我老細對我講的說話...

講多少少我遞佐信之後, 日本老細對我講既說話.
(以下藍色字只係我心裏面既說話, 當時我完全無出聲)

佢今日收到我封信, 終於都同我傾啦.

佢話佢都諗住今日答覆我架啦喎.
(吓話? 我今日遞信你就話諗住今日同我講?)

結果其實我都估到, 係無得加.

理由佢講佐好多, 其一係公司而家計salary係根據每人負責既jobs, 唔知點樣計個turnover, 再計埋D咩野%而決定架喎.
(唔好意思, 聽完一輪我都唔知即係點樣計, 但唔緊要啦, 我知道到最後都係佢鍾意既staff可以加多D, 唔鍾意既staff就加少D)

佢話如果我要加到呢個人工, 我做既jobs所賺到既錢就要去到$XXX, 所以無可能加到比我.
(我真係好想反問, 咁果位低能白痴同事既salary你又點計呢? 公司裏面無咩jobs既同事你又點計?)

其次佢話, 我過佐日本研修果半年, 對香港office係零付出, 加上公司出佐唔少錢, 例如機票, 宿舍之類…
(呢點我唔反駁, 我知道自己對唔住公司. 不過我想講, 我係日本office唔係去玩架, 我都有努力工作架)

佢話當初我入黎公司果陣簽佐約架喎, 個人工你agree佐, 係你情我願, 你簽佐名架喎.
(我唔知係我日文聽錯佢意思定聽漏D咩囉, 因為我真係唔明佢呢個係咩野point囉… 3年前我零經驗, 當然唔會expect咁多啦; 但老細你知唔知3年稅務會計經驗係外面都應該值D錢吓話?? 3年後既今日你攞番我3年前入職份contract同我講…? 我真係抓爆頭…) 

跟住佢話我呢三年黎所做既野都係"普通野, 效率唔算快又唔算慢, 普通啦".

佢話呢三年黎, 我阿頭一直不斷咁教我, 不斷付出, 但公司未有回報喎.
(吓? 我呢三年黎做既會計, 上佐稅局既tax computation同tax return, 答過稅局既信, 跟過既com sec文件, 教過其他同事既野... 原來全部都係我既幻覺??)

佢話"真係好唔明點解你一研修完返到黎香港, 就即刻要求加人工, 你之前唔係話會頑張ります既咩?"
(我原本真係無諗過要求加人工, 我初初諗住underpaid都好, 係度做多一年先再算. 但工作上真係令我喘不過氣, 同埋真係做得好唔開心, 加上今年加薪加得幾舊水, 仲少過我第一年入黎公司果陣. 不過好奇怪, 又一次証明香港人同日本人既思想分歧, 我係日本研修完返黎之後, 身邊唔少朋友係問我有無升職加薪; 反而日本人就覺得唔駛點加人工比你, 你要更加為公司努力先啱)

跟住佢再話"其實你未去日本研修之前, 日本果邊都問過我要唔要簽番D contract之類, 我當時話唔駛啦, Chloe返番香港之後應該會繼續係度做. 我真係無諗過而家會咁樣, 我都唔知點同日本交待. 而且你研修完就即刻話走, 黎緊日本都唔知仲比唔比我地派人過日本研修"
(我聽到呢度, 我個心好痛, 我知公司係比佐機會我, 我亦都承認我呢個時候要求加人工兼辭職係好反骨好衰女既做法, 我知我係對唔住公司, 縱使我對(香港)公司有幾不滿都好, 呢方面我知係我唔啱.)

我一直都無反駁過老細, 一直都無出聲, 不過聽到呢度, 我話"其實我初初返到黎香港, 真係諗住一直繼續做落去, 但係… 但係… 每一日都好忙…" (其實我心裏面有好多野想講, 但我明知再講都無意思…)

我老細即刻反駁我"我唔覺得你好忙喎, 如果真係忙的話, 應該OT到好夜吖. 我識唔少朋友, 佢地公司無OT allowance, 但仍然每晚做到X點X點…"
(吓? OT到夜一夜先証明自己忙? 原來你呢個非純正日本人都係咁諗? 早知我每日唔好咁辛苦做到無停手搞到自己無時間飲水去toilet啦, 早知我拖慢D野黎做, 做到八, 九點証明自己好忙啦好無? 哦原來我為佐返學為佐考試溫書而準時放工就係工作唔忙既表現…)


講真, 我都知我剛剛返黎香港就要求加人工, 跟手辭埋職, 全世界一定會覺得我食碗面反碗底, 過橋抽板. 但點解我明知大家會咁樣諗我, 我都仍然做出呢個行為???  有無人好好咁去了解我既唔開心同壓力到底有幾大????? 如果今年加薪唔係加得幾舊水仲少過我第一年個加幅; 如果老細唔係拖佐3個星期都唔reply我; 如果我唔係繼續比個白痴同事激到紮紮跳; 如果香港office個日本老細唔係咁偏私咁唔公平... 我都未必會去到辭職呢一步. 不過無得再如果架啦, 我知有D野無得再返轉頭.

係呢件事上面, 我知其實自己處理得唔好, 如果我EQ高D, 忍多一年半載, 可能唔駛搞到而家咁肉酸, 塊面"wear"到爛晒. 我亦唔想怨日本老細會講出以上既說話, 因為如果我站係佢立場, 我都明白對住一個"無感恩之心"既員工, 唔需要再同你客氣. 係呢件事上面, 我只怪自己EQ低, 脾氣差, 自視過高, 無安守本份, 無感恩圖報. 希望下一份工作我會做得開心D, 凡事處理得好D.