補祝結婚4週年紀念 part 2 - 聘珍樓食飯 (更新)

5月1日更新:

唉, 我話去聘珍樓食免費週年飯, 有人就覺得我地好似唔駛錢就叫到一枱都係食物, 好似好貪心咁.

我想澄清, 話說聘珍樓喺你擺完酒找數果陣, 會送一份禮物比對新人, 呢份禮物並唔似其他酒樓咁, 送埋D咩碗碟果D既垃圾, 聘珍樓送既係五年既週年紀念餐, 即係你呢五年裏面, 每年既結婚週年紀念日, 你都可以去聘珍樓免費食一餐, budget係兩人夾埋一千大元, 如果埋單over咗一千蚊, 比番個差額就得.

如果真係唔駛錢任叫的話, 我地就狂叫鮑參翅肚啦! 但我地唔想咁奢侈, 所以就叫番D普通野, 咪叫到成枱都係囉. 但我地無嘥野架喎, D野食唔晒我地會打包拎走架喎, 我地預咗黎緊果兩日可以唔駛叫外賣, 食埋D打包野就得.  

喺呢度一次過解釋完, 我就唔逐個留言回覆啦. 你地覺得我貪心又好核突又好, 是但你地啦~
-----------------------------------------------------------------

行完鐵路博物館, 我地就落觀塘APM睇海猿, 好鬼憎睇3D戲囉, 完全唔明點解呢套戲都要3D, 我真係唔覺得有咩3D效果囉…

然後我地就去觀塘聘珍樓食結婚週年飯.

雖然我地呢餐週年飯係免費啫, 但都唔駛用D咁既服務態度黎對我地架.

首先唔比個靚靚full set餐牌我地.

然後幫我地落單個阿姐好似新黎咁, 落單竟然可以落漏兩樣野.

跟住個阿姐又無啦啦走埋黎同我地講我地order個菜膽湯好似無喎, 話好似無燉湯, 話燉湯係冬天先有… 喂呀! 咩野叫"好似"啫?! 你自己問清楚先黎同我地講呀, 後尾佢同事見到佢咁, 走埋黎睇吓我地做乜事, 先幫我地落到單囉.

我地兩個人最後order咗六樣餸兩個湯, 當然食唔晒啦. 最後打包五盒野拎走.

補祝結婚4週年紀念 part 1 - 鐵路博物館

4月9日, 我地補祝結婚4週年.

朝早先去咗大埔墟既鐵路博物館行吓, 呢個博物館係免費入場, 地方雖然唔係好大, 但我地都行咗兩個鐘.

果度有幾架退咗役既火車, 我地喺火車上面影咗好多相.

中大人飯聚@北角東寶小館

4月8日, 約咗班中大同學仔係北角渣華道既東寶食飯.

上到去, 發覺環境已經好嘈, 唔係一個傾計食飯既好地方, 因為好難先聽到對方講既野.

我地叫咗炸豬手, 黃金蝦, 避風塘炒蟹, 墨魚汁麵, 風沙雞, 蟹粥, 另外同學仔仲買咗個蛋糕.

豬手, 都OK好味:

黃金蝦, 好貴, 但整得唔多好食囉:

炒蟹, 我食咗少少, 無咩特別:

墨魚汁麵, 難食:

風沙雞:

我地仲叫咗個蟹粥, 完全唔掂囉, D粥完全食唔到有蟹味...

我地食食吓飯, 果度無啦啦播勁歌, 本來個場已經嘈架啦, 播埋歌之後搞到個場好似disco咁. 最搞笑係一個類似老細既物體會扮MJ跳舞, 果度又有唔少外國人幫襯喎, D食客見到有人無啦啦係度跳MJ, 又high埋一份, 其實氣氛真係唔錯既, 不過我真係唔鍾意太嘈既地方, 完全傾唔到計.

最搞笑係老細物體突然間喺每圍枱捉D人去啤酒凍櫃果度派啤酒, 可惜我地飲飽食醉, 飲唔落啦, 最後都係還番D啤酒比佢地.

送既涼粉:

今晚最好食既, 係同學仔買黎既蛋糕:

蜜糖蛋糕(附食譜)

雖然我而家辭咗專業C9呢份工, 但我都仍然有keep住整吓蛋糕架~

食譜參考: 2010年11月4日出版既頭條日報既《COOK食譜BOOK》

材料:
1. 雞蛋 2隻 $2
2. 白糖 60g (我只用了50g) $0.525
3. 蜜糖 50g
4. 低筋麵粉 110g $1.54
5. 泡打粉 2/3茶匙
6. 無鹽溶牛油 80g (我只用了60g) $4.5

步驟:
1. 用電動打蛋器以高速打起雞蛋

2. 分3次加入白糖, 打至企身
3. 加入蜜糖, 手動拌勻
4. 低筋麵粉+泡打粉篩勻, 加入蛋漿中, 以膠刮拌勻

5. 加入溶牛油, 以膠刮混合
6. 將麵糊倒入模具, 入爐170度焗20分鐘

大約成本: $12 (約$1.5/個)

事後檢討:
1. 個味道麻麻, 因為個蜜糖味唔得, 下次試下用第二隻蜜糖.