淺談稅務 -- Personal Assessment (個人入息課稅)

大家交佐報稅表未? 填表果陣有無遇到什麼問題? 係度想講下何謂Personal Assessment (PA).

香港既稅種其實比較簡單, 你揭開份個人報稅表, 大致上你可以見到三種稅, 分別係Property Tax, Salaries Tax同埋Profits Tax.

Property Tax就係如果你擁有物業並出租, 有租金收入, 你就要交Property Tax.

如果你有打工, 就要交Salaries Tax.

如果你自己開舖頭, 間舖有錢賺既話, 你就要交Profits Tax.

假設你唔elect PA, 而如果以上三種稅你都有既話, 咁你就要分別交呢三種稅.

Elect PA的意思, 就是指將以上三種稅的入息合計, 之後再好似平時計Salaries Tax咁, 享有個人免稅額等等, 然後再以Salaries Tax的稅率去徵稅.

舉個簡單例子, 假設你獨資開佐間士多, 間士多係今個年度既net profits係10萬蚊, 你要交Profits Tax, 假設你唔elect PA, 你就要交$100,000 x 16%(unlimited company既tax rate) = $16,000既稅. (假設無野要add back to net profits同埋唔理provisional部份)

如果你elect PA, 咁你就可以享有個人免稅額, 假設你係single, 基本免稅額係10萬蚊, 而你間士多既net profits係10萬蚊, 扣除佐之後等如0, 即係你就無需要交稅勒.

當然elect PA仲有其他好處, 有機會再講啦~~

2008年5月23日(五) -- 保齡球+宵夜buffet

今日放佐工同成班同事包括日本人一齊去打bowling, 有同事帶埋仔女黎, 我就帶埋流沙包黎, 非常熱鬧. 我地個個爭住同BB仔影相, 但係我一抱上手阿B就喊, 試過兩次都係咁(我都話我唔適合做人媽咪, 我無愛心).

 

大家打佐三, 四局, 玩到九點半左右離開南華會. 然後我地去佐怡東酒店食宵夜buffet, 每位$148, 有同事有HSBC白金信用卡有七折. 呢度既宵夜buffet我覺得OK喎, 比我想像中多野食. 有壽司, 小籠包, 碗仔翅, 車仔面等等, 甜品都有好多款, 有cheese cake, tiramisu, 豆腐花, 粟子蛋糕, 布甸等等. 我覺得算係咁, 唔錯. 

 

大家吹吹水, 又教下日本人講廣東話, 食到十二點左右就散啦, 幾開心的一天~~   

歐洲旅行計劃擱置...

我同流沙包前年係關島註冊, 上年係香港擺酒, 但係... 其實我地一直都仲未去honeymoon, 因為淨係搞結婚都駛佐廿幾萬, 當初諗住儲一年錢, 結婚後一年(即係今年)先至去honeymoon啦. 本來打算黎緊六, 七月去歐洲, 因為日長夜短, 天氣又唔凍, 唔駛帶咁多厚衫去, 適合去旅行呀~

點知, D股票又唔生性, 然後我又報佐中大個course, 一次過交佐全年學費$45,450, 我而家無晒錢啦, 黎緊9月又要開始返學勒, 讀個master要兩年, 即係兩年內都唔駛旨意去到honeymoon啦, 嗚嗚... (我果科一年三個sem, 超intensive, 唔會free到兩個weeks去到旅行囉, 我又唔想走堂...)

唉, 我既歐洲之旅呀...

 

Pipi與流沙包北京之旅

Pipi同流沙包賴低我係香港,  兩隻野去佐北京嘆世界~~

絕種好上司

雖然我而家份工好忙, 日日做到無停手, 壓力又大 (做accounting唔可以錯, send比客簽名同上稅局/公司註冊署既文件絕對唔可以錯, 有時又要趕accounting既deadline同tax deadline. 最慘係我日文程度有限, 寫同睇無問題, 聽同講我真係好唔掂, 所以我好驚D唔識英文既日本客打黎, D同事就塞晒呢類電話要我聽); 不過我做得好開心, 因為我有一個好好既上司, 可能因為我之前既上司都係D無料扮晒勁, 卸膊又無能, 總之係廢柴一件(尤其是TDK果件Edmond, 簡直係垃圾中既垃圾), 所以我更加覺得而家上司既好. 佢好有料, 年輕時係PolyU讀translation, 跟住入佐Big4做tax, 然後又進修日文, D英文同日文都勁到勒勒聲, 又見識廣博, 對屋企人又好, 又勁錫佢個女, 簡直係絕種好男人(與流沙包同類), 講真佢係我偶像囉. 一直以黎佢教佐我好多野, 當我遇到問題果陣, 佢又會盡心盡力教我解答我既問題, 唔會乜都叫我自己搞掂, 唔會有得我自生自滅.

講真當初入黎呢間公司, 我既目標係0係度做兩年, 學晒要學既野就走, 因為魚唔過塘又點會肥呀~ 說實在而家呢間公司咩福利都無, 絕不是一間典型的日本公司. 比著我以前打死都唔會入黎呢D公司做, 最基本既連bonus都無. 但因為我決心轉行, 所以當初我只係視呢間公司為踏腳石.

但係做落佐我覺得做落去都有D前途既, 同埋我上司一日仲係公司未退休, 我可能未必會離開呢間公司住, 類似有點係知遇之恩吧...?

一個人在家的六天

流沙包佢11號星期日上佐北京, 呢幾日我都係一個人自己係屋企.

其實我都幾享受一個人在家的感覺, 鍾意幾時沖涼又得, 鍾意幾點訓又得, 鍾意做咩就做咩.

雖然呢幾日流沙包唔係身邊, 但我每一日仍然都係咁忙.

星期一在家做家務.

星期二放佐工要幫流沙包代課, 7:00pm~10:00pm.

星期三放佐工要係公司上堂, 跟住同老細及幾個同事食飯, 5:30pm~9:00pm.

星期四要返學, 6:30pm~8:00pm.

星期五流沙包返黎, 我放佐工當然係第一時間返屋企見流沙包啦~~

原來我沒有朋友...

有時我係度諗, 到底自己有幾多朋友? 有幾多係我當人地係朋友, 但人地根本無當過我係朋友呢?

有時主動打電話想約D朋友出黎食飯, 但對方總是說最近很忙. 幾忙你都要食飯架下麻? 有時打一次, 對方說忙, 打第二次, 對方仍說很忙, 那麼我都費事再打比你了. 每一次我都叫對方如果你得閒既就搵我啦. 可能我打比你兩次都撞正你好忙啦, 但如果你真係有心想同我食飯, 你得閒果陣應該會主動打番比我掛? 可能你根本都唔想同我食飯啦, 咁我都識趣既, 我都唔好意思再打第三次比你, 要你搵其他原因去推卻我啦.

有D朋友我會間中send mail或者MSN問下佢地近況, 然後問一句下星期得唔得閒一齊食飯之類. 但好多時對方覆番我, 都只係好簡單咁講下自己既近況, 完全都無再提及究竟得唔得閒一齊食飯, 一次又係咁, 兩次又係咁. 可能對方又係唔想同我食飯啦, 佢肯比面reply番我都算係咁啦(雖然有時係我寫十句比佢, 佢先覆番我兩三句). 算啦我唔再問你得唔得閒食飯囉…

之前佛誕假期, 我send SMS問佐好幾位舊同事得唔得閒上黎我屋企玩啦. 有D就回覆話唔得閒, 有個就咁覆"no la"就算(有無泠淡D呀?), 有D直程覆都唔覆添. 喂我一番好意invite你黎我屋企玩, 我係SMS都話就算你黎唔黎都覆番我呀. 有好幾個連覆都唔覆, 我send出咁多個SMS, 得一個人覆我話OK無問題. 唉, 算啦, 心淡啦. 你地連覆我一個SMS都唔願意敷衍我, 咁我以後都唔煩你地啦.

(有D我派帖請你地黎飲, 你地人又唔到禮又無電話又無個, 我都算啦當無件事. 但原來對方根本都無當我係朋友囉, 我仲要"wear"爛塊面send SMS請人上黎屋企玩, 人地都唔覆我啦, 我而家先知人地唔鍾意我呀, 真係後知後覺!!)

我承認我朋友唔算多, 得幾個中學同學(無法啦我係同一間中學讀足七年), 幾個大學同學(我果科得四十幾人), 幾個part-time degree同學, 幾個舊同事. 有D關係我係想同對方好好keep住, 但係每次主動搵對方想出黎食個飯啫, 點解都難過登天咁架? 我又唔係問你借錢, 對方總是話忙, 你知唔知道令我覺得好心淡呀? 我自問都唔係一個主動既人, 但點解只有我主動搵對方, 對方唔會主動搵下我呢? 如果你根本無當過我係朋友, 咁我以後都趣識唔會再搵你地出黎食飯啦…

令人無奈的同事…

話說我公司都唔算好大, 只係得廿零人, 由於我個post比較特殊, 所以我咩都要學, 咩都要知, accounting, company secretary, taxation等等我都要識.

公司既comp sec本來有兩個人負責開, 但之前走佐一個, 於是後尾再請番一個新同事跟番comp sec既野, 但係… 唉, 呢位新同事, 返佐工都差唔多一年, 但都仲係成日聽到佢阿頭話佢, 例如係做野唔小心, D資料又唔對清楚, 教過佢既野又記唔清楚等等. Comp sec既工作就係要細心, 大佬呀D文件要上CR上IRD, 所以一D野都唔可以錯, 但係呢位新同事做佐差唔多成年, 都唔見佢做野開始上手既… 日日都係要等指示去做野. 最慘佢阿頭唔係返九點, 係返十一點, 於是呢個新同事, 每日九點至十一點就成日坐係個位度發呆, 有時我行過佢個位附近既printer拎print out, 只係見到佢放疊文件係枱面, 幾個鐘頭都仍然係呆望住果一疊文件… 有時佢阿頭返佐黎, 但未有時間比指令佢做野, 呢位新同事都一樣係呆望住枱面既文件.

我地公司又好厚道既, 唔會點炒人. 之前聽我老細講, 話佢做comp sec都做唔掂, 不如比佢試下做accounting, 否則佢再係咁樣的話, 日本老細話要炒佢架啦. 不過如果比佢做accounting, 我一定唔夠膽pass自己D job比佢做, 我驚會錯漏百出, 到時自己對數仲慘過自己由頭做起.

幾日前同老細同幾個同事一齊出去食lunch, 老細又講開comp sec既問題, 佢都話呢個新同事黎佐咁耐, 都係幫唔到手, 問我地公司仲有無其他同事可以騰出D時間做comp sec既野... 到最後老細叫我幫下手, 因為公司裏面只有我學過下comp sec, 搵其他同事幫手的話, 可能就要comp sec阿頭又要重頭教起. 我反問老細咁新同事係咪會做下其他野, 老細話唔會架啦, 佢連comp sec都做唔掂, 唔會比佢做其他野.

(我真係唔明, 呢個新同事話佢以前都係audit firm做過, comp sec對佢黎講應該唔難理解啫. 反而我以前只係做sales coordinator, 從來都無接觸過咩係comp sec, 唔識accounting, 更加唔識taxation. 我都係入到黎呢間公司先學, 我亦只係比呢位新同事入職早一, 兩個月. 而家我手上有5個accounting jobs, 識得做Profits Tax computation, 識得填Profits Tax Return, 又知道點樣成立或者結束一間公司啦, 識得轉股啦, 改公司名啦等等...)

最近, 係comp sec方面同某間公司出現佐誤會同問題, 個客對我地有D唔滿意, 於是我老細就同我講, 叫我以後係comp sec方面負責跟呢個客. 本來我既工作係唔多需要做comp sec既野, 有好多野我只需要知點做就得, 未必要落手落腳去follow. 本來要我跟多野樣我又唔太介意, 至緊要學到野就得. 但我會怨, 如果0個位新同事醒少少, 可以開始獨當一面的話, 就可以減輕其他同事既工作量啦, 佢阿頭又唔駛咁辛苦.

而家公司有D做唔到野既同事, 佢地糧就照出, 但工作就要其他同事幫佢地分擔埋(老細根本都唔放心比D咩重要野呢D同事做), 講真我個心唔太舒服, 我心諗, 我頂埋佢地D工作, 不如將佢地份糧比埋我呀?!

(工作太辛苦了, 呻兩句我就無野的了. 我仍然是熱愛我呢份工作的!)

2008年5月1日(四) -- 又一傑作!

難得放假, 有閒情咪煮下飯仔囉.

今日既作品有粟米魚柳, 不過D雪藏魚柳好腥, 我又唔識點煮好, 唔係好好食.

節瓜紛絲雞肉, 有肉又有菜, 好味道! 呢個餸我阿媽以前成日整的, 今日諗起所以自己又試下整.

豬肉餅係上網睇食譜果陣得到既「靈感」, 算不過不失啦…

瑞士汁雞翼, 本來無諗住整, 不過見百佳特價, 六蚊四隻雞全翼, 咪買埋囉…

仲有個湯, 今次唔係買現成湯包啦~~

韓國首爾四天之旅 -- 後記

韓國真係一個幾悶既地方. 可能我唔應該夏天去啦, 冬天去都仲叫做可以玩下滑雪;

 

又或者可能我參加既係平價團, 都無去D咩景點, 成鬼日擺低你係條街/商場度幾粒鐘, 我唔覺得韓國有咩好shopping, 我淨係買佐D比香港平既韓國護膚品囉. 加上我同埋阿爸阿媽一齊去, 佢地梗加無興趣shopping啦, 一心諗住同佢地去下旅行玩下, 但結果好似悶親佢地咁.

 

又可能我對韓國呢個地方無咩特別喜愛啦, 你問我韓國有咩明星, 我淨係認得李英愛, 全智賢, 權相佑, 車太鉉同裴勇俊囉, 其他你問我藍色生死戀係邊個主演既, 我答你唔到囉. 韓劇黎講我淨係睇過大長今, 其他既我無興趣睇囉... 

 

都係日本呢個地方無論去幾多次都係咁多姿多采唔會厭既~~

 

自己既:

 

 

 

送比流沙包既:

 

 

手信: