12月9日同幾個大學同學展開澳門之旅. 我地朝早坐九點船過澳門, 到埗後我地先到漁人碼頭行下, 個碼頭無咩特別, 我地行下影下相, 跟住就去佐九如坊葡國餐廳食飯, 感覺上係又貴又唔係特別好食...
之後我地去佐旅遊塔, 好艱難先去到, 因為塔巴士又唔知搭咩車同埋係邊度塔, 截的士又唔係咁易截. 我地用佐$80上旅遊塔, 行佐陣就走勒.
跟住我地就返酒店check-in, 我地唔好彩遇到阻滯, 酒店話無我地agency既訂房紀錄, 要我地碌住卡唔過數住, 聽日佢地同agency取得聯絡確認無問題後就唔會過數. 佢既語氣比我既感覺係呢個問題好似成日發生咁, 之前酒店剛開幕睇報紙都話D人去check-in時酒店話無record所以無房比人入住, 估唔到間酒店開佐幕咁耐都仲有呢個問題... 但最大問題係酒店已經無晒twin room, 得番double room, 頂!!
酒店係幾靚架, 金碧輝煌咁, 係lobby行去搭lift上房要經過賭場, 最開心係我入賭場果陣比人check身份證, 哈哈~ 酒店間房勁大, 個toilet都大過人, 有兩個洗手盆架, 有機會都想同流沙包入黎嘆下~
然後我地就出誠昌食飯, 個水蟹粥都OK既, 但最好食既我覺得係個鱔, 我係一個唔鍾意食魚, 亦唔會食鱔既人. 但我見食剩幾舊, 諗住即管試下啦, 點知出乎意料咁好味, 好爽脆同埋無腥味架, 勁好味, 我唔食鱔既都食佐兩舊.
之後我地就入返酒店影相勒~~
沒有留言:
發佈留言