我是清潔阿嬸

黎佐日本既office做野, 我除佐做會計既工作之外, 仲要做埋清潔阿嬸既工作.

 

係香港office, 倒垃圾, 抹枱, 吸麈等等既工作都交由清潔嬸嬸負責, 如果你要香港既OL做埋清潔既工作, 我諗十個女性有九個都會即刻劈爆唔撈.

 

但係0係日本就好唔同, 日本既女性地位仍然好低, 而且係日本公司既文化裏面, 女職員就係要做埋呢D清潔/庶務既工作, 所以我而家係日本既office都要負責埋清掃既工作. 我地三個女同事輪流負責, 有一個星期係負責倒垃圾(即係拎住個大垃圾袋, 走均全office, 將同事位既垃圾筒既垃圾清理), 同埋負責淋花(係meeting room窗台種佐好多盆裁, 同埋office放佐D花花, 樹木做裝飾).

 

另一個星期既朝早要負責抹meeting room既枱面, 同埋下午要負責整理pantry, 呢度既office有自動飲品機, 一按鈕D咖啡呀, 綠茶呀就會自己沖出黎. 我既工作就係要增補番部飲品機裏面既咖啡粉綠茶粉, 加紙杯落紙杯位, 倒走飲品機底下既污水筒, 然後要洗煙灰皿, 同埋洗埋pantry個洗手盆(每日都要用洗潔精洗, 但係唔覺有手套可以戴), 而星期五果日仲要將D抹手毛巾, 厠所坐墊替換, 開個迷你洗衣機出黎洗毛巾再晾乾, 同埋要洗洗個飲品機出口位, 洗晒比客人飲水用既膠杯.

 

而每一個月仲要輪流負責吸一次塵.

 

我諗我番到黎香港之後, 我可以完全洗甩晒D港女性格囉, 變佐大和撫子, 哈哈哈~~~