2012年西歐六國十天之旅 -- Day 6 (part 1: 鐵力士峰)

我地尋晚住既酒店, 係我住過既歐洲酒店中最最最差既一間, 嗱渣殘舊不知所謂!:

繼前日壞車之後, 今日架車又有問題(因為都係果架車, 都無換過), 喺前往鐵力士峰既途中, 無啦啦成個車箱一陣機油味, 嗱嗱臨叫司機落車檢查吓啦, 勉強繼續上路, 司機打算將我地送到目的地後, 佢就會揸架車去check check, 誰知好戲在後頭囉...

喺司機檢查期間, 我地唔知又要等幾耐, 所以落車抖吓氣, 順便影吓相:

繼續上路, 喺差唔多去到鐵力士峰既登山纜車站既時候, 坐後排既團友突然大叫"車尾冒煙呀!!", 嚇得我地即刻全部人落車, 全團人唯有行路過去纜車站, 好在距離只係一千米左右, 唔係行咗好耐. 如果你話好似前日咁半途跪低咗, 又唔知要等幾耐先有另一架車接我地...  

見唔見到架車出緊煙??:

好在沿途風景都唔錯, 大家一路行一路都影吓相:

終於黎到纜車站, 我地先搭纜車上去:

然後再轉搭"世界首創旋轉360度吊車", 鬼死咁多人, 喺吊車裏面你自己想轉個身都難囉... 好彩只係搭八分鐘左右.

我好想講, 鐵力士峰真係無咩特別, 上山既風景又唔靚, 幾年前我跟勝景遊係去少女峰, 沿途風光明媚, 上山搭既交通工具又舒服好多, 如果有得揀, 我會推介大家去少女峰囉... 以下條link係我幾年前去少女峰既blog, 大家可以睇睇.

http://blog.yahoo.com/chloechingching/articles/52722/category/%E8%A5%BF%E6%AD%90%E5%8D%81%E5%9C%8B%E5%8D%81%E4%B8%89%E5%A4%A9%E4%B9%8B%E6%97%85+%282009%E5%B9%B4%29


上到山, 我地先去餐廳食lunch, 今餐好好食, 我估計餐廳個廚應該係香港人/廣東人, 因為無論食物同口味都好啱我地.

食完飯就係自由活動時間, 大家可以出去雪山走走, 或者去冰洞行吓.

呢個冰洞, 好似話係幾百萬年前已經形式, 所以洞裏面既空氣都唔同D喎...

 
之後落番山腳, 等另一架車黎接我地.