終於有新傢俬送黎

如果大家有睇開我個blog, 都知我而家做緊既係一間新set up既公司.

上星期, 終於有正式傢俬送黎啦~~

典型日本公司格局, 最討厭係無partition囉, 前面整塊咁矮既藍色板, 低低能能咁, 都唔知想點...

呢間係大老細房:

conference room:

我生唔生關你地咩事呢...?

今年新年無去旅行, 焗住要去拜年.

未結婚之前, 去親拜年D人都問你幾時結婚;

好勒, 到結咗婚勒, D人就問你幾時生BB.

我最憎就係人地問我幾時生, 老實講, 每次我同流沙包講親呢個話題, 我都係唔出聲扮傻, 如果佢再講我就會黑面.

我真係好鬼討厭細路呀, 我要自由自在, 我唔要生呀! (我唔要生既理由可參考呢度) 

結婚前我已經同流沙包講到明, 我係唔會生架, 如果你鍾意生小朋友的話, 你諗清楚, 唔好同我結婚.

流沙包成日覺得一個女人到咗某個年齡, 想法會有改變, 所以時不時就試探吓我. 但我唔鍾意小朋友唔想生呢個諗法, 從來都無變過囉. 所以每當流沙包問親我呢個問題, 氣氛都會變得有D不愉快.

所以每當D親戚問我幾時生, 我都唯有繼續扮傻(如果我直接答話無打算生, 佢地應該會長篇大論咁發表自己意見).

另外平時見流沙包D長輩朋友, 例牌都會問我地結婚幾耐, 然後就問幾時生小朋友. 如果佢地feel到我其實係唔多想生, 佢地就會發表意見, 例如生就要趁後生啦, 過多幾年想生都無得生啦 etc...

好煩呀, 我生唔生關你地咩野事啫? 生唔生都係我地自己既選擇吓咶? 我到而家都比唔到一個好好既理由自己, 生出黎到底為咩啫?  

仲有呀, 我極度討厭人地祝我"年生貴子", 我下年唔想再聽到!

農曆新年假期之: 煲碟

農曆年假期, 我同流沙包年年都會去旅行, 因為喺香港過年實在係超級悶兼無聊.

但今年我返新工, 初初唔知公司有額外假期, 所以就打消咗去旅行既計劃.

過年果幾日, 一次過煲晒好多買咗但未完全未開黎睇過既碟.

真的戀愛了 (Love Actually) -- 唔好笑我, 有好多好戲我真係未曾睇過, 因為以前D BF係D唔鍾意睇戲既人; 我想睇既戲 其他fd又未必有興趣; 雖然係可以自己一條友去睇戲, 但人越大越唔鍾意一個人自己睇戲, 所以好多出名既戲我都無睇過架... 呢隻碟我買咗好幾年, 一直放係櫃度拆都未拆, 今年終於趁過年開黎睇.

8美千嬌 (8 femmes): 當初買呢隻碟既原因, 係因為睇過影評讚. 法國片, 風格真係唔係幾慣, 同埋做做吓D人會失驚無神唱歌以表達當時既感受同心情... 內容大致上係講8個女人+一個男人喺一間大屋裏面, 男人被殺, 但當時大風雪, 所以無辦法與外界聯絡, 大家就係度估呢8個女人入面, 邊個係殺人兇手. 懸疑片, 但劇情我係完全估中晒囉...   

愛在遙遠的附近 (The Painted Veil): 買呢隻碟既原因只得一個, 係因為Edward Norton(如果你唔知佢係邊個, 請自行上網搜索), 我係因為Primal Fear呢套電影開始愛上佢, 佢既演技真係好出色.
至於The Painted Veil呢套戲... 唔好意思, 真係好鬼悶. 順帶一提, 呢套電影有黃秋生做. 

咁快有人搵我跳槽??

話說我1月中果陣去in過T字頭agent介紹比我既工, 不過我覺得地點太遠, in完就同agent講份工唔多啱我.

之後我返咗而家呢份新工(係A字頭agent幫我搵的), 返工無耐, T字頭agent打黎問我搵到工未, 問我記唔記得之前in過果份工, 但我答佢我已經搵到工啦.

上星期, T字頭agent再打黎, 問我份新工做成點, 然後仍然都係問我記唔記得之前in果份工, 佢話間公司對我有興趣, 雖然知我搵到工, 但都叫agent打個電話比我問一問, 如果我有意思既話, 想我再上去佢公司大家再見一見面.

如果我未搵到工, 都可能考慮吓(但地點真係太遠); 但而家我都搵到工, 對方又無話offer多幾多, 我當然就唔考慮囉...

更何況就算對方肯比高D人工, 我都未必會離開而家呢間新公司. 因為暫時黎講, 呢間公司比到我想要既野, 包括地點理想(我要返商業區, 唔要返工廈區), 公司又算大(我接受唔到連pantry都無既細公司, 因為pantry對我黎講係抖氣兼暫時放鬆既地方),有OT allowance, 有double pay有bonus, 多annual leave, 又有公司假期, 公司D日本人暫時又無咩騎呢怪, 公司又有實力, 而且我相信喺呢間公司可以學到野, 因為呢間公司將會成為成個group既head office.

我而家只係希望可以平平安安過渡probation, 其他野唔諗住囉. 

舞台劇: 二人餐

2月10日, 去咗睇二人餐首場, 一個字: 正!

如果未買飛既朋友, 而家應該仲趕得切買, 因為我地睇頭場, 見到仲有好多吉位未賣出去.

另外彭秀慧既29+1又重演啦, 今次仲會去到演藝學院歌劇院添, 未睇既朋友唔好錯過喇~

第一次去愉景灣

2010年2月8日(二)

年初六, 我同流沙包既最後一日農曆年假期, 去咗愉景灣行吓.

我地喺中環搭船過去, 經過IFC果陣, 見到商場D舖頭掛住一棵棵菜係門口, 而舞獅團就係商場轉黎轉去.

間間名店門口掛住一紮紮菜等採青, 好搞笑:

口痕買咗杯FROYO食 $38:

由中環坐船過愉景灣, 船程半小時, 但要成$31, 好鬼貴...

黎到愉景灣, 其實都無咩好做, 我地只係周圍行吓, 影吓相咁.

有感而發

我同流沙包兩個人既收入唔算好多, 叫做比上不足, 比下有餘. 但如果同流沙包既細佬妹比較, 我地兩個人要算係低收入人士.

流沙包屋企人咁本事, 本來係一件值得開心既事, 起碼唔會發生果D屋企人唔生性 成日要做阿哥既擔心/接濟之類既事發生.

不過從另一面睇, 亦都成為我既壓力.

好似某日咁, 流沙包妹同佢阿媽鬧交, 佢細妹鬧鬧吓突然間燒埋我地果疊, 佢問我奶奶"阿哥(指流沙包)過年比幾多錢你吖! 你講吖!!"

我知, 你比咗幾千銀奶奶過年; 我同流沙包只係比咗少少錢, 唔及你咁多...

但問題係, 流沙包妹同妹夫既收入, 係我同流沙包既2~3倍. 如果我地好似你地咁搵十萬八萬一個月, 你估我地唔想比多D錢屋企人嗎?

最慘既係, 流沙包屋企人成日有意無意咁話流沙包孤寒, 比家用係最少果個etc. 雖然我知有D說話佢地係講笑咁講, 但我聽落真係唔係太舒服...

流沙包雖然係長子, 但其實佢同佢細佬妹既年紀只係差一, 兩年, 事業上既發展唔會比佢細佬妹更優越; 加上流沙包只係一個教書佬, 月薪有幾多 佢地細佬妹都心中有數; 而佢細佬同佢妹夫做sales, 仲係大公司既高層, 我同流沙包兩個人夾埋搵既錢都唔及佢地一個人既收入. 佢妹夫加人工加五千蚊果陣; 我喺舊公司只係加得五舊水人工... 我真係唔明點解佢屋企人成日會搵我地黎同佢地比, 會成日話流沙包比得果少少家用、話流沙包唔肯買張三千幾蚊既床仔比外甥係孤寒、話流沙包喺X'mas party又買生蠔又買刺身係轉性... 就算呢D說話只係講笑咁講, 我聽到真係好唔開心. 我真係想講"我同流沙包唔及你地搵咁多錢, 我地有時真係無能力付出咁多"

有時大家睇我個blog或者FB, 好似見我地成日食好野, 去旅行咁. 但我地返工, 讀書, 進修咁辛苦, 有時只係想間中食好少少, 去旅行relax吓啫... 唔通我要死慳死抵儲錢交學費 喺屋企捱公仔麵果D相都擺埋上網比大家睇咩... 講真吖, 佢細妹/佢細佬女友揹緊既手袋, 以我成個月既人工可能都未必買到. 而我亦都未做到好似佢屋企人咁可以閒閒地幾萬蚊買個手袋/買隻錶...

元朗美食巡禮 -- 老廣靚湯

元朗其實有好多好野食, 黎緊想為大家介紹幾間元朗食肆~

老廣靚湯
地址: 元朗西裕街金輝徑金輝大廈11號舖
電話: 2433 0389
墨魚燒賣推介: 5粒星(5粒星為滿分)
http://www.openrice.com/restaurant/sr2.htm?shopid=32450

呢個舖位喺呢幾年黎不斷轉手, 黎到老廣靚湯, 終於都站得住陣腳啦. 佢主力做燉湯, 另外亦有鐵鍋飯食.

我墨魚燒賣食野咁奄尖, 加上元朗咁多好餐廳, 就算一間餐廳幾咁好食, 我都好少短時間內重覆幫襯. 但唯獨呢間老廣靚湯, 可以吸引到我成日幫襯.

佢賣既燉湯絕對係真材實料, 無加味精, 價錢又唔貴. 而佢果度賣既鐵鍋飯亦都好好食架~

有一次同老闆傾開, 佢話佢以前喺公仔點心做食品加工既研究(希望我無記錯啦). 佢自己都話舖頭太細 爐頭唔夠, 所以都應付唔到太多客人, 佢話都希望可以另覓一間大D既舖位. 不過我覺得佢喺而家呢個位都唔錯吖, 因為正記大排檔就喺正佢對面, 唔少喺正記食飯既人, 都會過黎老廣order燉湯, 而老廣就會拎煲湯過去大排檔.

大家黎幫襯的話, 就要有少少耐性啦, 一來佢舖位太細, 就算係舖頭出面加摺枱, 都成日爆滿; 二來佢D飯係即叫即整, 所以要等耐少少先有得食. 但以佢既食物質素, 等耐少少都無所謂啦~ 你見openrice到現時為止都係有讚無彈就知啦~

無聊相一堆

2月9日, 新年後第一日返工, 開工大吉~

前排影咗好多無聊相, 借呢個blog一次過擺晒出黎先.

1月份某日出文化中心睇《笑之大學》舞台劇, 睇show前去咗紅螞蟻食飯:

與《笑之大學》兩位主角合照:

過年前食既團年飯, 墨魚媽整咗D鮑魚, 好味道:

奶奶整既生日紅雞蛋:

某日落街食飯, 見到D雲好得意, 影低咗:

情人節將至, 公司樓下整咗好多朱古力形狀既擺設:

我地亦都有朱古力食:

去邊度食lunch好呀?

之前講過, 我公司基本上乜都無, 當然連微波爐都未有(亦唔知將來會唔會有...), 所以我根本無得帶飯返公司食, 而家返工每一日都係同我partner出街食飯.

我呢D帶開飯返公司食既人, 而家要我日日出街食, 我真係好唔慣囉... 嗱, 出街食好貴架麻, 仲要係海港城果頭, 食碗cheap cheap粉麵要成三十蚊, 普通既set lunch要四, 五十蚊, 好少少既餐廳更加要七, 八十蚊一個lunch...

同埋出街食飯好唔健康架麻, 多油多味精又肥膩, 日日食一定勁肥囉...

加上我係果D盡量唔想食剩野既人, 所以通常都會食晒成碟飯/麵, 但咁樣真係好肥仔吓囉...

大家知唔知海港城附近有無D又平又抵食既餐廳可以介紹吓呀??

以下係我其中幾餐既lunch.

日式定食 $8x, 味道我覺得一般, 八十幾蚊唔多抵:

lunch at Rice Paper $8x, 呢個我覺得勁好食呀!:

蕃茄烏冬 $44, 一般啦...: