2008年2月23日(六) -- 元朗排球隊春茗

今日終於好番, 個肚無再痛乜濟, 但都疴佐兩次. 下午流沙包同佐班學生出去打war game, 我就係屋企休息下.

 

夜晚我地出佐屯門虹橋食飯, 因為元朗排球隊搞春茗(不過要夾錢的, 每位$250). D食物真係好普通, 都係果D菜色, 味道一般, 但我真係唔明點解食D咁既野都要$250一位, 仲要係D咁既"up dum"爛鬼cheap酒樓, 超唔值.

 

最離譜既係, 張單由我簽卡找數先, 張單$4,535, 我照簽$4,535啦, 因為今餐揸fit人又唔係我, 我地埋單之後仲係酒樓度打麻雀, 咁到時大家夾完錢見有幾多零頭剩, 大家覺得呢餐值幾多貼士既, 咪用黎比貼士囉. 於是我無簽貼士啦, 點知果個仆街光頭阿叔侍應兜口兜面問我「無簽貼士喎」, 我X你呀, 老馮一定要比貼士架?! 我唔覺得你呢間仆街cheap雞酒樓D服務值1亳子貼士喎! 慶到我呀! 如果唔係大班朋友係度, 我一定已經反枱發瀾渣問候佢囉!!

 

除此之外, 呢餐飯我都唔係食得太開心, 大家難得圍埋一齊食飯, 佢地有D仲係好耐無見啦添, 呢D飯聚唔係應該大家一齊傾下偈吹下水咁既咩? 點知無啦啦有人發起開部NDS8個人一齊玩孖寶賽車, 有時仲要玩到野都未得閒食就趕住開新一局, 駛唔駛咁呀? 於是對戰果8個人就聚精會神咁係度打機, 無機打果D就默默係度食, 一係睇電視, 一係睇住打機果D人係度打... 你話呢餐飯食得幾無聊呢? 平時同流沙包兩個人食飯佢攞部機出黎打我都覺得唔高興啦, 大圍食飯比二百幾銀睇住你地係度打機? 我不如係屋企淥公仔面好過啦, 嘥時間, 真無謂!! 如果你地係覺得餐飯悶既要攞部機出黎打下解悶打發下D上菜時間既話, 咁你不如唔好黎食飯仲好啦! 你黎食呢餐飯為咩啫? 為打機or睇人打機?  

2008年2月21日(四)~22日(五) -- 腸胃炎, 病足兩日

唔知係咪連續兩晚飲佐D隔夜湯既關係, 星期三晚臨訓前已經覺得有D唔舒服, 星期四朝早起身真係肚痛, 又疴, 頂唔順要請病假係屋企休息.

 

到佐星期五, 仍然仲係肚痛, 要再請多日假. 今日仲疴得勁佐, 疴佐十幾次, 都唔知做乜. 但又無想嘔喎, 淨係疴.

 

好辛苦呀, 呢兩日大部份時間淨係訓, 咩都做唔到, 好似廢人咁.

2008年2月18日(一) -- 深圳按摩

今日同GM返上深圳office開會, 深圳office有D人仲放緊假, 有D出佐job, 成個office得番四個人.

 

開完會之後跟佐GM去深圳按摩, 我都係第一次去, 終於見識過係點. 如果有時間係上面relax下, 又可以上下網睇下波做下gym打下乒乓波睇下戲食下野, 過埋夜係裏面訓埋, 埋單二百幾蚊又真係幾抵玩.

 

按完之後再同GM係萬象城既火間土食埋飯, 兩個人食下飯傾下偈不知不覺已經九點幾, 然後先返番落黎香港.

 

同流沙包一齊果陣都無咁悠閒他條relax. (哼, 投訴中呀, 有無人接收到呀?)

沙嗲雞肉炒烏冬

上兩個星期日係屋企玩煮飯仔等流沙包返黎食, 我好簡單咁煮雞肉炒烏冬, 將D雞柳切細, 加D火腿絲, 菜, 打隻蛋落去兜勻, 再落D沙嗲醬, 完成.

 

味道... OK啦~

2008年2月16日(六) -- 錦田

今日同流沙包去佐錦田行下. 本來上網睇資料話係搭西鐵去到錦上路, 然後轉小巴去北圍村落車就是. 我地係錦上路西鐵站對出等小巴, 點知架小巴黎到個司機話呢度只可以落客, 唔比上車. 叫我地搭的士去, 話我地下次搭就返元朗總站上車搭去北圍村, 我地完全唔知點解西鐵站果度唔比人上車都有既??

 

好啦, 我地轉搭的士啦, 點知個的士司機又唔多識路, 仲兜錯佐路添.

 

終於到佐北圍村, 我地先去佐睇樹屋, 然後諗住行番去村口睇下D乜乜祠乜乜堂, 途中見到有個鄉村俱樂部, 有BBQ, 釣魚, 餵豬/白兔/ 山羊/松鼠, 又可以射箭, 摘士多啤梨等等, 於是我地就入去參觀下.

 

之後我地出番村口睇下D傳統建築, 天黑前就搭番小巴出元朗勒.

 

可惜今日天氣差, 成日落住雨, 我地又無帶傘, 搞到心情都無咁靚.

616日式火鍋 -- 好貴呀!

地址: 尖沙咀加拿芬道20號加拿芬廣場6樓603A舖
電話: 2152-0371

上星期五同流沙包去佐尖沙咀食日式SHABU-SHABU, 果度既套餐好貴, 我地已經叫佐個最平既豚肉套餐, 百幾蚊一個set(一人前), 得幾片豬肉, 有D烏冬, 冬菇, 菜等等.

另外我地仲叫佐個焗帶子, 雜錦天婦羅同雞肉炒飯. 個焗帶子幾好食, D汁甜甜地唔錯. 個天婦羅一般, 個雞肉炒飯, 我覺得麻麻地, 炒得唔好食. 

SHABU-SHABU我係日本都食過, 香港呢間既SHABU-SHABU... 唔抵食囉...

 

2008年2月14日(四) -- 情人節

今日係情人節, 我買佐一大堆朱古力返公司派比所有同事. 今日office都有D女同事收花.

放工後我同流沙包去佐KFC食飯. 無錯呀, 我地無去咩蠋光晚餐, 梗係唔去啦, 無理由無啦啦比多幾百蚊食一餐無咩特別既飯架麻, 結佐婚囉, 我唔會再係呢D日子比人劏到一頸血架啦~~ 由於我想食KFC, 所以就提議呢日黎食勒, 百幾蚊埋單, 抵呀~!!

2008年2月13日(三) -- 搵對手襪都咁難架…!!

聽日係情人節, 所以今日放工後落佐銅鑼灣打算買禮物比流沙包. 流沙包之前話想買對手襪, 但係搵唔到. 於是我今日放工就諗住落銅鑼灣搵啦, 我行均SOGO, MUJI, ESPRIT等等, 行佐兩個幾鐘, 都竟然搵唔到一對似樣既男裝手襪… 有無搞錯呀?? 最後行到去Log-on先搵到對似樣D既, 即買…

 

行到腳都跛呀!!

2008年2月12日(二) -- CJ7, 好無聊, 估唔到會係一部周星馳電影

今日落佐屯門睇戲, 套CJ7, 萬眾期待咁, 又話用佐幾多千萬拍攝. 本來我睇之前都已經睇過影評又聽過人地講話套戲劇情薄弱, 唔好睇, 好失望等等. 所以我都已經無抱咁大期望入場, 但睇完之後我真係好失望, 呢套咁既戲係周星馳電影? 係咪要進軍國際, 玩高層次, 就要拍埋D咁既戲? 部戲全無劇情可言, 如果佢係一套迪士尼電影, 係度硬sell親情, 我都嫌佢悶啦.

 

我都係鍾意睇周星星以前既無厘頭戲多D囉, 家有喜事呀, 唐伯虎點秋香呀, 整古專家呀等等, 套套我都睇過九千幾次, 但每次電視播返我又不其然會坐係度睇唔會轉台; 雖然每一個笑位我都記得晒, 但每次去到果D笑位我都仲係會笑得出架喎.

 

去到近期D如食神呀, 喜劇之王呀等等, 我見到電視播我就會即刻轉台囉, 實在已經唔再吸引我去睇...

 

同埋D雜誌成日話套CJ7 D場面係抄邊套邊套戲, 我就覺得佢地打曱甴果幕係好似PlayStation既遊戲<俺の料理>囉...

 

 

2008年2月11日(一) -- 參觀流沙包office

我公司係新年淨係放紅色假, 所以我本來今日就要返工, 但我實在接受唔到年初五就要返工(想當年我係TDK放到年初九架麻, 今年仲要咁PK年初三係星期六, 變相蝕佐一日假), 於是我就請佐兩日AL.

 

今日見無無聊聊無咩做, 於是流沙包就話帶我參觀佢office(但佢今日其實都仲放緊假), 流沙包office好細, 雖則話係IVE, 但成間中學咁, 行佐陣同小花影佐D相就落佐又一城行勒.

 

今日都係無咩做過, 夜晚就阿媽上黎拜年. 

2008年2月9日(六) -- 年初三, 麻雀日

年初三, 通常係姑媽同伯娘黎拜年既日子, 所以我都專登返佐娘家同佢地一齊去飲茶.

 

下午眾人吹雞上振宇屋企玩, 開佐兩枱麻雀. 然後玩佐D有奬遊戲, 玩啤牌飲酒. 我自己又衰走去「對」人地飲, 結果有時比人「對」番轉頭. 雖然係利賓納溝Vodka, 但係我一向唔識飲酒, 兩杯落肚後面又紅心又狂跳又想嘔. 後尾頂唔順係梳化訓佐陣.  最後差唔多玩到天光先走.

 

飲酒後遺症係全身又紅又痕...

2008年2月8日(五) -- 年初二, 又係無聊又嘥錢的新年活動

今日年初二, 一朝早又要出奶奶度食開年飯, 跟住奶奶, 我姑仔同叔仔等人就黎我地屋企拜年, 活動不外乎都係玩啤牌. D賀年禮盒就好似玩交換禮物咁, 我送盒金莎比你, 你又送番盒樂家杏仁糖比我, 我覺得係好嘥錢無聊囉, 既然要互送, 不如做offset咁大家都唔駛送咪仲好. (另外說實在我唔會買金莎, 什麼藍罐曲奇呢類收到膩兼毫無新意既禮盒比人囉. 我今年係去SOGO地庫買日本禮盒囉) 

 

玩到咁上下就出街食飯, 佢地話要食日本野, 幾艱難先搵到間有開門既. 八個人食, 食佐成千銀, 要我地埋單. 所以我都話出年寧願花D錢去旅行好過!

2008年2月7日(四) -- 年初一, 無聊的拜年活動

今年係我結婚後第一年過新年, 亦代表我要開始派利是. 說實在我係好肉痛好唔想派, 你知啦我一向愛財如命架麻, 要我無啦啦派錢出去喎, 好似割佐我忽肉咁, 哈哈~~

 

年初一朝早先去佐娘家同阿媽拜年, 以前未嫁的話我就要同埋阿媽一齊出去姑媽伯娘佢地度拜年. 今年我嫁佐人勒, 所以就要去流沙包屋企啦. 因為咁我年初一朝早先返佐娘家, 然後先再去奶奶度拜年.

 

年初一流沙包屋企要食齋, lunch係奶奶屋企食. 跟住就係呆坐, 呆坐, 呆坐... 無幾耐流沙包舅父一家大細都黎埋我奶奶家拜年, 於是我再退入房呆坐, 呆坐, 呆坐(呢個時候我已經睇晒D報紙雜誌). 拜年真係一樣非常非常無聊既活動, 幾廿人迫埋係一間幾百呎既豆腐膶, 坐都無得坐咁濟, 電視又做埋D白痴賀年節目, 都唔知做乜, 真係浪費時間.

 

呆坐到咁上下我地就過我姑仔屋企, 佢地係度玩射龍門, 廿一點等等, 但我無興趣玩. 於是我又再呆坐, 呆坐, 再呆坐, 坐到係梳化訓著.

 

我同流沙包講, 下年幾貴都好, 過年我唔想再係香港過勒, 去旅行啦!! 係香港過年實在超級無聊呀!!

2008年2月6日(三) -- 又行花市

今日係年三十, 三點後公司齊齊大掃除, 每人派條毛巾, 一對手套, 自己清潔番自己個位, 然後再清潔公用地方如pantry, 大門等等.

 

大掃除完, 四點半走得, 於是同流沙包去佐行花墟花市, 有D產品係維園無見過喎, 不過我地都係咩都無買到.

 

行完花市我覺得好攰, 於是返屋企恰佐陣, 然後八點半又要落屯門同流沙包屋企人一齊食飯. 呢餐飯食得唔係太開心, 食完飯都唔想去振宇屋企玩, 直接就返屋企訓覺算.

2008年2月5日(二) -- 行花市

今日放工後同流沙包去佐行維園花市, 人唔算太多, 可能天氣實在太凍啦~ 行花市我地通常都唔會買D咩, 果D大粒珍寶珠, 巨型金莎, 吹氣公仔, 風車, 毛公仔等等我地一律唔會買, 因為買佐返去都唔知擺邊度, 又唔知用黎做咩好, 所以我地行花市都係得個睇字, 湊下熱鬧咁而已.

 

估唔到行行下花市竟然撞到我個妹同佢男朋友, 於是我地就相約大家行完花市就一齊去食飯. 佢地聽日就飛北海道啦, 真係令人羨慕呀!!

太平山餐廳 -- 生日飯

地址: 山頂山頂道121號
電話: 2849-1000

2月1日, 流沙包提議上山頂食飯, 個menu都算多野, 不過真係「雜北lung」咩都有, 有日本刺身壽司, 印度咖哩, 美式燒烤, 意大利飯, 海南雞飯... 不過就無set dinner可以叫.

 

最後我地叫佐個龍蝦湯, 一個雞肉薄餅, 法式海鮮拼盤同一個羊肉. 個龍蝦湯幾好飲, D蝦肉都算幾彈牙; 個雞肉薄餅味道OK, 唔會太怪; 個法式海鮮都幾好食, 個湯好似蕃茄薯仔湯咁.

 

食完飯我地叫佐個甜品, 無幾耐見到隔離枱上果個甜品有支蠟燭插住係度, 同埋有播生日歌. 於是我怨流沙包點解我無呢D野.

 

等等下我無無聊聊攞個電話出黎睇下有無人搵過我, 點知突然間有人係我耳邊講「生日快樂」, 然後面前就出現佐個插住蠟燭既甜品勒~ 好開心呀! 無諗過流沙包會叫人咁做架~ 原來佢打電話黎訂枱既時候已經吩咐佐餐廳咁做~ 不過最衰就係我隔離枱個女仔又生日, 佢早我地一步上佐甜品, 令我知道佐有呢個驚喜, 否則的話我會開心好多~~

 

多謝流沙包!!

 

2008年2月1日(五) -- 又到佐呢一日...

今日又到佐一年一度唔想過既日子. 如常返工, 朝早十點幾無啦啦有個男人拎住紮花入佐黎office叫我簽收, 好surprised呀!!! 勁驚喜超開心, 嚴格黎講今次係我成世人第一次正式收花(之前收得一枝果D, 或者畢業收果D唔算呀~), 之前拍拖D ex, 從來都無送過花比我, 不過都好既, 因為第一次收花就係流沙包送既, 哈哈,  原來收花既感覺係咁開心的!

 

Lunch就同佐成班同事出佐去食, 放工就同流沙包一齊上山頂, 好凍呀!! 我地搭纜車上去, 上到去就係太平山餐廳食飯, 食飯果陣都有驚喜, 好開心呀! (詳情留番下篇食評講)

好耐未試過呢一日過得咁驚喜特別, 多謝你呀流沙包!

都係覺得自己結婚既成長片段比較特別D... 嘻嘻~~

啱啱個星期日要同流沙包一齊去飲, 其實呢餐飲宴既主角原則上我係唔識佢地, 個新郎係流沙包個細佬既中學同學, 所以同流沙包屋企人都熟, 我地結婚果陣都有請佢黎飲. 今次到佢結婚佢就請流沙包伉儷去飲. 所以我除佐知佢叫John Tam之外, 我對佢一無所知.

 

今次去飲既地點係銅鑼灣, 所以我同流沙包就早D出佐銅鑼灣行街, 我買佐好多新衫新褸呀, 仲買佐D賀年禮盒, 買佐blueberry tea, 好開心~

 

今次去飲既呢餐, 由於我都唔識兩位主角, 所以其實幾悶. 通常開席前都會播一D主角既成長照, 睇佐咁多都係覺得自己結婚時整既成長片段比較特別(比較特別啫, 我無話好特別呀~), 因為起碼有D特別效果睇下咁, 感覺上無咁悶.

 

飲完之後我再搵番我結婚時播既成長片段出黎懷緬下, 睇番都覺得幾悶架喎, 哈哈~

 

我地果陣段片有咩特別? 我偉大D放上黎比大家品評下啦, 哈哈~~~ (重申: 都幾悶架, 哈哈)

 

2008年1月26日(六) -- 震騰騰燒野食

上星期六陪佐個同事去雅麗睇結婚租既衫, D衫靚佐好多呀, 仲靚過我果陣結婚果D衫. 雅麗D staff好勁架, 我舊年四月結婚, 佢地仲認得我, 仲記得我叫咩名, 記得流沙包既職業係咩, 勁呀!!

之後就去佐荃灣既川龍BBQ, 好凍呀, 咁既天氣BBQ, 真係另有一番風味, 舊煨蕃薯都好食D, 哈哈~~

Bistro Delifrance -- 完全唔掂

地址: 銅鑼灣勿地臣街1號時代廣場地庫
電話: 2506-3022

上星期五係銅鑼灣食飯, 天氣凍唔想食日本野, 又唔知食咩好, 行行下又腳痛, 見到Delifrance於是就決定黎試下.

我地叫佐個2人套餐A, 有餐湯, 蒜蓉包四件, 一個雞肉野菌意粉, 一個焗豬扒飯, 兩杯飲品. 我地仲加佐$18要個brownie.

個雜菜湯稀到好似飲水咁, 好淡, 未飲過咁難飲既雜菜湯. 個雞肉野菌意粉得幾粒仔雞肉, 個味道又唔得. 個豬扒飯, 味道好怪, 流沙包話大家樂果D都好食過佢. 個brownie... 一句講晒, 唔係好好食囉...

同埋呢度D服務唔得, 果個所謂既assistant manager, 比人既感覺係輕佻浮躁囉...

我唔知係呢間分店先係咁差呀, 定全線都係咁既哩?