新鮮熱辣@墨魚燒賣: 1/3/2008

2008年3月27日星期四

2008年3月22日(六) -- 放假先黎落雨

餐餐都係咁, 放假先走黎落雨. 流沙包本來今日出去滑水, 但係咁既天氣佢最後都無出去, 於是諗住同我去行下街啦, 點知一落街無耐就落大雨... 邊度都唔駛去啦, 好鬼忟呀!!

於是我地就無無聊聊去佐間漫畫屋入會租漫畫睇, 都幾抵喎, 大部份都係$3本, 於是我地夾埋租佐十幾本漫畫返屋企睇...

無聊的一天...

2008年3月21日(五) -- 一個人在家

今日流沙包一早就出佐去, 得番我一個人係屋企. 流沙包佢朝早出去探舊同學, 人地剛剛生佐個BB. 跟住佢下午又要去教波. 本來夜晚話去牛丸屋企BBQ, 但係我唔多想去, 一來3月頭金雅生日先剛剛BBQ完, 唔想咁快又BBQ; 二來我心情唔多靚, 因為成日都要自己一個人孤伶伶係屋企, 所以我嬲嬲地, 流沙包打佐三十幾個電話返黎我都無聽佢電話. 於是佢都唔去BBQ返黎陪我.

2008年3月26日星期三

飯廳 -- 食物幾有創意, 但甜品就唔得啦

地址: 荃灣青山公路388號中國染廠大廈地下G06
電話: 2628-0636

上星期二同流沙包去佐荃灣既飯廳食飯, 其實呢間餐廳我幾年前已經黎過一次, 但係果次食完之後我覺得麻麻地, 所以之後一直都無再去過. 事隔咁多年, 諗住佢可能會有改進啦, 於是就再試下幫襯.

我叫佐個鵝肝鰻魚意大利飯, 配搭似乎怪怪地, 但出黎既味道又唔錯喎, 不過我覺得個鵝肝好似煎得過佐火候.

流沙包叫佐個面包蕃茄海鮮菠菜寬條面, 夠晒份量, 一個人肯定係食唔晒, 可以share兩個人食. 不過我覺得蕃茄味配菠菜面既味道真係唔多夾. 但個面包幾好食架~

不過個set dinner既甜品絕對係一大敗筆, 個set又唔算平, 係其他地方食dinner如果有甜品送的話, 最低限度都有杯雪糕或者一件cake仔呀~ 呢度既甜品竟然係幾粒泡芙... 你估兒童餐咩, 味道又唔係好喎.

另一個set我地加錢改做朱古力軟心蛋糕, 一句講晒呢度既甜品真係唔得, 首先佢無加雪糕球既... 呢個熱辣辣心太軟甜品要配個凍冰冰雪糕先好食架麻. 再者佢個心太軟又唔係整得好食, 同埋唔係好多朱古力醬流出黎囉.

我覺得呢度既食物係幾有創意既, 可以黎試下, 但甜品就去第二度食好過啦~~

2008年3月16日(日) -- 港島一天遊

今日應承佐阿媽同佢去屋村互助委員會搞既港島一天遊, 我地九點鐘係樓下搭旅遊巴出發, 先去佐位於鰂魚涌公園既葛量洪號滅火船展覽館參觀, 然後就去佐行動植物公園, 之後再去銅鑼灣既梨和園食韓國菜(無得燒烤, 只可以食熟食).

然後再去尖沙咀既歷史博物館, 大約4點半就上車回程返天水圍勒.

包食包車每位都只係$25, 確實幾抵, 不過... 幾悶架, 有D地方我自己都已經去過啦麻~ 不過今日既目的係陪阿媽出去玩下, 所以無所謂啦~~

2008年3月19日星期三

2008年3月8日(六) -- 金雅生日

今日係金雅生日, 我地一大班friend上佐佢係蟠龍半島既屋企開party, 有BBQ同打麻雀, 玩啤牌等等.

我第一次去佢蟠龍半島既屋企, 嘩~~~ 四層高house, 後面有私家花園, 最痴線既係沿樓梯一直落去, 就會落到去一個沙灘仔, 係一個屬於自己既私人海灘呀~ 雖然size唔算好大, 但你可以係岩石度釣魚, 可以就咁就跳出海游水, 或者落沙灘曬下太陽... 嘩, 咩生活黎架~~?!

我地傍晚開始BBQ, 好多野食, 又有魚, 蜆, 螺, 魷魚等等. 食飽之後就同壽星女打麻雀同玩射龍門, 但壽星女運氣好差, 射龍門狂撞柱, 輸佐幾舊水. 同我地打麻雀仲慘, 打佐5圈牌, 一舖糊都未食過...

希望金雅生日過得開心啦~~

2008年3月16日星期日

2008年3月6日(四) -- 手法復位

呢排唔知點解, 條腰越黎越痛, 以前雖然係日日都痛, 但最多都係坐係度先痛, 訓係度就唔會痛. 但係而家, 唔單止坐係度都痛(當然比以前仲痛得勁佐添啦), 而家連訓係度都痛, 我諗我應該就黎死架啦, 而家連訓覺都會覺得痛, 我遲早有一日會頂唔順由屋企跳落街架啦...

之前有同學介紹佐個深水埗既中醫比我, 我睇佐一次, 佢叫我定期返去做一種叫「手法」既野, 不過要成二百蚊一次, 我諗橫掂我都係無得救架咯, 費事嘥D咁既無謂錢啦, 更何況我果陣時搵得雞碎咁多, 如果每個禮拜都去做一次, 一個月咪要成千蚊...? 都係痛死罷就啦~ (但我每個禮拜去做facial都要二百幾蚊一次啦, 呢D係咪叫愛靚唔愛命呢...?)

但最近實在越黎越痛, 痛到自己都頂唔順, 所以的起心肝做佐第一次手法, 個女仔話我條腰好硬, 好似鐵板咁, 做佐四十分鐘左右, 個女仔主要都係0係我背脊按下按下, 捽下捽下, 做完條腰似乎鬆佐D既, 不過痛開既位置都仲係痛緊囉~(咁做得一次都唔會即刻無晒事咁勁既...), 佢叫我得閒既話就keep住返去做下...

如果有時間既話, 我都會keep住做既...

莎樂美餐廳 -- 食扒

地址: 荃灣沙咀道294號地下
電話: 2492-5021

上個星期二同流沙包係荃灣食飯, 以前有朋友同我講呢間係荃灣區食扒既老字號, 於是今次就同流沙包黎試下.

我地叫佐兩個set, 我果個係雜果沙律+餐湯+帶子+雜扒+飲品+雪糕; 流沙包果個係沙律+餐湯+雞扒炸蝦+飲品+雪糕. 以每個set都唔過一舊水既價錢, 又湯又沙律又雪糕都算係咁啦. 我個雜扒都唔錯, D豬扒幾腍幾好味~

又煮飯仔~

上兩個星期一, 我無跟流沙包返奶奶屋企食飯. 說實在我唔係太鍾意返奶奶度食飯, 所以我寧願一個人自己返屋企自己煮飯食, 仲叫佐我阿媽上黎食飯添.

由於七點幾先買晒野返到屋企, 所以我都係煮D好簡單既餸, 包括椒鹽雞翼, 火腿炒蛋同埋菜炒豬肉.

今次呢餐飯我自己幾滿意, 碟菜炒得好好味~~

2008年3月9日星期日

2008年3月1日(六) 母校校慶晚宴

今日係我中學母校二十週年校慶聚餐, 其實我對母校都算幾有歸屬感, 話晒我都係呢間學校讀足七年, 呢間學校又係我小學選校時既第一志願, 同埋話晒都係屯門區數一數二既名校呀~ 所以當初知道學校搞廿週年聚餐, 我諗住會去架. 但其他同學似乎就無咩興趣咁, 問親既都話無諗過參加.

由於流沙包都係呢間學校畢業, 所以我就叫佢陪我一齊去勒.

去到講真有D失望, 因為真係一個同我同屆既同學都無黎, 我搵勻晒門口貼住既table list, 我都搵唔到一個同屆既同學名... 唔係掛? 佢地真係咁忙? 定係對學校一D感情都無呢??

去到見番D miss阿sir, 我無主動同佢地相認, 因為我並唔係一個特別出色/特別差既學生, 通常中中庸庸普普通通果D學生, 加上畢佐業都咁多年, D miss阿sir都唔慌會認得自己. 更加上自己都係無咩記性既人, 去到見到有D老師, 我記得佢以前係教過我, 但我已經唔記得佢姓咩, 又唔記得佢果陣教我咩野科, 所以都係... 算啦, 一個招呼都無主動打...

反而流沙包比我更早畢業, 但都仲有唔少miss阿sir認得佢, 當然啦, 佢果陣運動咁出色, 風頭又勁~

我去到只係同一個師兄相認, 果陣我中四, 佢中六, 通常搞學會搞四社活動既committees都係中四/中六既學生, 所以我中四果陣認識好多中六既師兄, 但可惜我比較熟悉既都無黎.

我主動同佢相認既呢位師兄, 其實都無人會唔認得佢, 因為佢當年好勁架, 讀書成績超勁, 曾當選十大傑出學生, 會考8A, A-level好似5A. 其實我當年曾經暗戀過佢架~ (而家人大佐回想番, 其實果陣唔算係暗戀, 只算係對一D好出色既人既一種傾慕吧?) 想當年我都同佢一齊係聖誕節上過山頂架~~

今次見番佢, 對佢當然已經無晒以前果種感覺啦, 而家反而覺得佢幾滄桑下~

開席後我同流沙包兩個好似搭枱咁, 坐係一圍唔知邊年畢業既師弟妹果枱, 佢地其他人全部都互相認識, 我同流沙包... 真係悶到死.

席間既表演節目包括有家教會既家長係度唱大戲, 唱「經典流行曲」, 學校中樂團表演吹笛, 其他既仲有變魔術, 唱英文歌等等, 真係悶無暈...

金田日本料理 -- 得個長字, 都唔新鮮既...

地址: 元朗教育路裕榮徑好旺洋樓13-14號
電話: 2449-4433

每次經過呢間舖頭, 都好多人係度等位, 所以咁耐以黎我地都未幫襯過. 上星期六下午本來諗住行出大馬路搵間酒樓飲茶, 經過金田見到無咩人等位, 於是就轉軚去食日本野.

我地叫佐三文魚, 鰻魚同吞拿魚壽司, 呢度既特色係特長. 長就係長勒, 但係我覺得唔夠新鮮囉...

另外仲有雜錦壽司(一件), 芒果炸蝦卷(三件), 同埋雞軟骨. 味道都係普普通通啦.

我覺得, 呢間試過就算, 應該有排都唔會再黎幫襯.

2008年3月6日星期四

2008年2月29日(五) -- 又返大陸

今日又同GM返大陸, 朝早先返佐深圳office同深圳既同事開會, 跟住就去佐飲茶. 飲完茶之後就去佐個客度開會.

個會開佐好耐, 兩點幾去到個客度, 傾到五點半先走. 我越黎越覺得accounting job真係一樣唔賺錢既野, 一大堆資料, 又要花時間去消化, 去理解, 去了解成間公司既運作, cash flow等等, 有時個monthly report要做幾日, 先賺得三兩千一個月; 反而做company secretary, 幫個客成立新公司/做deregistration, routine既程序, 不用花太多時間精神就賺成萬蚊一個job.

開完會同GM及深圳同事食埋dinner先返香港.