2008年7月28日(一) -- 睇脊醫

今日放佐工之後去佐睇脊醫, 約佐六點鐘, 我大約五點五十分去到, 等到差唔多七點先有得睇.

 

X光就上星期已經預先照佐, 我一向都知我條脊骨係側彎架啦, 但睇完張X光片先知原來都彎得好嚴重下. 除佐側彎之外, 原來前後既彎度都唔正常添喎, 醫生問我係咪成日著高踭鞋, 但我由細到大都無著高踭鞋架喎... 點解會咁架??

 

跟住醫生就問下我既病歷, 例如痛佐幾耐, 幾時會痛D等等. 然後就叫我向前, 向後, 向側咁彎腰, 跟住醫生就話我呢個脊骨彎既問題係「結構性」, 因為我彎腰果陣, 條脊骨都無變番直喎.

 

醫生話可能係我細細個果陣姿勢唔正確所致. 跟住我問醫生同軟骨退化有無關係(我幾年前照過磁力共振, 知道我條脊骨有軟骨退化), 佢話都有咁既可能性.

 

然後醫生就叫我訓低, 抬高我隻腳, 幫我拉番鬆D筋. 跟住叫我打側, 幫我啪番D骨(我聽到啪一聲), 然後再叫我伏係度, 幫我按脊骨, 好大力咁噤佐兩下, 做復位 .

 

跟住就再用儀器, 貼D野係我條腰, 有D野啜下啜下電下電下咁, 跟住就走得勒, 星期五再去覆診喎.

 

覆金連X光片, total $900. 好貴呀~~~

 

我打算遲D再搵下骨醫睇...

 

(我唔生BB, 呢個都係原因之一. 如果我生, 日日咁跎住, 實痛死我啦, 我諗我條脊骨變形都似. 阿B未出世我就因病厭世跳樓死佐啦~)

新玩具 ASK TV-MP5 901

上星期六本來打算去九龍塘AMC睇蝙蝠俠, 但係已經買唔到即日飛啦, 於是打算黎緊個星期五去IFC睇.

 

之後落佐深水涉買玩具, 我終於都買佐PMP啦, ASK TV-MP5 901, 4.3" panel. 以後就可以DL定D日劇係搭車果陣睇啦. 我呢D係新界住香港島返工既人, 搭村巴快既要35分鐘, 搭九巴慢既要成一粒鐘(未計等車時間), 如果係車上面無野做真係好悶好浪費光陰架麻. 而家搭車都可以追到日劇勒, yeah!!

 

部機係流沙包送, 好開心~~~ 多謝晒~~

 

 

2008年7月18日(五) -- 公司聯誼之唱K日

我地有位深圳同事, 黎香港training三個月, 上星期五就係佢0係我地office既last day, 所以我地果日就同佢出佐去食lunch, 夜晚就去佐銅鑼灣CEO唱K.

中元禮物

上星期五個客上黎開會, 收到佢地既中元禮物.

其實就算唔係因為お中元既關係, 個客平時上黎開會都會買土產上黎.

好多客上黎我地office開會都會買土產(手信)上黎, 最常收到既係餅乾, 菓子, 蝦餅等等.

我有個客每次黎我地office都必定會買手信上黎, 但因為佢長駐東莞, 所以佢送既唔係日本既土產, 而係0係香港買既野, 例如我收過美真香既豬肉乾, 榮華既鳳梨酥, 好搞笑~~  

稻菊日本料理 Inagiku -- 好貴, 但食物一般

地址: 中環港景街1號國際金融中心商場4001-4007號鋪
電話: 2805-0600

 

星期三同GM及幾個同事放佐工一齊去食飯. 由於0係公司附近果D餐廳都食到厭晒, 所以我就提議去IFC睇下有咩好食啦.

 

去到IFC睇水牌, 有同事提議不如食日本菜, 所以就揀佐稻菊日本料理.

 

其實我一早都知道呢間野係貴, 但係無諗過原來係咁貴.

 

入到去坐低睇menu, 個個都唔敢話想食咩, 因為樣樣野都超貴, 例如一客壽司最少要八, 九十蚊, 最平既鐵板燒套餐要六百幾一位.

 

於是GM就話叫兩個鐵板燒, 一個海鮮, 一個美國牛, 另外再叫佐個雜錦刺身, 一個雜錦天婦羅, 一個和牛飯, 一個蕎麥面.

 

個鐵板燒都算幾多野食, 有沙律, 刺身, 飯, 甜品等等.

 

由於我唔食牛, 我都唔知個和牛飯/鐵板牛有幾好食. 其他食物我覺得OK啦, 未至於好食到喊.

 

我淨係知道我地六個人, 埋單total HK$2,900.

好彩係公司數啫... 呢間餐廳或者等生日/我同流沙包既週年紀念日先考慮再黎啦~~

呢期好down...

最近好多野, 搞到個人既情緒好低落.

 

1. 天氣問題?

 

呢排成日落住雨, 公司做野已經做得有D唔開心, 諗住weekend可以出去玩下relax下, 但係就日日落住雨, 搞到星期六日都唔可以出街玩, 放假都要屈係屋企, 我就黎抑鬱架啦. 我根本就無地方可以宣洩...

 

 

2. 朋友問題?

 

最近朋友間好似有D問題, 明明大家係好朋友, 但係總會因為一D事件令到關係有所變化, 會唔會從此大家都不會再算是朋友了? 尤其是最近睇完套日劇"last friends", 令到我好感慨, 到底真正既朋友應該係點既呢? 我到底有無真正既朋友呢? 日劇裏面既友情, 好似タケル同瑠可既朋友, 我都好想得到. 大家可以將心裏既說話毫無保留, 無需掩飾咁讓對方知道; 就算對方有時係講佐D說話令你受傷害, 但作為朋友既仍然會不離不棄. 我一路睇呢套日劇, 一直係度反思到底我身邊既朋友係點既呢? 我做唔做到對朋友應有果種關心呢? 我身邊既朋友會唔會係我有需要既時候出現係我身邊呢?

 

 

3. 工作問題?

 

其實我係幾鍾意呢份工, 我鍾意而家既field同埋job nature, 我鍾意我上司GM係可以信賴同埋親切既人. 但係有時覺得自己力有不逮. 我份工要接觸既野太多了, 要記既野太多, 做taxation要記Inland Revenue Ordinance, 做comp sec要記Companies Ordinance, 又要記好多forms, 要記好多手續同程序... 我有好多資料應該要睇, 但係根本就無時間去睇, 大堆資料疊到幾吋厚.

 

最大問題係我既日文能力仍然係far from good. 睇同寫都無咩大問題, 但聽同講一向係我既死穴, 學英文如是, 學日文都係咁. 有時開會果陣我知道個topic係咩, 我預計得到大家會講咩, 咁我就會聽到七成左右. 但如果係日本人既閒談對話, 或者個客打電話黎, 我無辦法預先知道佢地講緊咩話題的話, 我就唔係太聽得到佢地講咩, 有時只係聽得到一, 兩成... 唉...

 

 

4. 健康問題?

 

又係腰痛既老問題啦, 真係想死...

 

 

5. 金錢問題?

 

呢排好手緊, 本來plan會去歐洲旅行都擱置佐. 人工又低... 好似儲唔到錢咁...

 

 

 

我而家返到公司, 完全唔想講野吹水, 淨係工作工作再工作. 一到五點半放工就即刻走, 邊度都唔想去, 邊個都唔想見, 淨係想快D返到屋企自己柄埋.

 

我呢種情緒唔知幾時先可以轉變得到...

2008年7月6日(日) -- 梅窩濕身日

星期日墨魚氏一家+流沙包一齊入佐梅窩行下, 因為梅窩係墨魚媽細細個住既地方. 本身由屋企搭巴士去碼頭果陣都仲有少少陽光, 入到梅窩落佐船都仲有少少藍天, 點知行佐陣就落大雨, 雖然我地有帶遮, 但實在太大雨, 我地唯有係D有瓦遮頭既地方避下雨, 見細雨返D先繼續行. 我地淨係避雨都避佐兩次.

 

 

後尾見無乜雨就行上去銀礦灣瀑布同礦石洞睇下, 果陣都已經停雨咁濟, 但係當我地行落碼頭果陣, 突然間又開始傾盆大雨, 山路無處可避, 即使有遮都無咩用, 我地個個都全身濕透.

 

 

好辛苦先行番出碼頭, 我提議去梅窩體育館吹番乾個身先. 然後我地先至去食飯.

 

本來我地打算行完梅窩就去東涌行商場架麻, 但係去到東涌又落狗C咁, 於是就搭車返屋企勒, 真掃興...

 

成個島都係黃皮樹

 

花樣少年少女?

無線呢排播緊套日劇《花樣少年少女》, 漫畫版我有睇過, 台版叫《偷偷愛著你》, 香港版譯《女生勿進》. 當初睇漫畫版既時候都不是太鍾意呢套漫畫, 佢全套有廿幾期, 但當我睇到十幾期果陣, 我已經覺得D劇情係度拖, 好鬼悶, 好辛苦終於先捱到佢大結局.

 

所以電視版我都無咩興趣睇, 再加上D選角... 女主角堀北我覺得OK, 扮演男主角佐野泉既小粟旬, 我覺得真係完全唔掂, 又唔靚仔, 係度扮晒型, 果pat咁既頭髮都唔知想點... 總之我覺得佢成個爛仔格咁. 漫畫裏面既佐野泉係有氣質, 深藏不露, 外冷內熱既人黎架麻(我覺得), 小粟旬完全無果個神髓囉...

2008年7月1日(二) -- 畢業禮... 好悶耶...

今日陪流沙包出席佢以前教果間小學既畢業禮. 成個畢業禮大約兩小時, 頭一個小時淨係致辭, 介紹學校, 然後D畢業生逐個上台攞証書, 另外各級優異生又一一上台攞奬... 真係悶到訓著.

 

第二個小時就係學生表演, 有唱歌, 朗誦, 武術表演, 英文drama, marching band表演... 好悶呀.

 

以前流沙包仲係果間小學教果陣, 我都有去睇過畢業禮, 因為年年流沙包都會搞個體操表演, 係全個畢業禮最精采既環節, 亦係高潮所在, 令到沉悶既畢業禮加添小小生氣.

 

但自從流沙包無再係果間小學教, 畢業禮亦都無佐體操表演呢個項目, 結果成個畢業禮都係沉悶既氣氛中渡過.

 

畢業禮完佐之後, 好多人都同流沙包講好懷念佢搞既體操表演, 無佐個體操表演, 成個畢業禮真係失色不少...

世界女排大奬賽2008

多謝流沙包既安排, 今年又可以現場睇比賽, 冠軍賽中國對意大利真係好緊張刺激~~ 好好睇~~