添置新傢俬, 於是星期六約埋三pair人一齊去行Mega Box既B&Q, 另外再行宜家傢俬. 感覺上B&Q幾大D野幾齊, 無論傢俬, 裝修用品, 室外家具都有齊.

 

不過我都係鍾意行宜家傢俬多D, 感覺多D野睇, 同埋D design靚D, 參考性大D.

 

夜晚就一齊去佐食Ruby Tuesday, 我地仲計過條數, 即場用$400join佐個90日plan.

 

之後就入屯門係姚氏屋企打麻雀打到半夜3點幾先走.

 

好攰呀~~~~

Clipper Lounge@Mandarin Oriental -- 唔抵食

地址: 中環干諾道中5 號香港文華東方酒店閣樓
電話: 2825-4007

上星期一同屋企人去佐文華既Clipper Lounge食dinner buffet, 呢度每位$308(未計加一), 食物種類唔多, 海鮮既有青口, 蝦, 好細隻既蠔, 同埋長腳蟹. 平時如果流沙包係度的話, 有流沙包幫手拆肉, 今次流沙包唔係度, 靠自己, 只係食佐少少海鮮.

 

刺身有三文魚, 吞拿魚, 墨魚同埋甜蝦, 壽司都係差唔多款.

 

熱盤得果十款八款, 從來未食過dinner buffet得咁少熱盤, 都係D炸雞翼, 香腸, 炒粉絲等等, 又唔係好好食.

 

甜品就更加少, 係我食buffet以黎見過最少款最少選擇既, 佢唔係一個個cake擺出黎, 而係分開晒一舊舊超細件, 放係個碟仔度. cake我淨係見到有cheese cake同埋一款完全唔吸引既類似綠茶蛋糕既物體. 其他既甜品都係D一杯杯啫喱定布甸咁, 完全唔吸引.

 

係其他地方食tea buffet既食物種類, 都仲多過呢度既dinner buffet... 我唔會再黎架啦~~

睇脊醫後有感而發 -- 我的行路姿勢... (下)

--到再大個D, 大約係中四, 五果陣, 有個同我好熟既同學, 話我行路似鴨/企鵝. (我無嬲呢個同學, 我反而好多謝佢咁坦白話我知)

 

--到佐我返第一份工, 有個好熟既同事, 佢話我行路好似無力咁, 拖住黎行, 同埋行路果陣對腳伸唔到, 好似曲住膝頭黎行咁. 佢仲示範埋比我睇我平時行路行成點. (我同樣無嬲, 甚至好感激佢咁坦白, 知道自己原來係咁核突)

 

--又係同一個同事, 有次我同佢一齊放工, 見到佢男朋友. 第二日呢個同事同我講, 佢話男友問佢:「點解你同事行得咁怪既?」

 

--我對上果個ex, 佢話我行路無力, 同埋行路時對腳成日向內踢.

 

--我老公, 佢話我腳掌既"腳弓"位同平常人唔同.

 

--係美容院遇到一個醫師, 咁啱有免費檢查, 佢話我天生"盤骨內扣", 所以行路果陣對腳就會好自然咁向內拗, 同埋話我平衡力會好差, 老佐既話會好容易企唔穩跌倒.

 

 

 

所以我一向知道自己行路既姿態係好有問題, 但係我唔知自己既問題出係邊, 係盤骨問題? D筋既問題? 脊骨問題? 定成個人都有問題? 到底我可以點樣去改善? 有咩人可以幫到我?  

 

同埋我好唔明, 我應該係細細個果陣已經出現問題, 但點解屋企人無正視過我既問題? 睇完一次醫生之後我都無改善到, 點解唔帶我去睇第二個醫生? 小學呢? 學校唔發覺我行路一柺一柺既咩? 點解唔向我父母了解下我係咪有咩問題? 我會怨點解我細細個果陣無人幫我? 點解我身邊既人, 身邊既朋友無同我講我行路姿勢有問題? 如果我細個果陣有人去正視, 話比我知, 去幫我(如果無人同我講, 我真係唔知自己行路有問題), 係咪可以唔多唔少都改善到呢?  唔駛等到我已經大個佐, 發育完成我先知道自己既問題, 想改都改唔到D咩啦??

 

我而家同一班朋友/同事一齊出街, 我會習慣性地咁墮後, 唔會行係最前面, 唔想比佢地見住我咁核突既路姿. 有時行行下街知道有班死飛仔行係我後面, 我一係會行快D, 等佢地留意到我之前離開佢地既視線範圍; 一係會行慢D, 等佢地快D行過佐我睇我唔到; 有時甚至乎我會扮打電話扮摷袋停定係度唔行, 等班人見唔到我既路姿.

睇脊醫後有感而發 -- 我的行路姿勢... (上)

其實有樣野我想寫好耐, 但又唔係好有勇氣去寫. 不過認識我既朋友, 相信你地都會察覺到, 我既行路姿勢係有問題.

 

由於我無辦法睇到自己平時既行路姿勢係點樣, 所以我都唔知自己既路姿有幾咁核突. 但從身邊既人既反應, 我知道自己行路果陣應該係幾難睇.

 

我記得小學時, 有個關係好好的鄰居問我父母, 點解我行路時對腳伸唔直既? (正面睇唔直, O形腳; 側面睇都唔直, 好似曲佐膝咁) 於是父母就帶我去睇醫生. 我果陣太細, 我淨係隱約記得有照X光(淨係照腳, 無照條腰), 醫生話我對腳D骨無問題, O形腳可能係D筋既問題, 要我每日行三十分鐘"一字腳"(即係好似跳芭蕾舞咁, 將兩隻腳既腳掌向外打橫成一字形咁行路). 跟住就不了了之, 又無再覆診. (我大個佐之後有怨呢個醫生, 佢當時無好詳細咁檢查過我, 我既問題根本就唔係O形腳咁簡單)

 

果陣細個都唔知自己唔正常, 但人越大, 聽番黎既聲音就越多, 先越意識到問題既嚴重:

 

-- 係我中二果年, 我著住條短褲係屋企附近行, 無啦啦聽到後面有班死飛仔話:「乜前面果個人行得咁X怪? 」「可能佢個身太重, 對腳負荷唔到呢」(但我果陣連一百磅都無架喎)「咁就咪X出街啦, 真係影響市容!」我直覺已經知道佢地係話緊我, 佢地甚至乎行快兩步, 回頭望我到底係咩野樣. 到而家我都仲好記得佢地既對白同佢地既嘲笑聲. 果排我成日匿係屋企喊, 專登買D長裙著, 唔敢再著褲/短裙出街.

 

(待續...)