我遞佐辭職信啦~~~

我想同大家講, 我今日終於遞佐辭職信啦~

 

話說六月頭我send佐個e-mail同我阿頭講做得唔開心(詳情呢度), 阿頭佢話工作上既分配佢可以控制, 但人工既野佢無權話事, 叫我直接同日本老細講(香港office果個, 唔係日本office果位大老板).

 

我於是send個e-mail同日本老細講, e-mail裏面我再無提做得唔開心(因為講黎都無用, 大部份唔開心都係緣於佢對人不對事, 極度偏心兼偏私既做法), 我只係要求加人工.

 

我send e-mail果日係6月9日(三), 老細收到mail後, 佢話聽日同我傾, 到佐第二日星期四, 佢話唔得閒, 下星期一再同我傾, 到佐星期一, 佢話仲未答到我, 要再考慮一下.

 

結果拖佐3個星期, 連傾都無搵我傾過, 答案亦無個. 我覺得我好似不被尊重囉... 你得又好唔得又好, 最低限度都應該比個答覆我吓麻? 3個禮拜啦, 要諗幾耐? 我條氣好唔順呀(因為成日見佢係office同其他佢鍾意既同事嘻嘻哈哈, 完全唔覺得佢好忙囉), 於是我就決定今日遞辭職信.

 

初初我轉行咩經驗都無, 即使入行初期人工比以前低D我都無所謂. 期間我亦不斷進修, 完成佐BBA再報埋master(本來諗住讀埋第二年完成master, 但後尾讀佐一年去佐日本研修, 返黎香港之後諗緊仲繼唔繼續好), 3年內我學識做會計, 計tax computation, 填56ABFG, 填個人報稅表, 填公司報稅表, 學識佐少少公司秘書(係公司秘書, 唔係普通秘書, 有分別的).

 

但結果呢? 之前公司搬office改卡片"順手"轉佐我title做Senior但又無加人工, 今年加薪只係得果幾百蚊(我第一年加薪都4位數字啦, 點解越做個加薪會越低!!??), 我由3年前好熱血好衝勁, 變為今日已經好心灰意冷兼失去動力.

 

如無意外7月30日係我既last day, 之後我就會開始油牆假期.

 

如果大家想搵人幫手做會計或幫手填報稅表, 可以搵我傾傾呀, 價錢合理~ 哈哈.