國產凌凌柒產品? -- 太陽能風帽

上兩個星期五返佐深圳office, 六點鐘放工後去佐Wal-Mart行佐個圈.

見到樣(我覺得)超搞笑既產品 -- 太陽能風帽.

頭頂有塊太陽能接收板, 可以驅動帽前面個小風扇轉動, 咁就可以自動吹到塊臉, 唔駛人手撥扇咁辛苦.

好有創意呀, 哈哈哈~ 我覺得簡直係國產凌凌柒既產品之一.

到底有無人會戴呢頂帽出街架? 哈哈

2009年3月13日(五) -- 中學同學結婚

尋晚開始已經有D唔舒服, 今朝起身仍然無好轉, 不過點都要返工.

 

上午去佐公司附近睇醫生, 有D發燒.

 

放工後本來想早D返屋企抖下, 但今晚係我一個好好既中學同學結婚, 而且個新娘亦都係我中學同學, 所以今晚呢餐我點都要出席.

 

好彩到佐夜晚好似有少少好轉, 所以飲宴上都無人知道我唔舒服.

 

今晚結婚呢對中學同學, 佢地係畢佐業幾年之後先開始拍拖, 拍佐幾年就結婚勒, 我真係好戥佢地開心呀~~ 祝佢地白頭到老, 永結同心.

 

同埋新郎佢真係好有心思, 之前佢地拍拖, 佢比女友既驚喜行動我都略知一二, 我淨係聽到都覺得好感動.

 

今晚新郎竟然表演拉小提琴呀, 佢係完全無學過樂器架喎, 佢苦練佐九個月, 然後今晚就比新娘同大家一個驚喜.

 

如果我係新娘一定超開心超感動呀~~ 好感受得到新郎對新娘既愛同埋心意.

 

 

飲完之後, 流沙包知我唔舒服, 佢係黃大仙做完野後, 專登過黎九龍灣接我返屋企. 返到元朗我地諗住搭的士返屋企, 由於我唔舒服, 天氣又凍, 已經好辛苦. 仲要見住D賤人走晒去前面截的士, 流沙包一架的士都截唔到, 然後我就港女上身咁發晒脾氣, 真係好對唔住流沙包呀... 我成日同自己講要控制下D臭脾氣, 但結果小小事就黑晒面發晒火, 真係對唔住呀.

搬新office後記

新office總算安頓落黎, 有公司送佐個花牌黎, D花好香呀, 我地將個花牌放佐係門口出面, 但有時係office經過門口附近都會聞到陣陣花香味.

 

 

亦有公司送佐個果籃黎, 但係眨下眼就比其他同事分晒, 我連提子都無粒, 嗚...

 

最驚喜既係, 老細突然間每個同事醒佐封利是, 仲要係唔止一條紅衫魚係邊面呀, 真係超驚喜呀~ 雖然老細無講明呢封係咩利是, 但應該係慰勞班同事搬office搬得咁辛苦既回報掛~ 嘻嘻~~

 

不過麻, 我好唔鍾意我頭頂上面個冷機機呀, 個風口(佢係好似一般餐廳, 正方形一舊, 四邊有出風位果D冷氣機)係咁向住我頭頂吹, 吹到我個位D紙都飄下飄下, 有時吹到我好頭痛呀!! 我懷疑我燒佐幾日都係因為吹得冷氣多既緣故. 我係唔受得冷氣果D人黎架, 就算夏天三十幾度我都唔會開冷氣訓既, 日日咁吹住冷氣真係好辛苦呀.

 

較下個風? 較低個風口就吹落第二個同事頭頂, 點較都係會吹到人, 到最後都係無乜得較. 有無人可以教下我點做呀? 

2009年3月12日(四) -- 忙到嘔茄

今天的工作:

 

9:30am~10:00am: 準備及確認T公司及K公司下午到律師樓辦公証的文件

10:00am~10:30am: 製作Y公司於中國工商銀行加new signer提交的一大堆文件checklist list

10:30am~11:15am: taxation會議

11:15am~11:45am: 決定了printer位置, 所以要將部電腦由枱既左面搬去右面, 要掹晒D線再插過, 枱面D野又要rearrange過.

11:45am~12:10pm: H公司寄回已簽名的audit report, 會計上做番個audit adjustments, 然後準備將year-end個financial statements寄比個客.

12:10pm~12:20pm: T公司個客到佐, 開佐個簡短會議

12:30pm~1:45pm: 與GM, 1同事及T公司個客出街食飯

1:45pm~2:15pm: 繼續執拾枱面.

2:15pm~3:30pm: 陪T公司客人一同到律師樓辦理公証文件

3:30pm~5:30pm: 打出N個電話去工商銀行, 中國銀行, 恒生銀行, 詢問有關文件準備, 會計師/律師/國際公証做certify等等問題.

 

放工後: 返學

 

總結今天: 忙到嘔茄.

 

後記: 放工後去佐上堂, 開始覺得唔舒服. 到佐第二日起身仍然感覺不適, 朝早去佐公司附近睇醫生, 輕微發燒. 睇完醫生後繼續返office工作. 點知之後發燒燒佐3日都退唔到燒...

2009年3月7日(六) -- 考試日

今日好慘呀, 朝早10:30am~1:30pm係Sem B既考試, 考完試快手食個飯, 2:30pm~6:00pm就已經要上Sem C既堂, 駛唔駛咁intensive呀?!!

 

放佐學後同班同學仔一齊去大學附近既小白鷺BBQ, 6男3女一行9人, 果度幾隔涉, 好彩其中一個同學有揸車車我地去.

 

呢班同學仔好nice好健談, 見識又廣博, 人又好, 好開心識到佢地. 不過其實我最開心都係0係呢個course識到小蘑菇, 一個投契既同學仔, 佢個人好爽好真, 有佢係度唔怕有悶場.

 

 

 

班同學仔話下次去踩單車, 唔知講真定講笑呢?

 

另外, 今日搬office, 本來所有同事都要返公司, 但因為我考試所以返唔到. 係呢度想講多謝晒同辛苦晒所有出力既同事~~~ 

2009年3月6日(五) -- 要搬office啦~~

公司聽日就搬office, 所以今日內各人要將公司D野pack晒入箱. pack佐成個下午, 我自己位D野連文件連電腦佔佐3大箱+5個A4紙箱, 都唔算太多野.

 

因為我聽朝早要考試, 到今日仲未溫晒書, 所以六點左右我就要走先, 返屋企作最後衝刺.

 

今日下午幫GM一齊拎D野過新office, 有機會順便「參觀」一下新office, 幢大廈好舊式呀, 得兩部lift... 我公司而家係上環金龍中心, 雖然唔係甲級寫字樓, 但門面都叫做幾靚幾見得人呀; 新office果邊... 唉...

 

同埋第時無海景睇囉, 嗚~

 

算啦, 呻下啫, 無野lu~

傳說中的羊羹

今日個日本客上黎開會, 送佐盒羊羹比我地, 淨係睇個包裝, 盒野似乎唔平.

 

一盒十條, 包裝好靚好精美呀~

 

印象中我好似係第一次食羊羹, 味道甜甜地, 韌韌地... 日本人既野, 都係好睇多過好食啦~

 

Saizeriya -- 終於登陸香港啦~~

地址: 荃灣青山公路388號中國染廠大廈中染新城商場1摟103舖
電話: 3102 0220

呢間餐廳, 相信成日去日本既人應該唔會陌生.

想當年大學時代我地有一個月去日本研修兼home stay, 日本D野樣樣都貴, 日日lunch都唔知食咩好, 但呢間餐廳一個意粉都只係3, 4百円, 簡直係我地既救星, 隔幾日就去幫襯~

自此之後, 我對呢間餐廳有情意結, 之後再去親日本都一定要幫襯吓呢間餐廳.

佢登陸佐香港都有一段時間, 但位置係荃灣, 都無咩機會去食. 上星期去完馬灣玩歷奇, 即刻趁機會去試下.

食物無日本方面咁有質素, 個周打蜆湯好多料, 但係好似有D稀稀地... 個西班牙海鮮飯... 咁多汁既?

不過論價錢, 都係同日本咁上下, 廿幾蚊有個意粉, 三十幾蚊有個鐵板, 好抵~

是次消費每人約$50.

 

 

 

 

 

2009年3月1日(日) -- 馬灣歷奇

話說馬灣個挪亞方舟公園有個新既歷奇設施, 今日我就跟流沙包一齊入去試玩.

 

因為4月開始先正式對外開放, 所以為佐保密, 暫時就無相睇住啦~

 

我今日玩佐兩樣野, 我覺得簡直係挑戰我既個人極限, 簡單而言就係要爬上一D好高既地方, 然後係上面跳去另一個目的地~

 

另一個就係全東南亞暫時係得香港有得玩既一個設施, 就係升上一個好高既地方, 然後急速地由高處下墜.

 

我初初都估唔到自己能夠完成到, 好開心~

 

改title=升職?

話說我公司就黎搬, 所以卡片要印過. 早前派發各人既新卡片, 我發覺我既title由Japanese Coordinator轉佐做Senior Consultant, 有同事即刻問我係咪升佐職?

吓? 我唔知喎, 如果升職, 應該有人工加架? 但我又唔見我份糧有多到喎; 如果升職, 最底限度都有封公司信通知掛? 我事前一D都唔知喎…

之後趁機會問GM, 我話我發覺卡片個title唔同佐喎, 唔知有咩「含意」呢? 然後GM解釋完之後, 我得唔到我想要既答案, 於是我直接了當問有無得「加」呢? GM既答案係「遲D先啦~」

咁… 即係點呢?

非一般的搬office

公司就黎搬, 本來搬office都已經係一件好煩既事.

 

但我地作為會計師事務所, 搬office更加係一件煩上加煩既事.

 

1. 我地好多客, 0係香港實際上係無office的, 佢地既registered office都係借用我地而家公司既地址, 所以我地一搬, 連帶客人佢地既地址都要改, 所以BR要改過晒, 要通知公司註冊處.

 

2. 我地好多客開銀行戶口果陣, 都係用我地公司地址作為通訊地址/註冊地址, 所以我地一搬, 我地要幫客通知各銀行有關改地址一事. 即是說我地要問清楚個客0係咩銀行有咩戶口, 戶口號碼係咩, 然後打好D改地址form, send比客人簽名, 再等個客簽完名寄番比我地, 我地先可以交份form去銀行. 遇著D麻鬼煩既銀行, 除佐要改地址form之外, 仲要埋公司信, BR certified true copy等, 真係煩到嘔...

嗚, 我要執包袱...

嗚嗚嗚, 我... 我要執包袱啦...

 

 

 

 

 

 

 

 

唉, 其實係我公司3月尾租約滿, 業主又獅子開大口, 呢個時勢仲勁加租, 於是我地咪搵地方搬囉...

 

我地而家個office係五千幾呎架麻, 但公司附近搵唔到五千幾呎既單位, 於是唯有焗住五千幾呎搬去得三千八百幾呎既地方, 唉...

 

實迫死啦, 不敢想像呀~~~