歐洲之旅終於落實~

食完lunch buffet我地就落佐旺角既勝景遊報名, 我地結佐婚兩年, 終於有機會去到honeymoon啦~ 我地join佐個13天10國既旅行團, 去既國家包括: 意大利, 梵蒂岡, 奧地利, 德國, 列茲登士坦, 瑞士, 荷蘭, 比利時, 法國, 英國.

 

未計tax, fuel chg, 小費, 保險等等, 淨團費每位$21,998.

 

6月尾出發, yeah!! 好期待呀~~

海景咖啡廊 Café Rendezvous -- lunch buffet

地址: 尖沙咀麼地道70號海景嘉福酒店M層

電話: 2731 2860

復活節假期第三天, 同流沙包去佐食lunch buffet. 食物種類都算多既, 都係魚生, 壽司, 中式點心, 印度薄餅, 雞牛羊豬之類, 海鮮有青口, 蝦同埋螺. D螺太難咬啦, 我食佐兩隻已經食到棚牙好攰; 但流沙包竟然食佐十幾隻.

 

甜品方面都算多選擇, cheese cake, tiramisu等都有, 例牌既朱古力噴泉都有囉.

 

下次有機會試埋個tea buffet先.

 

 

 

 

 

2009年4月10日(五) 下 -- 夜晚食齋, 跟住上振宇屋企玩

去完昂坪360後我地返屯門食齋, 跟住當然唔少得上振宇屋企玩啦.

 

不過今晚有個小插曲, 就係我地今晚去食飯果間齋舖隔離, 有沙井爆炸事件發生, 好多警察, 消防, 記者係度呀~ 希望傷者快D痊癒啦.

2009年4月10日(五) 上 -- 人山人海的昂坪360

係灣仔食完鐵板燒之後, 我地即興地去佐昂坪360搭水晶纜車. 嘩, 超多人, 淨係排隊買飛都等佐大半個鐘, 買完飛之後等排隊上車又等佐大半個鐘. (因為水晶車廂要等好耐先有一架)

 

上到昂坪更加恐怖, 多人到呀... 我地上到去已經四點幾五點, 條落山人龍排到出佐昂坪市集, 排到差唔多去到食山水豆腐花既士多對面, 好誇張呀, 我地影下相, 食埋個豆腐花就排隊落山.

 

淨係排隊落山都排佐個幾鐘, 等到成七點鐘, 天都黑齊晒了, 全黑既車廂我覺得有D恐怖耶...

 

奉勸大家, 千祈唔好趁長假期去昂坪360, 迫死你~

 

 

 

 

 

 

 

 

松菱日本料理 -- 好好味既鐵板燒

地址: 灣仔港灣道1號萬麗海景酒店3樓

電話: 2824 1298

 

復活節假期第一日, 約佐姚姚伉儷同振宇伉儷一齊去食鐵板燒. 因為我唔食牛, 所以我叫佐個銀鱈魚lunch course, 佢地就叫佐個有和牛既lunch set. 另外我地仲叫佐條鰻魚share黎食.

 

師傅好勁呀, 兩三下手勢就拆佐個蝦殼出黎~

 

雖然我唔食牛, 但係今次都忍唔住食佐少少, 好好味耶~~

 

另外想讚下個銀鱈魚, 超甜超好味~~ 愛上銀鱈魚~

 

是次消費每人約$270.

 

 

 

 

 

 

 

咖喱王 Khyber Pass -- 重慶大廈食咖喱

地址: 尖沙咀彌敦道36-44號重慶大廈E座7樓E2室

電話: 2739 1177

 

4月9日復活節假期前夕約佐中大同學仔係重慶大廈食咖喱, 今次係我人生第一次入去重慶大廈, 幢大廈好舊啊, 等lift又要等好耐.

 

今次我地上去7E既咖喱王食飯, 雖然同學仔預先訂佐位, 但去到發覺有訂位同無訂位都無分別既, 一樣係跟隊拎籌等位.

 

我地叫佐好多薄餅同咖喱呀, 味道唔錯~ 同埋幾抵食, 食到飽飽都只係每人$70.

 

 

 

 

 

 

 

 

2009年4月6日(一) -- 聘珍樓慶祝擺酒週年紀念

雖然聽日先係擺酒週年紀念, 但聽晚流沙包有野做, 於是就提早今日去食週年飯. 係頭五年結婚週年紀念日既前後一星期, 我地都可以免費去聘珍樓食佢一餐紀念飯, 二人合共可以食$1,000.

 

舊年我地好豪咁叫佐套餐食, 又魚翅又鮑魚又大蝦; 今年就試下散叫, 菜色有:

 

燒味拼盤: 因為聘珍樓既叉燒好好食架, 所以我專登叫個拼盤食. 但今次既叉燒已經唔係以前既好食叉燒, 點解既?

 

芒果沙律拼煎銀鱈魚: 外形似炸魚柳, 不過好好食.

 

黃金大蝦: 好好味呀, 蝦夠大隻.

 

一個翅一個湯.

 

明太子海鮮炒飯: 我記得舊年既套餐都有呢個飯.

 

另外因為我地計過叫既野未夠$1,000, 所以求其叫多三個甜品, 分別係生果拼盤, 楊枝甘露同燉奶.

 

雖然我地係黎食免費飯, 但係招呼服務依然周到. 同埋趙經理仲認得我地, 仲記得流沙包係教書既, 勁! (不過因為當年擺酒發生佐D小意外, 所以趙經理應該會好記得我地)

 

最後呢餐飯埋單$941, 不過唔駛比錢, 只係放低佐廿蚊貼士就食到飽飽走人~~

 

2009年4月4日(六) -- 小欖跳蚤市場

今日朝早要去流沙包屋企果邊拜山, 跟住同佢屋企人飲茶, 呢餐茶好難捱, 好多說話聽既... 搞到心情勁差, 飲完茶後連行街既心情都無, 黑住面咁由屯門返番屋企.

 

返到屋企只係三點幾, 難得放假又唔駛返學, 無理由困係屋企唔出街架~?! 於是就搵地方去, 突然諗到不如去跳蚤市場囉, 近近地小欖就有一個, 即刻坐言起行搭小巴落去.

 

個跳蚤市場都算大既, 但係有好多攤檔都唔開(定租唔出去?). 不過我地竟然買佐唔少野喎, 戰利品如下:

 

流沙包買佐四隻紅酒杯

 

我既Hello Kitty糖果罌, 我雖然唔鍾意吉蒂貓, 但我好鍾意呢個糖果罌

 

我既烘燶面包景品公仔

 

我既狗仔公仔

 

以前阿伯個細佬佢有呢隻公仔, 我見得多就覺得佢好得意好想買番隻, 但果陣搵極都買唔到呢個size, 只係買到一隻同款大size. 估唔到係呢度搵到呢款細size, 好開心~! 後尾係facebook有friend話我知原來套公仔係以前一套卡通片既人物~ (我細個好少睇卡通真係唔知耶~)

 

呢個小欖跳蚤市場係三聖同荃灣有免費穿梭巴士往來架, 詳情可參考以下網址:

 

http://hk.geocities.com/hkfleamarket/travel.html

 

 

 

 

 

 

 

2009年4月3日(五) -- 返深圳office, 後吃喝玩樂

今日同埋V同事上深圳office做野, 因為聽日係清明節假期唔駛返學, 所以我一早plan定佐放工後係深圳食飯, 我幾日前已經約定深圳同事, 同埋仲叫埋老公放工後盡快係香港過黎深圳join我地. 

 

咁啱GM今日又上佐黎深圳office, 原來GM打算放工後同埋我地一齊去按摩揼骨, 但係我一早約好佐深圳同事, 於是就邀請埋GM放工同我地一齊去食飯.

 

呢間餐廳我想黎好耐架啦, 大漁日式鐵板, 我諗好多人都去過架啦, 超抵呀, 任點任食都係RMB150/HK$160咋~~ 包括刺身, 壽司, 各類即燒海鮮, 肉類等等, 飲品包括紅酒/清酒/果汁都係任飲架~~~

 

刺身都幾新鮮呀, 即燒蝦, 蠔, 扇貝等更加係正正正!

 

因為忙住食, 所以無乜影相呀~

 

第二日無疴肚痛無唔舒服, 所以我下次都會再去架~~

無無聊聊睇番D舊Blog

復活節假期諗住搵日係屋企專心溫下書啦, 因為月尾係Auditing既mid-term, 但係黎到最後一個Sem, 唔知點解完全唔想再返學, 唔想再溫書.

我攤開本書坐係電腦前面諗住溫書, 但係最後都係漫無目的咁上網.

突然間又無無聊聊睇番我係舊公司寫既Blog(內容請參考"我是公司打雜"的網誌分類), 我發覺原來我果陣對公司簡直係"恨之入骨"咁濟.

不過真係好慶幸我終於離開佐, 否則金融海嘯下, 舊公司既裁員行動中, 我一定係榜上有名.

亦好慶幸我無揀錯路, 如果我當初揀佐入Sanyo, 我都唔難保我而家會唔會失業中.

而家雖然因為工作太忙太辛苦而不開心, 但滿足感是有的. 或許做人最緊要知足, 同埋要記得當初決定轉行時的決心. 有時睇番轉頭, 回想在舊公司的冗員+打雜+面對弱智老細的生涯, 再看看我在而家呢間公司的位置, 其實再辛苦也是值得的.    

 

 

2009年3月28日(六) -- 打麻雀輸錢, 但輸得好開心

自從遞佐又收番辭職信之後, 我成個禮拜既心情都好低落, 一來唔知自己想點, 二來工作仍然勁大壓力, 三來返學返到無心機...

 

姚姚今晚突然吹雞話上振宇開局, 於是今晚有得去玩下.

 

平時打牌如果手風唔順, 食唔到糊輸緊錢的話, 我會打到好忟好燥; 但今晚我由第一舖開始一直輸, 輸緊幾舊水, 但係我反而覺得好開心喎. 因為我太耐無玩過啦, 今晚有得打麻雀, 我反而唔志在個輸嬴, 而係享受個過程, 同埋享受成班朋友有講有笑既輕鬆.

 

今晚係第一次輸錢輸得咁開心~

遞辭職信 -- 續

遞佐辭職信後, GM叫佐我入conference room同我傾佐好耐. 我地傾過D乜我唔係度多講啦, 總之我無提過人工呢樣野. 我地傾佐個幾鐘, 傾到lunchtime, GM話不如一齊出去食飯先, 叫我考慮下收番封辭職信.

 

食飯既時候又繼續再傾, 其實我知就算點傾都係改變/改善唔到D乜, 人手唔夠就係唔夠. 後尾食完飯, 我都無話會唔會收番封信, 係餐廳行返公司途中, GM已經話有D野想我幫手做, 就係教某同事關於company secretary既野(因為com sec一向都唔夠人手, 又請唔到人, 所以一早講過話要安排個同事幫手做com sec. comp sec個經理唔得閒教, 佢條0靚又勁廢, 所以最後教人既工作就落係我身上).

 

食完飯返番公司, 我都未坐低, GM已經拎返我封辭職信出黎同我講:"呢樣野我唔要架啦~", 係其他同事面前, 大家覺得我應該比咩反應?? 於是我只好接番封信...

 

就係咁, 我只係辭佐半日, 就不了了之咁將辭職單野變得好似咩事都無發生過咁...

 

2009年3月23日(一) -- 遞辭職信

我份工... 真係好忙, 全公司除佐日本人同GM之外, 就無其他同事識日文, 所以有好多工作, 除佐同我GM之外, 其他同事無辦法幫到手.

 

我GM係一個咩都識既人, 無論係中英日國語, 稅務/會計/公司秘書/中國事務/日本事務等等都好像無所不知咁.

 

GM間中會話幾多年後就退休, 希望退休前pass晒D野比我去接手, 但我覺得自己無咁既能力...

 

間中我真係忙到好忟呀, 有時覺得明明有些事可以是但叫其他同事做(因只是些同日文無關的濕碎工作), 但點解最後都係落0係我身上既?

 

除此之外, 我覺得我個post好孤獨, 以前除佐我之外,  仲有另一個同我一樣post既同事, 果陣起碼有個人可以呻下, 有人同我分擔下咁.

 

但係而家得番我一個, 其他同事根本唔明白我既工作內容, 無人幫到我手, 無人明白我既處境, 有咩事都無人可以傾訴咁...

 

呢排工作+讀書又忙, 之前又病, 情緒好低落. 我驚我再咁樣落去, 真係會做到發顛; 身體亦承受唔到咁大壓力, 成日病, 體重又跌, 情緒上根本就好唔想返工.

 

於是今日唔知發咩神經(當然有D導火線), 忍唔住終於爆發, 一朝早就打佐封辭職信遞佐比GM.

 

(待續)  

終於買佐抽濕機~

天氣開始潮濕, 以往諗住濕幾個月就過, 都無打算買抽濕機, 因為一年用得果一至兩個月, 其他時間就要搵地方安置佢.

 

但唔知係咪年紀大, 定之前病得太多連免疫力都低埋, 無啦啦出現皮膚問題, 醫生話可能同天氣潮濕有關. 於是終於的起心肝去買佐部抽濕機.

 

部機係豐澤買, Panasonic, 二千一蚊有找. 希望買佐部抽濕機之後, 牆身唔會再係回南天出現D黑色一粒粒既蟲啦~