送給同事的聖誕禮物

今年我買佐呢堆糖果送比公司同事, 大家有無覺得好令人懷念呢~?

 

 

呢堆糖大部份都係我個年代既童年零食, 例如眼鏡糖啦, 爆炸糖啦, 膠樽裝可樂糖啦, 欣欣杯啦, 戒指糖啦...

公司X'mas lunch...

我公司沒有Annual Dinner, 只有聖誕前會全公司一齊出去食個lunch. (同埋有時會間唔中全公司一齊出去飲茶)

 

今年既X'mas lunch對比舊年黎講, 可以說是毫無驚喜. 舊年都仲有海鮮食下, 今年... 簡直好似平時普通出街食既set lunch咁, 食物如下:

 

超普通沙律

 

超普通雞湯

 

超普通雞扒帶子飯 (其他可供選擇的main course有石頭飯, 肉眼扒, sole fillet, 海鮮意粉)

 

brownie (骰仔咁大, 打個乞痴都飛得走)

 

呢個咁既set lunch竟然要收每位$108, 簡直離晒譜. 再加上呢間餐廳鬼咁細, 各人坐低佐之後基本上係唔可以自由地行出行入(因為椅背貼椅背, 行出行入極度影響其他人), 所以連周圍同人影相都好難, 完全無聖誕party果種氣氛, 同舊年簡直係天壤之別.

GM與我

 

食到尾聲例牌黎個交換禮物(我公司無出錢買禮物for抽奬用, 只係大家同事買份不超過$100既禮物返去玩交換, 尤如小學生)

 

本來我對呢D咁既交換禮物一向無咩興趣, 因為我認為交換禮物只係你出錢換一份垃圾返黎比自己. 如果唔係有機會抽到現金, 我真係唔會參加呢D咁既交換禮物遊戲. (因為GM佢唔會咁cheap真係買份$100禮物返黎, 而係會整封現金大利是當係交換禮物用)

 

我舊年交換返黎既禮物, 比我放佐係公司櫃筒裏面足足一年無郁過. 估唔到今年咁好彩, 抽中佐GM果份現金禮物呀~~~ 嘩嘩嘩, 開心死~~

 

我見到有同事竟然抽到一盒層層疊, 仲要唔係木而係膠果隻... 如果比我抽中佐呢份禮物, 我既面口肯定比舊年更加黑. (呢隻層層疊我N年前都買過, 玩過一兩次之後就擺係度封塵)

 

呢個現金奬係呢餐所謂X'mas lunch既唯一安慰~~~

 

party結束後繼續返公司工作...

 

深圳家樂福的奇怪定價

22號上佐深圳office, 今次除佐去家樂福, 仲去佐少年宮個書城, 不過齋睇無買, 因為簡體字書我真係睇唔慣.

 

下午同同事去佐食山東菜, 個menu竟然比我發現以下菜式... 好恐怖呀~~~

 

 

去家樂福又係掃貨, 今次因為幫流沙包買朱古力, 所以買佐成兩舊水咁濟.

 

家樂福D價錢好奇怪, 通常大包裝既價錢除番勻應該係平過細包裝既價錢架麻, 但係呢度... 竟然比我發覺好多種貨品既大包裝仲貴過散買. 好彩我精明眼兼眉精眼企兼師奶性格啫, 否則買貴佐都唔知, 仲以為好抵.

 

以下係其中既例子:

 

Snickers朱古力

460g包裝 RMB39.9 (平均RMB0.087/g)

240g包裝 RMB17.4 (平均RMB0.0725/g)

 

Oreo朱古力條

36條裝 RMB38.3 (平均每條RMB1.06)

18條裝 RMB18 (平均每條RMB1)

 

Ritz餅乾

三條裝 RMB13.1 (平均每條RMB4.37)

一條裝 RMB4.2

 

咁既訂價, 係咪好奇怪? 佢係咪諗住搏D人以為買大包裝一定係抵D, 唔會咁仔細睇清楚對比下價錢, 所以專登將大包裝既定價set得仲貴過散裝咁買?

 

地球停轉日

19號同流沙包去佐睇地球停轉日, 我只係想講Keanu Reeves真係超型~~ 佢既外形再加上佢戲裏面既角色同能力, 真係好型好型呀~~~

 

但係我唔係太鍾意個結局.

勁廢既堂...

呢個Sem星期三果堂係Financial Accounting, 勁廢. 我唔係話呢一科廢, 而係教既Miss勁廢...

 

首先係佢堂上派既notes, 完全唔systematic, 好似求其copy D野出黎, 求其係書搵幾個examples出黎就算, 完全唔知佢D notes想點.

 

其次係佢既教法, 我覺得佢係屬於唔識教書果類人, 而且有時佢自己都唔知D examples做緊咩, 有時講講下會發覺D notes打錯佐, 或者佢自己有時都要停一停諗一諗先知條題目做咩... 唉...

 

好彩我讀BBA果陣都讀過下Financial Accounting啫, 否則真係完全唔知佢up緊乜野. 所以上一堂我真係頂佢唔順, 只係上佐三分之一既堂, 趁放break點佐名之後就即走.

 

真係返去自己睇書無咁嬲...

client送的聖誕禮物

某日client送佐一箱野過黎, 拆開後裏面有面包啦, 粟米湯/南瓜湯等既湯包啦, 有枝裝綠茶同埋橙汁啦, 同埋各式果醬呀~~ (當然全部都係日本貨黎啦~)

 

 

我拎佐樽藍莓果醬, hehe~~

 

終於出佐成績啦~~~

尋晚終於出晒上個SEM既考試成績:

ACADEMIC YEAR 2008-09/TERM 1/STUDY YEAR 1

Course Code Course Title Unit Grade CP WCP Grade Release Date ACY5903A FINANCIAL MANAGEMENT 3.0 A 4.0 12.00 15/12/2008 ACY5904A BUSINESS AND COMPANY LAW 3.0 A- 3.7 11.10 18/12/2008   Term GPA = 3.85    Term Total: Cumulative GPA = 3.85    Passed Failed 6.0 6.0 0.0     23.10

好開心, 一番努力(再加上AL既犧牲)無白費到~~

百五咪超速小巴??

某晚由上水搭綠色小巴返屯門, 途中見到個車速顯示器...

 

 

好驚呀~~~~ 開到百五咪??

 

 

 

 

 

 

 

 

 

 

 

 

 

其實係個顯示器壞佐啫...

 

 

2008年12月12日(五) -- 同事結婚去飲

今日有個同事結婚請飲, 於是我地班同事放工後一齊係公司出發, 去到只係七點幾, 打佐兩舖牌就要收檔啦(酒店方面要開始set枱). 我能能低低(太耐無打過計花既牌), 第一舖明明得一隻花, 竟然走去補兩隻, 結果變佐大相公, 明明果舖牌清一色大對對, 超靚架麻!~

 

第二舖因為三家做萬子(本來我都係清一色萬子架麻), 我求其食佐舖對對糊, 羸佐GM $32, 哈哈~~

 

本來諗住開席前自己影下相啦, 點知我帶去既相機原來無電, 激死人啦, 結果坐到開席, 勁無聊... 

 

不一樣的童年...?

我既童年, 係唔鍾意睇卡通片的.

 

記得好細過我開始有記憶果陣, 我睇過既卡通片有:

 

天界小神仙

肥牛牛布斯: 最記得係隻龜可以隨時由個殼度走出黎

甜甜小公主: 係講一個日本古代公主既日常趣事, 我記得佢有一個外籍老師的

我係小忌廉: 經典, 一定追

叮噹: 我個年代仲未叫多啦A夢

 

但當我越黎越大既時候(都仲係講緊小學時代咋喎), 我開始覺得D卡通片好低B, 所以開始揀卡通片黎睇, 果陣我又覺得亞視既卡通"高B"過無線既卡通, 所以我果陣睇既卡通多數係亞視播:

 

衝出世界: 個名超娘, 係講排球的, 我仲記得個女主角隊長叫原桂芝(寫法我唔sure), 紮馬尾, 綁住黃色絲帶蝴蝶

相聚一刻

貓之眼

奇天烈百科全書

神奇小子: 變身後戴住頭盔同斗篷, 可以飛上天

亂馬1/2: 亞視果陣係咪無播晒? 我唔知個結局係點喎...

千年女王: 呢套好似係無線播

 

 

其他既卡通片我大部份都無睇過, 包括一D好出名, 我個個同學都話好睇既卡通片:

 

聖鬥士星矢: 係我小學果陣超人氣, 但係我一集都無睇過.

龍珠

長腿叔叔: 我個個女同學都話超好睇, 但係我都無睇.

味吉洋一?: 我唔知果套卡通片叫咩名, 但片中D人餐餐都極度誇張咁大嗌"好好味呀~!!", 我果陣覺得好低能(我果陣係咁諗, 並無抵毁鍾意呢套卡通片既人既意思)

足球小將

 

人大佐之後(十幾廿歳之後), 反而又睇番多佐卡通片, 好似:

 

小孩子的玩具: 一套我覺得唔係比細路睇既卡通片, 係我最鍾意既卡通, 極有教育意義

幽遊白書: 果陣無線播我會追黎睇架

不思議遊戲: 我覺得漫畫好睇過動畫N倍

死亡筆記

他與她的事情: 初初我覺得幾好睇, 因為我覺得女主角同我幾似, 死要面勁讀書. 但後來我覺得每一個角色都好似完美無瑕咁, 我好似睇緊科幻故仔咁.

我們這一家: 每個星期日我都會開電視睇(但我發覺尋日已經轉佐做寵物小精靈). 同埋我想搵番個日文版黎睇呀~

 

仲有D咩勁hit既卡通呢...? 暫時諗唔到lu...

Jenny Bakery

某日同事係lunchtime買佐盒曲奇餅返黎, 好好味呀, 真係好鬆化.

 

其實之前睇雜誌都有印象介紹過呢隻曲奇餅, 但我都係睇完就算, 無記係心度, 估唔到真係幾好食噃~~

 

等我得閒都去買黎食吓先~

 

http://www.jennybakery.com/

 

 

相片來源: http://www.openrice.com/restaurant/sr2.htm?shopid=15648

 

不過係我心目中, 我遇過最好食既曲奇餅, 係N年前曾經開係南豐中心既一間舖頭仔, 我記得佢係用扁長方形既透明膠盒裝住D曲奇餅架. 果陣我一有機會出荃灣都會去買一盒黎食,  真係好好味架~

 

但可惜我已經唔記得果間舖頭叫咩名, 亦唔知間舖到底有無搬佐去第二度繼續營業... 如果而家比我遇番就好啦~

不知所謂的娛樂記者

我覺得, 要數對社會最無貢獻的工作, 娛樂記者可說是其中之一.

 

早前李嘉欣結婚, 有D娛記真係超無聊, 話根據清朝既乜鬼秘典, 如果佢地要製造小朋友, 就一定要係四日內成事, 否則就要等多幾個月之類既"報導"(我無留意呢單所謂娛樂新聞, 係某日咁啱轉過去有線A台睇到呢單報導). 嘩, 大佬呀, 你有無白痴無聊兼低能D呀? D咁既記者, 浪費時間作埋D咁既弱智新聞, 如果可以將D時間花係其他事情上, 對社會係咪有貢獻得多呢? 呢D咁既記者, 覺唔覺得自己係度虛度緊青春?

 

我每日都會拎頭條日報同AM730睇, 娛樂版我通常"立"下就算, 記得早前訪問熊黛林, 好似問佢關於對性既睇法, 竟然有記者反問佢:"咁你係咪破佐處?". 大佬呀, 人地破唔破佐處關你叉事咩? 而且我諗讀者都唔會咁白痴, 認為熊小姐仲會係處女吓麻?

 

然後尋日睇見倪震偷食既新聞, 話佢06年氹掂周慧敏加埋倪震個名落自己間公司, 間公司擁有兩層物業, 變相分佐一半業權比佢. 我睇下報紙登出黎既AR1...

 

 

大佬呀, 唔識野就唔該你讀多幾年書, 或者問吓人. 你登出黎果版係公司董事既資料, 唔係公司股東既資料呀! 公司股東既資料你應該搵第3頁呀. 你知唔知董事同股東既分別呀? 你唔係盲舂舂係董事果欄見到倪震個名就以為佢擁有佐間公司呀?

公司股東資料係第三頁:

公司董事資料係第五頁(亦即白痴記者刊登出黎果頁):

金融海嘯對我的影響...

金融海嘯, 雖然令我既身家無佐2/3, 有D股票帳面又蝕佐九成(係, 我無set止蝕, 我扺死!), 但嚴格黎講金融海嘯對我唔係太大影響, 投資既錢都係D多餘錢, 唔急用; 公司我又唔驚會裁員, 即使要裁有排都唔會輪到我.

 

問題係, 我既投資蝕到入肉, 我一向用開匯豐既PowerVantage, 如果戶口總值超過某個金額就唔駛交月費; 但自從10月開始, 無啦啦每個月收我$120, 原來我既戶口總值已經跌出個limit, 所以每個月都要交百幾蚊月費, 唔制呀~!! 點搞好呀? 每個月咁蝕百幾蚊都唔係辦法喎... 

2008年12月6日(六) -- 終於唔駛再同個bitch一組

今日返cost accounting, 已經要mid-term架啦, 仲要做group assignment, 有無搞錯呀?!

 

不過好彩今次唔駛再同個扮晒野又自以為是既八婆一組, 都叫做有D安慰啦~~

點解都係咁忙架...?

呢幾日老細+高層去佐日本同美國出trip, 諗住應該無咁忙啦, 但點解都係咁多野做架~? 嗚嗚嗚... 仍然係日日做到無停手, 唉~~

 

有間公司既數, 我仲係做緊07年12月咋, 死唔死...

 

不過因為高層唔係公司, 所以我有兩日偷雞著牛仔褲波鞋返工, 舒服好多啊~~~

歌德(美式)餐廳酒吧 -- 個日式手卷薄餅好食喎~

地址: 旺角通菜街1A -1L時尚廣場1樓

電話: 3678 3368

歌德餐廳, 係我仲係學生時代果陣覺得係一間好好食既餐廳.

 

人大佐, 錢多佐, 試既野又多佐, 覺得歌德餐廳都係普普通通啫, 所以我已經N年無去過.

 

某晚同流沙包係旺角都唔知食乜好, 經過條街有人落力宣傳, 於是就去佐歌德餐廳勒.

 

環境都唔錯, 係暗佐少少. 我地叫佐個日式雞肉手卷薄餅, 意外地勁好食, 熱辣辣, D醬汁夠入味, 唯一唔好係食到成手油. 另外D薯條係新鮮熱辣炸起架, 好好味!!

 

另外我地仲order佐個晚餐雜扒, 都OK啦~

 

估唔到呢餐飯令我對歌德餐廳有所改觀喎~

2008年11月30日(日) -- 在家抑鬱

明明考晒試, 心情應該好番好多, 應該好輕鬆架啦~ 但唔知點解心情竟然好低落, 做咩都提唔起勁. 連流沙包叫我夜晚出黎BBQ我都唔想去, 孤零零係屋企食叮叮飯. 都唔知自己做乜咁down咁唔開心...

2008年11月29日(六) -- 補課, 八月花食飯

星期六本來唔駛返學, 但因為考試前阿sir教唔晒書, 雖然考晒試, 但阿sir話都會照教, 如果我地有興趣聽就可以返去聽, 所以我都返佐去上堂.

 

上完堂我就搭車落九龍塘join流沙包, 因為佢帶隊去佐CityU打大專盃.

 

我地又係例牌去佐美心集團, 今次去佐八月花.

 

佢地越黎越狗呀, 有D菜式話唔可以使用AE卡優惠, 好賤呀~

 

食完飯跟手去佐Haagen-Dazs買佐個pint size雪榚返屋企~~

 

八月花是次消費約$220 (半價後).

2008年11月28日(五) -- 返深圳office

考晒試放完假返番工, 即刻星期五就上深圳office check數. 好彩今次都係好順利, 無咩野要改, 所以下午就走得勒.

 

lunch食韓國菜:

離開深圳office之後我就展開我既深圳半日遊, 首先去佐購物公園站既Coco Park, 都無咩野好行既, D野又貴, D衫嗱起手都5, 6百蚊一件, 我返香港I.T買好過啦~

 

之後去會展中心站既家樂福, 好大呀, 我行佐成粒鐘, 勁掃貨. D野好平呀, 我買佐一大袋野返黎.

 

大家估下總值幾多錢?

 

 

 

 

 

 

......

 

......

 

 

 

只係RMB136.4咋~~

 

最貴果樣就係OREO白朱古力條一盒18條裝, RMB20.7.

 

我覺得支雀檸超抵呀, 只係RMB2.1咋~

 

蕃茄味百力滋只係RMB5個幾.

 

香港無呢隻味道既杯面:

 

有D餅乾只係RMB兩個幾一包(當然係D大陸牌子啦, 我都唔敢買太多).

 

以後上親深圳office都去掃下貨先~~ (搞乜我既行為越黎越師奶...)

2008年11月26日(三) -- 終於考完試!!

呢個月請佐4, 5日假, 係屋企閉關準備考試.

 

今晚考Financial Management, 經過三個小時既考試, 呢個Sem既考試終於都結束啦~~

 

之後即刻落尖沙咀join流沙包同佢班同學一齊打邊爐, 佢班同學勁搞笑, 氣氛好好~

 

聽日要返工啦, 實好多野做啦, 嗚~~~

流沙包又去台灣

在家閉關準備考試的日子中, 流沙包去了台灣出席一個學術conference, 他回來後買了些手信給我:

經三姑提醒過後, 叫流沙包買的太陽餅:

疑似益力多:

2008年11月22日(六) -- 考試+去飲

今日係考Business & Company Law既日子, 由於係open book exam, 所以我帶晒d notes, 帶佐一本company law書, 一本business law書, 同一本字典仔(考試唔比帶電子辭典).

 

結果係我帶佐幾斤重既書去, 但我揭都無揭過.

 

我花佐太多時間係第一條題目上面, 結果後面果D答得好亂, D字越黎越核突... (都唔明, 我考試考佐咁多年, 考佐咁多次, 點解係時間分配上面仍然係咁差架!!) 

 

考完試之後就搭火車去旺角, 因為今晚係幸福少婦結婚既大日子. 恭喜晒呀~~