地址: 屯門屯隆街1號錦華商場2樓206-208號舖
電話: 2430-9798
重陽節果日睇完戲行完街就去食飯, 講真我都唔知屯門有咩好食, 因為我認為屯門係無好野食的. 行過見到呢間Red Cafe, 諗住未試過就即管試下啦. 入到去先知原來又係椰林閣集團既!?? 頂呀! 如果一早知係椰林閣我就一定唔會入黎啦! 係我心目中, 椰林閣只係學生先會去食既cheap cheap餐廳, 同埋服務一向係差到離晒譜, 我以前幫襯椰林閣都唔知受過幾多氣. 而家我有錢食餐好既我仲要去幫襯椰林閣?!! 哼!!!
但既然比佢個名呃佐入佐餐廳就費事轉頭又走人, 死死地氣坐低叫佐個二人餐, 有個意粉同薄餅, 雖然話係薄餅, 但我覺得係薄脆囉, 佢個底只係一塊好薄既趣卜卜.
味道... OK啦. 不過只要佢係椰林閣既, 我就無咩野想講...
重陽節要一朝早起身拜山, 唔係自己屋企果邊喎, 係流沙包屋企果邊喎... 又話約十點, 十點半都未見有人...
拜完山飲完茶我地就係屯門睇色戒, 好平呀, 只係$35咋, 差唔多比出面平一半~~ 我認我係有少少比果三場情慾戲吸引去睇, 不過睇完覺得果三場情慾戲, 其實有無需要呢...? 佩服湯唯佢三點盡露~~
地址: 鯉魚門海傍道中58A
電話: 2727-4628
上星期四晚同D日本客去鯉魚門食飯, 呢度環境企理, 不過食物就唔掂. 我地叫佐個白灼蝦, 蒸魚, 椒鹽瀨尿蝦, 豉椒"司奄", 粉絲扇貝, 兩個菜.
第一道白灼蝦已經唔掂, 蝦又細隻, 顏色唔係光鮮既橙色, 而係有D暗粉紅色咁, 食落唔覺得新鮮囉, 我同事仲話食到一隻係霉既添喎.
個粉絲扇貝, 粉絲得少少, 粒帶子韌韌地既, 唔太好食.
條魚OK既, 我覺得最好食係條魚囉.
瀨尿蝦, 普普通通.
個"司奄"又係唔掂, 好韌呀, 同埋D汁都炒得唔好味.
我地五個人, 海鮮已經買佐九百幾蚊, 成餐飯埋單要千七蚊, 即平均每人要三百幾蚊, 痴線架~ 咁既價錢我去流浮山, 三聖果度食, 已經食到捧住個肚好滿足咁走啦~ 鯉魚門呢度? 唔係好飽, 兼且一D都唔滿足囉...
但鬼叫呢度專做遊客生意咩, 仲要比人知道你係日本人, 仲唔掠你咩~?
上星期二放工去佐尖沙咀做facial, 做完返屋企樓下百佳睇下有咩野食可以做今晚晚餐同聽日既lunch. 我成日去睇下有無D就黎過期特價食品, 今次買佐盒聽晚就過期既水餃, 原價十幾, 現特價$6, 一陣返屋企煮黎食.
跟住又買佐舊就過期既咖喱荷葉飯, 本來$9.9, 特價幾蚊, 要黎做聽日既lunch. 同埋買佐盒鹹魚雞粒叮叮飯, 原價十六個幾, 特價$8.5, 將會係我後日既lunch.
應該讚自己精打細算, 成日夜晚去百佳候果D快過期既特價食品, 抵好多; 定係話自己折墮, 成架購物車都係呢類特價貨, 搞到好似我攞綜援好窮咁...
上星期一晚係公司上完堂之後, 同GM同兩個同事去佐食飯. 食物質素OK, 不過份量少佐D, 尤其是個意粉, 兩三啖就食得完咁.
D野都唔平, 我地叫佐五樣野, 埋單平均每人百幾蚊, 好彩唔駛我地比啫~
不過唔係食得好飽喎...
地址: 中環威靈頓街32-40號
電話: 2522-1624
話說我以前係TDK做果陣, 多數都係跟馬來西亞既客. 話就話係客, 其實大家都係0係TDK做, 係馬來西亞TDK同香港TDK買貨, 所以我識得一D馬來西亞既TDK同事.
好多時佢地都話打算黎香港玩, 於是我間唔中都會介紹下D香港地方比佢地知. 其中有一個話佢10月要黎香港飲佢朋友結婚果餐, 於是我同佢就相約一齊食餐飯見下面, 佢話想去鏞記食飯, 咁啱鏞記就係我公司附近, 於是就約佐尋日同佢去食lunch.
我地一共四人, 叫佐四個小菜四碗白飯, 小菜包括半邊燒鵝, 蝦子豆腐, 炒芥蘭同一個唔知咩野鱔. 味道我覺得無咩特別, 同普通酒家既差唔多啫. 碗白飯唔多OK添, 落少佐水, 好硬呀.
是次消費每人約$130, 又唔係好好食, 服務又一般, 呢餐lunch真係勁貴囉... 我朋友請客, 多謝晒啊~~
食飯果陣大家傾下香港同馬來西亞既物價, 佢話香港D樓好貴, 係香港三百幾萬只係買到一間唔夠一千呎既單位; 我朋友話如果換轉係馬來西亞, 可以買house, 連花園有三千幾呎囉... 鬼咩, 香港地少人多, 同埋香港D樓邊係攞黎住架? 攞黎炒架咋麻, 炒到貴晒...
佢地果度既物價好低, 係香港一個普通sales exe都有萬五蚊左右人工, 係馬來西亞既人工原來只係香港既一半, 所以佢地黎到香港覺得咩野都好貴.
我送佐盒老婆餅同鮑魚面比佢, 佢就送佐豬肉乾比我~~
今朝早有人上黎做家居示範, 介紹一款可以吸走塵蟎既吸塵機, 同埋一部可以過濾唔記得幾多mm粒子既空氣淨化機.
詳情唔多講, 總之流沙包真係超豪, 兩部機買晒, 盛惠兩萬幾.
下午我地好健康咁去佐打壁球, 夜晚就落佐千之壽同阿媽一齊食飯.
