2006年4月25日(二) 老細正PK~!!

今日難得我個廢柴老細唔係度, 所以我即刻send佐個mail比人事部經理, 佢係真正話得事既人. 我地入佐房傾, 佢話我老細同佢講話我已經confirmed佐要走, 我話我從來無表示過我堅決要走, 我一直係度等緊公司答覆我有無得額外加薪(你話我個老細幾仆街!! 佢問我min既底線係幾多, 但原來佢根本無再同人事部反映過!! 淨係話我confirm會走, 痴x線!!). 人事部經理話我部門班老細唔接納我既加薪要求, 但佢自己個人就可以加到10%比我. 不過人事部經理都同我傾過我部門既問題, 佢都話我部門死氣沉沉, 話D日本人老細咩都唔做咩都唔理, 淨係識係度鬥. 佢話佢睇過我既學歷資格條件等等, 話我出到去都應該唔只而家佢比我既加幅. 人事部經理問我打算點, 佢個人黎講可以自己加薪比我, 但我覺得事情已經搞到今時今日咁既田地, 而且我部門真係太廢啦, D老細又仆街, 再留落去都學唔到野又無前途, 所以我決定離開. 我覺得即使我出到去未必搵到我而家呢個人工, 但如果可以學到野見識多D我又覺得無問題掛? 總之就好過繼續留係度等發霉了吧??

報告完畢, 我LAST DAY是五月四日.

2006年4月19日(三) 老細正粉腸!!

今日我老細結婚, 夜晚部門班同事一齊OT到八點幾先離開, 因為老細係隔離中港城桃園擺, 費事咁早去到呆坐. 平日去飲真係好鬼累, 放佐工已經倦架啦, 桃園D野又唔好食, 我地食完道雞就同幾個同事一齊走, 夾份搭的士返屋企.

今日去飲同之前結婚果個同事一齊坐, 佢五月頭要請假去honeymoon, 所以同老細請假, 同埋傾下佢放假時D野邊個幫佢跟, 我老細就同我同事講話我遞佐辭職信啦, 因為我之前已經講佐比呢個同事知我唔滿意人工遞佐信, 等公司答覆有無人工加, 所以我同事都試探地問下bargain既事, 我老細同我同事講話D日本人唔聽佢講喎. 於是我同事就同我講, 話覺得係老細唔肯同我fight囉, 講真日本人咩都唔知咩都唔理, 你唔講清楚個情況比佢地知佢地點會明, 但老細唔會wear爛塊面同你bargain囉. 老細仲同我同事講, 覺得我走應該會confirm啦喎, 佢話我即使留番係度, 個心都會有條刺. 頂你呀, 你咪小人之心度君子之腹喎!! 呢個老細係咪黐Q線架? 我遞佐信之後未同我傾未問我原因即日就已經周圍同人講我辭佐職, 咁都算啦! 我要求加薪佢都唔知有無真係同D大粒佬反映過, 咁都算勒! 佢口中話有同日本人講, 但唔同我fight, 咁都算勒! 而家仲要周圍同人係背後講我, 又話我應該走硬, 又話我會有條刺?! 你有無搞錯呀? 呢D人都唔知點做人老細, 有病架!!??

2006年4月18日(二)

今日超唔想返工, 0?0?臨做埋D野準時走, 因為今晚元朗佢地有比賽, 七點半係荃灣打. 本來以為佢地會嬴, 點知最後都要打三局, 仲要輸埋. 不過而家呢隊波始終唔係以前既元朗, 如果係以前既元朗就一定無可能會輸.

睇完比賽搭西鐵返屋企, 然後去佐食潮州打冷, 好味道~~

2006年4月17日(一) 運動日~~

星期一朝早同ANATA落佐會所打乒乓波, 然後落屯門同伯母佢地飲茶, 跟住去佐仁愛堂碌ling, 今日好似食佐藥咁, 我最高分果局有140分呀, 好開心~~ 然後去屯門市中心行下街, 買佐對鞋, 三樽蘆薈, ANATA又送佐件運動衫比我, 跟住就返屋企勒, 因為ANATA今晚要練波.

2006年4月16日(日) 無所事事日~

星期日主要都係屋企"HEA", 下午睇佐套鐘樓駝俠, 呢套野完全唔係比細路仔睇既, 同埋D歌由廣東話唱出變得好難聽. 夜晚去佐百佳買壽司返屋企食, 總之今日就係咩都無做過.

2006年4月14日(五) 復活節假期第一天~~

ANATA今朝早約佐舊同事行山, 我因為懶所以無去(喂我尋晚OT到十點先走喎~). 下午約佐ANATA個妹同妹夫打麻雀, 所以下午落佐屯門一齊飲茶, 然後上阿妹屋企打麻雀. 我地由下午兩, 三點, 一路打到第二朝凌晨五點幾先走. 我嬴佐百幾蚊, 好開心~~ 我仲竟然自摸十三么, 不過今日個個都好顛, 除佐佢妹夫, 個個都食到十三么, ANATA仲要食佐兩次, 傻傻地.

2006年4月11日(二) 公司挽留...

我老細又叫佐我去傾計, 佢叫我再考慮清楚, 希望我留底唔好走. 我就話如果我留底你知我有咩要求, 佢話同D再大粒既傾過, 我要求既20%就真係做唔到, 問我最min要求幾多, 我話好難答你喎, 一陣我話10%, 咁公司真係比得10%我的話, 咁我留唔留先?? 同埋佢又唔知今年四月加薪我會加幾多(公司內部既話就大約都係3~5%), 最後我就話min都15%啦, 老細話再同我反映下, 如果到時公司加既幅度唔係我既理想, 叫我到時先再睇下點喎.

跟住老細就話, 佢同部門老細傾過, 如果我真係要走, 部門老細話唔想係出面請人(我既意料中啦, 出面請返黎既話點跟得掂呢度D野呀, 亂到七彩), 佢話一係就會係公司內部搵人轉過黎, 一係就睇下可唔可以係大陸搵人做, 將個POST搬上大陸喎~

我而家見步行步啦, 睇佢點回覆我, 我先再決定睇下點啦.

(你地唔好淨係睇霸王文, 比D意見我好喎~~)

2006年4月6日(四) 唔好同我講廢話!!

老細下午返佐黎, 叫我過去傾下, 佢問我為咩原因走, 我就話無啦啦轉SYSTEM, D野搞到七國咁亂, D日本人自己又唔知點溝通, 上面大陸做野又求鬼其, 搞到而家一鑊泡咁. 我老細就話咁過渡時期係混亂D架啦, 同埋你都未同上面班人再坐低傾下就決定辭職, 或者睇下比多次機會大家, 你再考慮下添啦. 佢講佐一埋廢話之後, 我就再提出話我而家人工好低, 根本儲唔到錢, 連交學費都好困難, 佢問我心目中係幾多, 我就話如果我出去搵, 至少會搵1XK呢個價(比我而家既人工多2K), 佢就話如果工作性質方面既野都可以幫到我, 呢樣野佢就無辦法啦~(我知呀, 你都係一個普通經理, 其實我知你根本話唔到事), 佢話公司唔可能為佐一個人改變本身既制度喎~(我知呀, 所謂既大公司咪就係咩都有規有矩, 其實就係死板唔會變通). 跟住佢話如果你真係咁決定既, 咁或者你睇下比番D時間我地請人啦, 你知阿某某同事遲D會放產假, 乜乜物物咁... 講真我其實都知唔慌會有得加架啦, 就算傾我都係諗住睇下同人事部經理有無計傾. 如果真係一亳子都唔肯加比我既, 我一定要五月四日last day架, 我係元朗公司出黎既, 本身人工已經偏低, 我都係想拎番我應該得到既合理水平0者, 如果咁都無商量, 咁算囉, 我唔會留係度等你搵到人為止架, 我一定會走! 如果你咁絕一亳子都唔肯加比我, 到時唔好怪我咁決絕話走就走. 講真而家上面大陸D人全部都係我舊元朗D同事, 做緊既貨, 對緊既客, 所有既單得我知道, 而家仲剛剛轉埋SYSTEM添, 我睇如果我走佐之後公司搵咩人去跟呢PAT咁既蘇州C!!! 越講越慶添, 但我真係做到好抆憎好谷氣!! 雖然我知道自己個POST根本唔係咁重要, 但我知如果唔趁而家走, 我諗多兩諗又係原地踏步走唔出去架啦~

其實我都唔知出到去搵咩工好, 我唔想再做番而家做緊既野, 好悶好刻板又無野學. 我想去試下D完全唔同既job, 甚至唔一定要搵日本公司(因為我知而家自己D日文真係差到唔見得人), 我甚至諗過想試下D唔係返office既工作, 但如果你問我即係咩野工, 我又真係未諗到答唔出, 而家仲係迷惘中...

2006年4月4日(二) 辭職!!

呢兩日做到嘔白泡, 說話公司要完全?殺以前元朗留落黎既果套, 所以要由四月一號起全部轉番做同TXO一樣既做法, 但問題多多, 班白痴都唔知點溝通架, 大陸自己轉晒, 香港竟然話仲未confirm幾時轉, 所以香港同大陸既data全部match唔到, D單過唔到黎. 我都唔明, 以前果套我覺得簡單易明方便簡潔, 而家呢套麻煩混亂繁複, 我以前可以3個鐘頭就搞掂晒既野, 轉佐系統之後我做一日都搞唔掂, 唔係我唔熟悉, 因為大肚同事果邊既做法都係一樣, 佢每次放假既野都係我幫佢跟, 所以我都算有做開呢一套, 但果陣我就覺得佢果套咁麻煩, 都係我本身做開果套方便好多; 真係估唔到我而家都要轉埋用呢套麻煩野, 我真係做到好?憎!! 一個人一對手根本做唔到咁多野, 其他人又打電話黎催我快D比文件佢, 不如我比埋條命你啦~! 點做呀? 我真係覺得自己好可憐好委屈, 係個位度一路做一路喊, 又要忍住唔比人知, 真係覺得自己好折墮, 本身自己人工又唔高, 所以我即刻打佐封辭職信, 仲即刻等老細走之前遞佐比佢. 我真係無諗過自己咁衝動會咁做, 雖然我成日口口聲聲話會走, 但都係諗住讀完書或者結埋婚先諗走, 我都估唔到自己會咁堅決呢頭想唔做, 果頭就已經打埋信遞埋. 我老細因為趕住走, 所以話星期四返黎先同我傾.

我就黎失業啦, 有無好工介紹比我呀? 我日文唔識講架啦, 睇都仲OK既; 普通話唔掂... 唉, 你都係聽?兜啦~~

2006年4月2日(日) 見家長日~

今日要出去拜山, 好耐未試過咁齊人, 一次過見番咁多親戚, 因為平時拜山都係得姑媽, 大伯娘, 三伯同幾個表姐. 估唔到今日會咁齊人, 除佐有大伯娘, 姑媽, 兩個表姐之外, 仲有表弟, 好耐無見既明哥哥同良哥哥, 明哥哥既老婆HELEN(堂嫂?), 大家姐同二家姐, 同埋大家姐個鬼佬老公STEVEN(我都係第一次見佢, 佢地結佐婚都唔係香港住), 好多親戚真係好耐無見.

拜完山我地過灣仔探阿?, 一行十五人去飲茶, 三家姐都黎佐, 良哥哥仲帶埋佢女朋友黎, 因為想人齊 一齊比阿?見下. D親戚都知道我結婚, 佢地個個都好愕然, 話我咁細個就結婚, 佢地睇我個樣, 個個都話我得廿一, 二?, 仲咩咁快結婚. 然後我話我已經廿七?啦, 佢地都話唔信, 睇我個樣咁細個. 其實我覺得係大家太耐無見啦, 對我既記憶仲維持係細細個學生妹果個IMAGE, 明哥哥竟然第一句見到我就問我畢業未, 我話我都出佐黎做佐三, 四年野囉~~

同埋明哥哥知道我結婚, 即場同我傾生意, 因為原來佢地兩公婆同人夾份開佐間digital media既公司, 做graphic design, video production, advertising. 佢話計番親戚價比我. 佢仲話可以介紹D相熟既化?比我添喎~

飲完茶送佐阿?返老人院, 我地就搭車返天水圍. 我地今晚約佐ANATA屋企人雙方家長見面, 我真係擔心到時傾唔掂數大家會面阻阻. 最慘係臨出門口出發去食飯之前, 阿媽又發晒脾氣, 老豆就例牌唔出聲, 真係搵著我黎搞, 好煩呀~ 我覺得自己成日係屋企都係見人講人話, 見鬼講鬼話, 佢地兩個搭車果陣分開企, 我就一時走埋阿爸度話阿媽又真係惡佐D既, 成日動不動就發脾氣, 一句說話唔0岩聽就黑晒口面, 我都知你捱佐幾十年架啦; 跟住我又走埋阿媽度話老豆一向性格都係咁架啦, 你都知佢份人一舊木又唔識溫柔唔識甜言密語, 我仲話口花花D男人先信唔過, 老豆把口唔識講野都係好事黎架~ 唉, 其實我做佐佢地個女廿幾年, 點會唔知佢地兩個D性格呀, 其實無話邊個0岩邊個錯, 係大家成日口硬又唔肯妥協, 包拗頸咁, 餐餐都要冷戰下先安樂咁. 老豆仲語重心長咁同我講, 叫我第時結佐婚記住要對個老公溫柔D...

好辛苦咁勸老豆?番阿媽, 我再加多兩錢肉緊, 終於係踏入酒樓前勉強和好如初, 一路食飯我仲要一路提醒老豆夾菜比阿媽, 真係... 除此之外我就低頭掛住食, 因為呢D場合我覺得有D唔自然, 話晒係雙方家長出黎講數, 好彩佢地都算傾得談笑風生, 不過我地要去到食晒飯上糖水果陣先正式入正題, 好彩氣氛都OK, 終於又過佐一關啦~~

2006年4月1日 愚人節~~

今日ANATA朝早無野做, 我地可以去飲茶, 飲完茶去佐投注站, 一入到去個實Q就截住我, 請我出示身份證, 真係開心死~ 估唔到今時今日廿七?人, 入投注站仲會比人查身份證~~ 果然係愚人節, 整古我呀~?

下午返屋企溫書, ANATA打陣機就要出去教波, 我就自己打機, 我仲未打完隻我的暑假2, 一次過玩佐三日, 又搵到新地方去, 好開心~

我開電視打機果陣見到賣廣告, 今晚有新一輯既PROJECT RUNWAY做, 好開心, 好彩咁0岩睇到個廣告, 否則就會miss佐第一集. 估唔到咁快又有得做, 原來我上次睇果輯係SEASON 1, 今晚開始係SEASON 2. 不過好變態, 之前選佐十六個出黎, 全部人飛到去NEW YORK都未坐低安頓, 就話兩個鐘頭後會eliminate兩個, 得十四個人可以留低繼續比賽, 好harsh呀~~

今晚叫PIZZA HUT外賣同埋睇佐陣無間道, 跟住就要返天水圍勒, 因為兩老去完泰國今晚返~