2008年7月28日(一) -- 睇脊醫

今日放佐工之後去佐睇脊醫, 約佐六點鐘, 我大約五點五十分去到, 等到差唔多七點先有得睇.

 

X光就上星期已經預先照佐, 我一向都知我條脊骨係側彎架啦, 但睇完張X光片先知原來都彎得好嚴重下. 除佐側彎之外, 原來前後既彎度都唔正常添喎, 醫生問我係咪成日著高踭鞋, 但我由細到大都無著高踭鞋架喎... 點解會咁架??

 

跟住醫生就問下我既病歷, 例如痛佐幾耐, 幾時會痛D等等. 然後就叫我向前, 向後, 向側咁彎腰, 跟住醫生就話我呢個脊骨彎既問題係「結構性」, 因為我彎腰果陣, 條脊骨都無變番直喎.

 

醫生話可能係我細細個果陣姿勢唔正確所致. 跟住我問醫生同軟骨退化有無關係(我幾年前照過磁力共振, 知道我條脊骨有軟骨退化), 佢話都有咁既可能性.

 

然後醫生就叫我訓低, 抬高我隻腳, 幫我拉番鬆D筋. 跟住叫我打側, 幫我啪番D骨(我聽到啪一聲), 然後再叫我伏係度, 幫我按脊骨, 好大力咁噤佐兩下, 做復位 .

 

跟住就再用儀器, 貼D野係我條腰, 有D野啜下啜下電下電下咁, 跟住就走得勒, 星期五再去覆診喎.

 

覆金連X光片, total $900. 好貴呀~~~

 

我打算遲D再搵下骨醫睇...

 

(我唔生BB, 呢個都係原因之一. 如果我生, 日日咁跎住, 實痛死我啦, 我諗我條脊骨變形都似. 阿B未出世我就因病厭世跳樓死佐啦~)