北海道牛奶布甸 (附食譜)

我喺網上面搵佐兩個食譜, 一個整出黎香濃D, 一個清新D.

材料(約4~5杯):
                      香濃      清新
1. 北海道牛奶 350ml / 500ml
2. 砂糖             40g     / 60g
3. 淡忌廉         150ml / 125ml
4. 魚膠片         6g       / 8g
5. 云呢嗱香油        少許

步驟:
1. 先將魚膠片用凍水浸軟
2. 將牛奶煮熱(煮熱便可, 不用煲滾)

3. 將砂糖倒入牛奶, 拌勻至完全溶化

4. 將魚膠片從凍水拎起, 並用熱水座溶成為魚膠液

5. 將部份熱牛奶倒入魚膠液, 輕輕拌勻後再倒回牛奶中

6. 熄火, 加入淡忌廉及云呢嗱香油, 拌勻

7. 倒入杯仔, 放入雪櫃, 完成

 

大約成本: 香濃 - $15.1共4杯(約$3.775/杯) 
                清新 - $18共5杯 (約3.6/杯)

好味好味!!

大澳一日遊 -- 為食篇

入到大澳, 梗係唔少得食食食啦, 以下為大家介紹部份美食.

老婆餅, 四眼酥
我見舖頭貼晒阿蘇黎幫襯過既相, 咪姑且買少少試吓囉, 都幾好食架, 幾蚊件, 價錢又唔貴.

炭燒瀨尿蝦 $10/10片
果度有好多檔炭燒海鮮架, 我就幫襯D多人排既攤檔, 我揀佐瀨尿蝦, 十蚊有十片, 幾甜喎, 好食!!

炭燒魷魚 $10/中size魷魚3片
因為瀨尿蝦幾好食, 食完無耐我又心思思想試埋魷魚, 於是又再去買, 不過魷魚麻麻地好食, 都係瀨尿蝦正D!!

車站豆腐花
果度都有好多檔賣豆腐花, 點解揀呢檔? 因為當我地行過果陣, 有個行經既婆婆同某路人甲講:"呢間豆腐花係最好食架啦", 咁我地咪揀佐呢間囉... 都幾好食架~~

炭燒雞蛋仔 $8
呢檔野勁多人排隊, 我之前上網睇人介紹, 都諗住一定要試呢個架啦, 不過初初唔知佢係邊度擺檔, 行到四點幾先見到呢檔雞蛋仔, 即刻撲埋去排隊. 點知排排吓阿伯大叫剩番八底左右, 幾驚買唔到呀!!
後尾差唔多排到我, 阿伯話我係最後一個, 叫後面果D唔駛再排啦! 嘩, 果刻直頭好似中佐六合彩咁開心呀!!! (後來排我後面個女仔, 係咁問阿伯仲有無少少漿可以整埋佢, 於是阿伯就連大桶裏面少少既漿都滴埋出黎, 勉強整多一底)
我大約排佐約半個鐘先買到.

紫貝天葵 $9
我見周圍都賣呢隻紫紫地紅紅地色既飲品(即係上圖我手上拎緊果支), 咪買支黎試吓囉, 酸酸甜甜咁, 都幾好飲吖!


下面呢幾樣我無買黎試, 只係影佐相就算.

燒海鮮
我見有鮑魚仔, 帶子, 都幾多人排隊架, 鮑魚仔好似廿蚊隻, 不過我地就無興趣試囉.

麥芽糖夾餅
好似$3一份, 不過提唔起興趣試.

焗豬扒飯 (附食譜)

今次自製焗豬扒飯, 雖然只係跟住食譜第一次整, 但係非常成功, 有大快樂焗豬既水準, 哈哈哈~~

食譜我係參考Miss Jubie's Blog整既, 整豬扒飯原來都幾多steps, 但係難度唔高.

材料:
豬扒 2件
洋葱(切絲) 半個
番茄(切件) 1個
蒜蓉 2湯匙
冷飯 2碗
雞蛋 2隻
芝士 適量

茨汁:
清雞湯 4湯匙
砂糖 2茶匙
鹽 1茶匙
麵粉 4茶匙
茄汁 適量(chok兩, 三下左右)
喼汁 少少

步驟:
豬扒去骨, 拍鬆(唔駛剁), 用生抽, 老抽, 糖, 胡椒粉醃
醃約30分鐘後再加生粉醃
雞蛋打散, 熱鑊落油, 先落三分一蛋漿, 用鑊鏟打圈兜幾下, 呈半熟狀態便加入冷飯兜勻, 加少少鹽調味略炒, 再落三分一蛋漿兜勻冷飯至乾身, 熄火後再落餘下三分一蛋漿兜勻至冷飯乾身及沾滿蛋漿為止. 炒飯鋪上焗碟備用

鑊熱落油, 將豬扒兩面煎熟, 再切細件將豬扒鋪於炒飯上

鑊熱落油, 下蒜蓉炒香, 再加入洋葱+番茄炒勻
倒入茨汁, 蓋蓋煮滾. 完成後將茨汁鋪於豬扒上, 再灑上芝士碎

入爐180度焗約30分鐘, 完成

 

 

 

大澳一日遊

十月一日國慶, 同流沙包入佐大澳行吓.

我地呢D元朗人, 入大澳梗係喺屯門搭船啦. 前一晚check到10:30am有船, 我地10:25am去到碼頭, 班船已經full佐啦喎. 雖然船公司有開加班船, 但連10:40am果班加班船都full埋, 唯有買下一班船, 即係12:30pm.

 

原來架船只得七, 八十個座位架咋, 唔怪之得咁快full晒啦. 奉勸各位想假日由屯門入大澳既朋友, 記得早D黎買定船飛呀.

睇吓架船幾細...:

買佐船飛, 我地見仲有兩個鐘, 咪食個早餐先囉~ 我地係海翠商場既KFC食早餐, 果度有海景位架, 好正!! 食完早餐我地行吓海傍同埋蝴蝶灣公園, 12:20pm返到碼頭預備上船.

唔駛講12:30pm既船亦都一早full晒, 連12:40pm既加班船都full埋, 下一班船要等到15:00pm先有.

呢架船會由屯門出發, 途中會停東涌, 沙螺灣, 最後一站先係大澳, 船程大約一個鐘.

入到大澳主要都係睇吓棚屋呀, 周圍食吓野呀, 睇吓人曬鹹魚呀, 睇吓貓呀, 最多睇埋日落咁囉~~ 都幾好玩既~~
 

 

 

 

 

 

 

 

 

 

 

 

 

 

 

大澳果然係假日熱門好去處, 流沙包係大澳大半日, 總共撞到四個friends呀.

焗蝦

有D蝦係雪櫃, 再唔食埋佢就變壞, 於是求其放入焗爐就咁焗.

我係D蝦上面灑佐D鹽, 然後入爐180度焗16分鐘左右.

焗野真係好鬼方便呀, 唔駛開鑊煮, 唔駛洗鑊, 又唔怕多油煙, 正!!

 

學生時代做過既無聊野

自從唔駛返工之後, 而家通常一落街就會見到D學生(因為我屋企樓下對面就係小學同中學), 間中會諗番以前讀書時做過既無聊野, 唔知大家有無試過呢?

(下面有D野我無做過, 但係見其他同學做過)

1. 係書後面攝住D係雜誌撕落黎既偶像相, 又或者攝歌詞(果個年代電腦未普及, D歌詞仲係自己手抄既).
2. 專寫情信比班裏面果D唔起眼, 呆呆笨笨, 無咩朋友, 電車型既同學整古佢地. (但收到呢類信既電車男好多時又信以為真喎, 奇怪...)
3. 坐先生位前面既同學會將紅色同藍色筆既筆芯調轉. (大家明點解架呵?)
4. 當有大班人圍埋一齊傾計既時候, 總有人會提出輪流講自己暗戀緊既對象.
5. 總會有D男女成為鬥氣冤家, 成日互相用書拍打對方, 扯辮, 鬧交, 追追逐逐咁... 表面上佢地係仇人, 但佢地又好似好enjoy咁架喎.
6. 畫龜貼係人地背脊.
7. 小學時放學後專登幾個同學匿埋係toilet, 趁D街隊走晒後 自己行番屋企.
8. 無無聊聊鍾意轉書, 轉毛巾etc., 懶係型咁.
9. 愚人節時將黑板D粉筆收起晒, 換做擦膠筆專用果D白色擦膠條.
10. 係堂上面傳紙仔

而家D學生, 酷熱天氣三十幾度下都仲要著住件長袖冷衫係街行, 我真係頂佢地唔順, 睇見都覺得熱. 痴痴地... 我都做過女學生, 以前條校裙都係全白色, 其實著晒底裙基本上已經唔怕會薄透走光架啦; 如果你話著冷衫係要黎遮身材, 嘥氣啦, 你放假果陣都係背心短褲咁出街架啦, 又唔見你放假都著住件長袖衫出街?