我好耐無買過袋, 因為屋企實在太多袋.
某日行經ANNA SUI, 唔知點解比其中一個款深深吸引住, 因為我本身無斜揹細袋仔, 而ANNA SUI呢個size對我黎講啱啱好.
但係… 屋企又實在太多袋… 都係算啦, 最後放低咗個袋無買.
之但係, 我又成日諗住個袋喎…
某一日, 我好頽咁上完QP workshop, 同流沙包喺銅鑼灣世貿食完飯, 又咁啱經過ANNA SUI, 又再忍唔住入去睇, 又再忍唔住拎上手, 加上sell屎話個袋做緊85折既時候… 流沙包就話”鍾意就買啦, 我送比你既聖誕禮物”
Yeah! 多謝流沙包~~~ “順便”仲買多對絲襪添, 哈哈~~
有睇開我個BLOG既朋友都知, 我喺日本生活過大半年, 香港既拉麵, 實在係令人好失望… 甚至乎一風堂, 其實我都覺得不外如是囉… 至於近期好出名既豚王, 咪玩啦, 我唔會排個幾鐘去食一碗拉麵囉…
雖然我唔係咩食家, 但好食同唔好食, 我都仲講得出, 好多人話香港同日本既水質唔同, 所以就算一樣既材料一樣既師傅, 都未必煮得出一樣既味道喎…
不過最近有一間新開既拉麵店, 係我喺香港現時為止食過最好食既, 佢喺元朗教育路, 名字叫”焰”.
點好食法? 我覺得湯底夠濃(我去兩次都係叫黑白焰), D叉燒夠軟夠滑, 我係可以成個湯底飲晒架囉~~
同埋佢呢期新舖開張, 會送汽水同溏心蛋.
另外果度既咖喱飯仲係免費加飯架~~
不過佢衰就衰在收太早, 好似十點就關門架啦. 
(我覺得自己寫寫吓好似收咗錢幫人賣廣告咁, 講明先, 我唔識呢間舖頭既老闆, 亦唔係收咗錢, 只係怕佢做唔住會執笠, 咁我喺香港就食唔到好食既拉麵啦… 哈哈)
11月, 同流沙包去咗尖沙咀海港城既鴻星食大閘蟹.
流沙包打電話去訂位, 第一輪係六點至八點半喎, 要我地八點半交枱, 都無問題吖, 之不過…
我六點先放工, 我地六點半去到, 初初上菜速度都正常, 但上上吓速度就開始慢落黎, 後來唔知係咪見我地八點鐘仲喺度拆緊第二隻蟹, 都明知我地無可能八點半交到枱, 於是就唔駛趕住上菜趕我地走, 結果我地食完晒三隻蟹就要開始呆等, 個湯羹同糯米飯要三催四請先上到枱, 結果食到差唔多九點半先走得囉…
Service好差呀!!
10月9日, 係我考車牌筆試既大日子.
2:50pm要去到長沙灣政府合署既運輸署考, 所以我果日請咗半日假, 先去咗深水埗搵野食.
我記得雜誌話有一間好出名既拉麵店, 兩個partner意見不合拆咗夥, 其中一個partner去咗西九龍中心另起爐灶, 於是我一心諗住去幫襯.
舖頭位置真係好難搵囉, 我上openrice搵晒舖頭no., 但無諗過佢竟然會喺果個商場仔裏面架嘛…
入到去, 布置都幾得意, 佢D櫈係裝支裝汽水果D膠箱黎架, 而日籍師傅就喺裏面好努力咁煮麵. 
由於我太太太掛住つけめん, 所以叫咗個咖喱沾麵, 味道又唔錯喎, 可惜我果陣趕住去考筆試, 三扒兩撥咁食晒碗麵, 無時間慢慢用心品嘗.
埋單時, 日籍師傅會同你講多謝, 我有機會喺香港講番句"ごちそうさまでした"
十月, 同流沙包去咗九龍酒店中菜廳龍逸軒, 試吓果度既點心buffet.
點心list上面既款式都算多, 仲有湯啦, 飯麵啦, 同埋可以過去西餐廳倚窗閣拎甜品食添.
價錢就$228一位(未計加一), 我覺得以食物種類同質素黎講, 又唔算好貴既.
我推介一定要食既包括個湯, 海皇西施泡飯, 蝦多士, 神戶牛肉飽, 火鴨絲炆米(主要係我不嬲都好鍾意食火鴨絲炆米, 而呢度既又整得幾好食).
至於倚窗閣果D甜品… 唔食都無損失囉…
中秋節假期, 約咗中大同學仔去小欖BBQ, 我果日喺旺角搭小巴入去, 收費每位22蚊, 仲要排好長龍啊~~
其實我覺得小欖燒烤場都幾隔涉吓啫, 交通又唔方便, 我住元朗都唔係太鍾意入去小欖BBQ; 對於無車既人黎講(嗱, 我都無車架), 點解仲會有興趣山長水遠入去BBQ既呢? 如果講燒烤場, 元朗屯門都有好多吖, 元朗西鐵站一出就已經有一個, 交通唔係方便得多嗎??
同學仔要每人帶一個月餅同一個生果去應吓節, BBQ已經食到好飽吓架啦喎, 仲食得落月餅? 哈哈~~
