今年新年無去旅行, 焗住要去拜年.
未結婚之前, 去親拜年D人都問你幾時結婚;
好勒, 到結咗婚勒, D人就問你幾時生BB.
我最憎就係人地問我幾時生, 老實講, 每次我同流沙包講親呢個話題, 我都係唔出聲扮傻, 如果佢再講我就會黑面.
我真係好鬼討厭細路呀, 我要自由自在, 我唔要生呀! (我唔要生既理由可參考呢度)
結婚前我已經同流沙包講到明, 我係唔會生架, 如果你鍾意生小朋友的話, 你諗清楚, 唔好同我結婚.
流沙包成日覺得一個女人到咗某個年齡, 想法會有改變, 所以時不時就試探吓我. 但我唔鍾意小朋友唔想生呢個諗法, 從來都無變過囉. 所以每當流沙包問親我呢個問題, 氣氛都會變得有D不愉快.
所以每當D親戚問我幾時生, 我都唯有繼續扮傻(如果我直接答話無打算生, 佢地應該會長篇大論咁發表自己意見).
另外平時見流沙包D長輩朋友, 例牌都會問我地結婚幾耐, 然後就問幾時生小朋友. 如果佢地feel到我其實係唔多想生, 佢地就會發表意見, 例如生就要趁後生啦, 過多幾年想生都無得生啦 etc...
好煩呀, 我生唔生關你地咩野事啫? 生唔生都係我地自己既選擇吓咶? 我到而家都比唔到一個好好既理由自己, 生出黎到底為咩啫?
仲有呀, 我極度討厭人地祝我"年生貴子", 我下年唔想再聽到!
2011年2月21日星期一
我生唔生關你地咩事呢...?
訂閱：
發佈留言 (Atom)
13 則留言:
我仲衰到有個熟朋友（係職業女強人）勸我生，我反駁：要生妳大把條件，妳係差在無好男人je..妳最好要仔唔要公！比我咁講條八婆即收聲！ 又係果句，人地生唔生關妳叉事，洗乜妳提點呀？！顧點妳自己先啦！天下啲無聊人多的是！
[版主回覆02/24/2011 12:50:00]咪係囉, 唔生咪唔生囉, 成日問長問短咁.
雖然我係屬於「想生」既，但係都好怕人地問
「瘡」都唔係話生就生啦…更何況係「人」
好似前d人問追問婚期咁，我會答佢：聽日啦
[版主回覆02/24/2011 13:04:00]哈哈, 你既答案幾好喎.
如果D人問我幾時生, 我可以答"今晚囉"
好開心有人同我有一樣睇法, 點解女人一定要生仔喎!!
我初初結婚D人又係成日問幾時生呀?? 當您話唔生佢哋就會發表偉論, 然後就會覺得你係怪人, 不過, 我唔理之後, 佢哋亦唔會再提架啦!! 因為時間係最好嘅良藥, 佢哋見到我哋兩公婆一年去幾次旅行, 自由自在, 而佢哋就邊到都無得去, 就只有羨慕, 哈哈!!
同埋我都唔明生嚟仲乜呢??
[版主回覆02/24/2011 13:04:00]YEAH!! 我都覺得無野"陀手LUNG腳"咪幾好, 仲咩要生出黎阻住自己喎.
我而家自己搵錢自己駛, 鍾意去邊就去邊, 做乜就做乜, 不知幾好.
支持你！點解結左婚就一定要生仔, 宜家自由自在咪仲開心！ ^^
[版主回覆02/24/2011 13:04:00]係呀, 我都鍾意自由自在, 見身邊D FD生咗件之後無晒自己生活咁, 我只係諗吓咋都打冷震呀.
當經歷左一d事情, 令我有d改變. 眼見同事仔仔患腦cancer, 表妹遇到幾多百萬份之一的基因免疫能力問題,看見醫院裡患血病的小朋友吊血, 未夠2歲有血cancer 的bb...... 令我覺得小朋友有事大人都好辛苦. 我表妹bb成長時健健康康, 為什么養到16歲有病變 ? 一句養兒100歲長憂99, 真冇錯. 我媽都唔再催我生, 只好同佢講句今時唔同往日. 我要好好enjoy 我下半生 ! (好喜歡逆按揭個idea, 我老左都有保障)
[版主回覆02/28/2011 12:48:00]無錯呀, 今時唔同往日. 我自己都做緊D退休保障. (更何況我唔覺得自己會有咁長命 )
同意呀!!! 我本身幾鍾意小朋友, 起初都諗住會生, 但一諗到第時要幫啲仔女溫書, 又要勞氣, 起碼冇20年自由, 一諗到呢到就咩念頭都打消晒.
[版主回覆03/05/2011 17:33:00]係呀, 我見d同事, 放假唔係用黎去旅行, 係喺仔女考試前放假黎同佢地溫習, 我淨係諗吓都覺得怕怕.
冇睇你blog一段時間,原來你已經搵到新既工作呀...亦已結束了你優長假期喇..好好...真替你開心呀...
[版主回覆03/15/2011 22:52:00]但返工返得唔多開心呀...
吓~~點解呀??? 工作量多?? 還是同事間相處??? 還是上司????
[版主回覆03/26/2011 21:03:00]工作量多囉, 忙到無時間食飯呀
係呀，如果單嘢換著係妳，妳會點呀？
[版主回覆03/26/2011 21:03:00]當場發難, 哈哈~
我本身鍾意小朋友, 細個時係會想生小朋友架, 但越大越唔會想生囉, 最多都係玩朋友啲細路, 玩喊咗就鬆人~ 同你一樣, 邊有咁多錢同能力養呀? 有錢交租, 一年一次旅行已經好好啦! 學我阿媽話齋, 呢個世界咁亂咁污染, 生個細路出唻咪盞令佢地將來受苦! 佢成日都話, 唔生我同哥哥, 佢去咗讀時裝設計囉, 使乜日做兩三份工吖, 又要擔心我呢個藥煲視網膜退化隨時會盲, 又要激氣阿哥成日離家出走, 又要驚我俾人呃, (成日俾人呃...), 又要擔心我嫁唔去... 睇見我日日做到咁夜, 佢心都痛埋, 生多個細路, 咪攞我命? 而且我又"林之之", 實俾啲細路蛤死...
依家爸爸媽咪都冇要我快啲搵人嫁, 連我女麻女麻呀啲親戚都要我唔好為嫁而嫁, 嫁咗都唔好生~ 睇見依家啲細路要乜有乜, 唔俾就嗌生嗌死, 打又話虐兒, 鬧又話失自尊, 點教呀? 獨留兒童在家又話要拉... 唉, 咩世界? 不如得閒同朋友食飯睇戲去旅行, 响屋企睇下書好過.
[版主回覆03/26/2011 21:02:00]乜你仲睇得灰過我... 其實嫁唔嫁/生唔生都好, 最緊要係自己生活得開心啫~
其實生一個好d,因為小孩會帶給你許多歡樂.相信有天你會改變想法.
[版主回覆04/22/2011 20:35:00]唔會喇, 我不知幾討厭細路.
生唔生,本來係很私人ge事,不過我有個至親,因為某d原因,唔可以生,本來遇到d唔熟性ge長輩問到佢地幾時生ge時候,好應該幫手解圍至o岩,但係佢老公講嘢不嬲刻薄,所以我都係蹺埋手睇戲多
[版主回覆05/01/2011 15:12:00]我就求其帶佢遊花園, 敷衍吓就算.
係呀係呀......99 成日話無小朋友唔似一個家庭, 我心諗, 咩叫似 or 唔似? 生左出黎我就要負責, 既然我唔想, 做咩逼我即...
我次次都講明唔會, 所以唔好成日望住我個肚呀!!
[版主回覆06/04/2011 08:42:00]好彩我奶奶一直都無直接開口問過我幾時生.
我都好憎人地話有小朋友先似番個家庭, 都唔知咩理論黎.
發佈留言