好忙!!!

就黎考試, 為佐溫書, 連訓覺都無時間~

暫時無閒情upload個blog住lu~~

 

虐待配偶

我覺得我自己有少少變態, 唔知點解我好鍾意打流沙包, 仲要打D最易見到紅手印既部位.

 

就係打大脾啦, 打完之後紅手印即現, 我覺得有D"滿足感"耶... (死啦我係咪心理變態)

 

另外, 平時同流沙包落街食飯我會拎個手挽小袋仔裝下銀包電話等等, 我鍾意行行下街突然"掹弓"將個袋仔"車"落流沙包個心口度...

 

我咁樣虐待配偶會唔會觸犯法例呢? 流沙包你要唔要打求助熱線...?

 

(打完人仲要影埋相post上網, 你話你唔係變態仲會係乜野?!!)

 

 

 

老公老婆? (有咩得罪請勿見怪...)

有時係街度成日見到D情侶, 得果十幾歳, 但係已經用「老婆」「老公」黎相稱, 我覺得幾「銀耳」. 又或者見到D唔太熟既親戚朋友, 明明知佢地拍拖拍得幾個月, 就已經用「老婆」「老公」黎稱呼對方, 我聽到就覺得唔知點咁.

 

可能我比較保守或者比較執著啦, 我拍過幾次拖, 即使最耐果個拍佐三年都好, 但我從來唔會叫bf做老公囉, 當然對方都曾經有要求過我不如叫佢做老公啦, 但我打死都唔肯咁叫囉. 我覺得「老公」呢個稱呼係有好深層既含意, 我認為老公/老婆一生人只係得一個既啫(假如唔離婚的話), 就係結佐婚會同你一生一世果個人, 會對你有承擔有承諾, 大家互相扶持互相關愛, 無論疾病貧窮都唔會嫌棄你既人(咁講好似好老土), 所以我覺得點可以咁隨便就叫對方做老公架?

 

有D人, 三個月就換一次畫, 每次拍拖都叫對方做老公老婆, 咁你呢世人咪有十幾廿個老公老婆?

 

或者其他人對呢D稱呼覺得無咩所謂, 唔會咁在乎啦, 但我就會好認真囉, 我0係流沙包求婚後才開始慢慢改口叫佢做老公, 初初果陣仲有D叫唔出口, 唔太自然; 初初果陣係人地面前都唔會叫佢做老公, 叫番流沙包既全名. 所以有時係街見到D十幾歳腦筍都未生埋既0靚仔0靚妹, 叫對方做老公老婆叫得咁鬼自然, 我真係為之側目囉...

 

我就係咁老土架啦...

我的日本語學習2

我而家個日文阿sir係香港人, 佢後生時留學日本, 跟住娶佐個日本太太, 所以佢屋企基本上0係日本而唔0係香港. 因為咁阿sir每隔一段時間就要飛過日本幾個星期, 然後又返番黎香港繼續教書既工作.

 

呢幾次阿sir飛番黎香港之後, 唔知點解無啦啦趁放學時鬼鬼祟祟咁塞佐D日本手信比我. 當我想開口問清楚果陣, 阿sir淨係話:「得啦~得架啦~」, 到底點解無端端有手信收咁好呢? 我好想知點解哦~~ 

我的日本語學習

雖然我係大學叫做讀佐3年日文, 亦都考佐2級能力試, 但係我聽同講既能力仍然十分之渣, 所以我而家仲有係坊間既日文學校讀緊日文.

 

我而家讀既呢間日文學校一D都唔出名, 無賣廣告, 只是靠口碑同埋朋友介紹, 但係我覺得阿sir教得好好.

 

佢既理念同出面D日文學校好唔同, 上堂係無書的, 因為佢著重學生聽同講既能力, 仲要係標榜地道日語, 而唔係書本上所教既日語.

 

而家阿sir教既日文, 以前係大學讀佐3年都無學過, 雖然學語言係好講自發性, 即係上堂之餘仲應該睇多D日劇, 日文書, 聽下日本電台等等. 但係講到尾我都係懶啦, 同埋我發覺我以前讀日文既方法真係好錯, 我太依賴書本上教既日文啦, 唔去刨多D日劇, 日本雜誌等等... (阿伯都教訓過我N次)

 

而家上堂教既日文, 我0係睇日劇當中真係成日都聽到, 聽得明既感覺真係好開心~ 例如前幾堂學完...ってば, 我呢期睇《絕對彼氏》(即係無線收費台即將會播既機械夢情人=>超核突的譯名), 真係成日聽到女主角講...ってば, 比著以前, 就算我聽到個音, 我都唔知果句說話有咩意思.

2009年2月7日(六) -- Applied Japanese Studies十週年晚宴

今天悉心打扮一番, 因為放學後要出席城大AJS既十週年晚宴.

 

成個晚會, 無咩特別野好講.

 

不過去完呢個週年紀念晚宴之後, 我諗我唔會再出席呢類活動了. 我覺得, 同屆既同學, 如果本身係熟, 就一定會成日出黎見面架啦; 唔熟果D, 就好似今晚坐係隔離枱果班所謂「同學」, 就算見番我連招呼都唔會打一個. 因為一來我遲到啦(我要放學先可以趕去麻), 一去到個晚會剛開始司儀係度講緊野, 所以我只有鬼鬼祟祟咁閃埋位坐低; 二來坐係隔離枱果班同學, 我讀書果陣已經睇佢地唔順眼架啦, 我自認都係一個港女, 但我覺得佢地更加係港女之中既港女囉, 成日以為自己好高貴, 睇唔起其他人咁.

 

至於非同屆既前輩/後輩, 更加唔會有咩交流啦; 最值得見番既せんせい, 全晚都忙到周圍走, 好困難先影到張合照, 同埋就算今晚我無出席, 我間中都會同せんせい keep in touch, 唔係真係畢業後就無見果隻.

 

AJS之母 -- 高橋老師:

後輩既表演(唱緊崖上的波兒):

 

合照:

LV頭飾入手

我覺得隻色真係... 幾sharp, 不過好似"小朋友"佐D...

 

但係隻色真係幾靚, 成粒啫喱糖咁~

 

呢四粒野大家估下幾錢?

 

 

 

 

 

 

聽講係around HK$1,600呀, 好貴, 我一定唔捨得買.

跟手講埋Keroppi既正確讀法

Keroppi, 我諗十個有九個都係讀成"KEY-ROLL-PI",

 

但我就讀番日文發音, 我會讀成"騎-羅-PI".

 

"騎-羅"既發音係表示青蛙既叫聲麻~~

UNIQLO既讀法

唔知大家知唔知呢個日本品牌既讀法呢?

 

原來好多香港人都唔知呢個牌子點讀.

 

某日有個同事問起, 佢一直都讀成"YOU-LEE-QUOTE".

 

其實呢個牌子既正確讀法係:

 

YOU-LEE(請自行加鼻音)-COOL-LAW

 

呢個係日本牌子, 緊係讀番日文發音啦~

The Mistral 海風餐廳 -- 好貴耶...

地址: 尖沙咀麼地道70號海景嘉福酒店B2層

電話: 2731 2870

 

去完海洋公園之後, 我地去佐尖東既海景嘉福酒店既Mistral食意大利菜, 個appetizer係帶子, 同埋叫佐個龍蝦墨魚汁意粉同pizza(4 Italian cheese).

 

食物... 我覺得普普通通, 服務都OK.

 

價錢, 勁貴, 一坐低就問你柯唔柯打既果兩杯香檳原來要成三百幾蚊, 早知唔叫啦. 成餐飯夾埋約千二蚊, 我地用佐cash coupon同埋會員卡75折, discount晒之後都要成九百幾蚊...

(D相分別用相機同i-phone影, 所以質素上有D分別..)

 

 

 

 

 

2009年2月1日(日) -- 免費去海洋公園

今日同流沙包去佐海洋公園, 我尋晚八卦上網check價錢, 先知原來生日可以免費入場架喎, 咁好既?!

 

入到去好多人呀, 人山人海, 我地既策略係唔嘥時間排隊玩機動遊戲, 淨係睇表演睇動物就算.

 

我地朝早係大樹灣果邊, 去佐百鳥居睇雀仔, 睇冰上表演, 太平洋海岸睇海獅, 然後睇佐兩點果場既海洋劇場, 再去海洋館(好多人排隊呀), 日本公園(全海洋公園最人煙罕至既地方), 水母萬花筒(都要排隊).

 

 

 

 

之後打算搭纜車落山睇威威劇場, 點知排隊搭纜車排佐成粒鐘咁濟, 落到山已經表演完畢, 我地唯有去睇熊貓, 行佐陣兒童王國, 玩到六點就離開lu.

 

 

 

最開心係去到熊貓館, 見齊四隻熊貓呀, 除佐佳佳係度靜靜地沉思之外, 全部係度食緊竹葉, 好可愛呀~

 

 

 

 

最討厭仍然係D大陸人, 打尖攝位, 推推撞撞, 橫衝直撞, 爭先恐後... 離晒譜, 完全唔講秩序. 你地作為遊客, 我都好想禮待你地, 但你地仍然好似未開發, 成個蠻夷咁, 到底你地幾時先會進步呀?  中國成日話發展話進步, 我知你地班自由行袋裏面係一疊疊銀紙好富有, 但弊在內裏依然係無文化無修養呢! 除佐物質上既進步, 麻煩中國政府好好教育下D人民係精神上既進步啦~~

 

我作為香港人, 雖然一早已略知班自由行既"行為", 但我都頂唔住佢地咁野蠻, 可想而知點解中國人去到外國旅行既時候, 會咁唔受歡迎囉...

2009年1月31日(六) -- 振宇家新春晚會

今晚上振宇家開party, 食物有美心叫既盤菜, 飯面等等.

 

食完飯照例部份人打麻雀, 部份人玩啤牌~

 

到佐十二點突然熄晒燈, 然後有人捧佐個蛋糕出來, 哈哈, 好開心呀~~

 

多謝大家~!!