2012年4月17日星期二

買車想買Smart Fortwo, 好唔好呢?



我同流沙包話買車買車, 由我地結婚前講到結婚後, 一直都係講完就算, 到而家為止都未實行.


 


今年決定認真考慮買車, 由於我好鍾意D外型cutie細細架好似玩具車/積木車咁既車款, 所以之前有諗過買Mini Cooper.


 


不過有朋友話Mini Cooper個seat位好低, 會坐得好辛苦喎…


 


而咁啱有朋友揸緊Smart Fortwo, 佢(女仔)對呢架車既評價唔錯, 而我上過佢架車睇過, 又真係好得意, 啱晒我心水, 所以就諗住買Smart Fortwo.


 


但係有其他friends聽到我話想買Smart, 就話呢款車唔係咁好, 跟住我上網睇吓人點講, 有D人既意見就話女仔揸會好辛苦 / 唔上得高速, 會好飄 / 上斜無力 / 會比的士佬或者大車蝦 / 零件比日本車仔貴 / 冷氣易壞 / 引擎好嘈 / 車身短如果撞起上黎會渣都無實死無生…


 


搞到我都唔知點好, 我無車牌, 又無坐開人地D咩野車款, 我對車完全係一竅不通, 都唔知點揀好… 大家有無咩意見比到我? 我既要求如下:


 


 


-要兩座位, 車外型得得意意, 好似玩具車仔咁


-唔會成日揸, 只係諗住得閒放假可以揸架車出去玩吓


-Budget 5, 6萬左右(二手車, 無諗過買新車)


-慳油


 


以上條件, 大家覺得我買番Smart Fortwo好, 定有無其他車款推介比我?


2012年4月13日星期五

2012年4月7日(六) – 擺酒五週年紀念日


今日係我地既擺酒紀念日, 記得我地結婚果年係復活節假期, 今日五週年, 咁啱又係復活節假期, 梗係要出去慶祝一下啦.


 


我地朝早先去咗The Mira既國金軒飲茶, 12點左右出到去, 我仲驚好多人要等好耐, 點知去到發覺成個場只係得幾枱茶客. 不過門口個receptionist話佢地分咗時段喎, 一點三係第二個時段, 問我地一點鐘交番張枱得唔得, 我地當然無問題, 因為我地都趕時間, 無諗住喺度hea坐.

我地叫咗六樣點心, 包括法國鵝肝荔芋角, 黑松露野菌餃, 山椒豚肉煎烤包, 金湯蟹肉灌湯餃, 綠茶紅豆煎堆, 焗燕窩蛋撻.


 


 


以為炸野應該會遲D先上, 點知第一碟上既點心就係鵝肝荔芋角. 一食落口, 搞錯呀, 完全唔熱架, 連暖都唔暖吓. 我同流沙包講:”碟野係咪之前出錯咗無人要, 拎番入廚房. 咁啱我地又order呢個點心, 所以拎番呢碟點心出黎比我地架?”, 完全無諗過炸野竟然係完全唔熱架囉!!!


 


當侍應收碟果陣, 流沙包問:”呢個點心本身係唔熱架?”, 個waitress話”暖暖地啦”, 我就答”但係完全熱都唔熱喎…”, 佢話會入廚房了解吓喎, 其實我又唔係想投訴, 不過佢之後都無交待番呢個點心到底係點囉… 我地又費事搞事, 結果係不了了之算數.


 


其他點心我覺得都係普普通通啦, 所有野都係蒸定晒咁, 唯一係個燕窩焗蛋撻唔係整定, 上枱時仲熱辣辣.


 


服務方面, serve我地果位小姐唔錯. 其他waiters亦間中會主動埋黎幫我地斟茶. 不過唔知係咪個場太靜無咩客, 定係我地坐喺廚房出口通道隔離, 班waiters間中會圍埋一齊傾計, 我地係完全聽到晒佢地講乜. 另外阿姐會好大聲話D做細架囉, 我見有個waiter喺度執緊枱, 阿姐喺佢隔離同佢講緊野, 跟住個waiter唔知做乜行開咗, 個阿姐就好大聲同個waiter講:”我而家講緊野呀!”. 我無諗過黎呢D地方飲茶, D服務咁唔專業架嘛…


 


呢餐茶埋單大約三百六十, 我應該唔會再黎第二次.


 


 


離開國金軒, 我地喺尖沙咀hea咗一陣, 然後去咗荃灣同兩家屋企人食飯.


 


流沙包原來訂咗個蛋糕, 五週年紀念就係咁渡過咗lu~

 

2012年3月30日星期五

Monster Sushi



話說之前我同流沙包去咗”爭鮮迴轉壽司”食咗D假壽司, 今次我決定食番D好少少既壽司, 於是去咗Monster Sushi.


 


我星期五晚大約六點十去到, 已經有人喺門口等緊位, 好彩流沙包早我少少去到已經攞咗位, 否則真係有排等.


 


我地叫咗個串燒拼盤, 海膽壽司, 龍蝦沙律壽司, 鰻魚玉子等等. 味道梗係唔錯啦, 總之唔好再叫我食番D $8一碟既就得.


2012年3月29日星期四

卓韻芝棟篤笑 – 又悶又無聊, 勁想中途走


3月18日, 我同流沙包去咗會展睇卓韻芝棟篤笑, 我真係非常非常之後悔買咗飛黎睇.


 


我未試過睇棟篤笑係成晚都無笑過架囉, 內容勁膚淺勁無聊, 係度扮同性戀人士既動靜, 扮俞琤, 連自己阿婆都搬埋出黎, 我真係完全唔覺得有趣囉.


 


尤其是嘉賓環節, 我地果場既嘉賓係黃德斌, 我根本都唔睇香港既垃圾電視劇集, 對於黃生我真係一D興趣都無, 加上阿芝同佢既對話都唔知up乜, 講埋D咩野點樣搽cream, 又話咩自拍, 嘉賓要被阿芝摸胸… 做咩啫? 用黎攝時間呀!!?? 悶到我打住喊露咁去咗個toilet.


 


去完toilet返黎, 我同流沙包講不如走囉, 反而係流沙包話既然都買咗飛, 咪睇埋佢囉.


 


我唯有拎部iphone出黎自娛… 好辛苦捱到完場, 都未等到阿芝謝完幕, 我已經急急腳鬆人.


 


今晚真係嘥錢嘥時間, 仲要門票係$380咁貴, 早知攞D錢去睇多套舞台劇好過!!



2012年3月28日星期三

爭鮮迴轉壽司 – 偽壽司, 我接受唔到囉…



上一篇blog話我同流沙包去咗The One睇大追捕, 睇完之後我地四圍搵野食, 見The One後面有間叫”爭鮮迴轉壽司”, 於是就試吓幫襯.


 


佢標榜碟碟8蚊, 我都知唔可以有任何要求, 但係… 我真係接受唔到呢D咁既”偽壽司”囉…


 


好難得見到D壽司, 上面舊肉係細舊到cover唔晒舊飯架囉… 都唔緊要, 8蚊呀嘛, 係咁上下, 我明白.


 


當我將舊”壽司”放入口之後, 我無辦法控制到自己, 不停喺度傻笑. “吓? 呢舊咩黎架? 壽司? 唔係掛? 咁既味道既? 我真係完全接受唔到呀!”


 


估勿論佢D飯唔係珍珠米, $8一碟我都唔認為會食到珍珠米. 不過你D壽司醋落多少少都唔怕死呀?? 我只係覺得我係放緊D味道古怪而又被捏成一舊既白飯入口, 呢舊野根本完全唔可以叫做壽司囉!


 


$8一碟真係好平, 但我真係接受唔到囉, sorry.


 


題外話, 當我地十點幾食完埋單後, 喺樓梯撞到王祖藍行緊上黎, 佢望住我地笑一笑, 我都禮貌地向佢報以微笑.


 


之後我同流沙包講:”尖沙咀咁多好野食, 點解王祖藍會選擇黎食D 咁cheap既壽司既?”


2012年3月27日星期二

2012年3月17日(六) – 香港花卉展覽2012



星期六, 我地去咗維園既香港花展.


 


我地果日好鬼死hea, 朝早起身先去咗飲茶, 磨吓磨吓已經三點幾, 出到去銅鑼灣已經四點.


 


今日既天氣好好, 又熱又曬, 好彩我帶埋把防UV遮去, 如果唔係實曬死, 流沙包一路影相一路勁標汗. 我地馬後炮話好彩咁晏先出黎, 如果早少少
點幾兩點黎到, 真係曬到人都癲.


 


唔駛問成個維園一定係人山人海, 勁多龍友, 要攝埋去影相都唔係咁易. 不過D花真係好靚, 我最鍾意係菠蘿同埋火龍果造型, 非常可愛~~


 


呢班模特兒係國際學校既學生, 展示出唔同國家風格既花飾服裝設計:



 


我黎緊會去左手面果個十年一度Floriade荷蘭花展:


我買咗盆小花花, 叫做家樂花, 盛惠$12:


 

行完花展, 我地過海去咗The One睇大追捕, 始終覺得杜緻朗呢個編劇寫既劇本唔夠劇力, 依然好幼嫩, 成個故事既大概, 我睇咗開頭無耐就已經隱約估到, 成套戲彷彿只係靠張家輝既精湛演技去搭夠而已. 不過叫做好過上次果部完全唔掂既殺人犯囉, 果部戲不知所謂到, 令人睇完之後忍唔住爆粗.


2012年3月21日星期三

2012年3月3日(六) – 香港海防博物館


呢個星期六, 難得流沙包又唔駛出去做野, 所以我地又可以出去拍拖.


 


我地拍拖好鍾意去D博物館, 因為我唔鍾意行商場, 行山我又驚太辛苦, 所以行博物館係我地拍拖既好去處.


 


今次呢個海防博物館喺筲箕灣, 對我地黎講好遠, 我地要先喺元朗搭巴士出天后巴士總站, 再轉地鐵去筲箕灣, 出咗地鐵站要再行十至十五分鐘先到達呢個博物館.



http://hk.coastaldefence.museum/


 


海防博物館出面有D坦克車, 大炮, 呢個area係唔駛入場費都可以參觀到.




 


佢真正既展館喺山上面, 比咗十蚊入場費之後, 要搭lift按8樓, 先去到展覽廳果層. 上到去居高臨下, 環境清幽恬靜, 又望到海, 景色真係一流.




 


山上面都有D大炮, 軍事設備之類. 而展館裏面就有展廳講述明/清代海防, 鴉片戰爭, 日佔時期等等既歷史, 亦有D紀錄片既播放.


 


我地行咗差唔多三, 四個鐘, 行到佢關門而無奈咁離開, 因為行到差唔多夠鐘果陣, 我地已經快睇快行, 唔能夠慢慢咁細閱D歷史.


 


行完博物館, 我地行返去地鐵站, 途中會經過東大街, 其中有一檔係賣雞蛋仔, 叫”低調高手”, 我見勁多人排隊, 於是八八卦卦咁走去排埋一份.


 


我地買咗一底雞蛋仔, 估唔到又真係幾好食喎, 外皮好脆, 但裏面仍然保持軟綿綿, 唔錯唔錯~~


 


夜晚我地過咗太古城食飯, 食完飯又山長水遠搭車返屋企了.


 


2012年3月20日星期二

愛上黃豆粉(きなこ)食品


因為我平時食飯食好晏(約兩點), 間唔中又要OT, 所以我平時會買好多零食放定喺公司, 以應付不時之需. 而我買零食既地點通常都係零食物語同埋無印良品.


 


 


呢排唔知點解愛上咗きなこ(我唔知係咪應該譯做黃豆粉??)既食物, 狂買咗好多きなこ既零食. 喺街見到きなこ既產品亦諗都唔諗就會買.


 


 


呢個係同事喺日本買番黎既, 非常非常好食, 大家如果去日本見到既話, 記得買黎試吓啦~:



 


呢個係無印買既, 我自己幾鍾意, 佢仲有一個長條形既, 叫做きなこ棒, 都一樣係咁好食:



 


呢個係零食物語買既, 我就覺得普通啦:



 


 

 大家有無其他きなこ既好味推介??