2011年12月28日(三) -- 柬埔寨越南6天之旅: Day 6 唐人街天后古廟, 後記

第六日, 最後一天行程. 由於今日坐下午機返香港, 所以基本上今日既行程只係得一個, 就係去唐人街堤岸參觀天后古廟.

 

今朝又係酒店食早餐, 唔知點解今朝個胃有少少唔妥, 所以我只係食咗碗粉, 同埋飲咗尋日喺超市買果支乳酪奶.

 

食完早餐我地就出發去天后廟, 對我黎講, 呢類廟係香港都有唔少啦, 其實仲有咩咁好睇咁特別, 連去到外地都仲要睇? 定係純粹諗住用黎攝時間架咋…?

 

 

跟住我地就出發往機場, 柬埔寨越南六天之旅, 就此完結.

 

 

以下物品九成都係手信, 其實我覺得真係無咩特別既手信好買, 尤其是越南, 但有D朋友/屋企人唔買手信又唔得, 唔知呢堆野裏面有幾多係會變為垃圾或者變為過期食品…

 

 

我覺得柬埔寨真係值得去, 雖然當地好落後, 但柬埔寨人好純真, 又善良. 喺我住既酒店, 雖然唔係五星級, 但每個服務員既態度同服務都好好, 大家團友都話, 以為落後地區既服務員, 未必會咁醒目咁主動咁有禮貌(就好似中國大陸果D咁囉…); 例子好似我每朝去酒店食早餐, 係餐廳門口要同服務員講低自己既room no., 到咗第三日我落到去食早餐, 我離遠見到門口個服務員, 佢已經笑容滿面向住我笑, 原來佢已經認得我, 就係我講出自己room no.既同時, 佢亦同時講出我既room no., 我地大家相視而笑. 例子仲有唔少, 喺呢度唔詳述, 我喺柬埔寨感受到既, 喺好多所謂先進國家係唔會感受到的.   

 

另外我發覺柬埔寨好多韓國人去, 日本人就少D; 去到越南反而日本人多D, 韓國人就比較少.

 

同埋都想讚一讚康泰既領隊, 叫阿MAY, 可能係女性既關係, 比較細心, 照顧到老人家, 而我地呢D因為掛住影相而成日落後大隊既人, 阿MAY都好好咁照應埋我地, 唔會只係跟住大隊 自己行咗去就算. 而成個trip除咗景點之外, 當地導遊講既經歷亦讓大家對當時歷史有更深認識. 柬埔寨導遊係第三代華僑, 經歷過赤柬既黑暗統治, 亦當過兵, 以前佢地成家人本來住大屋, 廿幾個工人服侍, 但後來比政府充公晒… 而越南導遊亦係當地華僑, 我相信佢既上一代係非常非常之有錢, 因為導遊話自己有四兄弟姊妹, 每一個都試過偷渡, 而每一次偷渡都要花幾多幾多黃金先得. 導遊話佢自己一個人都試過六次偷渡, 可惜六次都唔成功(當然”偷渡費”都要比六次), 呢D往事佢而家就好似笑話咁講比大家聽, 但當中有幾辛酸, 相信我地呢D生於和平地方既人係唔會明白…

 

 

最後送上流沙包自製postcard.