4月9日, 我地補祝結婚4週年.
朝早先去咗大埔墟既鐵路博物館行吓, 呢個博物館係免費入場, 地方雖然唔係好大, 但我地都行咗兩個鐘.







果度有幾架退咗役既火車, 我地喺火車上面影咗好多相.











2011年4月26日星期二
補祝結婚4週年紀念 part 1 - 鐵路博物館
2011年4月23日星期六
中大人飯聚@北角東寶小館
4月8日, 約咗班中大同學仔係北角渣華道既東寶食飯.
上到去, 發覺環境已經好嘈, 唔係一個傾計食飯既好地方, 因為好難先聽到對方講既野.
我地叫咗炸豬手, 黃金蝦, 避風塘炒蟹, 墨魚汁麵, 風沙雞, 蟹粥, 另外同學仔仲買咗個蛋糕.
豬手, 都OK好味:
黃金蝦, 好貴, 但整得唔多好食囉:
炒蟹, 我食咗少少, 無咩特別:
墨魚汁麵, 難食:
風沙雞:
我地仲叫咗個蟹粥, 完全唔掂囉, D粥完全食唔到有蟹味...
我地食食吓飯, 果度無啦啦播勁歌, 本來個場已經嘈架啦, 播埋歌之後搞到個場好似disco咁. 最搞笑係一個類似老細既物體會扮MJ跳舞, 果度又有唔少外國人幫襯喎, D食客見到有人無啦啦係度跳MJ, 又high埋一份, 其實氣氛真係唔錯既, 不過我真係唔鍾意太嘈既地方, 完全傾唔到計.



最搞笑係老細物體突然間喺每圍枱捉D人去啤酒凍櫃果度派啤酒, 可惜我地飲飽食醉, 飲唔落啦, 最後都係還番D啤酒比佢地.
送既涼粉:
今晚最好食既, 係同學仔買黎既蛋糕:


2011年4月21日星期四
蜜糖蛋糕(附食譜)
雖然我而家辭咗專業C9呢份工, 但我都仍然有keep住整吓蛋糕架~
食譜參考: 2010年11月4日出版既頭條日報既《COOK食譜BOOK》
材料:
1. 雞蛋 2隻 $2
2. 白糖 60g (我只用了50g) $0.525
3. 蜜糖 50g
4. 低筋麵粉 110g $1.54
5. 泡打粉 2/3茶匙
6. 無鹽溶牛油 80g (我只用了60g) $4.5
步驟:
1. 用電動打蛋器以高速打起雞蛋
2. 分3次加入白糖, 打至企身
3. 加入蜜糖, 手動拌勻
4. 低筋麵粉+泡打粉篩勻, 加入蛋漿中, 以膠刮拌勻
5. 加入溶牛油, 以膠刮混合
6. 將麵糊倒入模具, 入爐170度焗20分鐘


大約成本: $12 (約$1.5/個)
事後檢討:
1. 個味道麻麻, 因為個蜜糖味唔得, 下次試下用第二隻蜜糖.
2011年4月18日星期一
又黎公司dinner
上兩個星期, 又黎公司食飯, 因為welcome admin新同事返工, 同埋farewell另一個同事調過澳門office.
我地去咗鰂魚涌既菖蒲亭食飯, 果度既食物我覺得普普通通啦. 反而我想講一講果度某位女侍應.
果度有一位年約廿幾歳既女侍應, 紮住條長馬尾, 呢條友全晚黑口黑面, 完全無服務態度可言.
佢有次放低碟食物, 我地問佢有無D日本醋點黎食架? 佢粒聲唔出, 繼續keep住黑口黑面, 行埋黎將頭先碟食物打斜, 目的係等碟底既醋流出黎少少比我地睇, 然後就走咗去. 佢咁樣算係咩態度呢?
然後差唔多食完成餐飯, 叫佢斟D茶黎, 佢竟然好大力咁"砰"一聲放低個茶杯囉...
一間餐廳竟然有一個不知所謂既侍應, 就算佢D野幾咁好食, 我都唔會再幫襯囉... 更何況我又唔覺得果度既野好好食... 



2011年4月15日星期五
作家夢? 發完夢lu~
早排做專業C9, 多咗D空閒時間, 所以就諗住整理吓自己喺日本生活果大半年既生活片段, 打算自資出書.
後尾我見到新地同三聯書店合辦既年輕作家創作比賽, 就柴娃娃報名玩吓啦.
早前收到封信, 係新鴻基寄黎既, 我仲以為唔通咁好彩入到圍?
唓, 原來係"多謝參與"既証明一張...
咁即係都要自資出版啦...
2011年4月7日星期四
Lunch@尖沙咀
尖沙咀區食飯, 多數都係又貴又難食...
豬肉飯 $33@釜山韓國餐廳:
勁難食囉, D肉凍冰冰咁, 大學canteen都好食過佢啦...
車仔麵 $28@靚靚車仔麵:
呢碗咁既野就叫做"細雜錦"... 我係鄉下妹, 喺元朗食慣許祥昌, 你知唔知人地既細雜係點架?!
豬扒撈公仔麵 $33@興發茶餐廳:
D麵整得好難食囉...
番茄雞翼麵 $2X@星座冰室:

呢間野聽人講就聽得多, 親身黎都係第一次. 佢位置真係好奇怪, 我一個人真係未必識去. 番茄公仔麵, 唔係話唔好食, 但我覺得普普通通啦, 我都係懷念舊公司附近既勝香園多D囉.
雞脾凍檬 :
下午茶, 味道都OK.
牛雜牛腩米@德發牛丸粉麵:
本來我係唔食牛, 但果日同新同事一齊去, 加上個個都話呢間野勁出名, 所以就即管一試啦. 我唔食開牛, 唔知算唔算好食勒...
豬扒雞翼麵@華香園:


又係聽人講, 話呢度既豬扒好出名, 咪黎試吓囉... 唓, 都唔係好好食咋喎, 不外如是啫...
2011年4月2日星期六
返大陸飲
我地搭朝早八點半既直通巴士由屯門出發, 到差唔多十二點先上到中山.
上到去就先去食飯.


食完飯就上新人既屋企呆坐.



呆坐完一輪, 終於可以離開, 五點幾去到飲宴場地.

喺大陸擺酒原來係無麻雀打, 有排都未開席, 我同流沙包唯有行吓果個蚊型商場, 然後再喺KFC坐吓, 我拎部MP4睇下anime, 流沙包打吓NDS, 坐到七點半左右先上去酒樓.


去到酒樓, 又繼續呆坐, 坐到八點半先開席. 大陸擺酒好奇怪, 開席前原來唔會影大合照.


終於開席, 說實在, 原來大陸既新郎只係著套普通西裝, 真係完全認唔出佢係新郎; 而新娘... 我無意見...



散席大約十點幾, 本來我地諗住喺上面租酒店住一晚, 第二朝先返香港. 但死人流沙包話第二朝要帶隊喎, 所以我地漏夜要趕返香港, 條路線就精彩囉, 如下:
1. 流沙包有D阿姨住喺澳門, 所以我地跟埋佢阿姨, 先由中山搭的士去到拱北關口
2. 由拱北關口過去澳門(拱北關口好落後好恐怖好多行乞既人呀! 仲見到手臂咁長既老鼠呀!!)
3. 阿姨由澳門拱北關口車我地去澳門港澳碼頭
4. 搭12:15am船由澳門返香港
5. 由上環搭的士返元朗
返到元朗已經兩點幾, 痴線架! 我明明唔想返上去飲架麻!!