聽就聽人講果D平價大陸團好抵玩, 今次終於有機會去試吓.
本來我地join咗大航假期去東部華僑城, 出發日期係8月4~5日, 我地報團果陣明明都問清楚係成團先報名架嘛!!!
點知佢8月2日傍晚先打黎話唔成團, 有無搞錯呀?? 而家一係就改團, 一係就退錢.
由於我唔想參加果D去水上樂園既團, 又唔想去長隆, 所以我就選擇咗退錢.
但係難得流沙包放假陪我去旅行, 如果唔報呢D大陸團, 我地兩個人又唔知去邊好(當時已經係星期五, 都無時間再PLAN/再諗去邊), 於是我就去番大航假期, 求其揀咗一團唔駛玩水既, 團費每人$429.
我地星期六朝早八點喺福田口岸集合, 成個團有四十幾人, 我地喺福田口岸上咗旅遊巴之後, 再要去深圳灣接埋其他團友, 先正式出發.
呢個團主要係去中山同台山, 車程都唔短, 所以間中都要去D中途站比團友去吓TOILET, 但係大陸D TOILET真係... 好得人驚...
睇吓排TOILET條人龍長到...:
我地第一站去食lunch, 今餐名為"開心18秒金獎脆鯇宴", 餐廳叫美味園.
今餐主要係食脆肉鯇, 佢有唔同既整法, 有椒鹽啦, 炆啦, 蒸啦, 同埋火鍋食啦~ 淨係比我地火鍋用既脆魚片, 每一圍都有四碟咁多, 加埋其他餸, 多都根本就食唔晒D野.
個脆肉鯇真係好好食, 好爽口, 無骨, 喺香港完全食唔到, 連我呢D唔食魚既都覺得好好食; 而流沙包呢個鍾意食魚既人, 對呢個脆肉鯇更加係讚不絕口!!
餐廳出面有唔少攤檔.
好大條鯇魚耶~:
食完飯, 下一站我地去到台山黑沙灣睇沙雕.
點解入沙灘都要比入場費...?:
呢個係"台山第2屆沙雕旅遊文化節"喎... 但係我覺得完全無料到囉, 個場又細, D沙雕又唔靚, 簡直係嘥時間...
話咁快就睇完D沙雕, 但係距離集合時間仲有成粒鐘, 於是只可以喺沙灘影吓相, 呆企呆望呆等...
離開黑沙灣我地就去食晚飯, 今晚果餐叫做"番茄盞農家菜宴".
一枱12人食飯竟然有十幾樣餸, 真係好誇張. 同埋D餸其實都幾好食, 一定唔怕餓親.
右下角果碟就係番茄盞, 其實係番茄中間釀咗個鹹蛋黃再拎去炸完後沾上一D甜甜酸酸既醬, 勁怪...:
食完飯我地就返酒店, 今晚我地住喺台城市中心既高業大酒店主樓. (大酒店...?)
雖然呢間酒店只係四星, 但係間酒店其實好OK, 房間絕對有質素有驚喜, 去唔到五星相信係因為酒店無泳池.
喺酒店放低D野, 睇咗陣奧運, 我地就落咗酒店附近既華潤萬家同步行街行吓.
我地喺超市買咗呢D野, 有我去旅行必買既酸奶:
一打開盒雪糕, 吓? 就咁架咋? 無包裝袋既? 早知就唔買啦, 好似好唔衛生囉...:
