2007年8月24日(五) -- 公司bowling日~~

聽公司同事講, 係我未入黎公司之前, 公司都有分派別, 就係分新人派同舊人派, 舊人搞活動如BBQ, 唱K等等多數唔會叫埋新同事去. 不過自從我入佐黎公司之後, 公司原本既舊人都走得七七八八, 多佐新人加入, 所以公司又漸漸變得新人天下咁.

 

由於有些同事以前做新人時受過舊人既排擠, 所以到而家新人天下, 就唔想調番轉排擠番D舊人, 因為己所不欲, 勿施於人. 所以自從上次新人搞過羽毛球+壁球運動日之後, 我地話下次搞碌bowling會叫晒全公司既人去, 唔理係新人還是舊人.

 

於是我地就定佐上星期五去南華會玩bowling, 今次既公司聚會好成功, 唔計audit果邊, 我地accounting呢邊唔計老細同GM共有23位同事, 之中共有18位同事參加, 其中仲有兩位日本同事添~~

 

我地大約7點去到南華會, 玩佐兩局, 每人都只係$55, 都算幾抵喎~ (不過入會要$100喎, 一個會員可以帶3位非會員, 我地18個人即係有5個同事要另外出多$100入會)

 

碌完ling約九點, 我地就去佐南華會間酒樓食飯. 食完飯我地大家行番落銅鑼灣地鐵站, 我地有幾個同事同埋日本同事仲去食埋雪糕先返屋企.

 

今日好開心耶~~

Kcal -- 幾特別, 多款式多選擇

地址: 深井深井村88號地下
電話: 2491-2678

星期四流沙包係荃灣打沙灘排球, 於是佢提議夜晚係深井食飯, 上次食佐果間任食意大利餐廳, 呢次就去佐隔離既Kcal. 呢度既環境我覺得就麻麻, 不過食物就幾OK, 我叫佐個紐西蘭鹿柳, 配墨魚汁面, 七成熟; 流沙包就要左個野雞, 配菠菜面. 呢度既選擇都幾多, menu都好多頁, 同埋跟餐既沙律都有3種選擇, 配意粉又有墨魚汁面, 菠菜面等幾種選擇.

甜品就有芝士蛋糕同芝麻雪糕揀, 餐飲唔係普通得咖啡檸茶, 仲有D果汁之類揀, 我就揀佐薑汁檸蜜.

 

總言之呢間餐廳幾唔錯, 我鍾意佢多選擇多款式.

 

是次每人消費約$200

有幾多女性會覺得陳法拉靚女??

其實我對陳法拉無咩特別厭惡, 不過我真係唔明佢有咩咁正. 自從佢叫做上佐位之後, 我身邊好多男士都話陳法拉正, 佢地每次講開索女舉例, 都話「起碼都要似法拉咁正啦~」, 我就唔明陳法拉有咩咁正??

 

講真我一D都唔覺得佢靚喎, 講靚大把人比佢靚得多啦; 講身材佢又唔算好正好勁. 我認為D男人覺得佢正既原因, 係因為佢肯剝囉, 你話如果陳法拉唔肯除衫唔肯著泳衣係鏡頭面前出現, 仲有無男人會覺得陳法拉仲係咁正呢?

雲貴風味-- 算唔錯既

地址: 荃灣路德圍34號
電話: 2415-1123

星期三探BB之前先去佐食飯, 流沙包帶佐我黎呢度食. 我地叫佐紅薯粉, 我配雞翼同雲吞, 小辣. 湯底都幾好味, 小辣亦唔係好辣(有D地方即使小辣都辣到飛起咁), 一碗米線/紅薯粉配一樣餸就$24, 再加餸就每樣$3.

 

是次消費每人約$40

2007年8月22日(三) -- 榮升大舅母

流沙包細妹今日入院開刀生BB, 我放佐工之後去荃灣同流沙包食佐飯先, 然後先去港安醫院探BB. 個BB 8磅重, 係男仔, 好得意呀. 我地係BB房出面睇, 好多個BB係度, 一個個包到肥嘟嘟成隻蠶蟲咁, 好可愛呀~~

 

不過可愛還可愛, 千祈唔好叫我生.

2007年7月20日(一) -- 不能說的秘密

今日同流沙包去睇戲, 本來之前流沙包都有提議去睇呢套戲, 不過因為聽完<在晴朗的一天出發>盧覓雪既影評後, 佢話佢本身已經無佐少男少女果種校園愛情既情懷, 所以佢對呢套戲無咩共鳴. 而我亦以為呢套係普通既浪漫校園愛情電影, 我亦都知道自己已經無佐少女果種情懷, 所以無諗過要去睇.

 

但之後聽番黎既評價都係好評如潮, 話套戲好好睇, 話周杰倫好掂, 我都開始心郁郁想去睇, 所以就翻兜流沙包陪我去睇勒. 睇完真係覺得好感動, 套戲真係好好睇, 佢個故事真係估佢唔到, 成套戲無悶場, 周杰倫真係好勁呀! 本來之前對周杰倫無咩好感亦無咩反感, 總言之就係無咩感覺, 但睇完呢套戲之後, 我覺得佢真係一個才華洋溢既人, 真係好值得一看呀!!

千之壽 -- 我無咩好感...

地址: 元朗馬田路80號御庭居8號地下
電話: 2475-4547

18號晚我全日衝刺趕功課, 流沙包夜晚返黎同我食飯, 我地叫佐個炸雞軟骨, 一個三文魚壽司, 一個帶子壽司, 一個辣味螺肉, 一個天婦羅炸蝦卷, 同埋串燒煙肉蠔.

 

呢度既炸雞軟骨幾抵食, 好鬼大舊的. 辣味螺肉就麻麻地, 個串燒煙肉蠔幾特別.

 

不過說實在我唔係幾鍾意千之壽, 因為我覺得佢既menu款式太少.

我的九型人格分析

九型人格分析

第三型	成就者、事業型、成就型、實踐型  16%
第一型	完美主義者、完美型、改革者、改進型、秩序大使  14%
第四型	藝術型、浪漫者、自我型、憑感覺者  13%
第五型	智慧型、觀察者、思想型、理性分析者、思考型  13%
第六型	忠誠型、忠誠型、尋找安全者、謹慎型  12%
第九型	和平型、和平者、和諧型、維持和諧者  11%
第八型	領袖型、能力型、挑戰者、保護者、權威型  10%
第二型	助人者、全愛型、助人型、成就他人者、博愛型  8%
第七型	快樂主義型、豐富型、活躍型、創造可能者、享樂型  5%

我的九型人格分析？

Olive Cafe -- 不錯~~

地址: 荃灣眾安街68號荃灣城市中心地下
電話: 2940-6272

14號晚同流沙包去佐荃灣食飯, 呢度好似幾旺場. 我叫佐個豬仔脾配柚子汁, 流沙包要佐個唔知咩魚. 呢度既食物賣相同味道都唔錯, services同價錢都OK. 可以一試~

繼續世界女排大奬賽

星期六終於同個friend一齊去佐睇大奬賽, 主要係睇中國對波蘭, 同埋睇流沙包係球場上面工作~~ 連個friend都話: 「你黎到係同劉生影相既啫~?」呵呵, 又係喎~

中國對波蘭以為應該好快三局搞掂, 點知中國隊領先兩局都會比人追番, 仲要打第五局輸埋, 唉~~

睇完波就入屯門同振宇, 牛丸等人一齊食飯, 之後就梗係上振宇屋企打麻雀啦, 嬴佐二百幾蚊, 不過就拖佐娟娟落水要佢輸錢添...

今晚係香港先生比賽, 真係騎呢到爆, 勁好笑~~

流沙包進場:

中國隊:

中國對波蘭:

流沙包與球証:

呢個女仔以前係流沙包既學生, 有無人認得佢係邊個?

傻佬一名:

世界女排大奬賽又黎啦~~

一年一度既世界女排大奬賽又黎啦, 呢個係我每年都期待既盛事, 除佐因為我鍾意睇排球之外, 可以係球場上目睹流沙包既「英姿」亦係原因之一.

不過今年就有D阻滯啦, 因為星期五竟然無啦啦掛八號風球?!! 本來我約佐個friend今晚一齊去紅館睇波架麻, 而家比呢個風打亂晒D計劃, 我最驚既係無得入場睇咋.

流沙包話八號風球都唔會停賽, 只係會閉門作賽, 但即使八號風球都阻檔唔到我要去紅館睇波既決心! 本來兩點半掛八號風球就可以離開公司, 但因為場波六點半先開波, 我咁早走都無掟去, 於是就係公司留到四點半先走(我公司D人好勤力架, 我四點半走都仲有五, 六個同事未走, 鬼叫佢地要趕埋數, 好慘), 去到火車站美心食D野就入紅館睇波勒.

雖然係八號風球, 但都有唔少人入場, 佢地著數呀, 就算買咩飛都可以坐係VIP席, 流沙包話因為電視影埋去有D人會好睇D喎, 即係話我即使唔拎住PASS都可以坐邊都得, 唓~~

流沙包係line judge:

中國對多明尼加:

 

2007年8月8日(三) -- 第一次出job~~

我新工返佐約三個幾月, 今日第一次出job, 地點係觀塘開源道某日本公司.

 

呢間公司既資料好齊全, filing做得好好, 又有專人負責AR, 所以每個月只係需要去一日就可以搞掂一個月盤數. 其實我對會計仲未好熟悉, 我去到都係幫手簡單寫下voucher呢D工作.

 

不過觀塘對我黎講真係好遠耶, 搭巴士出去要粒幾鐘先到, 如果我下次轉工真係打死都唔肯返觀塘呀~~~

櫻花日本料理 -- 又開日本料理...

地址: 元朗教育路54號順發大廈地下
電話: 2449-3988

都唔知點解元朗開咁鬼死多日本料理, 最近又開一間, 於是8月3號果日就諗住去試下. 我地三個人叫佐個三文魚軟殼蟹卷, 火龍卷, 綠茶冷面, 燒雞軟骨, 同埋雞肉什菌炒飯.

D反卷真係麻麻地, 中間D料好少, 包又包得差. 不過個炒飯出奇地好味喎~

事隔太耐都唔記得每位幾錢lu~

2007年8月2日(四) -- 黑仔日, master唔收. 又比人偷電話 .

今日勁黑仔勁down, 一朝早返公司check e-mail知道佐個master唔收我, 已經down down地. 之後有條友仔送貨黎, 我唔知搞咩個大門無關, 條友仔入佐黎, 又要比我同佢四目交投, 於是就由我去招呼佢啦. 佢送佐箱野上黎, 話要收錢. 由於箱野唔係送比我地公司, 係比我地個客, 我又唔知箱野重唔重, 於是我叫條友拎埋箱野入去一齊問負責個日本人. 跟住我就行開行埋去蓋印之類啦. 返到埋位見條友竟然放箱野係我張枱拆箱, 跟住我地就驗貨搞一大輪簽收.

 

條友仔係十二點左右送貨黎, lunch完兩點我發覺擺係枱面部手提電話唔見佐既?? 摷完一輪都搵唔到, 我心諗好明顯係頭先條友偷佐啦!!!! 於是即刻call客問呢條友仔係邊間運輸, 終於搵到個負責人黎問, 佢話問過佢條0靚話無拎過喎(咁梗係啦邊有人肯認自己做賊架~~) 於是我叫佢同條友上黎我公司當面對質.

 

佢地三點幾上到黎, 我就用我同事教我個方法, 同條友仔兩人單獨入房傾, 條友初初死口唔認攞佐我電話, 後尾我動之以情加兩行眼淚, 話個電話既價值唔係最重要, 我剛剛結婚, 裏面有好多好耐無見既朋友電話同埋D好重要既相. 我話我只係想搵番部電話, 唔想追究責任, 如果佢可以話我知我部電話去佐邊, 我答應我唔會報警, 唔會追究. 之後條友可能「良心發現」又見我咁可憐, 又可能佢做賊既經驗尚淺, 好驚我真係會報警. 於是佢終於肯認部電話係佢拎既, 佢話佢呢排經濟有D問題, 呢份工又係剛剛先搵到, 所以佢話會比番部電話我, 希望我唔好報警, 唔好講比佢老細聽.

 

但佢話部電話唔係佢身, 佢收埋佐係某一個地方, 要放工先可以去拎返比我. 中間既詳情我唔再多講啦, 總之我最後都可以拎番部電話啦. 本來仲有下文既, 不過唔係重要, 唔講啦~~~

夢醒... (更新)

你以為你自已很幸福嗎? 其實一切都是假象; 你一直都很相信他嗎? 原來他早已經背叛了你. 原來男人真的是信不過, 你可以選擇留低, 或是離開.

你已經給背叛了很多次吧, 給不同的男人, 你以為今次這個不會背叛你嗎? 原來結果都是一樣. 如果你選擇留低, 你心裏面早已經有一根刺, 那是怎麼也沒有辦法磨滅的. 你不想以後都疑神疑鬼吧? 那是很辛苦的, 每天都在提心吊膽, 你不要再過那樣的生活了, 以往的經歷你還受不夠嗎? 你已經不再信任對方, 還怎麼繼續維持下去呢?

那麼不如選擇離開吧? 反正層樓是他的名字, 沒有你的份兒; 你們沒有聯名戶口; 你們沒有兒女. 只要將你的雜物衣服一併帶走, 簽一個名, 要跟他一刀兩斷也不是難事.

你現在應該很嚮往單身的日子吧? 不用再被背叛, 不用再受傷害, 不用再整天杯弓蛇影. 以後可以自由自在的生活, 你說多好?

***********************************************************

 

好多謝大家既關心呀, 累大家要為我擔心, 真係唔好意思. 係邊一個我唔方便講了, 總言之當事人會知道.

 

多謝你地呀, 原來有咁多人一直有留意我個BLOG, 感動~~

梭羅印尼餐廳 -- NO COMMENT

上環干諾道中137-139 號三台商業大廈1樓
2541-0995/2541-1027

上星期三朝早要上庭所以帶唔到飯, lunch就同同事一齊出去食飯. 我地叫佐個餐, 另外叫佐個蝦仁炒蛋. 呢度D野好細碟, 同埋可能我食唔慣印度野, 我覺得個巴東雞味道好怪. 個炒什菜好細碟, 炒又炒得一pat野咁, 唔好食.

 

呢度既特別就係白飯唔係一碗碗上, 係一個個大飯桶拎出黎即場「筆」落你個碟度, 啱晒果D大食飯桶, 你食幾多佢會「筆」幾多比你.

 

是次每人消費約$40

2007年8月1日(三) -- 荃灣法院認罪

今朝早無返公司, 因為要九點半到達荃灣法院2號法庭. 話說我地公司有個客無交Profits Tax Return被政府告, 我地公司就代表個客出庭. 其實認罪果個唔係我, 係我個同事, 我就純粹去「見識」下, 睇下個程序到底係點而已.

咁大個女第一次去呢D地方, 今日2號庭主要係處理小販阻街擺賣既檢控,  違反交通規則既檢控, 同埋無上報稅表既檢控. 個官會叫名, 然後當事人要企出去, 個官會讀段檢控內容出黎, 然後問當事人認唔認罪, 再問有無求情, 跟住個官會話罰款幾多, 然後就可以離開啦.

 

離開法院之後就返番公司啦.

偷偷影佐兩張相:

Quay -- 等上菜等到頸都長

地址: 中環歌賦街28號
電話: 2815-6986

上星期一同同事出街食lunch, 呢度有個小型沙律吧, 有生菜, 粟米, 蕃茄仔, 菠蘿同面包碎, 同埋有兩款沙律醬. set lunch我叫佐吉列豬扒拼司華力腸配薯菜. 呢度既薯菜唔係薯條, 係一個巨型炸薯蓉波波, 好嚇人, 早知配意粉算啦. 呢度既食物味道一般啦, 不過要等鬼死咁耐D野先黎囉, 搞到我要急急腳咁食.

 

是次消費每人約$80

二宜樓 -- 食物OK, 不過坐得好迫...

地址: 屯門湖翠路168-236號海翠花園海趣坊75號舖
電話: 2613-1386

星期六同阿媽預祝生日, 去佐呢度食飯. 我地叫佐個家常餐, 另外叫佐個拼盤. 個家常餐有鹽水雞, 菜, 魚, 炸蝦羔骨, 西蘭花帶子等等. 味道都唔錯既, 不過D枱就太迫啦, 同埋services麻麻地...

是次消費每人約$150.